Reçel Me Boronica të Freskëta – Ëmbëlsi Delikate

Boronicat shqiptare janë plot lëng dhe shije. Ato që rriten në veri të vendit janë edhe më të famshmet, e që njihen edhe në tregjet e huaja.

Përveç shijes, boronicat kanë vlera të pafundme për shëndetin e organizmit.

Të pasura me antioksidantë dhe vitaminë C, boronicat njihen ndryshe si frti i rinisë së përhershme.

AgroWeb.org ju tregon mënyrën e thjeshtë të përgatitjes së reçelit me këtë frut perfekt, kështu mund t’i shijoni gjatë gjithë vitit.

Përbërësit

2kg boronica

1.2kg sheqer

Lëngu i 1 limoni

Përgatitja

 

Duke qenë se boronicat mbajnë shumë gjethe apo shkopinj të vegjël, duhen larë mirë para se t’i përdorni për recetat tuaja.

AgroWeb.org ju sugjeron që t’i vendosi në një tas apo enë të thellë dhe t’i mbushni me ujë.

Për të shtuar efektin e pastërtisë mund të hidhni pak uthull molle ose sodë buke.

Ndryshojeni ujin dhe më pas kullojini boronicat në një tenxhere.

AgroWeb.org ju këshillon që t’i mbuloni me sheqer dhe t’i përzieni duke treguar kujdes që të mos i çani.

Vendosni në zjarr të ngadaltë dhe lërini që të ziejnë ngadalë.

Pas gjysmë ore në sipërfaqen e tenxheres do të jetë formuar një shkumë e bardhë.

Me një lugë mund ta hiqni, pasi kjo shkumë formohet nga sheqeri dhe nëse e lini reçeli do të krijojë kokrriza të ngurta karameli.

Kur të shikoni që lëngu i reçelit të fillojë të mpikset, AgroWeb.org ju sugjeron që të shtoni lëngun e limonit.

Lëngu limonit është perfekt për të shmangur sheqerosjen e reçelit, pra krijimin e kokrrizave si karamel.

Gjithashtu ai i jep edhe një shije shumë të mirë reçelit të boronicës.

Pasi të keni shtuar limonin lëreni reçelin të ziejë edhe për 5-7 minuta të tjera dhe më pas hiqeni nga zjarri.

Kalojeni të ngrohtë në kavanoza dhe mbyllini me kapak. Për disa minuta lërini përmbys sa të largohet ajri ose mund t’i fusni po përmbys në një tenxhere me shumë pak ujë.

Kur të jetë ftohur reçeli vendoseni në frigorifer dhe mund ta ruani gjatë gjithë vitit./AgroWeb.org

Lëngu i Fikut – Një Mrekulli në Kupë

Mënyra më e mirë për të përfituar të gjithë mirësinë e fikut është të pish lëngun që është i pasur me ushqyes të jashtëzakonshëm, që ndikojnë pozitivisht, jo vetëm në aspektin ushqimor, por edhe në atë shëndetsor. Fiku duhet të jetë patjetër pjesë e ushqimeve ditore.

Lëngu i fikut mund të përgatitet në shtëpi, duke shtrydhur fiqtë e freskët pa lëkurë, ose duke zhytur fiqtë e thatë në ujë për 30 minuta dhe më pas duke i përzier në mikser me ujë të mjaftueshëm. Zakonisht fiqtë janë të ëmbël dhe lëngu nuk ka nevojë për ëmbëlsi shtesë.

AgroWeb.org do t’ju mësojë se si të përftoni vlerat e mrekullueshme të fiqve.

Vlerat shëndetsore të lëngut të fikut

Hekuri. Njerëzit që përballen me nivele të ulëta të hekurit në gjak, femrat shtatzënë dhe ato që ushqejnë me gji duhet të pinë lëngun e fikut dhe të përfitojnë sasitë e duhura të hekurit.

Shëndeti i zorrëve. Lëngu i fikut është i pasur me fibër dhe stimulon lëvizjen e zorrëve dhe pastrimin e tyre.

Shëndeti i mushkërive. Lëngu i fikut përdoret për shërimin e njerëzve që vuajnë nga bronshiti. Ai është veçanërisht i mirë për shëndetin e përgjithshëm të mushkërive.

Forcë dhe energji të qëndrueshme. Ata që ndihen të lodhur, të plogësht, të dobët mund të pijnë lëng fiku herët në mëngjes për t’i dhënë vetes forcë dhe energji.

Tensioni i gjakut. Fiqtë dhe lëngu i tyre përmbajnë shumë kalium, që rregullon tensionin e gjakut dhe ul nivelet e larta të tij.

Ushqyerja me gji. Lëngu i fikut sugjerohet për stimulimin e prodhimit të qumështit të gjirit. Nënat kanë nevojë për ushqime të pasura me kalium. Konsumi ditor i fiqve ushqen nënën por edhe fëmijën.

Kundër plakjes. Lëngu i freskët i fikut është i pasur me antioksidantë si karoteni, luteina dhe acidi klorogjenik që kundërveprojnë me radikalet e lira që dëmtojnë trupin dhe përmirësojnë paraqitjen e lëkurës, flokëve dhe thonjve.

Për lëkurën. Lyejeni lëkurën me lëng fiku dhe shënjestroni aknet, njollat dhe lëndimet e lëkurës. Këtë duhet ta bëni çdo dy ditë për 15 minuta.

Për flokët. Fiqtë janë të pasur me shumë vitamina, minerale, antioksidantë dhe ushqyes. Ato përmbajnë gjithashtu shumë ujë dhe i bëjnë flokët të shëndetshëm e të bukur. Fiqtë e hidratojnë flokun dhe i japin atij shkëlqim dhe shëndet.

Përgatisni lëngun e fikut në shtëpi:

Përbërësit:

• 4-5 fiq të freskët
• Lëngu i një limoni
• Sheqer – sipas dëshirës
• pak ujë

Udhëzimet:

– Hiqni lëkurën e fiqve dhe ndajini në gjysmë.

– Hidhni ujë në mikser dhe shtoni fiqtë.

– Pas përzierjes me ujin, kullojeni lëngun e formuar dhe shtoni lëng limoni.

– Shtoni 4-5 lugë sheqer ose pak mjaltë.

– Lëngun mbajeni në frigorifer dhe shërbejeni të ftohtë./AgroWeb.org

A Rigjenerohen Qelizat e Organizmit Çdo Shtatë Vjet?

Rigjenerimi  i qelizave është një proces delikat dhe i heshur që kryhet në organizëm.

Gjendja e qelizave dhe ritmi rigjenerues i tyre është treguesi i moshës së vërtetë të trupit.

Shumë të dhëna që qarkullojnë nxjerrin në pah idenë se rigjenerimi i qelizave ndodh një herë në shtatë vjet.

Ideja se qelizat rigjenerohen tingëllon shumë premtuese, por a është e vërtetë?

Por sipas të dhënave të AgroWeb.org, rigjenerimi i plotë i qelizave njëherë në shtatë vjet është një legjendë urbane.

Çfarë Ndodh Me Qelizat Gjatë Jetës?

Qelizat ndahen, rigjenerohen dhe shuhen vazhdimisht. Çdo qelizë ka një cikël jete të ndryshëm.

Qelizat në shtresën e brendshme të stomakut zëvendësohen çdo pesë ditë, sepse janë të ekspozuara ndaj aciditetit.

Rruazat e kuqe jetojnë për të paktën katër muaj në organizëm dhe ripërtërihen, ndërsa qelizat e mushkërisë ripërtërihen pas pesë muajsh.

Sipas të dhënave të hulumtuara nga AgroWeb.org, asnjë qelizë nuk është e pazëvendësueshme.

Megjithatë, disa qeliza kanë nevojë për të paktën shtatë vjet që të rigjenerohen.

Qelizat e kockave zëvëndësohen çdo 10 vjet. Qelizat në traktin tretës zgjasin plot 15 vjet.

Nga ana tjetër ka qeliza që nuk shkatërrohen kurrë, siç janë ato të dhëmbëve.

Mosha e Saktë e Qelizave 

Studimet konfirmojnë se një person që jeton 75 vjet, nuk arrin dot të zëvendësojë as gjysmën e qelizave të zemrës të cilat kanë qenë të pranishme në lindje.

Shkencëtarët kanë konfirmuar se disa zona të trurit mund të zëvëndësohen, ndërsa neurone të tjera mbeten të njëjtat që nga lindja.

Organizmi i njeriut përmban rreth 10 trilion qeliza individuale.

Duke marrë në konsideratë që shumë prej tyre rigjenerohen dhe disa jo, qelizat trupore të një të rrituri janë mesatarisht rreth 11-15 vjeç.

Një prej faktorëve vendimtarë në rigjenerimin e qelizave është padyshim mosha.

Tek të moshuarit, rigjenerimi ndodh më ngadalë se tek të rriturit.

Duke qenë se shumë prej qelizave të rëndësishme siç janë ato të kockave, zemrës dhe trurit nuk rigjenerohen, AgroWeb.org ju rekomandon t’i trajtoni me kujdes./AgroWeb.org

* Ky informacion ka për qëllim të plotësojë, të mos zëvendësojë këshilla nga mjeku juaj ose ofruesi i kujdesit shëndetësor dhe nuk ka për qëllim të mbulojë të gjitha përdorimet e mundshme, masat paraprake, ndërveprimet ose efektet negative. Ky informacion mund të mos i përshtatet rrethanave tuaja specifike shëndetësore.

Burimi: U.S. National Library of Medicine

Gliko me Fiq të Egër – Receta e Ëmbël me Shije Mahnitëse

Ka shumë receta në përgatitjen e Glikove, mbretëreshës së gostisë në shtëpitë e shqiptarëve por glikoja e fikut të egër është ndër më të veçantat për nga shija unike e marramendëse që ajo ka.

AgroWeb.org sjell sot recetën autentike të kësaj glikoje, e cila përgatitet krejt lehtë në shtëpi. Për përgatitjen e kësaj glikoje do duhet të zgjedhin kokrra të plota e të mira fiqsh.

Përgatitja

Ata i pastrojmë me ujë të rrjedhshëm, e më pas u presim bishtat me majën e thikës duke hapur një gropëz të vogël. Në këtë mënyrë, fruti i fikut do të përthithë sherbetin dhe në fund të procesit do të vendosim nga nje bajame të bardhë aty.

Fiqtë e pastruar, i hedhim në një tenxhere me ujë të bollshëm dhe i zjejmë për 15 minuta. Më pas i kullojmë nga uji dhe i vendosim në një enë me ujë të ftohtë.

I lëmë në tenxhere për 24 orë duke u ndërruar ujin për rreth tre herë me qëllim largimin e hidhërimit.

Pas këtij procesi, tenxheren me fiqtë e vendosim sërish në zjarr. I lëmë të zjejnë derisa të marrin ngjyrën e tyre të errët nëse do të përdorim fiq të zinj, apo të gjelbër në rast se do përdorim fiq të gjelbër. Sapo të marrin ngjyrë, i heqim nga zjarri.

Më pas, me kujdes nxjerrim fiqtë dhe i shtrydhim ngadalë. Kështu u nxjerim ujin e tepërt e më pas u vendosim në brendësi nga një bajame të vogël. Në mënyrë që të kullojnë gjithë ujin, i vendosim në një letër kuzhine thithëse.

Në vjim, përgatisim shërbetin duke vendosur në zjarr tenxheren me ujin dhe sheqerin, i trazojmë derisa të shkrijë sheqeri.

E lëmë sherbetin të zjejë për 10 minuta. Shtojmë barbarozën, vaniljen dhe fiqtë. I lëmë të gjitha bashkë të zjejnë për 15 minuta.

Heqim tenxheren nga zjarri dhe vendosim një pecetë të apstër sipër saj duke e lënë ashtu për 24 orë, derisa fiqtë të thithin lëngun e sherbetit.

Më pas, e vendosim sërish tenxheren në zjarr në mënyrë që shërbeti të trashet. Hedhim lëngun e limonit dhe kontrollojmë fiqtë. Në rast se kanë zjerë shumë, i nxjerrim me lugë dhe lëmë të zjejë sherbeti derisa të lidhet.

Pasi trashet sherbeti glikoja është gati. Në rast se fiqtë i kemi nxjerrë më parë i bashkojmë me sherbetin e lidhur.

E vendosim masën e ngrohtë në vazot e sterilizuara. I mbyllim me kapak dhe i kthejmë përmbys duke i lënë kështu për 24 orë. Pas kësaj vazot me glikonë i vendosim në frigorifer.

Përbërësit

1 kg fiq të vegjël / 1.200 gr sheqer / 4 filxhan çaji me ujë /1 degë barbarozë për aromë ose 2 vanilje / Bajame të zbardhura aq sa kokrra fiku kemi /Lëngu i një gjysmë limoni./AgroWeb.org

Shije nga Amvisat Shkodrane – Byrek i Zbuluar me Kunguj të Njomë

Byreku i zbuluar sipas traditës shkodrane, i njohur në disa zona edhe me emrin Lakuriq është një ndër shijet më të veçanta të kuzhinës tradicionale shqiptare tipike e zonave veriore, e konkretisht Shkodrës.

Amvisat shkodrane e gatuajnë në disa mënyra këtë recetë fantastike duke përdorur mbushje e shije të ndryshme, të ëmbla apo të kripura.

AgroWeb.org ju sugjeron më poshtë dy receta fantastike të përgatitjes së byrekut të zbuluar me kunguj të njomë, një të ëmbël dhe një të kripur, që të dyja të shijshme në mënyra të ndryshme por që do t’ju tërheqin patjetër me shijen e tyre të veçantë.

Dy Receta – Një e Kripur, Një e Ëmbël  

Receta e Kripur

Përbërësit

3-4 petë byreku të hapura vet ose të gatshme

3-4 kunguj të njomë

100 gr djathë të bardhë ose kaçkavall

2-3 lugë miell gruri

5-6 lugë qumësht

Vaj ulliri

3-4 kokrra vezë

Kripë

Piper

1-2 qepë të njoma

Përgatitja

Si fillim pastroni kungujt e njomë, dhe pritini në kubikë të vegjël ose feta shumë të holla. Grijini qepët shumë hollë.

Në vijim, AgroWeb.org ju këshillon të përgatisni mbushjen me kunguj të njomë.

Vendosini kungujt e njomë në një tenxhere në zjarr, kaurdisini për pak me vaj ulliri e më pas shtoni qepët e njoma. Kaurdisini së bashku dhe hidhuni një filxhan kafeje me ujë dhe lëreni derisa uji të avullojë.

Më pas, rrihni vezët në një tas, shtoni qumështin dhe miellin dhe përziejini të gjitha bashkë derisa masa të bëhet e njëtrajtshme. Shtoni kripën dhe piperin gjithashtu.

Masën e vezëve me qumësht shtojeni tek tenxherja me kungujt e njomë dhe lëreni për 1 minutë në zjarr derisa masa të mpikset dhe në këtë mënyrë mbushja është gati.

Ndërkohë përgatisni petët e byrekut ose mund të përdorni edhe petë të gatshme.

Shtrojini në një tepsi të spërkatur me pak vaj dhe vendosini një mbi një duke u kujdesur që një pjesë të të tyre ta lini anash tepsisë për ta palosur në fund të mbushjes.

Secilën prej petave spërkateni me disa pika vaj ulliri kur ta shtroni.

Pasi keni shtruar petat, hidhni mbushjen dhe shtrojeni në të gjithë sipërfaqen e tepsisë, më pas palosni petët e mbetura anash tepsisë mbi mbushjen duke u kujdesur që në mes byreku të mbetet i zbuluar.

Futeni të piqet në furrën e parangrohur në 180 gradë derisa sipërfaqja e byrekut të marrë ngjyrën e kuqërremtë.

Receta e Ëmbël

Përbërësit

3-4 petë byreku të hapura vet ose të gatshme

3-4 kunguj të njomë

2-3 lugë miell gruri

5-6 lugë qumësht

Vaj ulliri

Gjalpë i freskët

3-4 kokrra vezë

1-2 lugë gjelle sheqer (sasia sipas preferencës)

Përgatitja

Procesi i përgatitjes së byrekut me kunguj të njomë në versionin e ëmbël është si më sipër vetëm ndryshon mënyra e përgatitjes së mbushjes.

Në këtë rast, kungujt e njomë pasi i keni prerë në kubikë apo feta vendosini të ziejnë për pak minuta në një tenxhere me ujë të valuar derisa të zbuten.

Më pas në tas rrihni vezët, shtoni shtoni sheqerin, pak gjalpë të freskët të shkrirë, qumështin dhe miellin dhe përziejini të gjitha bashkë.

Kungujt e zbutur kullojini nga uji, dhe shtojini tek masa e vezëve me qumësht dhe më pas vijoni përgatitjen e byrekut si në rastin e byrekut të kripur. Në fund spërkateni me pak gjalpë të freskët dhe futnei të piqet./AgroWeb.org 

Ushqim Përpara Televizorit – Zakoni Që Të Çon Drejt Mbipeshës

Shmangia e televizorit dhe pajisjeve të tjera elektronike gjatë gatimit apo ngrënies, ul gjasat e akumulimit të rrezikshëm të peshës.

Këtë e thotë një studim i fundit shkencor sipas të cilit, ushqimi nuk duhet ngrënë kurrsesi përpara televizorit.

Mbipesha është një problem madhor dhe faktor rreziku për shumë sëmundje si: diabeti, sëmundjet kardiovaskulare.

Studimet të cilave u referohet AgroWeb.org, zbuluan se njerëzit që ushqehen duke injoruar televizorin kanë më pak gjasa që të bëhen obezë.

Cilësia E Ushqyerjes Në Familje Bën Diferencën

Sipas ekspertëve, njerëzit që konsumojnë ushqime të gatuara në familje dhe që nuk shohin televizor gjatë vakteve, janë më pak të rrezikuar nga mbipesha.

Të dhënat e AgroWeb.org, tregojnë se mbipesha është më e pranishme mes të rriturve që nuk hanë ushqime të gatuara në shtëpi.

Sidoqoftë, ajo që për studiuesit ka më shumë rëndësi, është aktivitetet shtesë që njeriu bën gjatë kohës që është duke ngrënë.

Aktiviteti më i dëmshëm është mungesa e vëmendjes ndaj ushqimit dhe përqendrimi në televizor.

Ekspertët paralajmërojnë se nëse njeriu është i përqendruar tek televizori, nuk e ka mëndjen tek racionet dhe ushqimet që konsumon.

Duke mos pasur vëmendjen e duhur tek pjata, njerëzit e kanë më të lehtë ta teprojnë gjatë vakteve.

Fëmijët – Më Të Rrezikuar Nga Ushqyerja Përpara Televizorit

Fëmijët janë më të rrezikuar nga ky zakon i dëmshëm.

Nga hutimi që përcjellin pamjet në televizor, fëmijët nuk janë në gjendje të kuptojnë nëse janë ngopur me të vërtetë.

Kësisoj, ato përballen me luhatje të peshës dhe ndryshime të thella në sjelljen e tyre.

Një fëmijë kalon mesatarisht dy orë në ditë përpara televizorit.

Gjatë kësaj kohe, ata kërkojnë më shumë patatina, ëmbëlsira, pije të ndryshme dhe ushqime të dëmshme.

Ekspertët thonë se fëmijët nuk kanë vëmendje ndaj sasisë së ushqimit apo shijes së tij dhe ushqehen si të ishin robotë./AgroWeb.org

Qyteti me Zemrën më të Dobët – INSTAT Publikon Faktorët Ndikues

Jeta sedentare, dieta e pakontrolluar dhe ekspozimi i lartë ndaj alkoolit dhe ndaj duhanit po i vret shqiptarët. 

Më së shumti duket sikur po prek meshkujt, që çdo vit e më shumë po humbasin jetën nga infarktet dhe goditjet në tru.

Alarmante është ulja e moshës së vdekshmërisë nga kjo sëmundje për meshkujt nën moshën 50 vjeç.

Sipas INSTAT, janë rritur me 0.9% vdekjet nga sëmundje të aparatit të qarkullimit të gjakut në 2019-n, në raport me një vit më parë.

Rritja ka ardhur tërësisht nga meshkujt, humbjet e jetëve të së cilëve janë rritur me 3.2%.

Të dhënat më të fundit zyrtare nga Ministria e Shëndetësisë identifikojnë tre faktorë të rrezikut përgjegjës për sëmundshmërinë, rreziqet e lidhura me dietën ushqimore, hipertensioni arterial, duhanpirja.

 

Aktualisht, faktorët e stilit të jetesës përbëjnë mbi 70% të barrës totale të sëmundshmërisë.

Në dy dekadat e fundit në Shqipëri, niveli total i vdekshmërisë për shkak të mbipeshës dhe obezitetit është rritur më shumë se dy herë.

Në veçanti, niveli i vdekjeve nga sëmundja ishemike e zemrës është rritur 2.5 herë, ndërsa niveli i vdekjeve nga diabeti është trefishuar.

Në vitin 2010, duhanpirja ishte shkaktare e 22% të të gjitha vdekjeve në Shqipëri.

Barra totale e sëmundjes për meshkujt dhe femrat shqiptare është më e larta në rajonin e Europës Juglindore, raporton Ministria e Shëndetësisë në strategjinë kombëtare të shëndetit 2016-2020, ndërkohë që sëmundjet infektive në Shqipëri kapin një përqindje të lartë të barrës së përgjithshme të sëmundjeve, barra e sëmundjeve të patransmetueshme (NCDs) në Shqipëri është rritur me 34% nga viti 1990 deri në vitin 2010.

Ritmi i rritjes ka qenë i ngjashëm si për burrat dhe për gratë. Sëmundjet kardiovaskulare përbënin rreth 55% të të gjitha vdekjeve (51% te meshkujt dhe 61% te femrat) analizoi Ministria e Shëndetësisë.

Berati me zemrën më të dobët, rritet Shkodra

Në të gjithë vendin, në 2019-n kishte 4.1 vdekje për 1000 banorë, për sëmundjen e  aparatit të qarkullimit të gjakut, me një rritje të lehtë në raport me 4, që ishte ky tregues një vit më parë.

Sipas qarqeve, qyteti me vdekjet më të larta nga zemra dhe tensioni, në raport me popullsinë është Berati, me 5.3 vdekje për 1000 banorë, me rritje në raport me vitin e mëparshëm (shih grafikun).

Në vend të dytë ka kaluar Shkodra, e cila ka shënuar një rritje të lartë të humbjeve të jetës nga zemra dhe tensioni në 2019-n (+8%), me 77 jetë të humbura më shumë, duke u ngjitur në 5.3 vdekje për 1000 banorë, nga 4.8% që ishte ky tregues vitin e mëparshëm.

Më pas renditen Korça e Gjirokastra (5.1 secili) , Vlora (4.9), Dibra (4.4).

Zemrën më të fortë e kanë tiranasit (3.5 vdekje për 1000 banorë), durrsakët (po 3.5) dhe elbasanllinjtë (3.4)./Burimi:Monitor

Margarinë Apo Gjalpë – Të Vërtetat Që Vlejnë Për Mbrojtjen e Shëndetit

Të ushqehesh me yndyrë të shëndetshme është një sfidë më vete të cilën jo të gjithë e kalojnë me sukses.

Shumica prej nesh mjaftohen të zgjedhin yndyrën që të bën më pak keq se të tjerat.

Kur vjen puna te vaji, pranohet gjërësisht që vaji i ullirit është më i shëndetshmi, por tek yndyrnat e tjera, debatet vazhdojnë.

Shumë studime të konsultuara nga AgroWeb.org faktojnë se për shkak të sasisë së yndyrnave të ngopura që përmban margarina, mjafton një molekulë e vetme që ajo të konsiderohet si një material plastik.

Përmbajtja e këtyre yndyrnave e bën margarinën të zonjën të bllokojë shumë shpejt arteriet dhe të shkaktojë atak në zemër e shumë simptoma të tjera të rrezikshme.

Tani industria e margarinës ka shpikur formula të reja, duke ulur nivelin e yndyrnave të pangopura dhe duke shtuar përbërës më pak të dëmshëm.

1. Kostot

Kostot ishin një faktor kryesor i shpikjes së margarinës. Rrjedhimisht konsumatorët e blejnë atë pasi kushton më lirë.

Në Shqipëri, 100 gramë margarinë kushton 40 Lek, ndërsa 100 gram gjalpë ka një çmim fillestar prej 100 lekësh. Në Kanada, margarina u ndalua me ligj për 62 vite.

Në aspekt kostosh, margarina fiton.

2. Shija

Kur vjen puna tek shija, fituesi është i qartë. Vite më parë, atëherë kur margarina pati shkëlqimin e saj, njerëzit ishin të dyzuar, megjithatë kishte disa prej tyre të cilët i qëndruan besnikë gjalpit.

Shija e tij është unike, pavarësisht hyrjeve të reja në treg. Produkte artificiale mundohen ta kopjojnë shijen e gjalpit, por nuk arrijnë të jenë të suksesshëm.

Mjafton të kujtojmë shprehjen popullore “të shkrin në gojë si gjalpi” dhe të kuptojmë sa të apasionuar jemi pas tij.

3. Nivelet e yndyrnave të shëndetshme të ngopura

Kjo është pika më e fortë e përpjekjeve të margarinës për t’u dukur si e shëndetshme. Gjalpi ka më shumë yndyrna të mira të ngopura.

Më saktë, 100 gramë gjalpë përmbajnë 50 gramë yndyrna të ngopura, ndërkohë që margarina më e mirë përmban 10-35 gram në varësi të cilësisë. AgroWeb.org ju tregon se edhe në këtë pikë gjalpi fiton.

4. Vitaminat dhe mineralet

E dimë se gjalpi është nënprodukt i qumështit. Gjalpi përmban vitamina A, E, K dhe D. Gjithashtu përmban sasi të larta të seleniumit, një mineral i rëndësishëm dhe antioksidant më i fuqishëm se hudhra.

Gjalpi ofron iodinë, e cila është nevojshme nga gjëndrat tiroide. Nëse gjalpi ushqyesit i ka natyralë, tek margarina këta elementë janë artificialisht të shtuar.

5. Përmbajtja e kolesterolit

Margarina nuk përmban kolesterol, ndërkohë që të gjithë produktet shtazore siç është gjalpi përmbajnë kolesterol. Nga ana tjetër, vetë trupi prodhon kolesterol për funksionet themelore të tij.

6. Acidet yndyrore

Gjalpi përmban sasi të acideve yndyrore omega 3 dhe omega 6. Kjo sasi për shumë njerëz është tejet e shëndetshme në krahasim me ushqimet e tjera që konsumojmë.

Fituesi i qartë mes të dyve është padyshim gjalpi, sepse mbi të gjitha dhe pavarësisht të gjithave është një produkt natyral.

Çështja më e rëndësishme është mbajtja në nivele minimale të konsumit të gjalpit dhe rritjes së përdorimit të vajit cilësor të ullirit. Po ju si mendoni?/AgroWeb.org

Arra, Lajthi, Bajame – Çfarë Duhet Bërë Për Vlera të Plota

Farat dhe arrorët janë ushqime të shpejta, të thjeshta por shumë të shëndetshme, për shkak të larmisë së ushqyesve, fibrës dhe yndyrnave.

Megjithatë, nëse jeni një dashamirës i të pjekurave, AgroWeb.org ju sugjeron t’i zëvëndësoni me arrorët e papërpunuar, sepse pjekja industriale mund të shkaktojë disa efekte anësore dhe i prish ato.

Në shumë raste, kompanitë e përpunimit përdorin vajra jo cilësorë që janë të dëmshëm për shëndetin.

Ndaj blini më mirë arra të plota dhe piqini vetë në shtëpi.

Aktivizimi i vlerave të arrorëve

Të paktë janë ata që mund të kenë dëgjuar për “aktivizimin” e farave dhe arrorëve ku përfshihen arrat, bajamet, lajthitë, shqemet, fistikët e të tjerë, për të përfituar më shumë prej tyre.

Procesi i aktivizimit nënkupton mbajtjen në ujë për disa orë.

Të dhënat e AgroWeb.org thonë se arrorët janë të pasura me acid fitik. Kur ky mineral ndërlidhet me minerale si kalciumi, hekuri, zinku, magnezi dhe mangani në sistemin tretës, ul përthithjen e mineraleve.

Konsumi i rregullt i ushqimeve të pasura me këtë acid rrit rrezikun e osteoporozës.

Nëse shpesh e gjen veten duke ngrënë një grusht me bajame, lajthi apo arra, atëherë duhet të mësosh si t’i aktivizosh ato.

Në natyrë, farat dhe arrorët presin lagështinë e nevojshme dhe ngrohtësinë që kërkojnë, përpara se të lëshojnë rrënjë dhe të çelin filiza.

Arrorët dhe farat përmbajnë disa frenues enzimash që parandalojnë lulëzimin e tyre. Këto substanca frenuese çaktivizojnë enzimën dhe i bëjnë arrorët, të vështirë për t’u tretur.

Procesi i aktivizimit të arrorëve ul nivelin e acidit fitik dhe i bën enzimat të gatshme për tretje.

Duke i futur në ujë, ne ‘u themi’ arrave të thata që ka ardhur koha për të mbirë dhe për të çelur filiza, pasi uji aktivizon enzimat e duhura.

Lexoni më poshtë sugjerimet e AgroWeb.org mbi aktivizimin e arrorëve


Merrni një enë të madhe, shtoni dy gota me arrorët që dëshironi duke i mbuluar plotësisht me ujë të pastër. Shtoni dy lugë çaji me kripë deti dhe lërini ashtu për 7 deri në 12 orë.

Arrorët si bajamet kanë nevojë të qëndrojnë në ujë për 12 deri në 14 orë ndërsa ato më të butë, si shqemet nga 3 në 5 orë.

Kullojini dhe lajini. Hidhni mbi letrat e pjekjes dhe futini në furrë duke i pjekur ngadalë me 60-70 gradë celcius.

Farat dhe arrorët duhet të jenë tërësisht të thata përndryshe do të prishen shpejt.

Kur të thahen plotësisht futini në një enë të mbyllur mirë dhe ruajini në frigorifer. Në këtë mënyrë do të përfitoni gjatë vlerat e tyre maksimale./AgroWeb.org

Pulë e Pjekur me Lakër Arme – Tradita Fantastike në Tryezë

Kulinaria shqiptare spikat në shijen e saj në çdo gatim.

Receta të kripura e të ëmbla tradicionale mahnisin me shijet dhe aromat e tyre duke tërhequr këdo drejt tryezës.

AgroWeb.org sjell më poshtë një recetë fantastike të përgatitjes së pulës me lakër arme, një traditë fantastike e nënave dhe gjysheve shqiptare, e cila të përfshin tërësisht me shijen e saj.

Receta e saj është shumë e thjeshtë në përgatitje si dhe është ideale për një drekë të plotë dhe të shijshme.

Përgatitja e Pulës së Pjekur me Lakër Arme

Përbërësit

(Përbërësit më poshtë janë për 4-5 persona)

1 pulë 1 kg

1 kokërr qepë mesatare

2-3 lugë gjelle me vaj ulliri

1 lugë gjelle me salcë domate

1-2 gjethe dafine

Një tas i madh me lakër arme

Kripë

Piper

Spec djegës (sipas dëshirës)

Përgatitja

Pula e prerë në thela ose nëse preferoni mund ta lini edhe të paprerë, vendoset në një tenxhere në zjarr dhe kaurdiset me vaj ulliri dhe me pak gjalpë.

Në vijim shtohet qepa e grirë hollë, salca e domates, kripa, piperi dhe dafina.

Për më shumë shije nëse preferoni mund të shtoni edhe pak spec djegës.

Në vijim, AgroWeb.org ju udhëzon që t’i kaurdisni të gjitha bashkë dhe më pas t’i hidhni ujë derisa thelat e mishit të mbulohen.

Lihet të ziejë derisa mishi i pulës të zbutet dhe të mbetet me pak lëng.

Më pas, thelat e mishit të pulës me lëngun e mbetur kalojini në një tavë ose tepsi.

Ndërkohë, AgroWeb.org ju këshillon që të prisni lakrën arme të rripa apo copa të vogla dhe ta shtoni në tavën me mishin e pulës.

Futeni tavën në furrën e parangrohur dhe lëreni të piqet derisa lakra arme të zbutet dhe të mbetet me shumë pak lëng.

Ky gatim special shoqërohet në mënyrë fantastike me sallata të freskëta të stinës, me sallata jeshile, rukola apo edhe bukë të thekur, salcë kosi, djathë si dhe perime të ndryshme të marinuara me limon e vaj ulliri./AgroWeb.org

E Keqja Vjen e Ëmbël! – Cilat Janë Ndryshimet mes Sheqernave që Përdorni Çdo Ditë

Ata që tregohen të vëmendshëm kur lexojnë etiketat e ushqimeve, me siguri janë njohur me terma si “ pa sheqer”, “ pa sheqer të shtuar” apo “pa ëmbëlsues shtesë.”

Për hir të së vërtetës këto terma të bëjnë konfuzë.

Në lidhje me rolin e sheqerit në shëndetin tonë, duhet të pranojmë se sheqeri nuk është i keq, për sa kohë vjen nga burime si fruta e perime.

Sheqeri shtesë në pije dhe ushqime të përpunuara, është i dëmshëm dhe duhet të konsumohet në sasi të kufizuara.

Shkencëtarët thonë se njeriu nuk duhet të konsumojë më shume se 10 përqind të sheqernave të shtuar në ditë.

Nëse shkelet ky rregull, njeriu përballet me sëmundjet e zemrës dhe diabetin e tipit 2.

Por le të kthehemi tek ndryshimi mes termave “ pa sheqer”, “ pa sheqer të shtuar” apo “pa ëmbëlsues shtesë.”

Sheqeri natyral

Këto sheqerna gjenden tek frutat (fruktoza) dhe tek produktet e bylmetit (laktoza.)

Për fat të mirë, është e pamundur për njeriun që ta teprojë me sheqerna të tilla sepse ato konsumohen me fibra, proteina, vitamina dhe minerale.

Ushqime të pasura me këto sheqerna si ananasi, bananja apo patatja e ëmbël janë pjesë e çdo regjimi të shëndetshëm ushqimor.

Sheqernat e shtuara

Ushqimet e përpunuara, ëmbëlsira dhe pijet e gazuara përmbajnë sheqerna shtesë të nevojshëm për të përmirësuar shijen apo strukturën.

Sheqernat shtesë i gjejmë në produkte që gjejmë në supermarket siç janë mjalti i përpunuara, sheqeri kaf, shurupi i panjës, shurupi i misrit e të tjerë.

Ëmbëlsuesit artificialë

Ushqimet që zakonisht ‘shiten’ si ‘pa sheqer’ siç mund të jenë pijet pa kalori apo ëmbëlsuesit e tjerë siç është sukraloza, aspartame dhe zakarina.

Produktet pa sheqer

Sipas shkencëtarëve, një ushqim konsiderohet si ‘pa sheqer’ për sa kohë përmban 0.5 gramë sheqer/racion.

Është shumë e rëndësishme të tregohet kujdes me numrin e racioneve të një ushqimi sepse pavarësisht se përshkruhet si ‘pa sheqer’ ai sërish mund të përmbajë sasi të vogla sheqeri.

Ndonëse një produkt mund të përmbajë etiketën ‘pa sheqer’ kjo nuk do të thotë se ai nuk përmban sheqerna shtesë apo ëmbëlsues artificialë.

Për shembull mund të vëreni  produkte si çamçakizi, shurupet, kompostot, reçeli i frutave dhe ëmbëlsirave të ndryshme.

Produktet pa sheqer të shtuar

Ky term nuk do të thotë se një ushqimi të caktuar nuk i është shtuar sheqer.

Është e gjitha një lojë fjalësh sepse ai mund të përmbajë sheqerna natyralë, sheqerna artificialë dhe ëmbëlsues të tjerë.

Këtë term mund ta gjeni në produkte si gjalpi i kikirikut, lëngu i frutave, prevedetë, konservat e të tjerë.

Produkte jo të ëmbëlsuara

Nëse e shikoni këtë term në etiketën e një ushqimi të caktuar, duhet të dini se ky term shpjegon që ushqimi nuk përmban sheqerna të shtuar apo ëmbëlsues artificialë.

Por kjo nuk do të thotë që ky ushqim nuk përmban sheqer.

Shembuj të produkteve të tilla mund të gjeni tek qumështi i bajames, qumështi i arrës së koksit, salca e mollës, çaji i ftohtë e të tjerë.

Cila prej këtyre alternativave mendoni që është zgjedhja më e mirë për shëndetin?

Sipas AgroWeb.org asnjëra prej tyre nuk është e vlelfshme.

Produktet pa sheqer, të paëmbëlsuar apo pa sheqerna shtesë nuk mund të përzgjidhen vetëm në bazë të sheqeri.

Ato duhet të përzgjidhen edhe në bazë të të gjithë profilit ushqimor që duhet të përfshijë fibër, proteina, minerale dhe vitamina.

Ndonëse ushqimet e paëmbëlsuar tingëllojnë si më të mirë, AgroWeb.org ju rekomandon të zgjidhni burime natyrale të sheqerit siç janë frutat dhe perimet./AgroWeb.org

Hudhrat e Njoma si Mrekulli e Natyrës – Vlerat për Shëndetin

Hudhrat e njoma janë fantastike në vlera dhe shije.

E ndërsa shumë prej nesh stepen për konsumin, duke menduar aromën jo fort të këndshme, studiuesit i rekomandojnë për shkak të vetive që hudhrat kanë për organizmin tonë.

Nuk është e thënë të konsumohen vetëm të gjalla dhe të freskëta, përdorini në gatime, për të marrë të gjitha përfitimet që ato ofrojnë.

Hudhrat e njoma shqiptare kanë një veçori shumë të rëndësishme.

Ato vijojnë të jenë e njëjta farë tradicionale si ajo e kohëve të shkuara dhe ruajnë të njëjtën shije dhe vlera.

Mbi të gjitha janë produkte të tokës dhe zhvillimi i tyre nuk është i ndikuar nga asnjë stimulant apo substancë tjetër duke i bërë hudhrat e njoma shqiptare një nga perimet më të pastra dhe të sigurta.

Çfarë përmban hudhra e njomë?

Hudhra e njomë, ashtu si hudhra e thatë përdoret për të kuruar gripin e thjeshtë e deri për parandalimin e sëmundjeve të rënda.

Përdoret për të kuruar probleme që lidhen me sistemin e gjakut dhe zemrën, përfshirë kolesterolin e lartë, parandalimin e atakut të zemrës dhe sëmundjeve koronare.

Shumë e përdorin për të parandaluar problemet me zhvillimin e qelizave të dëmshme të mushkërive, të prostatës, të gjirit e të stomakut.

Një lëndë përbërëse e hudhrës shërben si lëndë kuruese për sëmundjet e zemrës dhe e mbron atë.


Hudhra ndikon edhe në përmirësimin e parametrave lipidë të gjakut, forcon potencialet antioksidante dhe shkakton ulje të tensionit. Në fjalë të tjera hudhra ndikon në uljen e kolesterolit dhe kurimin e tensionit të lartë.

Një studim lidh hudhrën me uljen e rrezikut të lindjes së parakohshme, si pasojë e lëndëve antimikrobiale dhe prebiotike që ajo përmban.

Studime të tjera tregojnë se hudhra përmban një lëndë që mbron mëlçinë nga dëmtimet që shkaktohen nga përdorimi i alkoolit.

Si ta zgjedhim hudhrën e njomë?

Hudhra e njomë duhet të ketë kërcell të fortë, pa pjesë të zbutura dhe gjethet e saj duhet të kenë ngjyrë jeshile të fortë.

Në rast se rreth pjesës së kërcellit është formuar një shtresë e butë, ajo duhet të hiqet gjithmonë.

Si të ruajmë hudhrën e njomë?

Mbështilleni mirë me letër dhe futeni në frigorifer. Kini kujdes gjatë mbështjelljes pasi aroma e saj e fortë do të përhapet kudo./AgroWeb.org

Uthulla e Hudhrës Kundër Peshës së Tepërt – Si Ta Përgatisni

Pesha e tepërt krijon një vatër problemesh shëndetësore duke nisur nga ato sipërfaqësore siç është pamja e deri tek mirëqenia e organeve.

Sigurisht që regjimi ushqimor dhe aktiviteti fizik janë dy nga themelet e ruajtjes së një peshe të shëndetshme.

Por kur ndryshojnë stinët, sidomos nga vjeshta në dimër, trupi grumbullon më shumë rezerva dhjami për të ruajtur nxehtësinë.

Edhe pse ky është një proces fiziologjik, shpesh ndodh që ta teprojmë me ushqimin dhe e kalojmë 2-3 kg e parashikuar të cilët shtohen në këtë periudhë.

Vit pas viti këto kilogramë të tepërt depozitohen në trup duke vështirësuar shumë funksione të tij.

Një shtim në peshë i tillë është i pakuptueshëm në fillim dhe arrin të deshifrohet vetëm kur trupi mban 8-10kg më shumë.

Ndaj edhe ekspertët e fushës rekomandojnë që gjatë pranverës dhe verës trupi të angazhohet më shumë për të humbur peshë.

AgroWeb.org ju tregon një kombinim i cili do të ndihmojë organizmin tuaj të djegë sa më shumë masë dhjamore.

Uthulla e hudhrës është një trajtim i cili pastron organizmin nga kolesteroli i keq si dhe dhjamin e tepërt.

Gjithçka lidhet me nxitjen dhe përshpejtimin e metabolizmit, i cili ndihmon trupin të tresë sa më shpejt ushqimin.

Me këtë trajtim, shoqëruar me aktivitet fizik dhe një regjim ushqimor të kontrolluar, ju do të shkoni në peshën tuaj ideale.

Përbërësit

200ml uthull molle

200g hudhra

Përgatitja

Nisni me përgatitjen e hudhrave duke i qëruar dhe shtypur ose grirë sa më imët.

Më pas kalojini ato në një kavanoz të thellë dhe mbusheni atë me uthull molle.

AgroWeb.org ju këshillon që të lini një hapësirë rreth 4-5 cm nga gryka e kavanozit bosh.

Mbylleni mirë me kapak dhe futeni në frigoriferi ku do të qëndrojë për 10 ditë pa e hapur.

Kur dita e 10 të ketë kaluar, nxirreni kavanozin dhe kulloni lëngun e formuar.

Kalojeni atë në një enë apo edhe në kavanozin që përdorët dhe lëreni edhe për dy ditë të tjera në frigorifer.

Këshillohet që kjo uthull të konsumohet çdo ditë nga një filxhan kafeje.

Mund ta përfshini tek lëngjet e frutave, nëpër sallata apo gatime të ndryshme.

Pas 30 ditëve të para do të shihni një ndryshim në paraqitjen dhe shëndetin tuaj./AgroWeb.org

Petulla me Lule Kungulli – Të Lehta me Shije të Freskët

Një mënyrë fantastike për të ndezur shijen e mirë të gatimit në gjithë familjen. Sigurisht petullat mbeten ndër recetat më të preferuara të shqiptarëve.

Me djathë a me reçel, me mjaltë a me kanellë, petullat janë ndër recetat më ndjellëse të shijes.

Sidomos kur ato përgatiten nga duart e nënave dhe gjysheve, është e pamundur tu rezistosh.

E sigurisht, sapo nis të hash një prej tyre nuk mund të ndalësh pa ngrënë edhe disa të tjera.

AgroWeb.org u sugjeron më poshtë një recetë fantastike të përgatitjes së petullave me lule Kungulli.

Lulet e Kungullit janë ndër produktet më të freskëta të stinës ndërsa i japin një shije të lehtë dhe delikate.

Ato shndërrrohen në një gatim fantastik teksa përgatiten si petulla, një mënyrë tradicionale e përgatitur nga amvisat shqiptare.

Shoqërohen në mënyrë fantastike me kos por edhe me djathë të bardhë.

Përgatitja e Petullave të Shtëpisë me Lule Kungulli   

Përbërësit

300 gr Lule Kungulli

2 gota uji me miell

1 gotë uji me kos

1 kokërr vezë

Gjysmë luge kafeje me sodë

Vaj

Pak kripë

Pak gjalpë (një lugë të vogël)

Përgatitja e petullave

Në një tas të madh hedhim vezën, kosin, kripën dhe pak gjalpë.

I rrahim fortë të gjithë përbërësit dhe më pas hedhim miellin dhe sodën.

Vijojmë t’i rrahim fortë derisa masa e brumit të jetë e njëtrajtshme.

Brumi duhet të jetë gjysmë i trashë dhe elastik.

Lulet e Kungullit të pastruara dhe të kriposura i fusim në brumin e petullave.

Hedhim vajin në një tigan, të cilin e vendosim në zjarr.

Kur vaji të jetë nxehur nisim të skuqim petullat.

Mund të përdorim një lugë gjelle për ndarjen e brumit për çdo petull.

Duhet të kujdesemi që largësia nga njëra tjetra duhet të jetë deri në 3 apo 4 cm sepse gjatë skuqjes brumi hapet.

Petullat skuqen nga njëra anë dhe pastaj kthehen nga ana tjetër./AgroWeb.org

Majdanoz Me Limon Kundër Rrudhave, Njollave Dhe Alergjive

Rrudhat, njollat, aknet, dhe alergjitë e ndryshme që dalin në lëkurë, janë tepër të përhapura në ditët e sotme.

Për fat të mirë, sot nuk ka përse të shpenzosh një mal me para për të gjetur kremëra apo kura të shtrenjta kundër këtyre problemeve.

Ekspertët rekomandojnë shumë kura natyrale që funksionojnë, siç është ajo me majdanoz dhe limon të ciluen AgroWeb.org e sjell më poshtë.

Kombinimi i të dyjave jo vetëm që pastron lëkurën por edhe e zbardh atë.

Me përdorimin e majdanozit dhe limonit apo uthullës së mollës, lëkura juaj do të jetë më e shëndetshme.

Vlerat E Majdanozit Për Lëkurën

Majdanozi është shumë i pasur me vitamina dhe minerale.

Lëngu i tij përmban vajra esencialë që ofrojnë sasi të jashtëzakonshme të manganit dhe kaliumit.

Vlerat e majdanozit e bëjnë atë shumë të kërkuar nga njerëzit që vuajnë nga diabeti, infeksionet urinare, temperature, lodhja apo inflamacioni i syve.

Në industrinë e kozmetikës, majdanozi ka aftësi rigjeneruese dhe zbardhuese.

Ai ju vjen në ndihmë për eliminimin e skuqjeve të lëkurës, freskinë dhe zbardhjen e saj.

Si Të Përdorni Majdanozin Dhe Limonin Për Shëndetin E Lëkurës

Përbërësit

1 lugë çaji me lëng limoni ose uthull molle

2 lugë gjelle me majdanoz të grirë hollë

200 ml ujë

Përgatitja

Në fillim duhet të zieni ujin në një tenxhere të vogël.

Më pas shtoni gjethet e grira hollë të majdanozit dhe lërini të ziejnë për 15 minuta.

Hiqeni tenxheren nga zjarri dhe lëreni lëngun të ftohet.

Shtoni lëngun e limonit ose uthullën e mollës dhe hidheni lëngun në një enë qelqi.

Ruajeni atë në frigorifer.

Përdorimi I Lëngut Të Majdanozit Dhe Limonit

AgroWeb.org ju këshillon ta përdorni këtë lëng dy herë në ditë, në mëngjes dhe në darkë duke lyer lëkurën.

Ai do të ngushtojë poret në lëkurë, do ta pastrojë dhe zbardhë atë.

Duke e përdorur këtë lëng në fytyrë, do të largoni njollat e errëta dhe lëkura juaj do të ketë një ngjyrë të njëtrajtshme.

Ajo do të ketë shkëlqim rinor dhe do të jetë më elastike.

Nëse e përdorni këtë lëng për gjatë gjithë muajit do të vëreni ndryshime befasuese./AgroWeb.org

Çfarë Ndikimi Ka Panxhari i Kuq Në Uljen e Kolesterolit

Panxhari i kuq është kryefjala e lajmeve për ushqimet më të mira për shëndetin e njeriut.

Ai është plot antioksidantë, vitamina dhe minerale por edhe shije dhe aromë.

Panxhari besohet të jetë kultivuar për herë të parë në Mesdhe diku rreth vitit 2,000 para Krishtit.

Në lashtësi, zhardhoku i kuq është përdorur jo vetëm për ushqim por edhe në mjekësinë popullore, sidomos kundër dhimbjeve të kokës dhe të dhëmbit.

Substanca që i jep panxharit ngjyrën karakteristike të kuqe të thellë është i rëndësishëm kundër toksinave.

Kjo është arsyeja përse panxhari i kuq është i pazëvendësueshëm në përpjekjet e njeriut për të pastruar organizmin nga toksinat e dëmshme.

Panxhari, me gjithë gjethet e tij, është një burim i shkëlqyer i folatit, vitaminave A, C dhe K, manganit, bakrit dhe kaliumit.

Si Ndikon Panxhari i Kuq Tek Ulja e Kolesterolit

Studimet të cilave u referohet AgroWeb.org shpjegojnë se ekstraktet e panxharit të kuq kanë aftësinë për të ulur nivelin e kolesterolit të plotë dhe të triglicerideve.

Sipas studimeve, këto ekstrakte në të njëjtën kohë kanë aftësinë të rrisin nivelin e kolesterolit të mirë.

Ekspertët thonë se kjo aftësi mund t’i atribuohet fibrës që gjendet tek panxhari dhe antioksidantëve të cilët ndihmojnë në uljen e kolesterolit të keq.

Ky i fundit është përgjegjës për shfaqjen e shumë sëmundjeve serioze që i kanosen zemrës.

Një filxhan çaji me copa panxhari ofron 3.8 gramë fibër ose 15 përqind të dozës së rekomanduar ditore të fibrës.

Niveli i Shëndetshëm i Kolesterolit në Gjak

Sipas ekspertëve, niveli i shëndetshëm i kolesterolit është si më poshtë:

Kolesteroli i plotë duhet të jetë më pak se 200 mg/dl (miligramë për një decilitër gjaku)

Kolesteroli LDU duhet të jetë më pak se 100 mg/dl

Kolesteroli LDL duhet të jetë 40 mg/dl  ose pak më i lartë.

Niveli i triglicerideve duhet të jetë më i ulët se 150 mg/dl.

Sipas të dhënave të AgroWeb.org, ndryshimet në ushqyerje dhe stilin e jetesës janë të nevojshme për uljen e kolesterolit.

Ushqime Të Tjera Të Mira Kundër Kolesterolit të Keq

Përveç panxharit të kuq, ushqime të tjera me aftësi të mëdha në uljen e kolesterolit të keq janë:

Arrat

Tërshëra

Spinaqi

Kakaoja

Hudhra

Farat e linit

Avokado

Vaji i ullirit ekstra i virgjër.

Të dy këto të fundit, pra vaji i ullirit dhe avokado  ofrojnë acide yndyrore mono-të-pangopura që parandalojnë aterosklerozën dhe ulin nivelet e kolesterolit./AgroWeb.org

Shkrimtarja Japoneze Shkruan Për Gatimet Shqiptare – Sugjeron Recetën e Saj të Preferuar

Kulinaria shqiptare ka bërë jehonë jo pak herë në fjalët e shkrimet e shumë vizitorëve të shquar që kanë ardhur në vendin tonë.

Shija e mrekullueshme në mbresat e përshkruara nga shumë shkrimtarë ka tërhequr edhe poeten dhe shkrimtaren japoneze Mizuho Ota.

Pas vizitës në Shqipëri, ajo ka publikuar eksperiencën e saj në faqen e njohur japoneze Asahi.com. Ajo thotë se i ka shijuar shumë qoftet dhe birrat në shesh, ushqim që në Japoni nuk e kishte provuar kurrë.

Qofte dhe Birrë në Tarracë

“Në Shqipëri, të cilën e kam vizituar dy herë deri më tani, më vjen ende keq që u ktheva në Japoni pa realizuar setin e shumëpritur të tre pjesëve të ‘Qofte dhe birrë në tarracë’.

Sa herë që shkoja në treg në Tiranë pashë një grup njerëzish që hidhnin mish të pjekur në skarë dhe pinin birrë në orët e para të pasdites.

Sidomos nëse një fllad i këndshëm dhe me diell kalonte midis çadrave nën erën e këndshme të mishit të pjekur në skarë. Këtë e quaj ‘Shesh, qofte, birra’ dhe dëshiroj shumë ta provoj në Shqipëri kur të vij herës tjetër”, ka shkruar Ota.

Perimet e Pjekura

Pasi përshkruan këtë menu në Tiranë, Mizuho vendos të bëjë qofte vetë në Japoni.

“Kur u njoha me ambasadorin Teneqexhiu për një punë në fund të vitit të shkuar dhe bisedova për udhëtimin tim në Shqipëri ai më tha: Nëse keni ndonjë pyetje, ju lutem më pyesni në çdo kohë.

Megjithëse kërkesa ime ishte e papritur, ai u tregua i gatshëm të më mësonte recetën e gruas së tij Elona në Tiranë”, shkruan ajo.

Ajo gjithashtu ka shkruar edhe për recetën e perimeve të pjekura të spërkatura me kripë dhe vaj ulliri.

“Sallata përbëhet nga domate me madhësi mesatare dhe tranguj të spërkatur me kripë. Mund ta hani me salcë kosi nëse dëshironi”, shprehet Ota.

Reçel Shtëpie me Pjeshkë – Ëmbëlsi, Aromë dhe Shije Magjepsëse

Cilësohen si frutat e arta të stinës, plot lëng e shije, të freskëta me aromë magjepsëse.

Fantastike për t’i konsumuar në çdo kohë ashtu si edhe për t’i gatuar në mënyra të ndryshme plot shije.

Reçeli i pjeshkës është shumë i lehtë në gatim por edhe tepër i shijshëm saqë shumë lehtë mund të kthehet në të preferuarin e të gjithë familjes.

Amvisat shqiptare janë duararta. Ato përgatisin reçel dhe prevede frutash të pashoqe.

Reçeli i pjeshkës të cilin AgroWeb.org e rekomandon në këtë artikull është i ëmbël, përgatitet lehtë dhe ka një shije të pakrahasueshme kur shtrohet mbi një fetë bukë apo biskotë.

Stina e pjeshkëve zgjat më shumë se ajo e frutave të tjerë, ndaj jeni akoma në kohë që të përvishni mëngët dhe të gatuani reçel të cilin mund ta shfrytëzoni gjatë gjithë vitit.

Mund ta kosnumoni për një mëngjes të shijshëm dhe të shëndetshëm, mund të përgatisni ëmbëlsira të ndryshme, të shoqëroni akullore apo ta konsumoni edhe thjeshtë.

Përgatitja e Reçelit të Pjeshkës

Përbërësit

2 kg pjeshkë

1 kg sheqer

3 lugë çaji me lëng limoni

Udhëzimet

Lajini, qërojini dhe hiqni bërthamat e frutave. Prijini në copëza të vogla sipas preferencës.

Më pas, AgroWeb.org ju këshillon t’i vendosini të gjithë përbërësit në një enë qelqi dhe lërini të qëndrojnë për një orë.

Më pas hidhini në një tenxhere të pastër dhe vendosini në zjarr.

Lërini të zjejnë për 25 minuta deri sa frutat të jenë shkrirë dhe shpërbërë duke krijuar një masë xhelatinoze.

Përziejeni masuen vazhdimisht përmes një luge druri dhe kujdesuni të hiqni çdo gjurmë shkume të krijuar në sipërfaqe.

Më pas, hidheni reçelin në kavanozë të sterilizuar duke lënë hapësirë në sipërfaqe.

Mbyllini me kapak dhe vendosini në një tenxhere të madhe me ujë të valuar për 10 minuta.

Kavanozët e pahapur mund të ruhen në temperaturën e ambientit për një vit.

Pasi t’i keni hapur kavanozët, futini dhe ruajini në frigorifer dhe duhet t’i konsumoni brenda tre javësh./AgroWeb.org

Supë Verore me Peshk, Domate dhe Karrota – Shije, Shëndet dhe Vlera

Nëse nuk e keni provuar akoma, atëherë është koha që ta përgatisni menjëherë duke ndjekur këtë recetë të AgroWeb.org.

Supa e peshkut është e dobishme për shëndetin. Ajo përmirëson shëndetin e tiroides, forcon shëndetin e trurit dhe ju ndihmon të hidratoheni pas një aktiviteti të mundimshëm fizik.

Supa e peshkut, përgatitet duke kombinuar peshkun ose frutat e detit me perimet dhe lëngun e tyre.

Supa përftohet nga zierja e shumë përbërësve në të njëjtën kohë deri në çlirimin e plotë të aromave të përbashkëta.

Kjo supë fantastike shoqërohet në mënyrë të shkëlqyer me sallatat të freskëta të stinës, perime të stinës të pjekura, bukue të thekur etj.

Përgatitja e Supës së Peshkut me Karrota dhe Domate

Përbërësit

2 peshq mesatarë (koc ose levrek)

4 domate të bëra mirë

4-5 karrota

1 kokërr patate

1 kokërr qepë mesatare

Kripë

Piper

Majdanoz

Përgatitja

Si fillim, AgroWeb.org ju udhëzon të pastroni mirë peshkut, ta vendosni në një tenxhere, ta mbuloni me ujë. Hidhini pak kripë dhe vendoseni të zjejë në zjarr përreth 15 minuta.

Pasi të ketë zjerë, përmes një luge largoni peshkun nga tenxherja dhe lëreni në një enë që të ftohet.

Ndërsa lëngun ku ka zjerë peshku kullojeni përmes një kullorëse kuzhine dhe mbajeni mënjanë për ta përdorur në përgatitjen e supës.

Mishin e peshkut pastrojeni ne kujdes nga halat, lëkura dhe koka dhe ndajeni në copëza të bogla ose fije.

Ndërkohë, grini përmes një rendeje kuzhine karrotat dhe lërini në një tas më vete, më pas grini po në rende domatet. Grini gjithashtu edhe qepët.

Kaurdisni qepët në një tenxhere me vaj ulliri, shtoni më pas karrotat e grira, kaurdisini për pak dhe shtoni më pas patatet e prera në kubikue të vegjël dhe më pas domatet.

Kaurdisini për pak, shtoni më pas mishin e peshkut, rregullojeni me kripë dhe piper dhe lëreni të zjejë përreth 30 minuta derisa supa të jetë gati.

Kur ta servirni spërkateni me pak majdanoz të freskët të grirë hollë./AgroWeb.org

Vala e Dytë e COVID -19, Përgatitjet e Nevojshme Për Secilin Prej Nesh

Shqiptarët po i gëzohen ngrohjes së temperaturave dhe lehtësimit të masave shtrënguese kundër përhapjes së COVID-19, ndonëse frika për rikthimin e mundshëm të pandemisë në vjeshtë është e madhe.

Pak ditë më parë, në një intervistë për A2CNN epidemiologu Ilir Alimehmeti shpalosi tre skenarët e mundshëm për hipotezën ose gjasat e rikthimit të virusit në një valë të dytë në vjeshtë.

Sipas tij, në rastin më të keq, duke marrë në konsideratë mësimet e historisë, vala e dytë mund të jetë më e fortë se e para

Skenari i dytë, sipas Alimehmetit ka të bëjë me dobësimin e virusit ndërsa skenari i mesëm mund të jetë i ngjashëm me fenomenin e tërmetit që shoqërohet me pasgoditje më të lehta.

Ndërkohë, Anthony Fauci, drejtor i Institutit Amerikan të Alergjive dhe Sëmundjeve Infektive, ka paralajmëruar se sipas mendimit të tij, rikthimi i virusit është i paevitueshëm dhe “mënyra se si ne do ta përballojmë atë do të përcaktojë fatin tonë.”  Parashikime të ngjashme janë bërë edhe nga ekspertë evropianë.

Virusi do të vazhdojë të jetë kërcënim

Lothar Wieler, president i Institutit të Shëndetit Publik Robert Koch Institute, në Gjermani mendon se virusi do të vazhdojë të jetë kërcënim deri sa 60-70% e popullësisë do të infektohet prej tij.

“Për rrjedhojë, ne e dimë me siguri të madhe se do të ketë një valë të dytë. Shumica e shkencëtarëve janë të sigurtë për këtë. Ka edhe të tjerë që mendojnë se edhe një valë e tretë është e mundur”, tha ai.

Kësisoj, duke qenë se nuk ka asgjë të sigurtë mbi gjasat e një vale të dytë apo të tretë të virusit, është e udhës që të përgatitemi.

Vetëm koha do ta tregojë nëse koronavirusi do të ketë të njëjtën mënyrë operimi si gripi i stinës që kthehet çdo vit në vjeshtë ose do të ketë ngjashmëri me virusin H1N1 që goditi në pranverë dhe u kthye në dimër dhe vjeshtë.

Vala e Dytë e COVID-19, Përgatitjet e Nevojshme Për Secilin Prej Nesh

Ekspertët thonë se duhet të vazhdojmë të jemi të përpiktë me masat e distancimit fizik dhe higjenës dhe të mbajmë nën kontroll pritshmëritë për normalitetin.

Për tu përgatitur për një skenar të tillë, ndjekja e përpiktë e standardeve të higjenës është e një rëndësie jetësore.

Informimi nga burime të sakta të informacionit është po aq i rëndësishëm.

Ekspertët këshillojnë që të shtyjmë marrjen e vendimeve të rëndësishme dhe të përgatitemi mendërisht dhe praktikisht për një valë të dytë.

Nëse do të vazhdoni të punoni nga shtëpia, investoni për një karrige të mirë për të shmangur dhimbjet e shpinës gjatë qëndrimit ulur.

Për të përballur karantinën e mundshme të ardhshme investoni në një pajisje palestre që do ju ndihmojë të kryeni aktivitet fizik.

Vazhdoni furnizohuni me medikamentet e duhura për tensionin, diabetin, temperaturën dhe dhimbjet, në varësi të problemeve shëndetësore.

Investoni në një termometër të ri, blini alkol, doreza dhe maska që t’i keni në shtëpi.

Këtu do të mësoni për termometrin e saktë që ju duhet në shtëpi

Blini shtesë ushqime që kanë një datë të largët skadence dhe tregoni kujdes financat duke mos bërë shpenzime të panevojshme.

Gjatë këtyre muajve, mund të krijoni një ‘fond karantine’ për të përballuar të papriturat e mundshme në vjeshtë.

Të qenit të ndërgjegjshëm dhe proaktivë në këtë situatë është e vështirë por të jep terrenin e duhur për të qenë të përgatitur dhe mbrojtur sa më shumë veten dhe të tjerët./AgroWeb.org