Lëngu i shegës është pija që dominon stinën e vjeshtës. Përfitimi i vlerave të këtij fruti të madhërishëm është kthyer në një traditë të mirëfilltë. Por kjo nuk do të thotë që ju duhet të mjaftoheni me lëngun e shegës për të marrë maksimumin e vlerave që ju duhen për të përballuar këtë stinë. Më poshtë do të gjeni një listë nga AgroWeb.org me pije të tjera që duhet t’i konsumoni patjetër gjatë ditëve të ftohta.

Çaj i ngrohtë me gjalpë. Ju duket i çuditshëm? Sidomos në zonat malore të Shqipërisë, çaji i malit përzihet me lëng limoni, mjaltë dhe pak gjalpë. Ky i fundit është një element që e bën shijen e çajit mjaft interesante dhe aspak të çuditshme, sidomos për ata që kanë probleme me kollën ose fytin. Nëse ju pëlqen çaji i malit, atëherë përdoreni shpesh kështu, jo vetëm në mëngjes, por edhe në mbrëmje.

Vezë të rrahura dhe kanellë. Hidhni pak qumësht në një mikser. Shtoni kanellë, arrëmyshk, vanilje, pak kripë dhe një lugë çaji me mjaltë. Në një pjatë hidhni të bardhat e dy vezëve. Rrihini deri sa të përfitoni një shkumë bardhoshe dhe të butë si reja. Përzijini së bashku dhe do të përfitoni një pije plot vlera, por jashtëzakonisht të shijshme.

Çokollatë e ngrohtë. Receta e çokollatës së ngrohtë që do të lexoni tek AgroWeb.org është fantastike. Shkrini çokollatë të zezë që ka përqindje të lartë kakaoje dhe shtoni qumësht. Nëse dëshironi ta bëni pak më të fortë shijen, hidhni në enë edhe një filxhan me kafe ekspres.

Pija e zjarrit të oxhakut. Nëse dëshironi të luftoni netët e ftohta të vjeshtës, dhe nëse keni hequr dorë nga alkoli, atëherë duhet të provoni këtë pije që kombinon fuqitë shëruese të uthullës së mollës, xhenxhefilit, piperit të kuq pluhur, qepës dhe rrepës, mushtit, mjaltit, ujit të ngrohtë dhe limonit ose portokallit. Nëse dëshironi mund t’i hidhni kësaj pije edhe një gotëz raki, që ta bëni më të fortë.

Qumësht i ngrohtë me vanilje. Është shumë e thjeshtë por shumë e shijshme. Ngrohni qumështin në një enë. Pa zier akoma, hiqeni nga zjarri dhe shtoni në të pak ekstrakt vanilje. Hidheni në një filxhan, shtoni pak mjaltë dhe kanellë dhe do të përfitoni një shije të mrekullueshme që të ngjan me akulloren e shkrirë. Ju bëftë mirë! /AgroWeb.org