Gjumi i mirë, i qetë dhe i patrazuar nuk ka të paguar.

Megjithatë, me kalimin e moshës të fjeturit për 8 orë të plota pa asnjë ndërprerje, vështirësohet ndjeshëm.

Ka njerëz që zgjohen disa herë gjatë natës dhe kanë vështirësi të mëdha të mbyllin sytë, ndonëse nuk kanë asnjë shqetësim në pamje të parë.

Ky çrregullim futet në kategorinë e pagjumësisë, por ka të bëjë kryesisht me vështirësinë në të qëndruarit në gjumë, zgjimin e herëpashershëm ose vështirësinë për të bërë një sy gjumë.

Sipas të dhënave të AgroWeb.org, ky çrregullim prek më shumë gratë se burrat.

Neurologët shpjegojnë se ky çrregullim shkaktohet nga disa faktorë.

Disa prej tyre janë: kërcitja e dhëmbëve, dhimbjet e këmbëve, urthi, apnea e gjumit, gërrhitja, fshikëza hiperaktive, alkoli e të tjerë.

Sa Orë Gjumë Ju Nevojiten Për Shëndetin?

Neurologët thonë se një i rritur ka nevojë për 7-8 orë gjumë.

Sipas tyre, nëse flini më pak apo më shumë, atëherë rrezikoheni seriozisht nga diabeti, sëmundjet e zemrës apo edhe sëmundje të parakohshme.

Këto orë gjumi janë të rëndësishme për kujtesën, për sistemin imunitar, oreksin dhe jetëgjatësinë.

Si Të Flini Më Mirë Dhe Pa Ndërprerje Gjatë Natës

Për të arritur këtë objektiv, njeriu duhet të tregohet i kujdesshëm dhe i vëmendshëm ndaj disa gjërave, në veçanti ndaj regjimit ushqimor, pijeve dhe orarit të fjetjes dhe zgjimit.

Sa i përket ushqimit, ju duhet të mos jeni as të uritur as të tejngopur përpara gjumit.

Telashet me stomakun nuk do ju lënë të vini gjumë në sy.

Hani 2 orë para orarit të gjumit.

Kafeja dhe alkoli duhen shmangur tërësisht.

Vera mund t’ju përgjumë por falë saj do të zgjoheni disa herë gjatë natës.

Një tjetër aspekt i rëndësishëm është celulari, me të cilin duhet të ndaheni çdo mbrëmje e të bashkoheni në mëngjes.

Njerëzit që zgjohen natën kaplohen nga ankthi  dhe stresi sa herë që shohin orën.

Akrepat lëvizin por gjumi nuk vjen.

Sipas të dhënave të AgroWeb.org, është shumë e rëndësishme t’i rezistoni tundimit për të parë orën dhe të fokusoheni tek frymëmarrja.

Përpara se të shtriheni për të fjetur, shkoni në tualet që fshikëza mos t’ju zgjojë natën.

Nëse shtriheni për të fjetur dhe kalojnë 20 minuta, duhet të çoheni e të shkoni në dhomën tjetër.

Lexoni një libër, palosni rroba, bëni diçka tjetër dhe hiqeni mendjen nga gjumi.

Kur të ndiheni të përgjumur, gjë që është e paevitueshme, shkoni menjëherë në shtrat.

E fundit por jo për nga rëndësia, për të përmirësuar cilësinë e gjumit, mund të merrni suplementin melatoninë.

Ky suplement plotëson sasinë e hormonit të gjumit që çlirohet në nivele më të ulëta në organizëm dhe ju mban në gjumë gjatë natës./AgroWeb.org