Djathi i Njomë i Kajmakut- Freskia e Traditës Shqiptare

Djathi i kajmakut është një produkt tradicional i freskët, i njomë, i butë, që përgatitet nga qumështi jo i pasterizuar dhe jo i homogjenizuar që kryesisht ofrohet nga fermerët e vegjël në vend.

Ai shërbehet kryesisht me bukë të thekur ose shoqërohet me panine dhe salçice.

Ky djath shërbehet edhe i shkrirë në variantin Balkanas të hamburgerit, apo në variantin e shijshëm kosovar të pleskavicës.

Ai përshtatet shumë mirë dhe plotëson shijen e mishit, sidomos të pjesës së kofshës së viçit.

Nëse lejohet të fermentohet, kajmaku i vjetëruar ka një shije të fortë dhe ngjyrë të verdhë.

Në këtë pikë ai përdoret në një sërë gatimesh dhe recetash brumi.

Për përgatitjen e tij ju nevojiten

5 litra qumësht lope ose dele jo të pasterizuar dhe jo të homogjenizuar.

3-4 lugë çaji me kripë

Përgatitja

Merrni një tenxhere mesatare dhe lëreni qumështin të ziejë.

Fikeni zjarrin dhe lëreni qumështin të ftohet plotësisht pa e përzierë për 4 deri në 5 orë.

Hiqeni kajmakun e akumuluar në sipërfaqe dhe futeni në frigorifer.

Zakonisht sa më i paskremuar të jetë qumështi aq më shumë kajmak do të prodhojë ai.

Proçesin e zierjes dhe ftohjes së qumështit përsëriteni disa herë, duke mbledhur sa më shumë ajkë dhe ruajtur në frigorifer.

Shtoni kripën dhe përzijeni mirë.

Ruajeni masën në një enë të mbyllur mirë dhe ruajeni në frigorifer për deri në 2 javë.

Shënim: Kajmaku tradicional përgatitet duke zierë qumësht të freskët të lopës ose deles dhe duke e vendosur në enë me grykë të gjerë.

Me ftohjen e qumështit, ajka mblidhet në sipërfaqe dhe formon një shtresë të hollë.

Ajka e mbledhur vendoset në shtresa të ndryshme me kripë në një enë të gjërë druri.

Ky proçes përsëritet disa herë deri sa ena të mbushet.

Kajmaku prodhohet gjithnjë në mënyrë tradicionale.

Përveç prodhimit për përdorim shtëpiak, kohët e fundit, industria e bylmetit po përqendrohet më shumë tek ky produkt i veçantë i cili përbën krenarinë e shumë vendeve të Ballkanit.

Djathi më i shtrenjtë është ai më i freskëti që shitet një ose dy ditë pas prodhimit.

Ky djathë, emri i të cilit vjen nga Turqishtja, qëndron për javë të tjera në frigorifer por forcohet dhe më pas nuk ka të njëjtën shije.

Kajmaku mund të vjetërohet në shtresa të përgatitura nga lëkura kafshësh, një traditë kjo e Shqipërisë dhe disa vendeve të Ballkanit të cilët mburren me këtë recetë të veçantë./AgroWeb.org

Çfarë Nuk Duhet Të Bëni Kurrë Me Stomakun Bosh

Nisja e ditës shëndetshëm sigurisht nis nga stomaku në mëngjes. Mënyra e të ushqyerit dhe kujdesi që duhet të tregojmë me gjërat që konsumojmë ose jo në mëngjes është shumë e rëndësishme për shëndetin e organizmit.

Këshilla që kemi dëgjuar më shpesh kohët e fundit kur rëndësia e të ushqyerit të shëndetshëm ka marrë dhenë është që të pimë ujë sapo të zgjohemi.

Uji pastron gjithë organizmin nga toksinat dhe ndihmon në rënien në peshë.

Nga ana tjetër, stomaku në mëngjes është delikat dhe nuk duhet mbushur me gjëra të panevojshme dhe që nuk kanë një ndikim pozitiv për shëndetin.

Më poshtë do të gjeni listën e 5 gjërave që nuk duhet të bëni kurrë me stomakun bosh, sipas ekspertëve të AgroWeb.org

1.Kurrë mos pini çaj apo kafe me stomakun bosh

Pirja e kafesë me stomakun bosh nxit prodhimin e një acidi që shkakton urth dhe refluks.

Gjithnjë pini një gotë ujë përpara se të pini çdo lloj pije tjetër.

Nëse nuk hiqni dorë lehtë nga kafeja, atëherë përpiquni ta pini atë me qumësht.

Tretja do të jetë më e mirë dhe stomaku nuk do të jetë aq i lënduar sa për të mos përmirësuar përthithjen e ushqyesve gjatë ditës.

2: Kurrë mos pini alkol

Pirja e alkolit me stomak bosh do të përshpejtojë përthithjen e tij në gjak.

Arteret do të zmadhohen dhe tensioni i gjakut do të bjerë.

Kur niveli i alkolit në gjak është shumë i lartë, atëherë me siguri do të humbisni kontrollin dhe do të keni marramendje.

3. Kurrë mos pini ilaçe me stomak bosh

Ilaçe të ndryshme kundër dhimbjeve siç janë paracetamoli dhe aspirina nuk duhen pirë kurrë me stomak bosh.

Këto lloj medikamentesh shkaktojnë gjakderdhje gastrike në momentin që futen në stomak dhe humbasin efikasitetin e tyre.

4. Kurrë mos bëni aktivitet fizik me stomak bosh

Nëse mendoni se do të humbni në peshë duke mos ngrënë, gaboheni rëndë.

Kur kryeni një aktivitet fizik, organizmi përdor glikogjen, një lëndë që vjen nga ushqimi.

Nëse ju nuk keni ngrënë, atëherë trupi do të djegë muskujt dhe do të nxisë akumulimin e tepruar të yndyrnave.

5. Mos bëni pazar me stomak bosh

Të bërit pazar nuk kërkon vetëm një kuletë të mbushur plot.

Nëse bëni pazar me stomak bosh, do të shpenzoni më shumë para për ushqime me shumë yndyrë dhe kalori./AgroWeb.org

 

Dhimbjet e Gjunjëve – Lehtësimi Përmes Ushqimit dhe Kurave Natyrale

Janë shumë faktorë që shkaktojnë dhimbjet e gjunjëve të ndikuara kryesisht nga Artriti, Osteoartriti, Artriti reumatoid dhe septik, cistet e gjurit apo frakturat.

Është një nga problemet më të zakonshme shëndetësore që sigurisht i prek të gjithë.

Dhimbjet e gjunjëve janë të padurueshme dhe therrëse dhe frenojnë tërësisht aktivitetin normal fizik.

Sipas ekspertëve të AgroWeb.org zakonisht dhimbja e gjunjëve shoqërohet me enjtjen e tyre, kufizimin e lëvizjeve normale të gjymtyrëve, probleme me ngjitjen dhe zbritjen e shkallëve, qëndrimin në këmbë apo ulur, mbledhje e ujit tek gjunjët duke shkaktuar dhimbje të forta.

Gjithashtu, dhimbja e gjunjëve shkaktohet edhe si pasojë e reumatizmës. Kjo sëmundje ndikon në enjtjen e gjunjëve, skuqjen e tyre e madje edhe në rritjen e temperaturës së trupit, vështirësi në ecje si dhe përkulje gjithashtu.

AgroWeb.org u sugjeron më poshtë disa metoda krejt efikase për lehtësimin e dhimbjeve të gjunjëve përmes kurave natyrale në shtëpi si dhe përzgjedhjes së ushqimeve të duhura.

Kura Natyrale

-Vendosni kompresa me akull te pjesa e gjurit që ju dhemb. Mbajeni për 20 minuta dhe bëjeni këtë ritual gjatë ditës.

-Shtrëngoni pjesën e gjurit që ju dhemb përmes një fashe elastike.

-Mundohuni të pushoni sa më shumë duke evituar lodhjen e gjunjëve. Bëni ecje të ngadalta të cilat nuk ndikojnë në futjen e gjunjëve në një aktivitet të plotë.

-Vendosni jastëkë të mëdhenj poshtë gjunjëve teksa pushoni.

-Hidhni një lugë gjelle me piper të kuq në një filxhan me vaj ulliri. Përzjejini bashkë derisa masa të bëhet homogjene dhe masazhoni pjesët e gjurit në zonën që ju dhemb. Këtë ritual mund ta bëni dy herë në ditë për një javë.

Kura përmes ushqimit

-Ju mund të lehtësoni dhimbjen e gjunjëve përmes një diete të mirë ushqimore me produkte që janë të pasura me vitamina dhe antioksidantë.

-Peshku përmban vitamina B, si vitaminën B6, e cila lufton aneminë. Si dhe vitaminën D, që është shumë e rëndësishme për asimilimin e kalciumit, element jetik ky për forcimin e kockave.

-Portokallet, duke përmbajtur një sasi të konsiderueshme vitamine C, forcojnë kockat dhe imunitetin.

-Perimet me gjethe ( spinaq, lëpjetë etj) janë burim i shkëlqyer i vitaminave antioksidative A dhe C, luteinës dhe beta karotenit. Kur këto kompozime bashkohen krijojnë mbrojtje të shkëlqyer nga krijimi i shumë sëmundjeve.

-Bajamet janë burime të pasura me vitamina dhe minerale. Bajamet paraqesin një nga komponentët bazë për energji si dhe vlera ushyese.

-Xhinxher njihet si një nga produktet më të çmuara me përdorimin e gjerë të tij në lehtësimin e dhimbjeve nga komplikacione të ndryshme shëndetësore. /AgroWeb.org

*Informacioni i mësipërm është përgatitur nga një grup mjekësh shqiptarë dhe të huaj të shoqatës AlbaMedicum që kontribuojnë vullnetarisht në sistemin shëndetësor shqiptar.

Vlerat e Rralla të Hurmave Arabike – Zbulojini Përmes Pamjeve

Edhe pse me origjinë orientale, hurmat e Arabisë janë shumë të kërkuara në Shqipëri, me një konsum të gjerë dhe me çmime jo të larta.

Hurmat e Arabisë, të freskëta apo të thata janë një prej frutave më të lashta në historinë njerëzore. Hurmat janë të pasura me vitamina, minerale, amino acide, acide yndyrore etj.

Ato nuk janë vetëm një burim i jashtëzakonshëm energjie, por ofrojnë qetësim nga shumë simptoma si çrregullimet intestinale, problemet me zemrën, anemia, çrregullimet seksuale, diarea, e shumë të tjera.

Vlerat më të mira shëndetësore të Hurmave të Arabisë

Hurmat e Arabisë janë të mira edhe për ata që duan të shtojnë në peshë.

Këto fruta të shijshme përmbajnë vaj, kalcium, hekur, kalium, fosfor, mangan, baker, magnez, sulfur të cilat e ndihmojnë organizmin të funksiojë më mirë.

Kur trupi nis e përthith vlerat ushqimore të hurmave, ndjesia e urisë nis të shuhet.

Sistemi nervor: Sistemi nervor përfiton nga hurmat për shkak të nivelit të lartë të kaliumit në to.

Shëndeti kardiovaskular: Hurmat e mbajnë zemrën të shëndetshme. Nëse i fusni në ujë gjatë natës dhe i shtypni lehtë në mëngjes para konsumimit do t’i jepni zemrës forcë. Hurmat ulin rrezikun e atakut në zemër duke zvogëluar nivelet e kolesterolit në gjak. Mjafton të konsumoni hurma dy herë në javë për një zemër të shëndetshme.

Plot energji: Mjafton vetëm gjysëm ore pas konsumimit të hurmave dhe do të ndiheni energjikë. Për shkak të nivelit të lartë të mineraleve, hurmat janë perfekte për njerëzit që vuajnë nga anemia. Ato janë plot hekur dhe si rrjedhojë pacientët përfitojnë energji dhe forcë dhe më pak lodhje e dobësi.

Një kilogram hurma përmban 3000 kalori. Kaloritë e hurmave janë në fakt të mjaftueshme për të plotësuar nevojat ditore të organizmit.

Sistemi i tretjes: Kripërat mineralet që gjenden tek hurmat e Arabisë ofrojnë forcë për kockat dhe luftojnë simptomat e dhimbshme të sëmundjeve kockore dhe kurojnë një sërë problemesh të sistemit të tretjes.

Alergjitë e Stinës: Një tjetër fakt interesant është që hurmat e Arabisë kanë në përmbajtjen e tyre sulfur organik. Ky nuk është një element i zakonshëm që mund të gjendet lehtë tek ushqimet e tjera. Por ky element lufton reagimet alergjike dhe alergjitë e stinës.

Normalisht nuk ju këshillojmë të hani vetëm hurma. Por nëse jeni të dobët dhe të hollë, dëshironi të vini muskuj, apo edhe dëshironi të jeni energjik pas një sëmundje mjekësore, atëherë hani hurma të tilla.

Kujdes! Përveç vlerave të jashtëzakonshme, duhet të kini kujdes. Duke qenë se sipërfaqja e hurmave është e e lëmuar dhe e lagësht ato mbajnë shumë papastërti. Duhet t’i lani patjetër përpara se t’i konsumoni./AgroWeb.org

Qepa Kundrejt Preshit – Cili ka Më Shumë Vlera Shëndetësore

Qepa dhe preshi janë dy perime të shëndetshme me pak kalori që kombinohen mjaft mirë së bashku në supa, gatime të pjekura e të ziera.

Të dyja këto perime ofrojnë pak proteinë ndaj duhen kombinuar me perime të tjera me shumë proteinë për të garantuar një ushqyerje të balancuar e të shëndetshme.

Gatimi i tyre është një proces që ndikon në vlerat ushqyese. Skuqja për shembull rrit nivelin e yndyrnave tek secila prej perimeve, ndaj nuk rekomandohet.

Vlerat e qepës

Kur e hani të pagatuar, qepa ka më pak kalori dhe yndyrë në krahasim me preshin.

Sipas ekspertëve të AgroWeb.org, nëse jeni të përqendruar në uljen e sasisë së kalorive, rënies në peshë apo ruajtjen e peshës, atëherë zgjidhni qepën sepse ka më pak kalori se preshi.

Megjithatë si preshi ashtu edhe qepa kanë pak yndyrë dhe kalori. Një avantazh potencial i qepës qëndron tek aroma që është më e fortë se ajo e preshit.

Aroma do ju bëjë të hani më pak qepë, sepse është shumë e fortë. Qepa përmban më pak sodium se preshi.

Në 100 gramë qepë gjenden 4 mg sodium por në të njëjtën sasi preshi gjenden 20 mg sodium.

Vlerat e preshit

Preshi është më i pasur në disa vitamina dhe minerale në krahasim me qepën. Në 100 gramë presh gjenden 2.1 g hekur — 10 herë më shumë se sasia e gjendur tek qepa.

Të dhënat e AgroWeb.org për qepën dhe preshin tregojnë se përmbajtja e kalciumit tek preshi është më e lartë, me përjashtim të qepëve të njoma.

Hekuri është i domosdoshëm për parandalimin e anemisë dhe kalciumi mbështet shëndetin e kockave.

Preshi përmban sasi të larta të vitaminës C në krahasim me qepën. Preshi përmban edhe vitaminë A ndërkohë që qepa jo.

Të dhënat ushqimore të qepës

Në 100 gramë qepë gjenden 40 kalori, 1.1 gr proteinë, 0.1 gr yndyrna. 9.3 gr karbohidrate, 1.7 gr fibër dietike dhe 4.2 gr sheqerna.

Mineralet përfshirë kalciumin, hekurin, magnezin, fosforin, kaliumin, sodiumin, zinkun, manganin, bakrin dhe seleniumin, gjenden gjithashtu tek qepa.

Të dhënat ushqimore të preshit

Në një racion prej 100 gramësh të preshit, gjenden 61 kalori, 1.5 gr proteinë, 0.3 gr yndyrna, 14.1 gr karbohidrate, 1.8 gr fibër dietike dhe 3.9 gr sheqerna.

Mineralet si kalcium, hekur, fosfor, kalium, magnez, sodium, zink, bakër, mangan dhe selenium, gjenden gjithashtu tek preshi.

Të dyja janë shumë të shëndetshme, ndaj rekomandohet t’i përfshini patjetër në ushqimin tuaj./AgroWeb.org

Të Panjohurat Efekte të Muçmollave Shqiptare

Muçmolla është vogëlushja e familjes së trëndafilit. Kjo pemë e vogël çel fruta të vogla në ngjyrë të kafenjtë deri tek ngjyrë ndryshku.

Këto fruta janë të ngjashme me ato të trëndafilit të egër, por më të mëdha në përmasë.

Ato përbëhen nga bërthama të forta. Muçmolla është një frut me reputacion prej kohësh në vendin tonë mesdhetar. Fama e saj ka gjetur vend nga e shkuara në ditët e sotme.

Muçmolla kultivohet kudo në Shqipëri, kryesisht në jug të vendit. Pamja dhe shija e saj janë krejt unike.

Shqiptarët i kanë vënë këtij fruit emra të ndryshëm që variojnë nga dialekti i rajoneve dhe rrethinave, por marrosja pas muçmollës është e njëjtë në të gjithë territorin.

Së bashku me kumbullat shahine, muçmollat mbeten pjesë e traditës së vendit. Kohët e fundit ka patur një tendencë në rritje ndaj konsumimit të frutave që deri në një farë periudhe kanë qenë të neglizhuara nga fermerët dhe tregëtarët.

Muçmolla është pjesë e familjes së mollëve dhe dardhave. Është e fortë e thatë, e regjur kur është e papjekur.

Proçesi i pjekjes është paksa misterioz dhe shpesh krahasohet me kalbjen. Qelizat e membranës shkrumbohen, substancat e tanines zvogëlohen dhe tuli bëhet i qullët dhe ngjyrë kafe.

Shija e muçmollës është pak si vera, me nuanca të mollës, kanellës por edhe pak pikante. Kujdes, nëse nuk është e pjekur dhe gati në kalbje është e kotë ta hash sepse nuk do ta kuptosh shijen e saj të vërtetë.

Fruti i lashtësisë

Muçmolla ka vendlindjen në Azinë jugperëndimore dhe Evropën juglindore. Ky frut ka qenë ndër të preferuarit e Grekëve dhe Romakëve ndërkohë që Britanikët e epokës viktoriane kanë qenë aq të marrosur pas saj saqë edhe vetë Shekspiri e përmendte si frut në veprat e tij.

Megjithatë në shekullin e 20-të atëherë kur Evropa pati një shpërthim të prodhimit të frutave që çelin vonë, muçmolla humbi fronin e saj të madhështisë.

Prezantimi i parë i mushmollës me Shqipërinë ka ndodhur shekuj më parë. Megjithatë asnjëherë nuk është kultivuar masivisht për tregti masive në vendin tonë. Kërkesat janë të larta edhe pse ky frut shitet në tezga të vogla në cepat e tregjeve fshatare.

Pjesa më kryeneçe e mushmollës është kur nis proçesi i pjekjes që ngjan me kalbjen. Nëse lejohen të rrinë në pemë, muçmolla do të piqet vetë natyralisht sidomos pasi ka përjetuar ftohtësinë e ngricave. Ndonjëherë frutat bien nga pema dhe humbin në natyrën e egër.

Alternativa më e mirë është kur frutat mblidhen para se ky proçes të nisë dhe pjekja të ndodhë në kushtet e shtëpisë.

Idealja është që të vendosen kokëposhtë në hapësira të drunjta dhe të ruhen në një vend të freskët pa dritë dhe të lagësht për javë me rradhë deri sa të kenë aromën karakteristike.

Vetëm një e treta e prodhimit të mushmollës arrin të piqet në pemë. Ato duhen konsumuar pasi janë zbutur.

Mund t’i merrni direkt nga pema dhe t’i shijoni. Nëse i këpusni herët atëherë lejoni të qëndrojnë disa javë dhe më pas hajini. Menjëherë sapo të jenë zbutur duhet t’i hani. Sepse nuk mund të qëndrojnë aq gjatë sa ç’do të dëshironit.

Muçmollat përdoren gjërësisht në Evropë për ëmbëlsira. Ato mund të piqen, gatuhen me avull ose të shërbehen në alkool.

Muçmollat sipas shkrimtarëve të njohur janë fantastike për t’u konsumuar me një gotë verë të mirë. Sipas gojëdhënave, asnjë frut nuk e hijeshon shijen e verës më mirë se muçmolla.

Vlerat shëndetësore

Prej shekujve muçmolla përdoret për shërimin e problemeve me tretjen, pasi ka vlera shumë kurative për sistemin tretës.

Muçmolla është e përkryer kundër inflamacioneve të shkaktuara nga bakteriet dhe viruset, ndihmon te bajamet e infektuara dhe lehtëson organet e frymëmarrjes.

Muçmolla përmban proteina, karbohidrate, taninë, pektinë, acide organike dhe është e pasur me vitamina C dhe vitaminat e grupit B.

Ajo është burim i mirë i kaliumit, kalciumit, hekurit dhe magnezit. Pektina e pranishme ndikon në uljen e kolesterolit, përmirëson punën e zorrëve, dhe ndihmon në shërimin e infeksioneve të ndryshme në organizëm.

Muçmolla ka edhe një përdorimi tjetër interesant në formën e kompostos. Për të përgatitur këtë është e rëndësishme që të përzieni disa lugë mushmolla të freskëta të grira dhe lihen për një orë në ujë të vluar.

Gjatë ditës nevojitet të pini dy gota nga kjo pije e ngrohtë dhe organizmi do të ndihet menjëherë më mirë./AgroWeb.org

Çomlek me Lepur të Egër – Receta e Shijshme e Gjahtarëve

Nëse ka një recetë që fiton mbi të gjitha fantazitë e shijes, e që lë mënjanë paksa amvisat ai është: çomlek me lepur të egër gatuar nga vet gjahtarët.

Mënyra e gatimeve të egra nga gjahtarët është speciale, tejet e shijshme e mbi të gjitha e veçantë në botën e kulinarisë.

E tillë është receta e çomlekut me lepur të egër. Magjepsëse dhe e plotë në aromë, për këtë pjatë nuk mbeten fjalë ç’të thuash, thjeshtë të lëpish gishtat  dhe t’i dorëzohesh shijes së saj.

Ndërsa dihet se durimi është një nga tiparet dalluese të gjahtarëve për një gatim ideal të lepurit të egër procesi është pak i gjatë.

Lepuri pasi pastrohet mirë dhe pritet në pjesë, fillimisht lihet për dy-tre orë në ujë e më pas marinohet për 12 orë.

Ky proces bëhet për t’i dhënë mishit të lepurit një shije të plotë e fantastike kombinuar me pjesën tjetër të përbërësve, qepëve, hudhrave dhe domateve.

Më poshtë AgroWeb.org përcjell një recetën tipike të gjahtarëve. Recetën në përgatitjen e një prej gatimeve më speciale që sigurisht mbetet ndër më të pëlqyerat e gjithë trevave shqiptare.

Përgatitja e Çomlekut me Lepur në Shtëpi

Përbërësit

Një lepur i egër vogël, i freskët 1 kg

1 kg qepë të thata

1 kokërr hudhër e plotë

4-5 domate të kuqe të bëra mirë

Kripë

Piper pluhur

Piper kokërr

Gjethe dafinash

Një lugë gjelle me uthull

Gjysmë gote me verë të kuqe ose të bardhë sipas preferencës

Përgatitja

Si fillim mishin e lepurit të ndarë në copë e lëmë në një enë me ujë përreth 2-3 orë duke e ndërruar ujin rreth dy-tre herë.

Më pas, AgroWeb.org i’u udhëzon që mishin e lepurit ta marinoni në vaj ulliri, erëza të ndryshme piper, dafina, uthull e limon.

E lëmë të marinohet rreth 12 orë para se të gatuhet.

Pas marinimit, mishin e lepurit e vendosim në një tenxhere me pak vaj ulliri dhe e vendosim në zjarr.

E kavërdisim pak dhe hedhim një litër ujë.

Ndërkohë, në një tigan hedhim vaj ulliri bashkë me hudhrat e pastruara. Secilin thelpi e ndajmë më dysh në mënyrë që të lëshojë sa më shumë aromë.

I kavërdisim hudhrat me vajin e ullirit për pak sekonda e më pas shtojmë qepët e grira.

I kavërdisim derisa qepët të zverdhen e më pas hedhim domatet e grira në rende. I kavërdisim sa të nisin vlimin. Më pas salcën e krijuar i’a shtojmë lepurit që po zjen.

Shtojmë kripën, piperin dhe dafinën dhe i lëmë të zjejnë për 45 minuta në zjarr të ngadaltë.

Procesin e zjerjes, sipas preferencës mund ta transferojmë edhe në furrë duke hedhur çomlekun e përgatitur në një tavë e më pas e pjekim.

Çomleku me lepur të egër është gatim jashtëzakonisht i shijshëm.

Ai shoqërohet në mënyrë fantastike me sallata të lehta, sallata jeshile me limon apo edhe patate të furrës. Por edhe me turshi të ndryshme e salcë kosi./AgroWeb.org

Xhenxhefil, Mjaltë dhe Kanellë – Për Diabetin, Stomakun, Ftohjet

Çajrat janë një aleat  i rëndësishëm për organizmin në këtë stinë të ftohtë.

Çajrat kanë vlera të forta mjekësore dhe prej shekujsh janë përdorur kundër disa sëmundjesh dhe çrregullimesh.

Kombinimet e çajrave janë të larmishme, por një prej tyre është tepër i veçantë për të mundur sëmundjet.

AgroWeb.org do tju tregojë pë çajin me mjaltë, xhenxhefil dhe kanellë.

Mjalti, xhenxhefili dhe kanella kanë aftësi shëruese të pakundërshtueshme.

Kur bashkohen në një çaj të vetëm, këto tre përbërës bëhen të pamposhtur.

Përbërsit e çajit

Një copë e vogël xhenxhefili 2-3 cm

2 lugë gjelle me lëng të freskët limoni

1 shkop kanelle

1 lugë çaji me mjaltë puro

Një gotë e gjysmë me ujë të pijshëm

Udhëzimet

Ziejeni ujin në një çajnik.

Qëroni xhenxhefilin dhe prijeni hollë.

Kur uji të ketë marrë valë, uleni temperaturën, shtoni xhenxhefilin dhe lëreni të ziejë ngadalë.

Pas disa minutash shtoni kanellën dhe lëreni në ujë për pesë minuta.

Kullojeni ujin në një filxhan dhe më pas shtoni mjaltin dhe lëngun e limonit.

Të dyja do të pasurojnë çajin me vitamina dhe antioksidantë.

Vlerat e Çajit me Mjaltë, Xhenxhefil dhe Kanellë

Shija e këtij çaji është e mrekullueshme, por lexoni më tepër për vlerat e kësaj kure te listuara nga AgroWeb.org.

Çaji është i mrekullueshëm kundër të ftohurës dhe gripit.

Mjalti, xhenxhefili dhe kanella kanë vlera të pranuara gjërësisht nga ekspertët e shëndetit.

Kundër diabetit

Studimet e fundit kanë konfirmuar se pirja e çajit me limon dhe xhenxhefil është efikase në zbutjen e ndikimit negativ që diabeti ka në organizëm.

Diabeti  mund të shkaktojë sëmundjet e zemrës, veshkave, tension të lartë të gjakut, ishemi dhe sëmundje të syve.

Antioksidantët tek ky çaj ju vijnë në ndihmë për të shmangur këto probleme.

Të përzierat, E ftohura dhe Gripi

Një nga arsyet përse njerëzit e preferojnë këtë çaj është se ai është shumë efikas kundër të ftohurës dhe gripit.

Antioksidantët dhe vitaminat në këtë çaj janë shumë efikase edhe në trajtimin dhe parandalimin e të përzierave.

Problemet me tretjen

Ky çaj është shumë i mirë në trajtimin e problemeve me tretjen dhe urthin.

Xhenxhefili është shumë miqësor ndaj stomakut dhe bën mirë kundër urthit, sidomos pas vakteve.

Dhimbjet e kokës dhe inflamacioni

Xhenxhefili është efikas kundër inflamacionit që është një nga burimet më të forta të dhimbjeve kronike.

Inflamacioni mund të shkaktojë një sërë problemesh shëndetësore ndaj duhet shmangur.

Çaji me xhenxhefil është efikas edhe për enët e gjakut.

Qelizat e Dëmshme

Xhenxhefili është një nga kurat më të fuqishme shëndetësore kundër radikaleve të lira dhe qelizave te dëmshme.

Çaji i pasur me antioksidantë ndihmon në riparimin e qelizave të dëmtuara.

Lëkura e thatë

Gjatë stinës së dimrit, lëkura thahet ndjeshëm dhe shkakton kruarje.

Ju duhet të merrni sasitë e duhura të vitaminave A dhe C dhe ky çaj është një burim i mirë vitaminash dhe antioksidantësh.

Provojeni çajin me xhenxhefil, mjaltë dhe kanellë në këto ditë të ftohta dhe do të ndiheni mirë menjëherë./AgroWeb.org

Vetitë Çudibërëse të Milcës, Barit të Bletës

Grekët e lashtë e kanë përdorur barin e bletës që 2000 vjet më parë. Asokohe, bari i bletës ishte një kurë bimore në nder të perëndeshës Diana.

Në mesjetë, bari i bletës përdorej për të lyer plagët, dhimbjet e dhëmbit, kafshimet e qenit, shtrembërimet e qafës dhe të vjellat gjatë shtatzanisë.

Legjenda thotë që bari i bletës përdorej edhe kundër rënies së flokëve. Bari i bletës njihet si melissa officinalis ose lemon balm.

Me kalimin e viteve, bari i bletës është përdorur edhe kundër inflamacionit bronkit, temperaturës dhe dhimbjeve të kokës.

Bari i bletës ndihmon gjithashtu në uljen e tensionit të gjakut,  çrregullimeve të humorit, dridhjeve, të vjellave dhe dhimbjeve të dhëmbëve.

Në mjekësinë popullore, gjethet e barit të bletës kurojne edhe dhimbjet menstruale.

Në Shqipëri, bari i bletës njihet edhe si milcë, mickel në zonat e Krujës, erëx, pselik në zonat e Beratit dhe spelinok siç njihet në Korçë.

Kjo barishte përdoret edhe sot kundër acarimeve nervore, problemeve me pagjumësinë, tretjen dhe spazmat urinare.

Vajrat esencialë të barit të bletës përmbajnë substanca që relaksojnë muskujt, veçanërisht fshikëzën e urinës, stomakun, mitrën.

Organizata të shquara shkencore evropiane përmendin aftësitë e barit të bletës për të kuruar së brendshmi luhatjet e humorit, ankthin, problemet me tretjen dhe herpesin, nëse aplikohet së jashtmi.

Përdorimi i barit të bletës si çaj ka marrë edhe liçensën gjermane për t’u përdorur kundër çrregullimeve të gjumit dhe stimulimit të oreksit.

Bari i bletës konsumohet si çaj, por gjethet e tij mund t’i shtohen edhe sallatave dhe të konsumohet i freskët.

Shumë shqiptarë e kanë barin e bletës pjesë të pandarë të kopshteve të tyre dhe e shijojnë të freskët.

Vetitë e Barit të Bletës

Qartësi mendore, perqendrim dhe qetësim

Bari i bletës përdoret gjërësisht kundër ankthit, stresit dhe pagjumësisë në Evropë. Pak kohë më parë, një studim arriti në konkluzionin që bari i bletës rrit përqendrimin dhe qartësinë mendore.

Ndihmon në studim dhe provime

Një studim i Universitetit Northumbria në Britaninë e Madhe tregoi që nxënësit që konsumojnë barin e bletës arrinin rezultate më të mira në provime dhe në detyrat e shtëpisë për deri 6 orë pas konsumimit të barishtes. Kjo e fundit i bënte ata më të qetë dhe largonte stresin gjatë provimit.

Kundër herpesit dhe virozave

Studimet kanë treguar që bari i bletës përmban disa substanca që ndihmojnë ndjeshëm për trajtimin e virozave dhe viruset që shkaktojnë çrregullime siç është herpesi.

Sipas studimeve, bari i bletës ose kremëra që e kanë atë në përmbajtje shkurtojnë ‘jetëgjatësinë’ e herpesit dhe zbut ashpërsinë e tij.

Për më tepër, bari i bletës ul shanset për rishfaqjen e tij dhe ofron çlirim nga kruajtjet dhe skuqjet. Ky efekt i barit të bletës vjen nga acidi rozmarinik dhe kafeik që gjenden tek bari.

Kundër Pagjumësisë dhe Ankthit

Komisioni E i Institutit Federal Gjerman për Medikamentet dhe Mjekësinë sugjeron përdorimin e barit të bletës kundër çrregullimeve nervore që shkaktojnë pagjumësi dhe parregullsive me tretjen. Komisioni E është një agjensi qeveritare që vlerëson sigurinë dhe efikasitetin e produkteve bimore.

Tiroidet dhe Sindroma e Lodhjes Kronike

Bari i bletës përdoret në Evropë për trajtimin e tiroideve dhe rregullimin e prodhimit të hormoneve nga ana e tyre.

Kjo veti, së bashku me karakteristikat anti-virale të barit të bletës e bëjnë këtë barishte mjaft të dobishme edhe për trajtimin e Sindromës së Lodhjes Kronike.

Alzheimer dhe Skleroza

Bari i bletës përmban vajra esencialë dhe substanca që kanë aftësi qetësuese tek njeriu. Studimet tek njerëzit kanë treguar që nëse bari i bletës merret nga goja ka efekt shumë qetësues.

Në doza të larta, bari i bletës të vë në gjumë. Studime të tjera kanë treguar që bari i bletës përmirëson kujtesën dhe rrit vëmendjen tek individët që vuajnë nga sëmundja e Alzheimer-it.

Kjo ndodh falë përmbajtjes së lartë të antioksidantëve që mendohet të mbrojnë qelizat e trupit nga dëmet që shkaktohen përgjatë një proçesi kimik të quajtur ‘oksidim’.

Çaji i Barit të Bletës

Mjaft nga vetitë e barit të bletës përfitohen në formën e çajit duke përdorur gjethe të njoma ose të thata. Një gusht me gjethe të tilla zjehen për 7 minuta bashkë me 300 ml ujë. Filtrojeni dhe lëngut mund t’i shtoni pak mjaltë dhe mund ta pini 2-3 herë në ditë./AgroWeb.org

Produktet Me Kimikate Që Po Helmojnë Shqiptarët

Konsumatori ёshtё vazhdimisht i ekspozuar ndaj kimikateve, tё cilat pёr fat tё keq janё tё fshehura mirё nё shumë produkte ushqimore, mjekёsore, pёrdorimit vetiak apo atij shtёpiak.

Kimikatet gjenden edhe nё ajrin qё na rrethon.

Shumё prej kёtyre produkteve janё tё zbukuruara me etiketa shumёngjyrёshe me tё cilat konsumatori joshet tё besojё se produktet nё fjalё janё natyrale, tё sigurta pёr fёmijёt apo tё pёrgatitura me produkte natyrale dhe organike.

AgroWeb.org ka pёrgatitur njё listё me produktet toksike qё na bёjnё dёm dhe duhen shmangur medoemos.

Jo vetёm qё produktet e mёposhtme janё njё kёrcёnim pёr organizmin, por ato janё rrezik akoma mё i madh pёr shёndetin e fёmijёve.

Ushqimet e pёrpunuara

Ushqimet e shpejta janё zakonisht tё pёrpunuara, tё skuqura, tё homogjenizuara, tё hidrogjenizuara dhe tё mbushura me aditivё dhe kimikate.

Mёnyra mё e mirё pёr tё parandaluar ushqimet e pёrpunuara ёshtё t’i konsumoni sa më rrallë, të blini vetёm produkte natyrale dhe tё lexoni me kujdes etiketat.

Toksinat nё produktet e kujdesit vetjak

Ndoshta ёshtё e vёshtirё pёr njё konsumator tё njohё tё gjithё pёrbёrёsit e produkteve tё higjenёs personale.

Pёr shembull, llaku i flokёve dhe açetoni i thonjve pёrmbajnё ftalate, qё shkakton probleme mё vёmendjen dhe i shpёrqendron fёmijёt.

Pasta e dhёmbёve pёrmban njё neurotoksinё si flouridi, që nuk duhet konsumuar nëse ka më shumë se 1600 njësi në etiketë, sidomos për fëmijët.

Shampot dhe produktet e tjera pёr fёmijё përmbajnë:

Sulfatin Laureth, (njё kimikat shumё i rёndё qё shkakton alergji)

1,4-dioxane (element shtazor qё shkakton kancer)

Formaldehyde (neurotoksinё qё çrregullon zhvillimin)

Mё e keqja nga tё gjitha Parfum, njё pёrzierje e mbi 3000 kimikateve tё rёnda tё cilat kompanitё pёr fatin tonё tё keq nuk janё tё detyruara me ligj t’i tregojnё.

Kimikatet nё detergjentёt larёs

Detergjentёt larёs pёrmbajnё fosfor, enzima, amoniak, naftalinë, phenol dhe sodium nitilotriacetat.

Tё gjithё kёto kimikate me emra tё pakuptueshёm qё shkaktojnё kruarje, njolla, tharje tё lёkurёs dhe probleme me sinozitin.

Kёto kimikate pёrthithen lehtёsisht nga lёkura nёpёrmjet çarçafёve dhe rrobave ndaj nuk është habi numri gjithmonë në shtim i shqiptarëve me sinozit.

Produktet toksike tё pastrimit dhe aromatikët e ambjenteve

Disa prej pёrbёrёsve mё tё zakontё qё gjenden nё produktet e pastrimit tё shtёpisё pёrfshijnё shumё kimikate siç janё:

2-BE (qё shkakton probleme me fertilitetin)

Amoniak (qё shkakton dёme tek veshkat dhe mёlçia)

Bojra qymyri (qё shkaktojnё kancer dhe dёmtojnё sistemin nervor) dhe tё famshmen aromё tё “mirё”.

Aromatikët e ajrit pёrmbajnё aromё me bazё kimikatesh dhe ju mund ta zёvёndёsoni me ujё dhe vajra esencialё natyralë.

Pesticidet

Pesticidet mund tё gjenden kudo tashmё: nё shtёpi, nё ambientin qё na rrethon, nё ushqim dhe nё pije.

Mёnyra mё e mirё pёr tё shmangur pesticidet ёshtё qё të blini gjithçka sa më natyrale, duke nisur nga ushqimi, veshjet tuaja dhe tё fёmijёve, ose tё pёrdorni uthull apo sodё pёr tё pastruar frutat dhe perimet.

Pijet e gazuara

Pijet e gazuara pёrmbajnё shumё acid fosforik qё shkakton probleme tek fёmijёt.

Sipas njё studimi tё Universitetit tё Harvardit, konsumi i kёtyre pijeve mund tё shkaktojё tumore, obezitet, diabet, por edhe mund tё shkaktojё edhe pjekuri seksuale mё tё hershme tek vajzat.

Pijet e gazuara pёrmbajnё njё sёrё ёmbёlsuesish artificialё, sheqerna, aspartam dhe pёrbёrёs tё tjerё tё dёmshёm.

Ёmbёlsuesit artificialё

Ёmbёlsuesit artificialё mund tё gjenden tek mjaft ushqime. Ata shkaktojnё sёmundjet e zemrёs, diabet, tension tё lartё tё gjakut dhe goditje nё tru.

Ёmbёlsuesit artificialё stimulojnё oreksin, rrisin dёshirёn pёr karbohidrate dhe shkaktojnё çrregullime tё metabolizmit.

Studiuesit nё Universitetin e Yale kanë zbuluar njё lidhje tё fortё mes obezitetit tek fёmijёt dhe konsumit tё ёmbёlsuesve artificialё.

Shishet dhe enёt plastike tё ushqimit

Njё studim gjerman nxorri nё pah se disa kimikate qё gjenden nё shishet plastike tё ujit tё 18 markave tё ndryshme Evropiane ndёrhynin nё sistemin e hormoneve njerëzore.

Ato shkaktonin difekte nё lindje, çrregullime kardiovaskulare, çrregullime me metabolizmin dhe probleme tё tjera me zhvillimin.

Pёrbёrёs tё tjerё tё enёve plastike tё ushqimit dhe shisheve plastike janё: bisphenol-A (BPA) dhe bisphenol-S (BPS), tё cilat pengojnё zhvillimin e trurit. Ju duhet tё pёrdorni gjithnjё enё qelqi pёr ushqimet tuaja.

Lodrat

Lodrat e fёmijёve pёrmbajnё shumё elementё tё rrezikshёm. Disa prej kompanive mё nё zё tё prodhimit tё lodrave nё botё pёrdorin material toksike siç ёshtё formaldehyde.

Kujdes

Edhe nёse nuk jeni prindёr, kjo listё me ushqime dhe produkte toksike ka ndikim edhe nё jetёn tuaj.

Toka dhe trupat tanё janё shtёpia jonё ndaj duhet tё kujdesemi pёr ta dhe tё shmangni pёrdorimin e kimikateve dhe toksinave. /AgroWeb.org 

Kajota – Vlerat e rralla të perimes dardhë

A keni vënë re në tregjet shqiptare një perime të re që ngjan si një dardhë por ka shijen e kungullit?

Kjo perime mban emrin Kajota, por ndryshe njihet edhe si perimja dardhë. Kjo perime është pjesë e familjes botanike që përfshin edhe trangullin dhe kungujt.

Bima e kësaj perimeje kërkon një tokë të lagësht por me një sistem kullimi të mirë dhe një mot të ngrohtë.

Në habitatin e tyre natyral, kjo bimë hardhi arrin edhe të kapërcejë pemët e larta dhe të rritet krah tyre.

Nëpër ferma, rritja e bimës së Kajotës është më e kontrolluar. Hardhitë e kajotës çelin lule të bardha të vogla që pllenohen nga bletët.

Perimet dardhë piqen dhe janë gati për t’u mbledhur 30 ditë pas pllenimit. Çdo bimë mund të prodhojë deri në 150 kokrra në një stinë.

Kokrrat e kajotës kanë një ngjyrë të gjelbër të çelët ose të verdhë. Në disa raste, lëkura e tyre është e lëmuar dhe në disa raste me gjemba.

Tuli i Kajotës është i bardhë dhe përmban një bërthamë të bardhë në formë vezore. Shija e kajotës është relativisht e ëmbël, madje mund të krahasohet me kungullin.

Vlerat shëndetësore të Kajotës

– Ashtu si edhe kungulli, Kajota është një nga perimet që përmbajnë pak kalori: 16 kalori në 100 gramë. Kjo perime nuk përmban yndyrna të ngopura apo kolesterol. Megjithatë ajo është e pasur me fibër dietike, minerale dhe vitamina.

Duke qenë se është një perime me pak kalori dhe e pasur me fibër, rekomandohet shpesh për ata që duan të ulin nivelin e kolesterolit dhe të mbajnë peshën nën kontroll.

– Kajota është një burim i pasur i kompleksit të vitaminës B, dhe folatit. Në 100 gramë të kësaj perime gjeni 23% të dozës së rekomanduar ditore të vitaminave. Ndikimi dhe roli i folatit para dhe gjatë shtatzanisë është i jashtëzakonshëm.

– Dardhat Kajote janë një burim i mirë i vitaminës C dhe i kompleksit të vitaminës B si thiamina, riboflavina, dhe minerale si hekuri, mangani, fosfori, zinku dhe bakri.

Përzgjedhja e kajotës dhe ruajtja

Zgjidhni gjithmonë kokrrat e një madhësie mesatare, me ngjyrë të freskët si ajo e mollës jeshile dhe të forta.

Kokrrat me një përmasë të madhe kanë lëkurë dhe tul më të fortë që nuk shijon shumë.

Shmangni furnizimet me kokrra të vjetra dhe kini kujdes për lëkurën e kajotës që ajo mos të jetë e nxirë, e gërvishtur, e çarë.

Në shtëpi, ruajini në një qese letre në frigorifer për deri në 3 javë. Kokrrat e mëdha dhe ato të vjetra prishen shpejt, ndaj nuk duhet t’i konsumoni me vonesë.

Përgatitja dhe servirja

Kajotat mund të përdoren në sallata të ndryshme siç është ajo e lakrës.

Lajeni kajotën mirë me ujë të bollshëm. Fërkojeni nëse lëkura është shumë e ndotur. Prisni bishtin dhe fundin e saj.

Nëse keni kokrra të freksëta dhe të vogla nuk duhet hequr lëkura, por kokrrat e mëdha duhen qëruar.

Në momentin e qërimit, kokrrat e mëdha lëshojnë një lëng që mund të shkaktojë irritimin e lëkurës. Mbani doreza dhe përdorni ujë të rrjedhshëm.

Priteni dardhën në copa dhe shtojeni në sallatat që kombinohen me lakër, panxhar, pastinak, fruta deti, kërpudha, qepë, misër, djathë dhe fruta./AgroWeb.org 

Kombinimi i Shegëve me Boronicat – Cilat Probleme Shmang në Organizëm

Shegët shqiptare dhe frutat vendase të pyllit janë një zgjedhje e shkëlqyer për organizmin.

Kjo vlen për vetë faktin se këto fruta të tokave shqiptare janë natyralisht të pasura me sheqerna natyralë, vitamina dhe minerale.

Shegët dhe boronicat në veçanti përmbajnë fitoushqyes siç janë polifenolët, flavonolët dhe anthocianinë, të cilat janë antioksidantë të fuqishëm.

Këta të fundit shfarosin radikalet e lira të cilat sulmojnë qelizat dhe çelin rrugën shfaqjes së sëmundjeve të rrezikshme kronike.

Shegët dhe boronicat janë plot me vitamina, por kjo nuk është e vetmja arsye përse të dyja mund të përgatiten si lëng. E mira e të mirave është se shija e këtyre frutave përputhet dhe intensifikohet ndjeshëm.

Një racion me lëng 100 përqind boronice dhe shege është e barazvlefshme me pesë racione në ditë me fruta dhe perime.

Për fat të mirë ky lëng mund të përgatitet shumë lehtë në shtëpi dhe në këtë mënyrë ju do të keni plotësuar nevojën ditore për fruta dhe perime.

Kjo nuk është e vetmja arsye përse ju duhet ta konsumoni këtë lëng. Ekspertët e AgroWeb.org shpjegojnë se ky lëng është i shumë pasur me vlera shëndetsore.

Ushqyesit

Lëngu i shegës dhe boronicës është një burim i shkëlqyer antioksidantësh, vitamine C dhe K.

Lëngu i shegës është një burim i mirë i acidit folik dhe bakrit ndërsa lëngu i boronicës është një burim i mirë i manganit.

Kombinimi i këtyre dy lëngjeve sjell shumë përfitime në një gotë.

Megjithatë, duhet të dini që shumica e lëngjeve të frutave që blini në treg kanë lëng molle ose rrushi shtesë që synon të zbusë aromën e fortë dhe karakteristike.

Shtesa të tilla minimizojnë nivelet e vitaminave në përmbajtje të lëngut përveç vitaminës C.

Përfitimet

Antioksidantët në këtë lëng përmirësojnë kujtesën, luftojnë sëmundjet e zemrës, ulin kolesterolin dhe shmangin disa lloje problemesh tumorale.

Një studim tregoi se njerëzit që pinin lëng boronice ishin ndjeshëm më të mirë në ushtrimet që masin nivelin e kujtesës apo të të mësuarit.

Ekspertët e AgroWeb.org shprehen se lëngu i shegës arrijnë të përmirësojë profilin e lipideve dhe të ulë kolesterolin.

Ndërkohë studimet e tjera kanë treguar se boronicat janë të pasura me përbërës që luftojnë radikalet e lira dhe parandalojnë sëmundjet e zemrës.

Si të bëni lëngun e boronicave dhe shegës në shtëpi

Përbërësit

2 gota me kokrra shege

1 gotë me boronica

Udhëzimet

Shtrydhini kokrrat sipas renditjes së mësipërme. Përziejeni lëngun dhe konsumojeni menjëherë. Me këtë sasi frutash përfitohen 1-2 gota lëng.

Në rastin e shegëve, pastrojini kokrrat nga shtresa e bardhë e cila e bën shijen më të hidhur.

Për ta hapur shegën çajeni atë në pjesën fundore dhe në pjesën e sipërme.

Më pas bëni 6 prerje të vogla dhe hapeni frutin me duar.

Përdorni doreza dhe përparëse sepse lëngu i shegës lë njolla. Për të shmangur këtë, ju mund ta hapni shegën edhe në një tas me ujë.

Kokrrat do të bien në fund, ndërsa shtresa e bardhë do të ngrihet në sipërfaqe. Kullojeni ujin dhe shtrydhini kokrrat./AgroWeb.org

Sheqerpare – Tradita e Ëmbël e Shqipërisë

Me arra apo bajame, e sherbetosur dhe e shkrifët, sheqerparja mbetet ndër recetat më unike të amvisave shqiptare  

Tradita shqiptare e ëmbëlsirave është e pasur me receta të mrekullueshme por ajo e sheqerpares është padyshim më e veçanta.

Është gostia më e mirë për miqtë, ëmbëlsia më e dashur për familjen e sigurisht receta për të cilat të gjitha trevat shqiptare krenohen se është traditë e tyre.

Dibra ka recetën e saj fantastike, aq sa prej dekadash tashmë njihet emërtesa e Sheqerpare Dibrane.

Elbasani e Tirana po ashtu si edhe qytetet jugore, Berat, Gjirokastër a Korçë krenohen për traditën e tyre të sheqerpares, e cila në fund të fundit mbetet shqiptare.

Megjithëse  një traditë e huazuar qindar vite më parë nga Turqia, sot kjo ëmbëlsirë e përvetësuar nga mjeshtëria e amvisave ndër shekuj ka vendin e saj në kuzhinën e mrekullueshme shqiptare.

AgroWeb sjell recetën e famshme  të përgatitjes së sheqerpares në shtëpi, shumë e lehtë për t’u përgatitur me një dimension të fortë shijeje për t’u ëmbëlsuar.

Si të përgatisim sheqerparen krejt lehtë në shtëpi

Përbërësit për brumin

250 gramë miell

100 gramë gjalpë

100 gram sheqer

1 kokërr vezë

2 lugë gjellë kos i bardhë

1 lugë e vogël me maja për ëmbëlsira

Pak kripë

Disa thelpinj arrash dhe bajamesh

Për përgatitjen e sherbetit

200 gramë sheqer

200 ml ujë

2 lugë lëng limoni

1 lugë çaji me vanilje pluhur

Procesi i përgatitjes

Si fillim përgatisim sherbetin. AgroWeb.org ju kujton të bëni kujdes që sherbeti të jetë i ftohtë në momentin që do t’u hidhet ëmbëlsirave.

Në një tenxhere hedhim ujin dhe sheqerin dhe i vendosim në zjarr që të vlojnë.

Në momentin që nisin të zjejnë, hedhim lëngun e limonit dhe e lëmë në zjarr të ngadaltë për 5 minuta.

Më pas, e heqim nga zjarri dhe e lëmë të ftohet.

Ndërsa sherbeti ftohet, nisim përgatitjen e sheqerpareve.

Në një enë të bollshme hedhim miellin, majanë, sheqerin, vezën, kosin dhe i përzjejmë që të gjitha bashkë derisa të njëtrajtësohen, më pas, hedhim gjalpin e shkrirë dhe pak fare kripë.

I përzjejmë me dorë të gjithë përbërësit derisa masa e përftuar të jetë e njëtrajtshme.

Më pas në një tavë shtrojmë letrën e kuzhinës, ndajmë brumin në forma ovale të sheshta dhe në mes krijojmë një gropëz të vogël ku vendosim nga një thelpi arre ose bajame.

Të gjitha sheqerparet e përgatitura i shtrojmë me rregull në tavë.

AgroWeb.org ju këshillon që sheqerparet të mos i vendosni shumë pranë njera tjetrës sepse gjatë procesit të pjekjes do fryhen në përmasat e tyre.

Ndërkohë ngrohim furrën në temperaturën 180 gradë celcius. Pasi furra të jetë nxehur fusim tavën me sheqerpare dhe i lëmë të piqen përreth 30 minuta derisa sheqerparet të marrin ngjyrë të praruar, të artë.

Pasi shqeqerparet janë pjekur, i heqim nga furra dhe siç janë të nxheta u hedhim përsipër sherbetin e ftohtë.

I vendosim në një pjatancë me rradhë dhe më pas i servirim për ti shijuar me familjen ose me miqtë./AgroWeb.org

 

Mëlçia – Si të Dalloni Shenjat e Para të Problemeve në Organizëm

Mëlçia është një organ tejet i rëndësishëm në trupin e njeriut. Ka shumë role të rëndësishme si pastrimi i gjakut, luftimi i infeksioneve të ndryshme dhe ndihmon në tretjen e ushqimit.

Një nga veçoritë më kryesore të mëlçisë theksohet fakti që është organi i vetëm në trup që rregullon veten në rast dëmtimi. Por dëmtimi i mëlçisë duhet të kapet në kohë.

Disa shenjat kryesore të dëmtimeve të mëlçisë

Çehre e verdhë

Nëse mëlçia nuk funksionon siç duhet për shkak të niveleve të larta të bilirubinës të akumuluar në gjak, lëkura dhe sytë bëhen të verdhë për shkak të ngjyrës së bilirubinës. Kjo gjendje njihet si verdhëz.

Sëmundja shfaqet kur mëlçia është dëmtuar dhe nuk është në gjendje të përpunojë bilirubinën.

Ky lloj i dëmtimit të mëlçisë mund të shkaktohet nga përdorimi i tepruar i substancave toksike, infeksionet, përdorimi i tepruar i alkoolit, hepatitit, tumoreve dhe nga përdorimi i drogës.

Ënjtje

Mëlçia e dëmtuar mund të shkaktojë ënjtje të trupit. Nëse mëlçia është dëmtuar, nuk mund të funksionojë siç duhet dhe të bëjë punën e saj. Kjo sjell akumulim të ujit në trup dhe gjymtyrë, në shumë raste tek këmbët dhe barku.

Nxirje

Nëse keni probleme me mëlçinë, trupi nxihet më shpejt dhe më shumë në rast dëmtimi. Po ashtu edhe kur priteni apo çaheni, gjakderdhja është më e zgjatur dhe mpiksja më e vështirë.

Arsyeja për këtë është prodhimi i reduktuar i proteinave të nevojshme për mpiksjen e gjakut. Mëlçia prodhon faktorë të koagulimit dhe nëse është dëmtuar ata nuk mund të prodhohen.

Kruajtje

Simptoma të tjera të sëmundjes së mëlçisë janë kruajtja, dështimi i veshkave dhe problemet me gjëndrën tiroide. Kruajtja fillon si shqetësim acarues, shfaqet në vende të ndryshme të lëkurës.

Probleme me tretjen21

Problemet me mëlçinë arrijnë të sjellin ndryshime në ngjyrën e jashtëqitjes. Nëse vuani nga këto probleme, jashtëqitja bëhet më e zbehtë dhe ngjyra e urinës bëhet më e errët.

Asnjë simptomë

Në disa raste, mëlçia e dëmtuar mund të mos tregojë ndonjë simptomë ose shenjë. Në këto raste njerëzit nuk janë as të vetëdijshëm për problemet. Është tronditëse që gati gjysma e pacientëve nuk kanë simptoma. Ata vetëm vënë re lodhje të vazhdueshme, kruarje dhe mungesë të energjisë.

Nëse sëmundja e mëlçisë nuk trajtohet në kohë, pacientët mund të bëhen të çorientuar, të hutuar dhe shumë të përgjumur. Në rastet më të këqija pacientët mund të përjetojnë koma dhe madje specialistët tregojnë për situata fatale për shëndetin./AgroWeb.org

Shtimi i Rasteve me Anemi – Ushqimet që Duhet të Përdorni

Anemia është sëmundja që lidhet me uljen e numrit të rruazave të kuqe të gjakut dhe pakësimin e përqindjes së hemoglobinës.

Së fundmi është kthyer në një nga problemet shëndetësore kryesore të shqiptarëve bazuar në të dhënat e mbledhura nga AgroWeb.org dhe kontaktet me mjekët e specializuar në qendrat e kujdesit shëndetësor të vendit.

Të prekurit nga anemia kanë lëkurë dhe mukoza të zbehura, lodhen shpejt, ndjejnë këputje dhe apati, nuk kanë oreks dhe shfaqin ulje të presionit arterial. Ata që vuajnë nga anemia kanë edhe rrahje të shpejta të zemrës, vështirësi në frymemarrje, dhimbje koke, marrje mendsh dhe shikim të turbullt.

Anemia sjell uljen e përqendrimit të oksigjenit në gjak dhe në inde, duke lehtësuar zhvillimin e infeksioneve të ndryshme.

Specialistët e Shëndetit Publik tregojnë për AgroWeb.org se shtimi i rasteve të anemisë së fundmi ka lidhje me problemet në ushqim. Një faktor kryesor është mosmarrja prej organizmit e lëndeve të nevojshme ushqimore, të vitaminave dhe mineraleve, sidomos të hekurit.

Gjendja anemike përcaktohet saktë vetëm nga analiza laboratorike e gjakut, që tregon numrin e rruazave të kuqe. Në forma të lehta dhe mesatare nuk ka nevojë për regjim shtrati, por duhet patur duhet kufizuar aktiviteti fizik. Për format më të rënda duhet patjetër regjim shtrati ose trajtim mjekësor.

Të ushqyerit kundër Anemisë

Ushqimet duhet të jenë të pasura me vitamina, minerale dhe sidomos me proteina. Anemikët duhet të konsumojnë vezë, peshk, qumësht, gjalp të freskët, lakra të freskëta, spinaq, karota, brokoli, panxhar dhe shumë fruta.

Trajtimet me produkte të Natyrës

Mjekësia tradicionale përdor disa bimë që përmirësojnë aneminë dhe rruazat e kuqe të gjakut.

1. Merrni 1-2 lugë kafeje prej bimës së bluar të pelinit. Hidheni në një gotë ujë dhe zijeni për 15min. Përdoreni 3 herë në ditë nga 1 lugë gjelle, gjysëm ore para buke. Kura vazhdon 1-2 muaj rrjesht, deri në përmirësimin e plotë.

2. Merrni 1 lugë gjelle nga fletet e grimcuara të thata të hithrës. I zieni në një gotë me ujë për 15min. Pasi ta filtroni, ëmbëlsojeni me pak mjaltë. Pijeni 3 herë në ditë nga 1 gotë për 1 muaj rrjesht.

3. Rrënjët e Sanzës (Gentiana Lutea) shërbëjnë për aneminë. Merrni 10 gr me bimë të bluar. Zijeni në 1 litër uje për 15min. Kullohet dhe pijeni 2-3 filxhana në ditë para buke./AgroWeb.org

Valbona – Shikoni Shkatërrimin e Paralajmëruar të Perlës Shqiptare

Ka një vit që hidrocentralet e para po hedhin shtat në Parkun Kombëtar të Valbonës.

Ka një vit që nuk ka më Valbonë!

Lugina e Valbonës kishte statusin e Parkut Kombëtar prej 1996 dhe pritej të shndërrohej në asetin më të rëndësishëm turistik në vend.

Ajo do të bëhej pjesë e një parku gjigant që do të bashkojë kurorën e Alpeve me Kosovën e Malin e Zi.

Por përgjatë lumit që i jep emrin Parkut, do të ndërtohen 11 hidrocentrale.

Një prej tyre, më i madhi është Hidrocentrali i Dragobisë.

Kompania ndërtuese pretendon se ka marrë miratimin e banorëve të zonës duke treguar një listë.

Por banorët thonë se lista është e manipuluar, madje në të ka emra të personave që kanë vdekur prej kohësh.

Në fund të lajmit keni dy materiale filmike që flasin vetë për shkatërrimin e Valbonës. Mos i humbni pa i parë!

Çfarë thonë banorët e Luginës së Valbonës

“Valbona nuk është e jona, ne jemi shërbëtorë të saj! Kur s’ka pasur shtet fare, e kemi mbrojtur me gjak se Valbona do të ishte e Serbisë sot.

Lumi është palca e luginës së Valbonës, na duket banale ndërtimi i hidrocentraleve këtu. Përfitimet janë individuale, nuk janë të zonës, është shumë më dinjitoze t’i rishohin vendimet pasi ajo që po ndodh është turp”, tregojnë banorët.

Çfarë thonë turistët e huaj për Luginën së Valbonës

Valbona para se të niste ndërtimi i hidrocentraleve. Foto: Miqtë e Valbonës

‘Është një nga vendet më mahnitëse të botës, që kam pasur fatin ta shoh, t’i ndjej e t’i thith ajrin e pastër, të mbushem me frymë e t’i shijoj gjithçka të mrekullueshme që ka.’

Me këto fjalë të përzgjedhura, Larissa Olenicoff, një publiciste ruse, përshkruan Luginën e Valbonës, pas eksperiencës së saj në këtë vend.

‘Çfarëdo udhëtimi të keni ndërmend të bëni, aktiv, shplodhës, romantik, reflektiv, apo edhe të gjitha bashkë nëse doni, të jeni të sigurt se nuk do të zhgënjeheni.

Ajri i freskët në ato lartësi s’ka të paguar ashtu si trofta e famshme aq e shijshme që peshkojnë nga lumi Valbona.

Ka rreth 200 km shtigje udhëtimi që mund t’i eksplorosh përreth Parkut Kombëtar, ose për ata që janë në kërkim të rehatisë dhe relaksit.

Edhe sikur thjesht të udhëtoni me makinë deri në fund të rrugës, do t’ju ikë mendja nga kjo mrekulli.’

Por Larissa ka rastisur të dëgjojë e të jetë personalisht dëshmitare e një lajmi të keq, të cilin e përshkruan kështu:

‘Por ja ku po ju them edhe një lajm të keq. Ky vend kaq special, i cili ka mbetur ende i virgjër ndryshe nga nga shumë vende të bukura natyrore në rajon, edhe falë të qenurit i izoluar, tani është në rrezik.

Çfarë thonë agjensitë e huaja turistike

Valbona gjatë punimeve të ndërtimit të HEC-eve. Foto: Miqtë e Valbonës

Një kompani turistike me bazë në Britaninë e Madhe i ka dërguar një kërkesë Kryeministrit Rama, që të ndalë ndërtimin e hidrocentraleve në Valbonë.

‘Ne jemi një kompani e fokusuar në vendet e Ballkanit Perëndimor, ndërsa kemi punuar me partnerë turizmi në Veri të Shqipërisë për disa vite rresht.

Klientët tanë, të cilët kanë vizituar Shqipërinë dhe kanë takuar mikpritësit vendas, janë mahnitur gjatë eksperiencës së tyre, duke rrëfyer mbi mjedisin natyror spektakolar si dhe kulturën aq unike e autentike.

Majat e Ballkanit dhe shtigjet që shtrihen përgjatë zonave të thella të Thethit dhe Valbonës, kanë marrë një famë ndërkombëtare si një nga destinacionet më të mira në botë për pasionantët e ngjitjes në male.

Së fundmi kemi dëgjuar për planet e zhvillimit të një projekti hidrocentralesh në Valbonë. Duke vëzhguar disi më në detaje, jemi thellësisht të shqetësuar për këtë propozim.

Ekzistojnë shumë pak zona vërtet të paprekura, vërtet të egra natyrore që kanë mbetur në Evropë. Valbona është një ndër këto të pakta vende.

Çfarë pasojash do të ketë Valbona?

Valbona si ishte dhe si është. Foto: Miqtë e Valbonës

Pasojat e pritshme të një zhvillimi hidroenergjetik do të ishin shkatërruese për mjedisin, për komunitetet lokale, për trashëgiminë e tyre kulturore dhe për industrinë e turizmit në rajon.

Në botën e sotme, ajo çka po vlerësohet gjithnjë e më shumë janë ato vende të cilat nuk po e ekzagjerojnë me zhvillimin dhe që ruajnë ende gjallë trashëgiminë e tyre kulturore dhe natyrore.

OJF TOKA dhe të gjithë miqtë vendas dhe të huaj të Valbonës protestuan në fundjavë para kryeministrisë. Qeveria e sotme shqiptare, edhe pse ka pranuar në tërësi se koncesionet nuk duhej të ishin dhënë, nuk duket se shqetësohet shumë për zbatimin e tyre.

Foto nga protestat e fundit kundër shkatërrimit të Valbonës: Foto: Miqtë e Valbonës

Qeveria pretendon se nuk mund të bëjë asgjë, pasi e ka “trashëguar” problemin.

Po kush do ta trashëgojë shkatërrimin e Valbonës? /AgroWeb.org

Ndiqni këtë video që tregon qartë Shkatërrimin e Valbonës

Ndiqni këtë video që tregon qartë Ish – Madhështinë e Valbonës

 

Shëndeti i Veshkave Nis në Tryezë – Cilat Janë Ushqimet Më të Mira

Shëndeti i veshkave është thelbësor për mirëqenien tonë.

Problemet me veshkat shkaktojnë sëmundje të tjera kardiovaskulare.

Për fat të mirë ka disa ushqime që i mbajnë veshkat të shëndetshme, falë antioksidantëve që janë armiq të sëmundjeve kronike.

Ndaj është shumë e rëndësishme që të ushqeheni me ushqime të pasura me antioksidantë, të cilat do t’i gjeni në listën e mëposhtme të përpiluar nga AgroWeb.org

Ushqimet më të mira për veshkat

Specat e kuq

Specat e kuq përmbajnë pak kalium por shumë vitamina si C, B6, A, acid folik dhe fibër. Janë shumë të mira për shëndetin e veshkave.

Specat e kuq përmbajnë likopen, një antioksidant që e mbron organizmin nga radikalet e lira.

Specin e kuq mund ta konsumoni bashkë me peshkun ton, mishin e pulës ose në sallata.

Lakra

Kjo perime është e pasur me fitoushqyes që largojnë radikalet e lira nga organizmi dhe pakësojnë rrezikun e sëmundjeve kardiovaskulare.

Sipas ekspertëve të AgroWeb.org, kjo perime përmban vitaminat K dhe C, fibër, vitaminat B6, dhe acid folik që i mban veshkat të shëndetshme.

Lulelakra

Kjo perime miqësore me veshkat është një burim i pasur me vitaminë C, folat dhe fibër.

Ajo ka edhe disa përbërës të rëndësishëm për mëlçinë dhe neutralizon substancat toksike.

Lulelakra konsumohet e gatuar me avull, e zier si edhe përfshihet në sallata.

Hudhra

Lufton inflamacionin dhe kolesterolin. Ajo përmban antioksidantë dhe parandalon mpiksjen e gjakut, duke i ardhur në ndihmë veshkave.

Hudhra përdoret në shumë gatime si me me mish, perime, peshk dhe salcë domate.

Qepët

Qepët përmbajnë flavonoidë dhe kuercetinë që parandalojnë depozitimin e yndyrnave në enët e gjakut.

Kuercetina është një antioksidant që mban larg sëmundjet e zemrës.

Ekspertët e AgroWeb.org shpjegojnë se qepët janë shumë të mira për veshkat dhe kanë pak kalium.

Ato përmbajnë krom që ndihmon në metabolizimin e yndyrnave, proteinave dhe karbohidrateve.

Mollët

Një mollë e vetme është burim i pasur fibre dhe substancash që luftojnë inflamacionin.

Ajo largon kolesterolin e keq, shmang konstipacionin dhe sëmundjet e zemrës.

Ky frut i bukur mund të konsumohet edhe si pije e shijshme.

Frutat e pyllit

Boronicat përmbajnë anthocianidinë, një antioksidant që largon toksinat dhe inflamacionin.

Ato përmbajnë vitaminë C, fibër dhe mangan. Boronicat bëjnë mrekullira edhe për kockat.

Mjedra përmban një acid që neutralizon radikalet e lira në organizëm.

Luleshtrydhet janë të pasura me antioksidantë, vitaminë C, mangan, fibër por edhe shumë subtanca kundër inflamacionit, që garantojnë shëndetin e zemrës dhe veshkave.

E bardha e vezës

Përbën proteinën më të pastër dhe më cilësore që mund të gjendet në tokë.

Ajo përmban amino acide të rëndësishme dhe pak fosfor që e bën fantastike për shëndetin e veshkave.

Peshku

Peshku është një burim i pasur proteinash. Rekomandohet që të konsumoni dy ose tre herë peshk në javë.

Peshku përmban acidet yndyrore omega-3 që parandalon radikalet e lira dhe sëmundjet e zemrës.

Peshku është i dobishëm kundër kolesterolit të keq dhe rritjes së nivelit të kolesterolit të mirë.

Vaji i ullirit

Vaji i ullirit përmban acid oleik që mbron organizmin kundër oksidimit.

Për më tepër, polifenolët dhe antioksidantët luftojnë inflamacionin dhe mbajnë veshkat të shëndetshme.

Nëse i kushtojmë trupit më shumë vëmendje se bukurisë së jashtme, do të ndihemi dhe do të dukemi më mirë se kurrë.

Shëndeti i veshkave është thelbësor për një organizëm të shëndetshëm dhe jetë të qetë./AgroWeb.org

Vlerat e Ujit të Ngrohtë në Përtëritjen e Organizmit

Uji është i pazëvëndësueshëm për shëndetin. Ai është mbështetja më e fortë për lëkurën, muskujt dhe gjymtyrët.

Uji ndihmon qelizat e organizmit të përthithin më mirë ushqyesit dhe të luftojnë infeksionet.

Pirja e një gote me ujë të vakët ose të ngrohtë çdo ditë i shton përfitimet në organizëm.

Ndonëse kërkimet shkencore për këtë temë janë të kufizuara, avokatët e mjekësisë alternative betohen në vlerat e ujit të ngrohtë në përmirësimin e shëndetit.

Përfitimet e Ujit të Ngrohtë në Organizëm

Pirja e ujit pavarësisht temperaturës është thelbësore për mirëqenien.

Njerëzit e kanë pirë ujin e ngrohtë prej mijëra vitesh.

Recetat mjekësore popullore janë të mbushura me rekomandime për rëndësinë e ujit të ngrohtë.

Kjo ka shërbyer si shtysë për disa shkencëtarë që të nisin studimet mbi vlerat e pirjes së ujit të ngrohtë.

Më poshtë do të gjeni tetë vlerat e rëndësishme të ujit të ngrohtë për organizmin.

Tretje më e mirë

Kur nuk pini ujë mjaftueshëm, zorrët mjaftohen me ujin që futet në organizëm nga ushqimet dhe pijet.

Një gjë e tillë shkakton dehidratim dhe vështirëson lëvizjen e zorrëve.

Dehidratimi kronik shkakton konstipacion dhe dhimbje të zorrëve, hemorroide dhe fryrje.

Uji i ngrohtë ndihmon në shpërbërjen e ushqimit më shpejt se uji i ftohtë apo i vakët.

Uji i ngrohtë pakëson rrezikun e konstipacionit duke ndihmuar zorrët të lëvizin më mirë.

Pastron organizmin

Ekspertë të mjekësisë alternative thonë se uji i ngrohtë ndihmon në pastrimin e organizmit.

Uji i ngrohtë rrit temperaturën e trupit dhe nxit djersitjen.

Nëpërmjet djersës, organizmi nxjerr toksinat dhe pastron poret.

Përmirëson qarkullimin e gjakut

Uji i ngrohtë zgjeron enët e gjakut dhe përmirëson qarkullimin e gjakut.

Në këtë mënyrë, muskujt janë të qetësuar dhe dhimbja është më e pakët.

Ndonëse nuk ka pasur studime të mjaftueshme të mbështesin këtë teori, çdo përmirësim në qarkullimin e gjakut ndihmon në ushqyerjen e duhur të muskujve dhe organeve.

Rënia në peshë

Studimet kanë mbështetur idenë se pirja e ujit ndihmon ata që duan një peshë më të mirë trupore.

Nëse pini ujë do të ndiheni më pak të uritur.

Uji ndihmon organizmin të përthithë ushqyesit, thonë studimet.

Një i tillë i publikuar në vitin 2003 zbuloi se pirja e ujit të ngrohtë përshpejtonte rënien në peshë.

Sipas shkencëtarëve, pirja e 500 ml ujë përpara vaktit, rrit metabolizmin me 30 përqind.

Më pak dhimbje

Uji i ngrohtë përmirëson qarkullimin dhe fluksin e gjakut në muskujt e lënduar.

Sipas të dhënave, pirja e ujit të ngrohtë mund të zbusë dhimbjet, por nga ana tjetër, nxehtësia mund të nxisë djersitjen.

Kundër të ftohurës dhe problemeve me frymëmarrjen

Nxehtësia ndihmon kundër të ftohurës dhe bllokimeve të rrugëve të frymëmarrjes.

Pirja e ujit të ngrohtë ndihmon në lëvizjen e shpejtë të sekrecioneve ndaj nxit kollën dhe mënyra të tjera të nxjerres së sekrecioneve dhe pastrimit të rrugëve të frymëmarrjes.

Konsumi i kafesë dhe çajrave

Uji i ngrohtë në kombinim me kafenë ose çajin ofron vlera të tjera për sa kohë nuk e teproni.

Nëse e teproni, çajrat me kafeinë dhe kafeja mund të shkaktojnë dehidratim.

Por nëse nuk e teproni, kafeja rrit jetëgjatësinë, ul rrezikun e shfaqjes së Parkinsonit, disa tumoreve, diabetit të tipit 2, sëmundjeve të mëlçisë e disa problemeve të zemrës.

Çaji ul rrezikun e sklerozës, sëmundjeve të zemrës, diabetit të tipit 2 dhe sëmundjeve të mëlçisë.

Kundër stresit

Një gotë me ujë të ngrohtë ndihmon në menaxhimin e stresit dhe ankthit.

Pijet e ngrohta në përgjithësi rekomandohen kundër këtyre dy simptomave.

Temperatura e duhur

Pijet e ngrohta si kafeja ose çaji serviren zakonisht në temperatura shumë të larta.

Temperatura optimale e një çaji, kafeje ose uji të ngrohtë është diku në 40 °C.

Në këtë mënyrë nuk digjini as gjuhën dhe as fytin por mund të shijoni kënaqësinë që përcjell një pije e ngrohtë./AgroWeb.org

Pasha Qofte – Shija Tradicionale e Odave Gjirokastrite

Janë disa gatime tipike të zonave të ndryshme të Shqipërisë të cilat spikasin me shijen unike të tyre, të plotë dhe karakteristike.

Receta të cilat brez pas brezi lartësohen me shijen e tyre në çdo sofër e tryezë shqiptare.

E tillë është receta e ane’ve (nënave) gjirokastrite, një gatim i vjetër po aq sa edhe gurët e qytetit emblematik të jugut të Shqipërisë.

Supa me Pasha Qofte është një ndër krenaritë e kuzhinës tradicionale gjirokastrite. Falë mjeshtërisë së tyre në kuzhinë, nënat dhe gjyshet gjirokastrite mahnisin këdo me shijen e mrekullueshme të këtij gatimi special.

AgroWeb.org u sugjeron të shoqëroni këtë supë shije plotë me sallata të freskëta të stinës, byrekë të ndryshëm apo edhe me pak nga zahiretë fantastike shqiptare.

Me shumë pak përbërës, të cilët me lehtësi gjenden në çdo kuzhinë çdo kush mund të përgatisë këtë recetë tradicionale gjirokastrite vet në shtëpi për t’i ofruar familjes një vakt fantastik e mbresëlënës për shijen.

AgroWeb.og u përcjell më poshtë mënyrën e përgatitjes së kësaj supe të shijshme në shtëpi.

Si t’i përgatisim krejt lehtë në shtëpi

Përbërësit

(Përbërësit përzgjidhen në bazë të personave në familje. Përbërësit më poshtë janë për katër persona)

Për përgatitjen e qofteve

250 gr mish i grirë

1 kokërr qepë

Gjysmë filxhani çaji me oriz

Një e bardhë veze 1 lugë gjelle gjalpë pa kripë ose vaj ulliri

3 gota me ujë

Majdanoz i freskët

Kripë

Piper

Për përgatitjen  e supës

Lëngun e një kokrre limoni

Një gotë ujë

2 të verdha vezësh

Një lugë gjalpë i shkrirë ose vaj ulliri

Përgatitja e Pasha Qofteve 

Në një tenxhere hedhim ujin bashkë me orizin dhe i lëmë të zjejnë për 15 minuta. Më pas i heqim nga zjarri dhe orizin e kullojmë nga uji duke e lënë mënjanë në një tas.

Më pas grijmë qepët hollë dhe e hedhim tek tasi ku kemi hedhur orizin e kulluar, shtojmë mishin e grirë, bashkë me të bardhën e vezës, kripën, piperin dhe majdanozin e freskët.

I përzjejmë mirë të gjitha bashkë derisa masa të bëhet e njëtrajtshme.

Më pas, njomim duart me ujë dhe ndajmë masën në qoftë të vogla në madhësinë e një kokërr arre.

Nga ana tjetër, hedhim në një tigan dy gota me ujë, pak gjalpë ose vaj ulliri dhe shtojmë me kujdes qoftet duke i lënë të zjejnë në zjarr të ngadaltë për gjysmë ore.

Ndërkohë nisim përgatitjen e supës.

Rrahim të verdhat e vezës bashkë me lëngun e limonit dhe ujin dhe në mënyrë të ngadaltë i’a shtojmë tenxheres ku kanë zjerë qoftët.

I përzjejmë më shumë kujdes që të mos prishet forma e qofteve.

Tenxheren e heqim nga zjarri dhe e servirim të ngrohtë.

Sipër mund të shtojmë pak pika gjalpi të shkrirë ose pika vaj ulliri si dhe majdanoz të grirë hollë.

*Për një gatim më të shëndetshëm, AgroWeb.org u sugjeron të përdorni vaj ulliri në vend të gjalpit. /AgroWeb.org

Vaji i Kastorit për Shëndetin – Cilat Janë Vlerat për Zemrën, Imunitetin, Lëkurën

Vaji i Kastorit vjen nga farat e bimës Ricinus communis që rritet në natyrë në shumë vende me klimë të ngrohtë.

Egjiptianët e lashtë e përdornin këtë produkt si një kurë natyrale shumë efikase kundër irritimeve të lëkurës dhe syve.

Vajit të Kastorit i janë thurur lavde për aftësitë shëruese të lëkurës, luftuese kundër baktereve dhe qetësuese për sistemin tretës.

Prej mijëra vitesh, ekspertët më në zë të mjekësisë popullore e kanë përdorur për të trajtuar një sërë sëmundjesh.

Vaji i Kastorit ka fituar mjaft popullaritet falë aftësisë që ka për të shëruar konstipacionin, infeksionet e lëkurës dhe përmirësuar shëndetin e flokëve.

Megjithatë, ekspertët e AgroWeb.org thonë se Vaji i Kastorit luan një rol të rëndësishëm jo vetëm në forcimin e sistemit imunitar.

Vaji i Kastorit mundet të rrisë numrin e qelizave që ndihmojnë organizmin të largojë me shpejtësi viruset, bakteret, mykun dhe qelizat e dëmshme.

Vaji i Kastorit prodhohet nëpërmjet presimit të ftohtë të farave të bimës.

Ky vaj përmban acid ricinoleik që është shumë i vlefshëm, së bashku me disa kripëra të dobishme që shërbejnë për ushqimin dhe zbutjen e lëkurës por edhe për t’ju dhënë produkteve një strukturë më të qëndrueshme.

Për këtë arsye, Vaji i Kastorit përdoret gjërësisht në industrinë kozmetike dhe në produktet për flokët dhe lëkurën.

Vajin e Kastorit e gjeni lehtësisht në farmaci dhe pikat e shitjes së produkteve organike.

Ai gjendet edhe në trajtën e lëngshme për t’u pirë, si edhe në trajtëm e kremrave vajor për masazhe kundër dhimbjeve.

Vlerat shëndetsore të Vajit të Kastorit

Acidi ricinoleik që gjendet tek ky vaj është një acid yndyror i pangopur që ka një sërë vlerash të rëndësishme.

Përmirëson funksionet imunitare

Vaji i Kastorit përmirëson qarkullimin e gjakut, shëndetin e gjendrës tiroide, sistemin limfatik dhe atë imunitar.

Sistemi limfatik është përgjegjës për funksionin e plotë të sistemit të tretjes dhe të qarkullimit.

Vaji i Kastorit ndihmon në detoksifikimin e organizmit dhe përmirëson shëndetin  e zemrës dhe atë të sistemit tretës.

Konsultohuni me mjekun apo farmacistin për dozën dhe mënyrat e përdorimit sipas problemeve nga të cilat vuani.

Përmirëson qarkullimin

Qarkullimi i gjakut dhe sistemi imunitar janë në varësi të njëri tjetrit.

Kjo do të thotë se një njeri ka më shumë gjasa të preket nga një sëmundje kronike kur sistemi limfatik dështon së funksionuari ose shfaqet edema.

Kur përthithet nga lëkura, Vaji i Kastorit i jep forcë sistemit limfatik dhe pasuron qarkullimin e gjakut.

Për një tretje të shëndetshme  

Në mjekësinë popullore, Vaji i Kastorit stimulon çlirimin e plotë të substancave të akumuluara në traktin gastrointestinal. Nëse përdorni Vajin e Kastorit për të lyer zonën abdominale, do të vini re një tretje më të mirë dhe një rritje të energjisë.

Zbutje të simptomave të artritit

Vaji i Kastorit përdoret si një kurë natyrale kundër inflamacionit, enjtjes së kyçeve dhe dhimbjes që shoqëron artrititin.

Falë vlerave të tij natyrale kundër inflamacionit, ky vaj mund të përdoret edhe për masazhe në rastet e dhimbjeve muskulare dhe të gjymtyrëve.

Nëse lyeni zonat e dhimbjes dy herë në javë, simptomat do të zbuten./AgroWeb.org