Bananet, perimet e gjelbërta, qitroja dhe qumështi janë disa prej ushqimeve më të shëndetshme të dietës sonë, përveç në rastet kur marrim ilaçe. Këshillat mjekësore më të përsëritura janë që ilaçet nuk duhen përzier me alkol ose kafe, por së fundmi këshillohet që njerëzit që pijnë ilaçe të mos konsumojnë edhe disa nga produktet e lartpërmendura. Këto ushqime ua vështirësojnë punën ilaçeve për të dhënë efektin e duhur, madje në raste jo të pakta shkaktojnë edhe efekte anësore të rrezikshme. Ato kanë përbërës që mund të ndikojnë për keq në proceset e metabolizmit të trupit. Gjeni më poshtë një listë të ushqimeve që duhen shmangur gjatë periudhës së marrjes së ilaçeve.

Bananet

Ky frut ka përmbajtje të lartë potasiumi dhe si rrjedhojë mund të ndërhyjë në efikasitetin e ilaçeve për tensionin e gjakut pasi kështu do të merrni sasi shumë të madhe potasium. Potasiumi gjendet tek portokallet dhe perimet e gjelbëra duke shkaktuar çrregullim në rrahjet e zemrës. Nëse do të rregullosh tensionin e gjakut dhe të ndihmosh zemrën, mos ha banana në të njëjtën periudhë që konsumon ilaçe.

Qitro
Mëngjesi është koha ideale për të pirë lëngun e qitros për ata që e duan të shtrydhur ose për të ngrënë frutin për ata që e duan të plotë. E megjjithatë, nëse je duke marrë ilaçe për uljen e kolesterolit, duhet të heqësh dorë nga qitroja sepse ky frut manipulon procesin e metabolizmit të ilaçit, që do të thotë pjesa më e madhe e dozës përfundon në qarkullimin e gjakut duke shkaktuar dhimbje të mëdha muskulare. Statinat që përdoren për uljen e nivelit të kolesterolit kanë një kundërveprim më të madh kur bien në kontakt me përbërësit e qipros. Fruti bllokon enzimat e nevojshme të mëlçisë dhe minimizon efektet e pritura të medikamentit. Qitroja duhet anashkaluar edhe kur njeriu merr antibiotikë, thonë mjekët.

Qumështi

Nëse je duke marrë antibiotikë ose medikamente të tjera për osteoporozën, nuk duhet t’i shoqërosh ato me qumësht. Kalciumi në të ndërhyn me ilaçet dhe i pengon ato të japin efektin e duhur. E njëjta këshillë vlen edhe për produkte të tjera si djathi dhe kosi që duhen shmangur nëse merr tetraciklinën, ciprofloaksinën dhe alendronatin. Qumështi, djathi dhe kosi e veshin stomakun me një shtresë kalciumi që pengon përthithjen e ilaçit nga trupi.

Jamballi i Zi (Likuiricia e Zezë)

Jamballi është një rrënjë që ka një efekt të mirë laksativ dhe fuqi ëmbëlsuese shumë herë më të fortë se sheqeri. Kjo rrënjë e ëmbël ul potasiumin në trup dhe mund të jetë e rrezikshme nëse konsumohet nga njerëzit që vuajnë nga sëmundjet e zemrës. Përzierja e ilaçeve për zemrën me rrënjët e ëmbla shkakton çrregullim të rrahjeve të zemrës, madje mund të shkaktojë atak në zemër. Jamballi është i mirë për ata që vuajnë nga ulçera në stomak, por duhet shmangur nëse je duke marrë ilaçe për zemrën, kontraceptivë oralë, hollues gjaku, insulinë, antidepresivë, etj.

Kale dhe jeshillëqet e tjera

Kale është cilësuar si një superushqim, por nëse merrni hollues gjaku apo ilaçe për çrregullimin e zemrës, atëherë kale dhe gjethet e tjera të gjelbëra duhen shmangur sepse ndikojnë negativisht. Ilaçi më popullor që parandalon trombozën në gjak është varfarina. Kale nga ana tjetër ka shumë vitamin K1, dhe varfarina bllokon Vitaminën K1 duke mos patur më pas asnjë efekt në hollimin e gjakut. Kjo gjë ndodh vetëm në rastin e këtij ilaçi ndërkohë që me aspirinën nuk janë shënuar raste të kundërvepritmit të perimeve të gjelbëra.

Kafeja
Nëse vuani nga astma, atëherë duhet të shmangni kafenë sepse efektet anësore të saj shkaktojnë nervozizëm, ankth, dridhje dhe çrregullim të rrahjeve të zemrës. Një studim i Ohio State University tregoi që kafeja rrit shanset për dështim të nënave shtatzëna në tetë javët e para të shtatzanisë. Studiuesit treguan që 28% e 172 grave shtatzëna që morën pjesë në studim dhe që pinin dy kafe në ditë humbën fëmijën e tyre. Sipas të njëjtit studim grave që kishin pirë shumë kafe ndërkohë që përpiqeshin të ngelnin shtatzënë ishin 75% më të rrezikuara për të patur një dështim.

Alkooli

Në pothuaj të gjitha përshkrimet e një ilaçi këshillohet shmangia plotësisht e alkolit. Ky i fundit shton presionin ndaj mëlçisë që është edhe përpunuesi më i madh në trup. Çfarëdo gjëje të fusësh në gojë, shkon përmes mëlçisë. Ndaj kombinimi i alkolit me ilaçet rrënon funksionet e trupit, çon një nivel më të lartë dhe më të rrezikshëm të medikamentit në gjak, e si rrjedhojë ilaçi shkakton më shumë dëme se sa të mira. /AgroWeb.org/