Në dashurinë e tyre për bukën, shqiptarët furnizohen çdo ditë me një mori alternativash të këtij produkti prej brumi. Një ndër më të preferuarat është padyshim buka e fshatit, që ka një shije, butësi dhe një kore fantastike shumë më të mirë se çdo bukë tjetër. Por sa e vërtetë është buka e fshatit që tregtohet në vend?

Për çudi, në çdo furrë buke në qytet gjen bukë fshati. Ndonëse buka e vërtetë e fshatit kërkon një përkujdesje të veçantë, eksperiencë dhe përbërës cilësorë, në ditët e sotme, emërtimi ‘bukë fshati’ i jepet lehtësisht edhe bukës tjetër që nuk plotëson kushtet.

Ekspertët e AgroWeb.org tregojnë se përgatitja e bukës së fshatit kërkon angazhim maksimal dhe duar të forta për të dalë aq e shijshme dhe e pangatërrueshme me asgjë tjetër.

Teknikat artizanale të përgatitjes së bukës së fshatit janë kryesore, por çelësi i suksesit është padyshim durimi. Shumë prej furrave të bukës në vend përdorin miell të një cilësie të dobët dhe substanca jo të mira për ardhjen e brumit. Siç mund të pritet, buka nuk është nga ato që të mbetet në mendje.

Fermentimi i majasë ka nevojë për 24 orë që të lejojë ndërveprimin e enzimave natyrale me miellin për të krijuar më pas dendësinë dhe shijen karakteristike të bukës së fshatit.

Ndoshta nuk e dinit…

Buka e fshatit tretet shumë më lehtë sepse enzimat kanë pasur kohën e duhur për të shpërbërë glutenin në miell gjatë fermentimit të majasë së bërë vetë. Sa më shumë të zgjasë procesi i prodhimit aq më jetëgjatë do të jetë buka.

Por kjo nuk është formula që ndiqet në shumë prej furrave të bukës në Tiranë që prodhojnë bukë fshati 15-20 herë në ditë dhe punësojnë 2 ose 3 njerëz për çdo furrë.

AgroWeb.org u interesua në 15 furra buke të ndryshme në qytet në lidhje me mënyrën e prodhimit të bukës së fshatit. 12 prej tyre u shprehën se buka e fshatit ishte përgatitur me maja të zakonshme dhe jo brumë të ardhur, ndërsa tre të tjerat nuk pranuan të ndanin informacion me gazetarët.

AgroWeb.org nuk thotë se këto furra nuk prodhojnë një bukë të mirë, por e vërteta është se këta bukëpjekës nuk mund të shpikin emra që të tërheqin konsumatorët me produkte të cilat kushtojnë më shumë se buka e zakonshme, por që në përgatitje janë njëlloj me të.

Buka e fshatit është një bukë që është gatuar me brumë të ardhur, pa përdorur maja të zakonshme tregu dhe që është gatuar me miell gruri përzier edhe me drithëra të tjerë si thekra, tërshëra, etj.

Buka e fshatit kërkon maja natyrale brumi të ardhur që përmban baktere të dobishme që formohen natyralisht në miellin e bukës dhe që ka aftësinë ta fryjë brumin në mënyrë të ngadaltë. Bakteret e acidit laktik kërkojnë shumë orë fermentimi që të bëjnë punën e tyre të mrekullueshme.

Përgatitja e majasë së brumit të ardhur është një metodë tradicionale mijëra vjeçare. Brumi i përgatitur rifreskohet disa herë me miell dhe ujë dhe lejohet të fermentohet për orë me rradhë deri sa të ‘vijë.’

Një pjesë e tij përdoret për përgatitjen e bukës duke shtuar më shumë miell, ujë dhe kripë, ndërsa pjesë tjetër shtohet dhe ruhet si bazë për gatimin e bukës të nesërmen. Ky brumë qëndron i patrazuar në frigorifer për ditë, javë ose muaj.

Ajo që bukëpjekësit në vendin tonë shesin si bukë fshati mund të ketë formën e saj, por nuk është përgatitur si ajo dhe as ka të njëjtat vlera me të. Brumi i ardhur përdoret për të reklamuar bukën e zakonshme nga bukëpjekës që janë të etur për maksimizimin e shitjeve në të njëjtën mënyrë se si shitës të paskrupullt përdorin fjalën ‘BIO.’ /AgroWeb.org