Boronicat e Kuqe të Shqipërisë – Vetitë Unike të Antibiotikut Natyral

Boronica e kuqe është e famshme. Ajo është nga ato fruta që të ngacmon qiellzën por shumëfishon shqisat e shijes dhe aromës.

Ky frut mund të shijohet i vetëm ose mund ta shoqërosh me diçka tjetër, duke ofruar një eksperiencë të bukur.

Boronicat e kuqe të kultivuara janë më të mëdha se lloji që rritet në natyrë në Shqipërinë e veriut.

Brezat e vjetër e kanë vlerësuar dhe shijuar boronicën e kuqe sipas traditave që zgjasin edhe sot.

Ata e konsumonin boronicën e kuqe të thatë, të ëmbëlsuar me mjaltë ose me shurup frutash si pekmezi.

Boronica e kuqe është një frut që mund ta mbash në ngrirje për vite me rradhë, ndërsa mblidhen në fundvjeshtë kur këto kokrra magjike arrijnë kulmin e pjekurisë dhe ngjyrës mbresëlënëse.

Ajo është koha perfekte për t’i blerë ato, për t’i gatuar, apo edhe për t’i ngrirë dhe konsumuar ngadalë gjatë muajve apo viteve në vijim.

Në këtë mënyrë, ju mund të shijoni boronicën e kuqe sa herë që të doni. Lexoni më poshtë vlerat e listuara nga AgroWeb.org:

Vlerat shëndetësore të boronicës së kuqe

Lëngu i boronicës së kuqe është i famshëm për rolin që luan kundër infeksioneve të traktit urinar, sepse parandalon bakteret që zënë vend në fshikëzën e urinës.

Antioksidantët dhe fitoushqyesit që gjenden tek boronica e kuqe kanë një ndikim të jashtëzakonshëm në shëndetin e njeriut.

Ky frut përmban substanca që parandalojnë sëmundjet kardiovaskulare dhe formimin e kolesterolit të keq në zemër dhe enët e gjakut.

Studimet kanë treguar që boronica e kuqe është një frut që ofron mbrojtje nga radikalet e lira, sepse përmban antioksidantë të fuqishëm.

Fibra që gjendet tek boronica e kuqe është një tjetër vlerë e shtuar, sepse tek çdo racion me këto kokrra të shijshme ne gjejmë 20 % të dozës së rekomanduar ditore të fibrës.

Një racion me boronica të kuqe jep edhe 24% të dozës ditore të vitaminës C dhe vitaminës E.

Kur janë të freskëta, boronicat e kuqe përmbajnë sasinë më të lartë të antioksidantëve.

Në variantin e thatë, ato kanë pak më pak antioksidantë dhe në variantin lëng, kanë shumë pak antioksidantë.

Kur të blini lëng boronice të kuqe sigurohuni që është lëng i plotë natyral dhe jo lëng me sheqer të shtuar.

Mënyra më e mirë për të nxjerrë lëngun nga këto fruta është t’i shtrydhni vetë.

Duke qenë se boronica e kuqe dhe lëngu i saj përmban acid oksalik, ato zgjerojnë aftësinë e disa medikamenteve për të parandaluar mpiksjen e gjakut.

Rrjedhimisht njerëzit që vuajnë nga gurët në traktin urinar duhet të kufizojnë konsumimin e ushqimeve dhe pijeve të tilla.

Boronicat e kuqe në variantin e tyre të thatë janë të famshme për shijen e tyre të veçantë që të ngacmon. Ato mund të kombinohen me një sallatë me spinaq të freskët dhe djathtë të bardhë, ose me fruta të tjera si portokallë, mollë dhe ananas.

Duhet të dini se çdo kokërr e vogël boronice bën një punë të madhe në të gjithë organizmin.

Shkencëtarët pranojnë njëzëri se, boronica e kuqe parandalon sëmundjet e zemrës, ulçerën, infeksionet urinare. Duhen përmendur edhe përfitimet e panumërta nga vitaminat, mineralet, antioksidantët dhe fitoushqyesit që përmban.

Ndaj sa herë që të keni boronica të kuqe pranë jush, kini paraysh që po i jepni shëndetit tuaj një shtysë të fuqishme./AgroWeb.org

Duaje Zemrën Tënde. Këshillat kundër Rrahjeve të Çrregullta

A e keni përjetuar ndonjëherë ndjesinë sikur zemra do t’ju dalë nga kraharori?

Po ndjesinë e zemrës që sikur resht së rrahuri për një sekondë? Ajo për të cilën po flasim në këtë artikull ka të bëjë me rrahjet e shpeshta dhe të çrregullta të zemrës, një fenomen që zgjat krejt pak, por që mund të ndodhë shpesh, jo vetëm kur jeni në lëvizje, por edhe kur jeni ulur, shtrirë ose duke qëndruar në heshtje.

Lajmi i mirë është që jo të gjitha rastet e rrahjeve të shpeshta të zemrës janë një tregues i një problem shëndetësor që ka prekur këtë organ.

Ndonjëherë, rrahjet e shpeshta të zemrës shkaktohen nga situatat kur zemra sforcohet nga stresi, sëmundjet, dehidratimi ose aktiviteti fizik. Shkaqe të tjera të rrahjeve të shpeshta të zemrës përfshijnë:

Shtatëzania

Përdorimi i tepruar i kafeinës

Simptoma të tjera mjekësore

Marrja e ilaçeve

Duhani dhe produktet e tij

Vazhdoni të lexoni këtë artikull të AgroWeb.org dhe mësoni për pesë mënyrat më të mira se si mund të mbani nën kontroll rrahjet e çrregullta dhe të shpejta të zemrës në kushtet e shtëpisë, ose kur ju duhet të vizitoni një mjek, dhe mbi të gjitha për pasjen e një zemre të shëndetshme.

1. Provoni teknikat e vetëqetësimit

Stresi mund të shkaktojë ose përkeqësojë rrahjet e çrregullta të zemrës. Stresi dhe ekzaltimi i tepërt mund të rrisin nivelet e adrenalinës. Menaxhimi i stresit nëpërmjet vetë-qetësimit ju vjen në ndihmë.

Provoni të qëndroni ulur me këmbë të kryqëzuara dhe merrni frymë ngadalë me hundë dhe nxirreni nëpërmjet gojës. Përsëriteni këtë ushtrim disa herë deri sa të ndiheni më të qetë.

2. Ushtrimet për stimujt nervorë

Nervi vagus luan një sërë funksionesh përfshirë atë të ndërlidhjes së trurit me zemrën. Ushtrimet që kanë të bëjnë me këtë nerv e stimulojnë atë dhe ndihmojnë në rregullimin e rrahjeve të zemrës. Stimujt nervorë mund t’i bëni në shtëpi, por së pari duhet të merrni mendimin e mjekut. Bëni një dush të ftohtë. Shpëlajeni fytyrën me ujë të ftohtë ose vendosni mbi të një peshqir të lagur me ujë të ftohtë apo një kompresë për 20-30 sekonda. Shoku i të ftohtit ndihmon në stimulimin e këtij nervi.

3. Pini ujë

Dehidratimi mund të shkaktojë rrahje të çrregullta të zemrës, sepse gjaku përmban ujë dhe kur jeni të dehidratuar, gjaku trashet më shumë. Sa më i trashë gjaku, aq më fort duhet të punojë zemra ta dërgojë atë nëper vena. Pulsi shtohet dhe rrahjet janë më të çrregullta dhe më të shpejta. Nëse e ndieni një gjë të tillë, pini një gotë me ujë. Nëse vini re se urina ka një ngjyrë të verdhë të errët, atëherë pini më shumë ujë për të shmangur rrahjet e shpeshta të zemrës.

4. Riktheni ekuilibrat e elektroliteve

Elektrolitet ndihmojnë në transmetimin e sinjaleve në të gjithë trupin. Disa prej elektroliteve që i bëjnë mirë zemrës janë: Kaliumi, Kalciumi, Magnezi. Shumica e këtyre elektroliteve merren më mirë nëpërmjet ushqimit.

Avokado, bananja, patatja e ëmbël dhe spinaqi janë burime shumë të mira të kaliumit. Nëse dëshironi të rrisni dozën e kalciumit, konsumoni më shumë barishte me ngjyrë të gjelbër dhe produkte bulmeti.

Barishtet së bashku me arrorët dhe peshkun janë një burim i shkëlqyer i magnezit. Kujdes me kripën. Shumë njerëz marrin më shumë kripë nëpërmjet ushqimeve të paketuara, produkteve të mishit dhe ushqimeve të shpejta.

5. Shmangni stimuluesit

Zemra është e ndjeshme ndaj substancave të ndryshme.

Pijet dhe ushqimet me kafeinë

Alkoli i tepërt

Disa ilaçe kundër të ftohtit dhe kollës

Ilaçet kundër oreksit

Ilaçet kundër sëmundjeve mendore

Ilaçet kundër tensionit të lartë të gjakut.

Këto janë gjërat nga të cilat duhet të hiqni dorë ose të konsumoni më pak, nëse dëshironi që zemra të rrahë siç duhet./AgroWeb.org

Reçeli i Karrotës, Ëmbëlsia Natyrale në Kuzhinë

Karrotat përcjellin një ëmbëlsi natyrale dhe një shije të butë.

Karrotat rriten mjaft lehtë, kushtojnë pak dhe përmbajnë 1 përqind pektinë. Këto karakteristika e bëjnë karrotën të përshtatshme për përgatitjen e një reçeli të veçantë.

Reçeli i karrotës është një ëmbëlsirë krejt e veçantë e traditës shqiptare. Ai përgatitet nga amvisat në shumë zona të Shqipërisë, veçanërisht në Përmet e Berat, ku tradita e glikove dhe reçelit është një art më vete. Ky reçel, veç shijes unike ka edhe shumë vlera, të cilat nuk humbin gjatë përgatitjes.

Përgatitja e reçelit

Lajini, qërojini dhe grijini karrotat. Hidhini në një tigan të thellë dhe përziejini me sheqerin.

Grini hollë lëkurën e një limoni dhe një portokalli dhe hidheni në tigan. Shtrydheni lëngun e limonit dhe portokallit dhe shtojini së bashku me arrëmyshkun dhe kanellën, sipas dëshirës.

Shtoni një litër me ujë dhe lërini të gjithë përbërësit të ziejnë. Sigurohuni që sheqeri ka shkrirë.

Lërini karrotat të ziejnë fort për pesë minuta dhe më pas për 30 minuta të tjerë në një temperaturë më të ulët deri sa e gjithë masa të ketë arritur strukturën e duhur.

Nëse dëshironi të provoni që masa e reçelit është lidhur siç duhet atëherë hidhni një sasi të vogël në një pjatë të ftohtë të cilën e keni vendosur më parë në ngrirje.

Nëse lëngu mblidhet si shurup apo ka trashësinë e duhur atëherë është gati për t’u hedhur në kavanozët e larë dhe të sterilizuar.

Si fillim hiqni çdo gjurmë shkume apo bulëze që mund të jetë formuar në enën e gatimit. Nëse lëngu i karrotës nuk ka marrë trashësinë e duhur, atëherë vazhdoni ta zieni deri sa të jetë gati.

Përbërësit

1 kg karrota
1.5 kg sheqer
1 litër ujë
2 lugë çaji me kanellë pluhur ose shkopinj kanelle
1 lugë çaji me arrëmyshk pluhur ose arrëmyshk të freskët e të grirë
2 limonë
1 portokall/AgroWeb.org

Lakror Shtëpie me Hithra, Tradita Shqiptare e Shijes

A mund të ketë një gatim me përbërës hithrën e të mos jetë i shijshëm dhe i shëndëtshëm? Sigurisht që jo.  

Kuzhina tradicionale shqiptare në përgatitjen e gatimeve me hithra është padyshim e veçantë në shije e vlera.

Mbi të gjitha recetat, nga përgatitja e reçelit me hithra, tek supat e shijshme, si lakrori me hithra vështirë se mund të gjesh të dytë.

Është një nga traditat më të hershme, të shijshme nga duart e amvisave shqiptare, traditë që ka magjepsur vendas e të huaj.

Lakrori i shtëpisë është një ndër recetat më të veçanta me të cilin padyshim amvisat jo vetëm shtojnë shijen e gatimeve në familje por edhe nderojnë në mikpritjen e tyre miqtë dhe të afërmit e dashur.

Lakrori njihet si traditë e Korçës dhe zonave përreth saj, tradita e do që ai të piqet në saç, një mënyrë tipike e moçme shqiptare e pjekjes së lakrorëve, byrekëve apo tavave të ndryshme me perime në prush. Falë prushit dhe nxehtësisë së tij të avashtë, tepsitë me gatimet e pjekura marrin një shije të veçantë.

AgroWeb.org sjell më poshtë recetën tradicionale të të mrekullueshmit lakror me hithra, i cili krejt lehtë mund të përgatitet në shtëpi, për t’u ofruar si një vakt i shëndetshëm dhe i shijshëm në familje.

Përgatitja e Lakrorit me Hidhra

Përbërësit:

1kg hithra të freskëta

500 gr Miell

250 ml Ujë

10 gr Kripë

Vaj Ulliri

Pak gjalpë

Sodë Buke

Dy qepë të njoma (sipas preferencës)

Përgatitja e brumit dhe mbushjes me hithra 

Si fillim, përgatisim brumin, duke hedhur në një tas të madh miellin.

Pasi bëjmë një gropë në mesin e miellit hedhim kripën, sodën dhe i përzjejmë me dorë ndërsa nisim të shtojmë ujë të vakët derisa brumi të krijohet në një masë të butë dhe të përshtatshme për t’u hapur në formën e petës.

Brumin e përftuar e mbulojmë me një pecetë të pastër dhe e lëmë përreth gjysmë ore që të fryhet ndërsa nisim përgatitjen e hithrave.

Qepën e grirë hollë e hedhim në një tigan të madh. E skuqim me 3 lugë vaj ulliri dhe pak gjalpë derisa volumi i qepës të ulet.

Më pas, hedhim hithrat, të cilat më parë i kemi pastruar dhe i kemi zjerë me një valë. Kaurdisim qepët me hithrat derisa të njëtrajtësohen e më pas hedhim kripë.

I përzjejmë për dy minuta. Për të përftuar një masë pak të trashë të gjellës me të cilën do përgatisim lakrorin, në një gotë të vogël mund të hedhim një lugë miell dhe ta tretim me dy lugë kos.

Këtë masë, më pas e shtojmë tek hithrat dhe përzjejmë masën. Të njëjtën gjë mund të bëjmë edhe me qumësht në vend të kosit.

Përgatitja e lakrorit me hithra 

Pasi e përgatisim gjellën me hithra, e lëmë të ftohet. Gjatë kësaj kohe brumi është gati për t’u punuar. Brumin e ndajmë në dy pjesë, ku pjesa e sipërme duhet të jetë më e vogël se e poshtmja.

Pasi hapim petën e poshtme e shtrojmë në tepsi, të cilën e kemi lyer njëtrajtësisht me vaj ulliri, hedhim mbushjen me hithrat në të gjithë petën që kemi shtruar më parë.

Ndërkohë, hapim petën e dytë më të madhe dhe e vendosim sipër duke i kthyer pak anët.

Në mungesë të saçit tradicional, fare mirë lakrorin mund t’a pjekim në furrë në 180 gradë për 20-30 minuta deri sa të marrë pjekjen e duhur.

Në fund të përgatitjes, pasi lakrori është pjekur e nxjerrim nga furra dhe e lyejmë me një lugë gjalpë fshati./AgroWeb.org

Kurat Natyrale Për Shëndetin e Gjakut

Gjaku është energjia që mban në lëvizje organizmin tonë.

Normalisht, ai duhet të qarkullojë në trup pa u trazuar, duke transportuar ushqyesit e nevojshëm në qeliza dhe duke dhënë dhe mbështetur vazhdimësinë e jetës.

Kur gjaku mpikset në një prej enëve ose kapilarëve, gjithçka ngec. Një gjë e tillë mund të jetë kërcënuese për jetën, sepse bllokimi i arterieve pengon furnizimin me gjak të organeve jetësore siç është zemra ose truri.

Parandalimi i mpiksjes së gjakut shpesh arrihet nëpërmjet kurave natyrale të cilat do t’i gjeni të shtjelluara në këtë artikull të AgroWeb.org

Ekspertët e AgroWeb.org shpjegojnë se gjaku përbën rreth 8 përqind të peshës trupore.

Roli i gjakut në jetën tonë shpesh anashkalohet deri në momentin kur pësojmë një lëndim në lëkurë. Atëherë rikujtohemi për rëndësinë e gjakut dhe përbërësve të tij në parandalimin e humbjeve të mëdha.

Mpiksja e gjakut ka të bëjë me bashkimin e qelizave të kuqe dhe përbërësve të tjerë qelizorë dhe akumulimin e tyre në vendin e lëndimit për të parandaluar rrjedhjen e tepruar të gjakut.

Holluesit natyralë të gjakut janë të rëndësishëm. Zakonisht, mpiksja e gjakut është e shëndetshme dhe ka një qëllim të vetëm; të parandalojë rrjedhjen e tepruar të gjakut. Por, në disa raste, mpiksjet e vazhdueshme janë tregues të një problemi më madhor shëndetësor.

Shmangni mpiksjen e gjakut në mënyrë natyrale.

Pini ujë

Uji është një hollues mjaft efikas por i nënvlerësuar i gjakut. Dozat e mjaftueshme të ujit e mbajnë trupin të hidratuar dhe garantojnë një qarkullim të mirë të gjakut.

Xhenxhefili dhe hudhra

Janë dy prej përbërësve më të zakontë në kuzhinën tonë. Ata luftojnë inflamacionin dhe parandalojnë artereosklerozën ose trashjen e mureve të enëve të gjakut dhe formimin e pllakëzave.

Vitamina D

Në mjekësinë popullore tradicionale Vitamin D e marrë nga dielli pranohet të luajë një rol natyral në hollimin e gjakut.

Antioksidantët

Barishtet si spinaqi, zarzavatet si brokoli dhe arrorët parandalojnë oksidimin dhe prodhimin e radikaleve të lira, duke pakësuar rrezikun e mpiksjes së gjakut.

Kivi dhe specat e kuq përmbajnë fitoushqyes të rëndësishëm dhe enzima që kanë vlera në hollimin e gjakut dhe largimin e toksinave prej tij. Ushqime të tjera të pasura me antioksidantë përfshijnë thjerrëzat, tërshërën dhe grurin.

Çaji jeshil

Çaji jeshil është një nga kurat më të mira natyrale kundër mpiksjes së gjakut falë përmbajtjes së lartë të antioksidantëve. Çaji jeshil luan rol në zgjerimin e enëve të gjakut dhe prodhimin e lëndës së njohur si oksidi nitrik.

Vitamina C

Vitamina C është një antioksidant i fuqishëm që gjendet tek agrumet, kivi, barishtet etj. Ushqimet e pasura me vitaminën C ndihmojnë në rimëkëmbjen e mureve të arterieve dhe garantojnë një shëndet optimal vaskular.

Çokollata e zezë

Një studim i publikuar në revistën e Shoqatës Amerikane për Zemrën nxorri në pah se çokollata e zezë përmirëson qarkullimin e gjakut, falë prodhimit të lëndëve të ndryshme kimike që zgjerojnë arteriet. Speci djegës, çaji jeshil, xhenxhefili dhe hudhra janë ushqime të tjera që përmirësojnë qarkullimin e gjakut.

Aktiviteti fizik

Aktiviteti fizik është parësor në përmirësimin e qarkullimit të gjakut dhe kundër mpiksjes së tij.

Rëndësia e mëngjesit

Vlerësojeni mëngjesin. Zgjohuni herët. Niseni ditën me një vakt të mirë dhe të shëndetshëm dhe përfitoni të gjithë ushqyesit e nevojshëm.

Duhani vret

Duhani vret në mënyra të ndryshme. Një prej tyre është dëmi që ai shkakton në enët e gjakut dhe problemeve me qarkullimin e tij.

Stresi

Stresi prish balancat hormonale dhe çon në prodhimin e radikaleve të lira që krijojnë një efekt zinxhir në trup përfshirë mpiksjen e tij.

Pakësoni alkolin

Nëse dëshironi të përmirësoni qarkullimin e gjakut, kufizoni dozat e alkolit./AgroWeb.org

Hudhra dhe Xhinxheri Për Të Mposhtur Sëmundjet

Të dyja këto produkte kanë qenë subjekt studimesh të shumta për vlerat që ofrojnë.

Hudhra dhe xhenxhefili janë dy produkte që përmbajnë vlera të shumëfishta terapeutike dhe shëndetësore, për të mos përmendur këtu efikasitetin e tyre në recetat e gatimit.

AgroWeb.org ju tregon se të dyja këto produkte kanë qenë subjekt studimesh të shumta jo vetëm për efikasitetin në luftimin e infeksioneve, por edhe në parandalimin dhe zvogëlimin e inflamacioneve.

Kundër plagëve 

Hudhra lufton mykun, virozat dhe bakteret. E njëjta gjë vlen për xhenxhefilin.

Një studim i publikuar në “Journal of Microbiology” zbuloi se xhenxhefili kishte fuqi më të madhe kundër baktereve dhe ishte më efikas se sa antibiotikët tradicionalë që përdoren kundër dy lloje të infeksioneve bakteriale që hasen kryesisht në spitale.

Kundër inflamacionit

Si hudhra, ashtu edhe xhenxhefili kanë vlera të mëdha kundër inflamacioneve. Xhenxhefili përdoret shpesh për të trajtuar artritin, një sëmundje që shkaktohet nga inflamacioni.

Një studim i vitit 2013, i publikuar në revistën “Food and Chemical Toxicology” të konsultuar nga AgroWeb.org, tregoi se alicina, substanca aktive e hudhrës ishte efikase në trajtimin e sëmundjeve kronike inflamatore.

Kundër qelizat malinje dhe të vjellave

Hudhra funksionon duke parandaluar zhvillimin e radikaleve të lira në disa mënyra.

Sipas kërkimeve të AgroWeb.org, ajo lufton bakteret dhe ndalon substancat që shkaktojnë mjaft probleme në organizëm. Për më tepër ajo promovon riparimin e ADN-së.

Xhenxhefili është përdorur prej kohësh në shumë kura bimore. Ai është mjaft efikas kundër problemeve me stomakun dhe të vjellave.

Xhenxhefili është i dobishëm veçanërisht për mbajtjen nën kontroll të refluksit të acidit dhe të vjellave.

Për sëmundjet e zemrës dhe të ftohtit

Hudhra me xhenxhefilin ndihmojnë në parandalimin e sëmundjeve të zemrës, duke ulur tensionin e gjakut dhe ngadalësuar forcimin e arterieve.

Hudhra dhe xhenxhefili kanë aftësinë të parandalojnë të ftohtin dhe të forcojnë sistemin imunitar.

Çaji me xhenxhefil dhe hudhër

Çaji me xhenxhefil dhe hudhër përdoret si një kurë natyrale kundër të ftohtit. Ai lehtëson këto simptoma, sipas Universitetit Clayton të Mijekësisë Natyrale.

AgroWeb.org ju tregon se përdorimi i këtij çaji ju jep të gjitha avantazhet e hudhrës dhe xhenxhefilit si antibiotikë natyralë, kundër inflamacionit dhe për të lehtësuar dhimbjet e kokës apo të vjellat.

Gjithçka ju duhet është të shtoni tri hudhra të shtypura ndërkohë që përgatisni çajin tuaj të xhenxhefilit.

Çaji i përgatitur nga hudhra e njomë ose e thatë bashkë me xhenxhefilin përcjell shumë vlera shëndetsore.

Çaji i xhenxhefilit dhe hudhrës ka një shije të mirë, veçanërisht nëse kombinohet me mjaltë dhe limon. Ai është një alternativë e mirë për ata që vuajnë nga virozat ose i ftohti.

AgroWeb.org do t’ju tregojë për një kombinim tjetër të hudhrës dhe xhenxhefilit që është më i mirë për një shëndet afatgjatë.

Me xhenxhefilin dhe hudhrën mund të përgatisni një kombinim të ngjashëm me pastën, e cila përdoret edhe në gatim si salcë.

Ajo është e shëndetshme dhe shumë e shijshme në shumë dimensione. Nëse e përdorni qoftë për marinim ose thjesht për aromë, gatimet tuaja do të marrin një nuancë tjetër aromatike. Mbi të gjitha përveç shijes, organizmi përfiton edhe efektet mbrojtëse.

Më poshtë do të gjeni një metodë të thjeshtë të sjellë nga burimet AgroWeb.org për përgatitjen dhe ruajtjen e salcës së hudhrës dhe xhenxhefilit

Përbërësit:
250 gramë xhenxhefil (të qëruar dhe të prerë hollë)
250 gramë hudhër (të qëruar dhe të prerë hollë)
1 lugë çaji me kripë
2-3 lugë gjelle me vaj ulliri cilësor

Udhëzimet: Përdorni një mikser ose shtypini përbërësit së bashku në havan deri sa t’i ngjasojë një salce pesto. Hidheni salcën në një enë qelqi dhe ruajeni në frigorifer. Salcën mund ta përdorni në supë, gatimet me oriz, makarona e të tjerë. Organizmi juaj do t’ju jetë mirënjohës. /AgroWeb.org

Çfarë e Shkakton Plakjen Para Kohe tek Shqiptarët?

Procesi i plakjes është i pashmangshëm. Por a njihni njerëz që duken më të mëdhenj se mosha e tyre? AgroWeb.org flet sot për plakjen e parakohshme.

Kjo është diçka që është padyshim nën kontrollin tuaj. Fatkeqësisht, plakja e parakohshme është diçka që përjeton shumica e shqiptarëve.

Duket se shumë nga zakonet e përditshme – disa që ndoshta as nuk i pranoni se po i bëni – ju tregojnë më të vjetër se vitet e vërteta.

Gjumi i pakët dhe i keq plak para kohe

Gjumi nuk mban vetëm mendjen tuaj të shëndoshë – ai ndihmon të dukeni më të rinj për më shumë kohë.

Gjumë riparon dëmin që që merr organizmi gjatë ditës. Pra ekspozimin ndaj lodhjes, ndotjes dhe stresit. Kur merrni gjumin e duhur, lëkura juaj nuk mund të përgatitet për ditën tjetër.

Kjo dërrmon lëkurën tuaj, sjell qeliza më pak të shëndetshme dhe afron plakjen e parakohshme. Mundohuni të bëni të paktën tetë orë gjumë në natë, sugjerojnë të gjithë specialistët e mjekësisë.

Mungesa e frutave dhe perimeve në ushqim plak para kohe

Gati 80 për qind e shqiptarëve nuk hanë 2 deri 3 racione 100 gramëshe me perime në ditë. Ndërsa 72 për qind nuk arrijnë të hanë fruta mjaftueshëm, sipas të dhënave të anketave me fokus grupeve të organizuara nga AgroWeb.org.

Megjithatë, frutat dhe perimet parandalojnë dëmtimin që shkaktohet tek lëkura juaj nga plakja e parakohshme, sipas Akademisë Shkencore të Dermatologjisë.

Frutat dhe perimet janë plot me ushqyes, si antioksidantë dhe vitamina, të cilat ndihmojnë në luftimin e dëmtimeve të radikaleve të lira dhe mbajnë qelizat e lëkurës tuaj të shëndetshme.

Disa fruta dhe perime që duhen patjetër? Zarzavate me gjethe të errëta si spinaq, patate të ëmbla, portokall, speca të kuqe, luleshtrydhe, shegë, boronica, shparguj dhe kërpudha.

Sheqeri dhe brumërat bëjnë të dukeni më të vjetër

Shumë brumëra dëmtojnë edhe përtej rritjes së peshës. Ushqimet si buka e bardhë, akulloret dhe patatet e skuqura, mund të shkaktojnë të gjitha llojet e problemeve me fytyrën tuaj.

Kjo ndodh për shkak se ato rrisin maksimalisht nivelet e sheqerit në gjak. AgroWeb.org ju tregon se këto shkaktojnë inflamacione dhe nxisin daljen e puçrrave në fytyrë.

Plus, teprimi me shumë ëmbëlsira mund të çojë në glikazim, një proces në të cilin molekulat e sheqerit i bashkohen kolagjenit të lëkurës suaj. Kjo e bën kolagjenin të fortë dhe më pak elastik, duke shkaktuar rrudhat e parakohshme.

Duhanpirja ju bën të dukeni më të vjetër të moshë dhe ju plak para kohe

Para se të ndizni një cigare, mbani mend se mushkëritë nuk janë pjesa e vetme e trupit tuaj që paguan një çmim të dhimbshëm.

Pirja e duhanit bën të dukeni më të vjetër dhe shumë më shpejt. A ka prova për këtë?

Studiuesit krahasuan tiparet e fytyrës së 79 çifteve të binjakëve – në të cilat një binjak aktualisht tymoste pesë vjet më shumë se binjaku tjetër. AgroWeb.org raporton se studiuesit gjetën se ata që tymosnin më gjatë patën shumë më tepër rrathë sysh dhe rrudha pafund.

Plus, duhani është i ngarkuar me kimikate që dëmtojnë kolagjenin dhe elastinën, thotë Akademia e Dermatologjisë, të cilat janë vendimtare për një fytyrë të re.

Shumë alkool ju vjetëron tepër shpejt

Ka një arsye që askush nuk duket bukur në mëngjes pas një mbrëmje me tepri alkooli. Studimet tregojnë se alkooli ul nivelet antioksiduese në lëkurën tuaj.

Kjo shkakton dëmtime në qelizat tuaja të lëkurës, duke nxitur rrënimin e fytyrës dhe rrudhat.

Alkooli gjithashtu dehidraton lëkurën tuaj, çka bën që fytyra të duket e thatë e rrënuar dhe plakur.

Mbajini në mendje këshillat e mësipërme. Nuk janë aspak lukse, por mirëmbajtje e shëndetit tuaj./AgroWeb.org

Vlerat e Çajit të Hithrës për Veshkat dhe Organizmin

Hithra është një bimë e egër që përdoret rregullisht në Shqipëri.

Çaji i hithrës, ndoshta nuk futet në listën e zgjedhjeve të preferuara të çajrave për shumë konsumatorë.

Megjithatë ky çaj është i shijshëm e plot vlera, sepse arrin të ulë dhimbjet, qetësojë alergjitë, përmirësojë sistemin imunitar dhe mbrojë zemrën.  Po ashtu ai përmirëson tretjen, largon inflamacionin dhe shëron problemet me lëkurën.

Hithra është një bimë e egër që përdoret rregullisht në Shqipëri. Hithra gjendet kudo në vendin tonë, ndërsa emri i saj shkencor është Urtica Dioica. Për mijëra vjet me rradhë, hithra është përdorur gjërësisht, jo vetëm si burim ushqimor dhe fibrash, por edhe për mjekësinë bimore.

Nëse hithra përdoret si burim ushqimor, duhet të dini që ajo është e pasur me proteina njësoj si spinaqi. Hithra mund të thahet dhe të përdoret për çaj. Lulet e bimës së hithrës përdoren kryesisht për përgatitjen e këtij çaji.

Çaji i hithrës është i fortë dhe ka një efekt të menjëhershëm në organizëm, për shkak të flavonoidëve, karotenoidëve, vitaminave dhe mineraleve.
Hithra është veçanërisht e pasur me kalcium dhe magnez, madje më shumë se barishtet dhe zarzavatet e tjera.

Këta ushqyes merren direkt nëpërmjet çajit të hithrës që është shumë i kërkuar në mbarë botën. Disa prej vlerave befasuese të hithrës janë të renditura më poshtë nga AgroWeb.org.

Vlerat shëndetsore të çajit të hithrës

Shëndeti i veshkave

Vlerat më premtuese të çajit të hithrës kanë të bëjnë me veshkat. Ky çaj ka efekt diuretik dhe ndihmon në stimulimin e urinimit të shpeshtë e të shëndetshëm. Çaji i hithrës përmirëson edhe shëndetin e prostatës dhe parandalon zhvillimin e gurëve në veshka.

Sistemi imunitar

Flavonoidët dhe karotenoidët që gjenden tek çaji i hithrës, së bashku me sasinë e lartë të vitaminës C, i japin kësaj pijeje efikasitet të plotë në lidhje me fuqizimin e sistemit imunitar.

Shëndeti i zemrës

Shkencëtarët kanë zbuluar një lidhje të drejtpërdrejtë mes konsumit të rregullt të hithrës dhe uljes së tensionit të gjakut. Përbërësit anti-inflamatorë si dhe kaliumi ndihmojnë në uljen e presionit të arterieve dhe enëve të gjakut, duke përmirësuar kështu qarkullimin e tij dhe fluksin e oksigjenit në çdo pjesë të organizmit. Një gjë e tillë ul shanset për atakun në zemër, isheminë apo komplikacionet e tjera kardiovaskulare.

Tretja

Antioksidantët dhe vetitë kundër inflamacionit të çajit të hithrës e bëjnë atë fantastik kundër problemeve me tretjen. Çaji i hithrës ndihmon në rimëkëmbjen e shëndetit të të gjithë aparatit tretës dhe promovon rritjen e baktereve të dobishme.

Shëndeti i lëkurës

Çaji i hithrës ka efekt qetësues dhe ai ndihmon në lehtësimin e simptomave të akneve, ekzemës, irritimeve dhe njollave të tjera të lëkurës. Ju mund ta pini këtë çaj për të përfituar këto efekte, ose mund ta përdorni lëngun për të lyer zonat e prekura në lëkurë për të siguruar një përthithje maksimale.

Osteoporoza

Çaji i hithrës përmban shumë minerale të shëndetshme përfshirë kalciumin, magnezin dhe hekurin. Kjo e bën këtë çaj,të jashtëzakonshëm për njerëzit që vuajnë nga anemia, por edhe për parandalimin e sëmundjes që gërryen kockat me kalimin e moshës.

Ul dhimbjet dhe inflamacionin

Çajin e hithrës mund ta përdorni për të ulur dhimbjet e muskujve, shpinës, kokës, lëndimeve të lëkurës etj. Ky çaj është kaq i fuqishëm sa që pa mbaruar së piri do të vëreni se dhimbja ka ikur. Aplikimet e jashtme të çajit të hithrës janë po aq efikase, madje më të drejtpërdrejta, por gjithnjë sugjerohet ta pini çajin e hithrës për të përfituar më shumë prej tij.

Si të përgatisni çajin e hithrës

Vendosni hithrat, të thata ose të freskëta, në një çajnik. Hidhni ujë dhe vendoseni çajnikun në zjarr. Për një filxhan me hithra, ju nevojiten 2 filxhanë me ujë. Çajin mund ta bëni të fortë duke hedhur më pak ujë, ose më të lehtë duke hedhur më shumë ujë.

Sapo uji të nisë të ziejë, hiqeni nga zjarri dhe lëreni të ftohet për pak minuta. Më pas kullojeni dhe hidheni në filxhan. Disa njerëz preferojnë të shtojnë pak sheqer, por edhe mjalti është një zgjidhje ideale. Mund t’i shtoni akull nëse dëshironi/AgroWeb.org

Llojet Më të Mira të Aloe Verës

Ajo njihet si bima e përjetësisë dhe simbol i parajsës.

Vlerat e Aloe Verës janë të mrekullueshme dhe me siguri lexuesit e AgroWeb.org janë të mirëinformuar.

Këtë bimë të mrekullueshme mund ta kultivoni edhe në shtëpinë tuaj dhe ta keni gati për urgjenca si gërvishtje, çarje apo djegie.

A e dinit se nga bima e Aloe Verës mund të përfitoni shumë edhe nëse e pini?

Aloe Vera përmban mbi 200 përbërës biologjikisht aktivë si polisakaride, vitamina, enzima, amino acide dhe minerale që promovojnë përthithjen sa më të mirë të ushqyesve për të cilat trupi ka aq shumë nevojë.

Por cilat janë llojet më të mira të bimës së Aloe Vera që mund të konsumohen për të mirën e organizmit?

Llojet më të mira të bimës së Aloe Verës

Në botë, gjenden mbi 400 varietete të bimës së Aloe Verës, por jo të gjitha janë të mira dhe të vlefshme për konsum nga njerëzit.

Shumica e këtyre varieteteve shërbejnë për dekorim, dhe vetëm pak prej tyre kanë efektet çudibërëse për mirëqenien e njeriut. Sipas një publikimi të Medical Plants of the World, varietetet më të mira të Aloe Verës janë:

Aloe Barbadensis, të cilën mund ta gjeni edhe me emrin Aloe Sabila

Aloe Barbadensis, të cilën mund ta gjeni edhe me emrin Aloe Sabila

Aloe Arborescens

Aloe Arborescens

Aloe Saponaria, që mund të gjendet edhe me emërtimin Aloe Maculata

Aloe Saponaria, që mund të gjendet edhe me emërtimin Aloe Maculata

Aloe Ferox

Aloe Ferox

Aloe Vera në Shqipëri gjendet në pikat e tregëtimit të luleve, por edhe pranë kompanive që furnizojnë me lule të gjithë tregun e qyteteve në vend.

Të dhënat e publikuara nga “The Journal of Environmental Science and Health”, tregojnë se Aloe Vera ka vlera të fuqishme në betejën kundër baktereve, virozave dhe mykut, veti që e bëjnë këtë bimë të dobishme në pastrimin e organizmit nga toksinat dhe patogjenët dhe në fuqizimin e sistemit imunitar.

Por këto nuk janë vlerat e vetme të bimës së Aloe Verës.

Nëse konsumoni ose përdorni Aloe Vera, atëherë do të përmirësoni disponibilitetin e vitaminës B12 në organizëm. Kjo do të thotë se trupi do ta përthithë dhe përdorë më mirë këtë vitaminë të nevojshme.

Aloe Vera përmban gjithashtu vitaminat A, C, E, acid folik, si edhe vitaminat B1, B2, B3 dhe B6. Kjo bimë e mrekullueshme përmban 20 nga 22 amino acidet esencialë për të cilat ka nevojë organizmi i njeriut, por edhe acid salicilik që lufton inflamacionin dhe bakteret.

Përveç rolit të pastrimit të organizmit, Aloe Vera përqendrohet kryesisht tek largimi i toksinave nga stomaku, veshkat, shpretka, tëmthi, mëlçia. Gjithashtu  ndihmon me tretjen, ulçerën dhe inflamacionin në stomak.

Aloe Vera forcon sistemin tretës dhe ofron një alternativë të shëndetshme për ata që vuajnë nga artriti.

Xhelin e Aloe Verës mund ta konsumoni në formën siç përftohet nga bima. Mënyra më e rekomandueshme është që të pini lëngun e bimës, të cilën mund ta rrisni vetë në shtëpinë tuaj.

Kombinojeni xhelin në lëngjet tuaja të preferuara të frutave dhe perimeve ose pijeni veçmas. Sigurohuni që të përdorni xhel të pastër të aloes që nxirret nga pjesa e brendshme e gjetheve të Aloes.

Shija e xhelit mund të jetë pak e athët dhe e hidhur, por mund ta përzieni me pak mjaltë dhe të përfitoni vlera të shumëfishta./AgroWeb.org

Kungulli i Misirit, Risia e Biznesit Shqiptar të Reçelit

Dimensioni i traditës sonë të famshme në përgatitjen e reçelit ka krijuar vulën shqiptare në një botë të tërë magjike shijeje dhe ëmbëlsie.

Dikur, kjo traditë ishte e kufizuar brenda kuzhinës së nënave dhe gjysheve. Ndërsa sot është shndërruar në një biznes të “ëmbël” fitimprurës për këdo që ka guxuar drejt kësaj sipërmarrjeje.

Me një emër krejt interesant “Jam Fruta” që mishëron në vetvete filozofinë e shëndetit dhe mirëqenies, prej tre vitesh Dashamir Elezi i’a ka dalë që të ngrejë një biznes të mirëfilltë me traditën më të mirë të kuzhinës shqiptare: Reçelin.

Mjeshtëri në përgatitje, fruta të freskëta të kultivuara nga fermat shqiptare, shije e jashtëzakonshme, esenca e traditës në secilën prej recetave.

Të gjitha këto, i bëjnë llojet e reçelit, marmalatave apo glikove të prodhuara nga kjo sipërmarrje e re, në produktin më special “Made in Albania” të kërkuar plot interes nga tregjet e Europës dhe më gjerë.

“Fillimisht është pasioni mbi këtë traditë të hershme shqiptare pastaj sigurisht biznesi.

Për të patur çdo lloj reçeli, marmelate apo glikoje me vlerat maksimale të frutave përdorim gjithmonë frutat e fermave shqiptare.

Në mënyrë kategorike, të gjitha produktet janë 100 % me ëmbëlsim natyral nga lëngu i rushit të përqëndruar.

Falë kësaj veçorie, vlerat ushqyese janë të garantuara” thotë Dashamir Elezi, administrator i “Jam Fruta”. Ai tregon për AgroWeb.org përkushtimin dhe pasionin e përditshëm në aktivitetin e sipërmarrjes së tij.

Por krahas traditës së recetave tipike, të cilat i kemi provuar të gjithë sa në shtëpitë tona po aq edhe të gjysheve, sot një mënyrë tjetër fantastike jo vetëm në tërheqjen e konsumatorëve por edhe në sjelljen e një risie në tregun shqiptar janë disa receta reçeli të veçanta.

Në disa raste të padëgjuara më parë e që intrigojnë me shijen e tyre. Një prej këtyre recetave është befasuesi reçel i Kungullit të Misirit.

Reçeli Shijeplotë i Kungullit, Shije dhe Sukses  

Mund të tingëllojë çuditshëm por ndër llojet më të veçanta, padyshim të shijshme e mbi të gjitha shumë befasues është Reçeli i Kungullit të Misirit. Për Elezin, ky lloj reçeli është ndër më të kërkuarit sot, më interesantët dhe më tërheqësit nga konsumatorët.

Kjo recetë e lashtë, mesjetare me origjinë nga Mantova e Italisë ka mahnitur këdo që e ka provuar me shijen e saj të plotë dhe fantastike. Aq sa, nëse nuk e di se për çfarë bëhet fjalë, vështirë se mund t’a gjesh që është prej kungulli.

Për të përgatitur këtë lloj reçeli duhet me patjetër Kungull Misiri, shija e të cilit në çdo mënyrë gatimi është fantastike.

Kultivimi i Kungullit të Misirit në Shqipëri bëhet në fshatrat e Elbasanit, Tiranës e Lushnjes. Janë këto zona, nga të cilat “Jam Fruta” furnizohet për përgatitjen e reçelit të kungullit.

Si fillim kanë qenë restorantet që kanë tërhequr këtë lloj reçeli e disa markete prestigjoze. Ndërsa tani fama e tij po përhapet gjithandej, madje edhe drejt tregjeve europiane.

Receta Misterioze

Ka diçka misterioze në përbërësit e reçelit të Kungullit të Misirit. I pyetur nga AgroWeb.org, Elezi vështirë se e tregon recetën.

“Është sekrete, ndaj dhe nuk mund ta bëjmë publike.

Sigurisht që mund të ketë shumë receta për këtë lloj reçeli. Por ju siguroj përbërësit e recetës sonë janë unik.

Ndaj dhe sekreti dhe fshehtësia e kësaj recete për ne është jashtëzakonisht e rëndësishme” thotë ai.

Megjithatë, për kuriozitetin e të gjithëve AgroWeb.org sugjeron më poshtë një recetë të thjeshtë të reçelit të kungullit.

Përgatitja e reçelit të kungullit në shtëpi

Kjo recetë mund të përgatitet krejt lehtë në shtëpi nga të gjithë. Për këtë reçel, u duhen  2 kg copa kungulli të prerë, 1-2 kg sheqer, 2 litra ujë të gëlqerosur, dy portokaj dhe 200gr arra.

Si fillim, qërojmë kungullin dhe e ndajmë në copëza të vogla.

Më pas, copëzat e prera të kungullit i lëmë për dy orë në një enë ku kemi hedhur ujin me gëlqere. Për ujin e gëlqerosur, na duhet 100 gr gëlqere në 2 litra ujë.

Pas dy orësh, heqim copëzat e kungullit nga gëlqerja dhe i shpëlajmë disa herë me ujë të përvëluar. Ndërsa kullojmë kungujt, në një enë përgatisim sherbetin duke hedhur 2 kg sheqer dhe 400 ml ujë.

Pasi sherbeti të jetë nxehur hedhim copëzat e kungullit dhe portokajtë e qëruar. Portokalli shkrihet dhe ofron një nuancë ideale në shije.

Reçelin e lëmë të ziejë në zjarr të ngadaltë për rreth një orë. Pastaj hedhim arrat dhe e lëmë të ziejë edhe 15 minuta.

E heqim nga zjarri dhe nisim ta hedhim në kavanoza të sterilizuar. Pasi i mbushim me reçel, kavanozat i mbyllim fort, i lëmë të ftohen dhe i mbajmë në frigorifer.

Këtë recetë të thjeshtë mund ta provoni krejt lehtë në shtëpi. Por siç tashmë na tërheq edhe kureshtia e recetës misterioze e të fshehtë, përgatitur me mjeshtëri siç na tregon Elezi, ky reçel duhet provuar me të vërtetë patjetër.

Ndërkohë për specialitete të tjera të veçanta reçeli spikasin edhe ai i fikut me shafran, reçeli i dardhës me spec djegës apo edhe reçeli i qepës./AgroWeb.org   

Vlerat Shëndetësore të Lëngut të Rukolës dhe Brokolit

Lëngjet natyrale janë të mrekullueshme sa mund të lehtësojnë edhe sëmundjen më të keqe.

Shkencëtarët kanë arritur të zbulojnë se si njerëzit mund të neutralizojnë sëmundjet duke përdorur produkte krejtësisht natyrale.

Lëngjet unike natyrale me përbërje frutash, perimesh dhe barishtesh ju ndihmojnë shumë për të luftuar disa sëmundje.

Metoda e përftimit të këtyre lëngjeve është e shëndetshme dhe pa pasoja toksike. Veçanërisht i shëndetshëm është kombinimi i brokolit dhe rukolës, në një lëng unik për organizmin.

Brokoli

Kjo perime mund të konsiderohet si super-ushqim duke qenë se është provuar të ketë superfuqi në parandalimin e radikaleve të lira dhe në mbështetjen e sistemit tretës.

Po ashtu ndimon në mbrojtjen e sistemit kardiovaskular, në detoksifikimin e organizmit, si dhe në uljen e nivelit të kolesterolit dhe s’duhet lënë pa përmendur në shëndetin e kockave.

Është e pasur me vitaminë C, vitaminë K, vitaminë B6, vitaminë E, kalçium, magnez dhe të tjera. Substancat që gjenden tek brokoli, shkaktojnë disa reagime gjenetike, duke aktivizuar edhe genet që luftojnë radikalet e lira.

Rukola

Me shijen e saj të veçantë, substancat ushqyese dhe vitaminat, rukola është një zëvëndësuese e denjë e çdo të gjelbre.

Ajo është burim i shkëlqyer i substancës glukozinolates që gjatë përtypjes transformohet në isothiocianates, e cila nga ana tjetër neutralizon agjentët e dëmshëm në organizëm.

Për më tepër, rukola përmban sasi të përqendruara të pigmentit klorofil që lufton radikalet e lira. Gjithashtu përmban sasi të mëdha të vitaminës C dhe beta karotenit.

Spinaqi

Vlerat shëndetësore të spinaqit janë të shumëfishta.

Perimet me gjethe të gjelbërta duhet të konsumohen pasi janë të pasura në klorofil, i cili ka një efekt të mrekullueshëm në të gjithë organizmin duke sjellë nivele të shëndetshme të hekurit, duke pastruar dhe shëruar organizmin.

Spinaqi gjithashtu është një trajtues i mirë me alkaline, si dhe i pasur me vitaminë K, vitaminë A, vitaminë C, vitaminë B2, vitaminë E, mangan, acid folik, magnez, hekur, kalçium, kalium, etj.

Lëngu i Shëndetit

Të gjithë përbërësit e lartpërmendur të kombinuar së bashku i japin organizmit një armë të fortë kundër radikaleve të lira. Duhet të dini se secila prej këtyre substancave nuk ia del dot e vetme të luftojë problemet, por lëngu i të gjithë përbërësve sjell fuqinë.

Përbërësit

200 gr brokoli

150 gr rukola

150 gr spinaq

Mjaltë sipas preferencës

Kombinimi i këtyre përbërësve nuk kërkon një recetë të mirëfilltë. Ju mund t’i kombinoni sipas dëshirës në mikserin tuaj të preferuar. E rëndësishme është që t’i përdorni të gjitha për të mbrojtur shëndetin tuaj./AgroWeb.org

Supa Me Avokado, Pasuri Ideale Për Organizmin

Kënaqësia që zbret në stomak pas një vakti të lehtë e të shijshëm ushqimi pa dyshim ndikon në ngjitjen e një humori pozitiv përgjatë gjithë ditës.

E tillë është ndijesia që të dhuron një supë e ngrohtë, delikate dhe kremoze me avokado e gatuar në shtëpi.

Padyshim çdo supë ka shijen e saj karakteristike ashtu si edhe vlerat ushqyese por kur vjen puna tek supa me avokado, shija të ofron një tjetër dimension  kënaqësie.

Të gjithë e dimë që për nga vlerat ushqyese, avokado është një nga dhuratat më bujare që i janë bërë njerëzimit. Vlerat ushqimore të avokados janë të panumërta.

E kombinuar në një pjatë të shijshme supe këto vlera i ofrojnë organizmit më shumë se sa thjeshtë ndjesinë e shijes së mirë.

Supa me avokado është shumë e shëndetshme dhe me vlerë aq sa të serviret në një restorant me pesë yje. Përbërësit e saj kushtojnë pak dhe përgatitja është mjaft e thjeshtë. Ulja e kolesterolit është një vlerë e shtuar.

Avokadot janë një frut që buron energji. Rreth 80% e frutit përmban ujë (72%) dhe fibër dietike (6.8%) duke pasur një ndikim pozitiv tek njerëzit në përpjekje për të rënë në peshë.

Avokadot mund të përfshihen në shumë receta. Ato janë të shijshëm dhe kremozë dhe krahas supës ato kombinohen më së miri në sallata, ëmbëlsira e shumë gatime të tjera.

AgroWeb.org sugjeron më poshtë një recetë fantastike të supës kremoze me avokado e cila mund të përgatitet shumë shpejt dhe lehtë në shtëpi.

Supa me avokado në kuzhinën tuaj

Përbërësit

2 avokado të qëruara dhe pa bërthamë

2 filxhanë të mëdhenj të ngrohtë me lëng pule ose perimesh

1 lugë çaji me lëng limoni

1 lugë gjelle me kos pa yndyrë.

½ lugë çaji me erëzën e preferuar si majdanozi, kopra e të tjerë. Nëse keni erëza të freskëta përdorni më shumë

¼ lugë çaji me hudhër pluhur (ose e grirë në rende)

¼ lugë çaji me qepë pluhur (ose e grirë në rende)

¼ lugë çaji me piper

Kripë sipas dëshirës.

Udhëzimet

Vendosini të gjithë përbërësit në një mikser dhe përzijini ato deri sa të përfitoni një masë kremoze dhe të butë.

Këtë mund ta ngrohni ose ta konsumoni të ftohtë.

Pjatat e supën mund t’i zbukuroni me feta avokadoje, feta rrepash të kuqe, kos apo krem.

Mund ta përdorni si salcë për gatimet me mish pule, mish viçi, derri apo peshk. (Zakonisht, supa krem e avokados hidhet sipër filetos së mishit sipas llojit të tij)

Për këtë recetë rekomandohen avokado të përmasave të mëdha.

Nëse ju gjënden avokado të vogla mund të përafroni sasinë e përbërësve të tjerë./AgroWeb.org

 

Ushqimet e Pasura me Vitaminat e Rinisë

Produktet dhe trajtimet e bukurisë që na ofrohen çdo ditë, shpesh përshkruhen si vepra arti të afta të bëjnë mrekullira për të rikthyer gjallërinë e fytyrës si brenda ashtu edhe jashtë. Por në të vërtetë, ne jemi çfarë hamë.

Misioni i ushqimit nuk është vetëm të ngazëllejë apo të kënaqë shqisat, por edhe të na japë energji dhe rini të organizmit.

Ushqimi ka një tjetër mision po aq të rëndësishëm. Ai është pjesë e pandashme e rutinës së kujdesit të lëkurës.

Vitaminat kundër plakjes mund të merren shumë mirë nëpërmjet ushqimit, në mëngjes, drekë dhe darkë duke i dhënë lëkurës shkëlqim, hidratim dhe pamje rinore.

AgroWeb.org do t’ju tregojë për listën e vitaminave më të mira kundër plakjes dhe burimet më të pasura natyrale ushqimore ku mund t’i gjeni ato.

1. Vitamina C

Përfitimet kundër plakjes:

Vitaminës C i thurin shumë lavde kur vjen puna tek roli i saj në sistemin imunitar. Por roli i kësaj vitamine është shumë i çmuar në prodhimin e kolagjenit që ndihmon në mbrojtjen e qelizave nga dëmet e shkaktuara prej diellit.

Ku mund ta gjeni:

Specat (pavarësisht ngjyrës)
Brokoli
Luleshtrydhet
Agrumet si ananasi, limoni, limoni jeshi, portokalli e të tjerë.

Doza e nevojshme:

A e dinit se specat përmbajnë 280 mg vitaminë C ndërsa portokallet që çmohen kaq shumë kanë vetëm 90 miligramë?

Njeriu ka nevojë për të paktën 100 mg vitaminë C në ditë, ndaj për të përfituar këtë dozë duhet të hani dy fruta ose perime të lartpërmendura në ditë.

2. Vitamina E

Përfitimet kundër plakjes:

Vitamina E shërben si mbrojtëse e membranës së qelizave. Ajo ruan hyrjet dhe daljet e çdo gjëje në lëkurë.

Kur kombinohet me vitaminën C, vitamina E mbron lëkurën kundër dëmeve të shkaktuara nga rrezet ultra vjollcë.

Ku mund ta gjeni:

Embrioni i grurit (të cilin mund ta shtoni në lëngjet me proteina, tërshërë, bukë, biskota dhe kos)
Arrorët dhe farat (farat e lulediellit, kikirikët, bajamet)
Avokadot

Doza e nevojshme:

Konsumoni një lugë gjelle me embrion gruri, dy feta avokadoje ose një grusht me arra.

3. Beta-Karoteni

Përfitimet kundër plakjes:

Beta-karoteni është thelbësor për shëndetin e lëkurës. Ai transformohet në vitaminë A që është përgjegjëse për riparimin dhe rritjen e qelizave.

Ku mund ta gjeni:

(Perimet dhe frutat me ngjyrë portokalli dhe të gjelbër)
Karrotat
Kungulli
Pjepri
Pazia
Spinaqi
Rukola

Doza e nevojshme:

Ju nevojiten të paktën dy racione në ditë të frutave ose perimeve të lartpërmendura.

4. Omega-3

Përfitimet kundër plakjes:

Omega-3 janë yndyrna të mira e të shëndetshme që e mbajnë lëkurën të ushqyer, ruajnë integritetin e membranës së qelizave, mbajnë toksinat larg dhe mbrojnë kundër dëmeve të shkaktuara nga dielli.

Ku mund ta gjeni:

Farat e bluara të linit
Arrat
Sardelet ose salmoni i egër

Doza e nevojshme:

Konsumoni 90 deri në 150 gramë peshk në javë. Nëse nuk ju pëlqen peshku, atëherë mund të provoni suplementët e Omega-3. Konsultohuni me mjekun përpara se ta bëni këtë, sepse këto suplementë hollojnë gjakun.

5. Uji

Përfitimet kundër plakjes:

Uji mund të mos jetë një vitaminë, por e kemi dëgjuar me mijëra herë rëndësinë e të pirit ujë. U

ji është jetësor për shëndetin e lëkurës dhe bukurinë tonë. Sa më shumë ujë të pini, aq më mirë funksionojnë organet, përfshirë atë më të madhin siç është lëkura. Uji hidraton qelizat dhe i jep lëkurës elasticitet, gjallëri, shkëlqim dhe pamje rinore.

Ku mund ta gjeni:

Burime të rëndësishme të ujit përfshijnë:

Shalqini
Ananasi
Manaferrat
Lulelakra
Domatet qershizë

Me këto produkte, përfitimi do të jetë i dyfishtë. Përveç ujit, do të përfitoni edhe beta karoten dhe vitaminë C.

Doza e nevojshme

Debatet mbi sasinë e ujit që duhet konsumuar vazhdojnë, por ne ju rekomandojnë të lini etjen t’ju tregojë sasinë për të cilën keni nevojë./AgroWeb.org

Pranvera e Dytë Sjell Risjell Shalqi të Ëmbël në Treg

Përgjithësisht në Shqipëri, Qershori, Korriku dhe Gushti mund të quhen ndryshe Muajt Kombëtarë të Shalqinit, këtij fruti të kuq dhe të ëmbël, shija perfekte e freskisë.

Por klima e ngrohtë e këtij viti ka bërë që të kemi ende shalqinj të mirë, prodhim totalisht vendi në treg.

Nëse keni parë një prani të pazakontë të shalqinjve dhe pjeprave në treg nuk ka asgje për t’u habitur, përkundrazi. Jo vetëm shalqinjtë, por edhe pjeprat e kësaj vjeshte janë nga më cilësorët.

Fermerët shpjegojnë për AgroWeb.org se ka qenë moti i ngrohtë pranveror i muajve të parë të vjeshtës që ka bërë që të kemi ende prodhim të shalqinjve dhe pjeprave të vonshëm.

Kultivuesit Ruzhdi Koni dhe Ristan Janko, së bashku me Ndriçim Hysën tregojnë madje me krenari prodhimin e bollshëm dhe cilësor të shalqinjve të këtij tetori në Divjakë, rritur në kushte krejtësisht natyrale dhe përkujdesin e duhur organik.

Shalqini është padyshim fruti më i konsumuar në Shqipëri ndjekur nga pjepri dhe vedeni.

Shalqini i rritur në Shqipëri nuk ka të krahasuar në aspekt shijesh dhe vlerash me asnjë nga zonat e rajonit.

Zonat e Fierit, Lushnjës dhe Mallakastrës janë kampionë të prodhimit të shalqinit në Shqipëri.

Në vitet e fundit, Shqipëria ka prodhuar plot 221,628 ton shalqinj nga fushat dhe 1044 ton nga serat.

Prodhimi vjetor i Lushnjës arrin në 81, 804 ton ndjekur nga Shkodra me 22,779 ton.

Nga e majta, kultivuesit Ristan Janko, Ndriçim Hysa dhe Ruzhdi Koni tregojnë prodhimin e bollshëm dhe cilësor të shalqinjve të këtij tetori në Divjakë. Foto: WebLibrary

Cilësia e Lartë rrit Eksportet e Shalqinjve

Në vitet e fundit, fermerët shqiptarë kanë eksportuar afërsisht 23.000 ton shalqi në vit, kryesisht në Ballkan por edhe në tregjet e Bashkimit Evropian, të cilat janë dhe tregjet më atraktive për këtë produkt.

Vendet evropiane që janë importuesit më të mëdhenj të shalqinit, janë Gjermania, Franca dhe Britania. Kjo pasi në këto vende ky frut nuk mund të prodhohet, për shkak të temperaturave të ulëta. Por nuk mbeten pas dhe Lituania dhe Çekia.

Tregu rajonal i Ballkanit aktualisht dominohet nga eksportet shqiptare të shalqirit. Pothuajse gjysma e të gjithë eksporteve shkojnë në Kosovë dhe Serbi.

Vende të tjera ku Shqipëria ka qenë e suksesshme në eksport përfshijnë Malin e Zi, Moldavinë, Rumaninë, Bullgarinë, dhe Kroacinë.

Shqipëria është prodhuesi i katërt më i madh me shalqi pas Rumanisë, Hungarisë dhe Ukrainës.

Fakte mbi vlerat e shalqinit

Shalqini ka më shumë likopen se domatet. Likopeni është një antioksidant i fuqishëm që i jep frutave ose perimeve atë ngjyrën e bukur rozë ose të kuqe.

Lëngu i shalqinit çliron nga dhimbjet e muskujve.

Ju mund të hani farat dhe cipat e bardha e shalqinit Lëvorja e shalqinit përmban shumë elementë ushqyes të shëndetshëm që i bëjnë mirë gjakut.

Shalqini është pothuaj i gjithi ujë E dini të gjithë ndoshta, por bëhet fjalë për një të dhënë interesante. 91 % e shalqinit është ujë, që ju mban të hidratuar./AgroWeb.org

Shumë i Shijshëm – Receta e Padëgjuar e Reçelit të Specave

Kjo është receta e shijshme, plot delikatesë e aromë që mahnit këdo me shijen unike të përftuar përmes Reçelit të Specave

Specat e kuq i japin gatimeve të çdo stine, jo vetëm ngjyrë por edhe shije dhe aromë. Megjithëse e padëgjuar në traditën e hershme dhe popullore shqiptare të përgatitjes së reçelit, ai i specit të kuq është krejtësisht unik.

Me një teksturë të plotë në shije, delikat dhe aromë ndjellës, reçeli i specit të kuq është ndër më fantastikët që do pasurojë me patjetër  recetat e ëmbëlsirave që përgatisin amvisat shqiptare.

Në formën e tyre të përqendruar siç është edhe reçeli, specat e kuq kombinohen mjaft mirë me djathërat, por mund të konsumohen edhe veçmas mbi një fetë me bukë të thekur.

Reçeli i specave të kuq është ideal për këtë stinë. Receta që sugjeron AgroWeb.org do ju ndihmojë të jeni krijues dhe të talentuar në kuzhinë.

Specat e kuq priten në copa, gatuhen me sheqer, me uthull vere dhe pak gjalpë.

Rezultati është një reçel për të lëpirë gishtat, por edhe unik në vlera dhe shije.

Reçeli mund të ruhet në një kavanoz në frigorifer për deri një muaj. Për më tepër, atë mund ta ruani edhe në ngrirje për më shumë se tre muaj.

Si ta përgatisim këtë recetë krejt lehtë në shtëpi

Përbërësit

  • 2 speca të mëdhenj të kuq, me fara dhe të prerë në copa
  • 1 lugë çaji me fara të specave djegës, nëse ju pëlqejnë recetat pikante
  • 1 gotë e çerek me sheqer
  • 3 lugë çaji me limon
  • Gjysëm gote me uthull të bardhë
  • 1 lugë gjelle me gjalpë pa kripë
  • Gjysëm luge çaji me kripë

Udhëzimet e përgatitjes 

1. Pastrojini specat nga farat. Merrni një pjatë të vogël dhe vendoseni në grirje.

2. Në mikser hidhni specat e kuq dhe farat djegëse (nëse ju pëlqejnë gatimet pikante) deri sa të grihen hollë. Në një enë të vogël përzieni mirë katër lugë gjelle me sheqer dhe lëngun e limonit.

3. Në një tenxhere të përmasave mesatare, përzieni së bashku sheqerin e mbetur, uthullën, gjalpin, kripën dhe masën e specave të grirë në mikser. Lërini të ziejnë në temperaturë të lartë për rreth pesë minuta.

Përziejeni herë pas here. Ngadalë shtoni masën e sheqerit dhe lëngun e limonit duke e përzierë me specat në tenxhere në mënyrë të vazhdueshme që të mos ngjitet në pjesën e fundit të enës. Lëreni të ziejë deri sa reçeli të trashet për rreth 2 minuta.

4. Lëreni recelin të ftohet plotësisht. Hidheni atë në kavanozë dhe ruajeni në frigorfier për deri një muaj ose në ngrirje për deri në 3 muaj. Reçelin mund ta konservoni sipas preferencës./AgroWeb.org

Çfarë Duhet të Keni Kujdes me Zgjedhjen dhe Gatimin e Patateve

Patatet e reja tashmë i gjen në çdo treg të Shqipërisë. Është e vështirë t’u rezistosh me shijen dhe pamjen e freskët që kanë.

Zona e Shishtavecit në Kukës dhe Stëbleva, Librazhdi, Korça dhe Pogradeci janë më bujaret në ofrimin e varieteteve të ndryshme të patateve të një cilësie superiore.

Patatet e reja kanë lëkurë të hollë të lëmuar dhe në ndryshim nga simotrat e tyre, arrijnë të ruajnë formën edhe pas prerjes dhe gatimit.

Patatet e reja janë zgjedhja më e mire. AgroWeb.org ju tregon se tek patatet e reja sheqernat nuk janë transformuar në niseshte dhe për këtë arsye përshtaten shumë mirë me çdo gatim.

Shqiptarët kanë tendencën që çdo patate të vogël ta quajnë të re. Por gjërat nuk janë kaq të thjeshta. Patatet e reja janë ato që dalin në treg menjëherë pas nxjerrjes nga toka.

Zakonisht, patatet ruhen për disa javë që lëkura të zejë vend dhe çarjet e saj të sheshohen, duke garantuar kështu një jetëgjatësi më të madhe.

Patatet e reja janë të njoma dhe kanë një shije të ëmbël në fillim me një nuancë hidhësie në fund. Më poshtë do të lexoni disa prej këshillave të AgroWeb.org mbi përzgjedhjen dhe ruajtjen e patateve të reja.

Si t’i zgjidhni patatet e reja

Mënyra më e mirë për të dalluar nëse patatja është e re është ta fërkoni lëkurën e saj me gishtin e madh. Lëkura duhet të jetë mjaft delikate dhe të hiqet menjëherë me një prekje.

Shumë ndjekës të AgroWeb.org dëshirojnë të dijnë se si të gatuajnë patatet për të zvogëluar formimin e akrilamidit, substancës së dëmshme për shëndetin.

Si t’i gatuani për shëndet të mirë

Akrilamidi formohet në mënyrë natyrale gjatë pjekjes dhe skuqjes së produkteve që përmbajnë sheqer, niseshte dhe aminoacidin asparaginë.

Akrilamidi arrin të formohet edhe gjatë pjekjes ose skuqjes së patateve, në një temperaturë më të lartë se 120 gradë.

AgroWeb.org ju këshillon të shmangni ruajtjen e patateve në frigorifer. Në temperatura të ulëta, patatet lëshojnë një sasi më të madhe të sheqerit dhe pastaj kur piqen do të prodhojnë më shumë akrilamid.

Zgjidhni varietetet e patateve të vendit pasi këto përmbajnë më pak asparaginë dhe sheqerna natyralë.

Çfarë duhet të keni kujdes

Mos harroni se patatet janë vjelur në korrik, gusht dhe shtator. AgroWeb.org ju tregon se duhet të zgjidhni patatet e reja dhe jo ato që janë vjelur kohë më parë.

Mundohuni të shmangni patatet që janë ruajtur për periudha të gjata, sepse ato përmbajnë më shumë sheqer.

Para gatimit, lërini patatet e prera nën ujë të rrjedhshëm për 15-20 minuta për të eliminuar glukozën dhe sheqerin e e tepërt.

Para çdo gatimi, vendosini patatet të ziejnë në ujë për rreth 6 minuta. AgroWeb.org ju këshillon të shtoni 1 lugë e gjysmë uthull në ujë për çdo litër.

Pehashi acid do të ngadalësojë dhe ndalojë formimin e akrilamidit. Në skuqje apo pjekje, kontrolloni ngjyrën e patateve. Duhet të ruani ngjyrën e artë, por jo t’i lejoni të nxihen./AgroWeb.org

Çaji i Hideve me Xhenxhefil Kundër Virozave

Çaji i hideve është një çaj bimor që përgatitet nga frutat e ëmbla të hideve të thata.

Çaji është i pasur me një sërë vitaminash dhe ushqyesish. Përmban sheqerna natyralë dhe vitamina A, B1, B2 dhe C.

Ky çaj përdoret kryesisht për të trajtuar një sërë çrregullimesh dhe problemesh me shëndetin duke nisur nga lëndimet dhe acarimet e fytit deri tek anemia.

Shqipëria është një nga vendet ku hidet apo xinxifet gjenden me bollëk, prandaj sapo të vijë sezoni i tyre, mos harroni të thani një sasi të mirë të tyre dhe t’i përdorni m&eumeuml; pas për një çaj me veti dhe vlera të çmuara.

Prej shekujsh të tërë, hidet janë përdorur në mjekësinë popullore, veçanërisht në atë të Azisë së largët. Falë vlerave të panumërta shëndetësore, ky çaj bimor është një nga më të çmuarit që ju mund të konsumoni në shtëpinë tuaj.

Në këtë lajm AgroWeb.org, po i referohet si ‘ide’, por emrat e tyre variojnë nga hide, ide dhe xinxife në varësi të rajoneve të Shqipërisë.

Një publikim i ‘Science Direct’ tregon se hidet përmbajnë kalium, fosfor, kalcium, mangan, hekur, sodium, zink, bakër, vitaminë C, thiaminë dhe riboflavinë.

Në fakt, idet përmbajnë 20 herë më shumë vitaminë C se agrumet.

Një studim mbi vlerat shëndetësore të hideve, shpjegon se ky frut përmban 18 nga 24 amino acidet e domosdoshme për organizmin.

Hidet përmbajnë saponinë që ka një efekt qetësues për sistemin nervor.

Vlerat shëndetësore të hideve janë si më poshtë:

Luftojnë të ftohtin, kollën dhe gripin

Që në lashtësi, çaji i hideve është përdorur për trajtimin e të ftohtit, kollës dhe gripit. Duke qenë se hidet janë të pasura me vitaminat A dhe C apo edhe kalium, ato janë të rëndësishme për të forcuar sistemin imunitar.

Kur kombinohen me xhenxhefil, mente dhe jamballin, hidet qetësojnë muskujt e fytit dhe ndihmojnë në qetësimin e kollës.

Rikthejnë ekuilibrin emocional

Ekspertët e bimëve medicinale thonë se ky çaj rikthen balancën e energjive negative dhe pozitive në organizëm.

Për më tepër, ai zbraps të gjitha pengesat e energjisë trupore dhe mban nën kontroll qetësinë emocionale, duke rikthyer ekuilibrat e nevojshëm.

Stresi dhe ankthi

Çaji i hideve përmban saponinë dhe luan rolin e qetësuesit natyral të sistemit nervor, duke larguar stresin dhe ankthin.

Detoksifikim
Ky çaj luan një rol pastrues për organizmin. Ndihmon në heqjen e toksinave dhe kimikatëve nga trupi, rrjedhimisht duke kryer një shërbim tepër të rëndësishëm detoksifikues.

Imunitet të fortë
Çaji i hideve ndihmon në formimin dhe mirëmbajtjen e qarkullimit të gjakut, hormoneve, kockave, muskujve, lëkurës, flokëve, enzimave dhe neurotransmetuesve, apo në formimin e mbi 50,000 proteinave në trup. Nga ana tjetër, proçesi i shërimit të plagëve përshpejtohet dhe sistemi imunitar përforcohet.

Mbron muskujt
Çaji i hideve ka një rol riparues duke rigjeneruar qelizat dhe indet e dëmtuar. Ky rol i bën hidet të nevojshme për muskuj më të fortë.

Ofron energji
Ky çaj mund të quhet edhe një pije natyrale energjike. Pasi ta keni konsumuar atë, energjia natyrale do t’ju rikthehet.

Kundër plakjes së lëkurës
Çaji i hideve përmban antioksidantë dhe rrjedhimisht vonon plakjen e lëkurës dhe e mban atë më të re për shumë vite.

Si të përgatisni çajin e hideve:

Përzgjidhni 300 gramë hide të thata
Shtoni xhenxhefil të qëruar 5-6 cm rrënjë do të mjaftojë
Kanellë dhe një dardhë të prerë në copa për ta bërë më të ëmbël

Udhëzimet:

Në 3 litra hidhni xhenxhefilin e prerë në copa, shtoni kanellën dhe dardhën. Pritini hidet dhe hidhini në tenxhere. Lërini të ziejnë për 4 orë. Kullojeni lëngun dhe kështu keni përftuar çajin, të cilin mund ta pini të ngrohtë nëse dëshironi. Pjesën tjetër lëreni të ftohet dhe futeni në frigorifer ku mund ta mbani për 10 ditë. Mund ta pini të ngrohtë ose të ftohtë sipas preferencës./AgroWeb.org

Ushqimet me Vitaminë B5, Kundër Alergjive, Stresit dhe Ankthit

Vitamina B5 e njohur ndryshe si Acidi Pantotenik është shumë e rëndësishme. Ajo vjen në ndihmë kundër azmës, rënies së flokëve, alergjive, stresit, ankthit, çrregullimeve me frymëmarrjen dhe problemeve me zemrën.

Ajo rrit imunitetin, zbut osteoartritin, shenjat e plakjes së parakohshme, mban nën kontroll diabetin dhe rrit rezistencën kundër një sërë infeksionesh

Një ushqyerje e pasur nënkupton praninë e bollshme të kësaj vitamine kaq të nevojshme për shëndetin dhe mirëqenien e organeve.

Ajo luan një rol të rëndësishëm në prodhimin e transmetuesve nervorë në tru, steroideve dhe përthithjen e yndyrnave, proteinave dhe ushqyesve të tjerë nga ushqimet.

Thënë shkurt, kjo vitaminë është e pazëvendësueshme për shëndetin.

Simptomat e Mungesës së Vitaminë B5

Nëse ndonjëherë ju duket sikur nuk i ndieni këmbët dhe më pas ju kaplojnë dhimbjet, atëherë duhet të dini se kjo është një simptomë e mungesës së vitaminës B5.

Kjo simptomë shoqërohet nga ndjenja e vazhdueshme e lodhjes dhe drobitjes së gjithë trupit. Simptoma të tjera përfshijnë pagjumësinë, aneminë, të vjellat, kontraktimet e muskujve dhe çrregullime jo normale të lëkurës.

Ku gjendet vitamina B5?

Burimet më të rëndësishme të kësaj vitamine janë kërpudhat, brokoli, lakra, bishtajoret, salmoni dhe barishtet.

Kjo vitaminë gjendet edhe tek vezët, peshqit, majaja, arrorët, qumështi, djathi, gruri dhe kikirikët.

Vlerat shëndetsore të vitaminës B5

Stimulon hormonet

Vitamina B5 sintetizon shumë përbërës organikë të rëndësishëm për trupin e njeriut. Për shembull, ajo është e rëndësishme për formimin e yndyrnave, proteinave, karbohidrateve, amino acideve dhe antibiotikëve. Kjo vitaminë stimulon gjithashtu hormonet e veshkave.

Largon stresin

Vitamina B5 është me famë sa i përket heqjes së stresit dhe zgjidhjes së disa problemeve mendore si ankthi dhe depresioni. Ajo rregullon hormonet që janë përgjegjës për krijimin e këtyre problemeve mendore.

Shëndeti i zemrës

Vitamina B5 bën një punë të mrekullueshme në mbrojtjen e funksioneve të zemrës. Ajo rregullon nivelin e kolesterolit dhe mban nën kontroll tensionin e gjakut.

Gjallëria fizike dhe mendore

Vitamina B5 ndihmon në zbutjen e lodhjes dhe drobitjes fizike dhe rikthen të gjitha aktivitetet e metabolizmit. Vitamina B5 rrit gjallërinë e trupit dhe e bën atë të jetë efikas në kryerjen e detyrave të përditshme.  Kjo vitaminë vlerësohet shumë nga njerëzit aktivë dhe ata që merren me sport.

Kujdesi për lëkurën dhe flokët

Vitamina B5 ndihmon në ruajtjen e shëndetit të lëkurës dhe paraqitjes së bukur të saj.

Ajo vonon shfaqjen e parakohshme të shenjave të plakjes, rrudhave dhe njollave të moshës. Studimet kanë treguar se ajo luan një rol të rëndësishëm në pigmentimin e flokëve dhe parandalon zbehjen e ngjyrës.

Vitamina që tretet në ujë

Vitamina B5 i përket atij grupi vitaminash që treten në ujë nëse merren sisuplement. Rrjedhimisht ajo nuk shoqërohet nga substanca toksike në organizëm. Kjo vlerë e bën këtë vitaminë shumë efikase për njerëz të të gjitha grupomoshave.

Sistem i fortë imunitar

Vitamina B5 është shumë e mirë në forcimin e sistemit imunitar, duke na ardhur në ndihmë kundër një sërë infeksionesh apo sëmundjesh.

Nëse dëshironi që të zvogëloni gjasat e prekjes nga një sëmundje e keqe atëherë përpiquni të maksimizoni numrin e qelizave të bardha dhe të mbani sistemin imunitar të mbrojtur. Këtë mund ta bëni duke ngrënë ushqime të pasura me vitaminë B5.

Rrit nivelet e hemoglobinës

Vitamina B5 arrin të rrisë nivelet e hemoglobinës në trupin e njeriut. Ajo ndihmon mëlçinë në metabolizmin e substancave toksike./AgroWeb.org

Arrat e Njoma, Ushqimi i Jetëgjatësisë

Momentet e fëmijërisë të kaluara tek gjyshja ose të afërmit në fshat mbeten më mbresëlënëset. Pjesë e këtyre momenteve janë padyshim pemët.

E mbani mend shijen e mrekullueshme të arrave të njoma dhe gjurmët e lagështa që na linin nëpër gishta? Këto arra të shijshme mund të ruhen gjatë gjithë vitit, disa i ngrijnë e disa i ruajnë kryesisht në formën e glikosë.

Kujtimet mund të fashiten por shija e arrave të njoma jo, ndonëse tani jemi më shumë të mësuar me shijen e arrave të thata. Me një kërcitje të vetme, arrat shpalosin vlera dhe fantazi.

Ato mund t’i hamë siç janë, t’i hedhim në sallatë ose t’i gatuajmë në ëmbëlsira. Arrat e njoma nga ana tjetër kanë një shije të pakrahasueshme dhe të rrallë. Ato janë kremoze, kanë një ngjashmëri me arrën e kokosit por me një aromë unike të lehtë prej arrori.

Për më tepër, këto arra janë më të mbushura dhe më të ëmbla se varianti i tyre i thatë.

Në mjekësinë popullore, arrat e njoma përbëjnë një zgjidhje të rëndësishme kundër disa sëmundjeve. Të thatat por edhe të njomat janë plot me vlera shëndetsore.

Ato janë të pasura me acidet yndyrore omega-3 dhe një burim i pakonkurueshëm i acideve yndyrore mono-të-pangopura (72%) siç është acidi oleik. Ngrënia e arrave ul kolesterolin e keq dhe rrit atë të mirin.

Konsumi ditor prej 25 gramë plotëson 90 përqind të dozës së rekomanduar ditore të këtyre acideve që mjaftojnë për pakësimin e gjasave të shfaqjes së tensionit të lartë të gjakut dhe sëmundjeve të zemrës. Nga ana tjetër, arrat fuqizojnë shtyllat e organizmit tonë siç janë kockat.

Arrat shumëfishojnë përthithjen dhe depozitimin e kalciumit dhe pakësojnë nxjerrjen e këtij minerali jashtë organizmit.

Një tjetër vlerë e shtuar e konsumit të arrave qëndron në përmirësimin e metabolizmit. Arrat ofrojnë minerale si mangani, bakri, kaliumi, kalciumi, hekuri, magnezi, zinku dhe seleniumi.

Këto minerale kontribuojnë në mirëqenien e metabolizmit, rritjen dhe zhvillimin, fertilitetin tek meshkujt, tretjen dhe sintetizimin e acidit nukleik.

Arrat janë një burim i pasur antioksidantësh dhe yndyrnash të shëndetshme. Ato pakësojnë faktorët e rrezikut të sëmundjeve të zemrës, gjithnjë nëse janë pjesë e një stili të shëndetshëm jetese.

Shumë studime me subjekt njerëzit tregojnë se ngrënia e arrave përmirëson funksionet e trurit, lufton depresionin dhe frenon problemet mendore si pasojë e moshës. Thënë shkurt, arrat janë një ushqim fantastik i jetëgjatësisë.

Çuditërisht, arrat janë një burim i lartë i melatoninës, një ushqyes i lidhur fort me gjumin. Thënë ndryshe, pa melatoninën nuk ka gjumë. Rrjedhimisht ngrënia e arrës luan një rol në qetësimin gjatë ditës dhe në gjumin e mirë dhe të qetë gjatë natës.

Arrat përmbajnë acide esenciale yndyrore siç është edhe acidi alfa linolenik, përbërësit e të cilit janë të lidhur me fortësinë dhe shëndetin e kockave. Falë arrave, ne furnizohemi me acidet yndyrore omega 3, nëpërmjet të cilave luftojmë inflamacionin dhe kemi kocka të forta për një periudhë të gjatë./AgroWeb.org

Siguroni Jetëgjatësinë e Vajit Cilësor të Ullirit

Përdorimet e tij në gatimet tona të preferuara janë të panumërta, aq sa furnizimi me këtë vaj nuk është kurrë i tepruar.

Në ka një produkt që nuk duhet të mungojë kurrë në kuzhinë, ai është vaji i ullirit ekstra i virgjër.

Përdorimet e tij në gatimet tona të preferuara janë të panumërta, aq sa furnizimi me këtë vaj nuk është kurrë i tepruar.

Gjithnjë sugjerohet që në kuzhinë të kesh disa shishe rezervë me vaj ulliri cilësor, por natyrshëm lind pyetja, a prishet ndonjëherë vaji i ullirit?

Jetëgjatësia e vajit të ullirit

Siç ndodh edhe me ushqime të tjera që kanë një afat përdorimi dhe cilësie, vaji i ullirit nuk bën përjashtim. Padyshim që edhe vaji arrin një pikë që e bën atë të papërdorshëm. Me kalimin e kohës, ajri, nxehtësia dhe drita kanë një ndikim të pakthyeshëm në cilësinë e produktit dhe në sigurinë e tij.

Pavarësisht të gjitha hapave që marrim për ta ruajtur sa më mirë, vaji i ullirit nuk do të zgjasë përjetësisht.

Zgjidhja më e mirë është gjithnjë vaji i freskët ekstra i virgjër, i pastër dhe natyral i ullirit. Por kjo nuk do të thotë që këto karakteristika do të garantojnë jetëgjatësinë e tij, sepse vaji i ullirit është një produkt natyral i pastër pa aditivë, që mund t’ia zgjasin jetën por dëmtojnë cilësinë.

Shumica e vajrave të ullirit janë të përdorshëm deri në dy vjet që nga data e paketimit. Nëse dëshironi të shtoni jetëgjatësinë e vajit të ullirit, shfrytëzoni këto këshilla nga AgroWeb.org:

Nëse keni disa shishe, mos i hapni të gjitha njëherësh, por një e nga një. Vajra të ndryshëm mund të kenë shije dhe aromë të ndryshme. Është e rëndësishme të mbani mend që kur shishja hapet, përmbajtja e saj do të ketë një jetëgjatësi më të shkurtër.

Ruajeni në vend të freskët

Mbajeni vajin e ullirit në një vend të freskët dhe të errët, larg zonave të gatimit dhe burimeve të nxehtësisë. Mos e fusni në frigorifer, por mbajeni në një dollap të ajrosur mirë që do të ndihmojë në zgjatjen e freskisë së vajit të ullirit.

Mbajeni shishen të mbyllur mirë

Shishet dekorative që mund të keni në shtëpi, ngjajnë shumë të bukura, por nëse e keni të pamundur të izoloni grykën e tyre që ta mbroni vajin e ullirit nga ambienti i jashtëm, atëherë shishja nuk bën punë. Ekspozimi i vajit në oksigjen do të përshpejtojë prishjen e vajit.

Mbajeni shishen larg dritës

Shumica e vajrave të ullirit janë të paketuara në shishe të errëta për një arsye të vetme. Ato filtrojnë shumicën e dritës që arrin të degradojë vajin e ullirit me kalimin e kohës. Një shishe qelqi me ngjyrë të errët është gjithashtu e rëndësishme për të siguruar jetëgjatësinë e produktit.

Si të dalloni një vaj të prishur

Fakti që një shishe me vaj ulliri ka një afat përdorimi të stampuar në të, nuk garanton që vaji do të mbajë të njëjtën cilësi për shumë gjatë.
Përpara se të përdorni vajin e ullirit, kontrolloni datën e stampuar si një udhëzues për cilësinë e tij. Jini vigjilentë për shenjat e mëposhtme që do t’ju ndihmojnë të dalloni vajin e prishur.

Pamja

Gjëja e parë që duhet të shikoni është pamja e vajit të ullirit. Pas një 12 ose 18 muajsh, vaji do të nisë të ndryshojë ngjyrë. Nëse prishet, vaji do të marrë një ngjyrë të çelët të verdhë.

Aroma

Në ka një tregues vendimtar për cilësinë e vajit, është aroma e vajit. Vajrat e freskët kanë një aromë të ndezur e të mprehtë. Por duke u prishur, vaji merr një aromë që të ngjan me kikirikët e prishur, shkumësin apo stukon.

Shija

Nëse keni akoma dyshime, provoni një gllënkë dhe shijojeni në gojë. Nëse shija që do të përjetoni do të jetë ajo e yndyrës që ngjit, thartësisë apo e ngjashme me kungullin, dijeni që keni hasur një vaj ulliri të prishur./AgroWeb.org