Si Ndikon Shqetësimi i Vazhdueshëm Në Trupin Tuaj

Shqetësimi mund të ndikojë në trup në mënyra që mund t’ju befasojnë dhe kur ai bëhet kronik, mund të shkaktojë ndjenja ankthi, e madje edhe dhimbje fizike.

Shumë njerëz që shqetësohen së tepërmi, kërkojnë lehtësim në zakone të dëmshme si ngrënia e tepërt, pirja e duhanit ose përdorimi i alkoolit dhe ilaçeve.

Megjithatë disa ngjarje stresuese, të tilla si një provim ose një intervistë për punë, mund mund t’ju shtyjë të mësoni më shumë dhe kjo nuk është diçka e keqe.

Por shqetësimi, frika ose ankthi i vazhdueshëm është i dëmshëm dhe mund të bëhet aq iracional sa ju mund të mos përqendroheni në realitet ose të mendoni qartë.

AgroWeb.org në këtë artikull, ju njeh më tepër rreth problemeve fizike që shqetësimi i vazhdueshëm mund të shkaktojë në organizëm dhe si mund ta lufotoni atë.

Si shqetësimi i tepërt mund t’ju bëjë të ndiheni të sëmurë fizikisht?

Shqetësimi kronik dhe stresi emocional mund të shkaktojnë një mori problemesh shëndetësore.

Lufta ose reagimi i trupit bën që sistemi nervor simpatik i trupit të lëshojë hormone stresi siç është kortizoli.

Këto hormone mund të shkaktojnë reaksione fizike si: vështirësi në gëlltitje, marramendje, rahje të shpejtë të zemrës, lodhje, dhimbje koke, pamundësi për tu përqendruar, nervozizëm, dhimbje muskujsh, çrregullime të tretjes, humbje të kujtesës afatshkurtër dhe deri në sulm në zemër.

Nëse shqetësimi i tepërt dhe ankthi i lartë nuk trajtohen, ato mund të çojnë në depresion dhe madje edhe në mendime vetëvrasëse.

Edhe pse këto efekte janë një përgjigje ndaj stresit, stresi është thjesht një shkas. Nëse sëmureni apo jo, kjo varet nga mënyra se si ju e trajtoni stresin.

Cilat ndryshime në stilin e jetës mund të ndihmojnë?

Megjithëse shqetësimi i tepërt dhe ankthi i lartë mund të shkaktojnë një çekuilibër në trupin tuaj, ka shumë mundësi që ju të mund të rivendosini harmoninë midis mendjes, trupit dhe shpirtit.

Këshillohuni me mjekun

Filloni duke biseduar me mjekun tuaj dhe bëni një test të plotë fizik për t’u siguruar që problemet e tjera shëndetësore nuk po ju ushqejnë ndjenjat e ankthit.

Mjeku mund të përshkruajë ilaçe kundër ankthit ose kundër depresionit, për t’ju ndihmuar të menaxhoni këto shqetësime.

Ushtroni çdo ditë

Pa diskutim, kimikatet e prodhuara gjatë ushtrimeve të moderuara mund të jenë jashtëzakonisht të dobishme në drejtim të rritjes së funksionit të sistemit imunitar.

Ushtrimet e rregullta aerobike dhe forcuese janë gjithashtu një mënyrë shumë efektive për të trajnuar trupin tuaj për të përballuar stresin.

Ushqehuni shëndetshëm

Stresi dhe shqetësimi i vazhdueshëm, mund të shkaktojnë uri të tepërt ose anoreksi tek disa njerëz.

Moderoni konsumin e kafeinës

Kafeina stimulon sistemin nervor, i cili mund të shkaktojë adrenalinë dhe t’ju bëjë të ndiheni nervoz dhe nervoz. Prandaj këshillohet të konsumohet në mënyrë të moderuar.

Domate të Shtruara me Djathë dhe Erëza të Freskëta

Nëse po kërkoni për një recetë shoqëruese, një shtesë delikate e të shijshme për gatimet tuaja, sapo keni gjetur të duhurën.

Domatet kanë vend në çdo recetë të kripur prandaj, edhe këto me siguri që do t’i përdorni.

Ndryshe nga sa i keni përdorur më parë dhe shumë të thjeshta në përgatitje, domatet e pjekura me djathë dhe erëza të freskëta janë një alternativë e shëndetshme dhe e shijshme për të kaluar vaktet.

Do ju duhen gjithsej 15 minuta për ta përgatitur këtë recetë dhe jo më shumë se 5 përbërës.

Ndiqni m ëposhtë këtë përgatitje të shpejtë dhe bëjeni edhe ju menjëherë në shtëpitë tuaja.

Përbërësit

4 domate mesatare

130 gr djathë kaçkavall

1 tufë borzilok

1 thelbi hudhër

Gjysmë luge çaji kripë

Piper i zi

Përgatitja

Si fillim AgroWeb ju këshillon të ndizni furrën në temperaturën 200 gradë C.

Më pas bëni gati një tavë të shturar me letër pjekje dhe veçmas prini domatet në feta të rrumbullakëta.

Prijini ato deri në 3-4 mm duke treguar kujdes që të jenë të plotë dhe të mos prishen gjatë këtij procesi.

Pasi t’i keni prerë vendosini të gjitha njëra pas tjetrës tek tava që përgatitët, duke i hedhur edhe pak kripë.

Ndërkohë në një enë shtoni djalthin kaçkavall të grirë, borzilokun e prerë hollë, hudhrës e grirë ose mund ta përdorni në formën e pluhurit dhe piperin e zi.

Përziejini të gjithë këta përbërës dhe me anë të një luge vendosini sipër secilës domate.

Bëni kujdes që miksi të mos shpërndahet në tavë, por ta vendosni vetëm sipër fetave të domateve tuaja.

Tanimë furra duhet të jetë e ngrohtë dhe mund t’i fusni të piqen për 10 minuta.

Nxirrni nga furra kur djathi të ketë shkrirë dhe domatet të jenë pjekur, por kujdes mos e teproni me kohën e pjekjes.

Shërbejini menjëherë dhe shijojini të ngrohta me pjata mishi, sallata apo bukë të thekur./AgroWeb.org

4 Mënyra Të Thjeshta Për Të Përballuar Nxehtësinë E Ditëve Të Verës

Me valët e nxehtësisë që po shkaktojnë temperatura rekord në të gjithë vendin, ju mund të pyesni se si të veproni për të përballuar ditët e nxehta të stinës.

Gjetja e mënyrave për t’u ruajtur nga nxehtësia nuk është vetëm për rehati, por është gjithashtu e nevojshme edhe për shëndetin tuaj.

Kur trupi mbinxehet, jo vetëm që do të ndiheni vapë, por kjo mund të ketë edhe efekte shkatërruese për shëndetin tuaj.

Për t’ju ndihmuar të përballeni me temperaturat e larta, AgroWeb.org ndan me ju disa këshilla shumë të vlefshme nga ekspertët mjekësorë.

Qëndroni sa më shumë në ambientet e brendëshme

Një nga mënyrat më të mira për të përballuar të nxehtin është ta shmangni krejtësisht atë, duke qëndruar në ambientet e brendëshme që kanë një ajrosje të mirë.

Nëse iu duhet të dilni, kufizoni kohën e qëndrimit jashtë, duke bërë pushime të shpeshta në zona me ajër të kondicionuar për t’u freskuar.

Mbani shtëpinë tuaj sa më të freskët që të jetë e mundur

Nëse nuk keni kondicioner, ju mund të parandaloni që dielli të ngrohë shtëpinë tuaj duke mbyllur dritaret ditën dhe duke i hapur gjatë natës, për të lejuar ajrin e freskët të futet brenda.

Gjithashtu, shmangni ndezjen e furrës ose pajisjeve të tjera që mund të rrisin temperaturën e ambientit të brendshëm.

Mbani ujë me vete

Ekspertët e shëndetit thonë se është e lehtë për trupin të humbasë ujë përmes djersitjes kur ekspozohet ndaj temperaturave të larta.

Për këtë arsye, ju mund të dehidratoheni shumë shpejt kur temperaturat ekstreme zgjasin për një periudhë të zgjatur kohe.

Prandaj, për të zëvendësuar lëngjet e humbura gjatë ekspozimit ndaj nxehtësisë është e rëndësishme të mbani me vete ujë.

Ekspertët rekomandojnë gjithashtu të pini ujë edhe nëse nuk ndjeheni të etur, kështu do të parandaloni dehidrimin.

Vendosni kompresa të ftohta

Ju mund të vendosni kompresa të ftohta ose pako akulli në zonat kryesore të trupit tuaj, siç janë qafa dhe kyçi i duarve.

Por kini kujdes të mos vendosni akull direkt në lëkurë, pasi kjo mund të shkaktojë djegie.

Këshillohet që të mbani një copë ose një peshqir midis lëkurës tuaj dhe burimit të ftohtë.

Ju gjithashtu mund të bëni një dush ose banjë të freskët për t’u qetësuar, por shmangni ndryshimet e papritura të temperatures. Një rënie e menjëhershme e temperaturës mund të jetë e dëmshme për trupin.

Vishni rroba të lira, të lehta dhe me ngjyra të çelta në ditët e nxehta, sepse ngjyrat e errëta thithin nxehtësinë.

Dhe sigurohuni që të vendosni krem ​​kundër diellit në çdo zonë të trupit tuaj që nuk mbulohet nga veshja.

Si të dalloni lodhjen nga i nxehti?

Lodhja nga i nxehti varion nga simptomat e lehta deri tek ato seriozet, duke përfshirë:

etjen e tepërt

ngërçet e muskujve

të përziera

humbje të përqëndrimit

djersitje e tepruar

lodhje

Kur temperatura e trupit arrin më shumë 40 ° C, simptomat mund të jenë të tilla si:

dhimbje koke e fortë

konfuzion

humbje e vetëdijes

ndërprerje e djersitjes

Foshnjat, fëmijët dhe njerëzit e moshuar kanë një shans më të lartë për të përjtuar këto shqetësime nga i nxehti, sepse trupat e tyre e kanë më të vështirë të rregullojnë temperaturën e trupit.

Njerëzit të cilët janë të sëmurë veçanërisht nga probleme kronike të zemrës, diabeti, veshkat ose marrin ilaçe të caktuara mund të jenë gjithashtu në rrezik./AgroWeb.org

Tërshëra, 3 Gabimet Që Të Pengojnë Të Humbisni Peshën

Tërshëra është një produkt shumë i mirë për rënien nga pesha dhe për mbarëvajtjen e saj.

Studimet të cilave u referohet AgroWeb.org thonë se tërshëra është shumë e pasur me fibër dhe për rrjedhojë e mban njeriun të ngopur gjatë dhe nuk e shtyn drejt zgjedhjeve jo të shëndetshme në ushqyerje.

Për më tepër, sipas studimeve, tërshëra e bën metabolizmin më të shpejtë dhe rrjedhimisht nxit djegien e kalorive.

Ajo  ndihmon që zorrët të kryejnë funksionin e tyre më së miri. Sistemi tretës stimulohet mjaftueshëm duke lejuar që ushqimi të kalojë pa problem nëpër organet e tretjes.

Për më tepër, tërshëra është një burim i pashtershëm proteinash, gjë që e bën atë një domosdoshmëri për personat që stërviten. Tërshëra është një antioksidant i vërtetë.

Shtoji tërshërë mëngjesit tënd, sepse pa një shëndet të mirë nuk mund ta shijosh jetën, por përpiqu të mos bësh këto gabime që pengojnë përpjekjet e tua për të rënë nga pesha.

Zgjidhni Tërshërë  të Ëmbëlsuar

Tërshëra e paketuar dhe e gatshme për konsum është padyshim e pasur në sheqer dhe për rrjedhojë nuk është e shëndetshme.

Një racion tërshërë e paketuar mund të ketë deri në 12 gramë sheqer.

Idealja është që të zgjidhni tërshërë të paaromatizuar ose jo të pasuruar në mënyrë që të shtoni sipas dëshirës fruta të freskëta, arrorë, fruta të thata dhe kanellë.

Racioni ka shumë rëndësi kur vjen puna tek çdo ushqim dhe jo vetëm tërshëra ndaj duhet t’i përmbaheni një racioni të vetëm.

Pra mos prisni të humbisni në peshë nëse hani dy ose tre tasa me tërshërë në mëngjes.

Nuk Bëni Kombinime Të Mençura

Një vakt me bazë tërshëre duhet kombinuar në mënyrë të zgjuar.

Tërshëra është një burim i mirë i karbohidrateve komplekse, ndaj ajo duhet kombinuar me proteinë dhe yndyrë të shëndetshme.

Për shembull tërshërën mund ta pasuroni me fara chia, gjalpë arrorësh ose edhe një vezë.

Ju mund të përdorni edhe qumësht sipas dëshirës./AgroWeb.org

‘Zëri i Amerikës’: Si u përkeqësua situata nga pandemia gjatë korrikut në Shqipëri?

Në Shqipëri, muaji korrik shënoi një kthesë negative të ecurisë së pandemisë Covid 19. Të gjitha shifrat, përveç viktimave, 1 rast i vetëm, pësuan një përkeqësim, krahasuar me muajin qershor, kur ato ishin në kuotat më të ulta që prej fillimit të saj.

Në korrik u konfirmuan dhe rastet e para të variantit Delta, ndonëse një pjesë e mirë e mostrave të dërguara në një laborator të specializuar në Gjermani, i përkisnin muajit qershor. Megjithatë autoritetet tanimë kanë pranuar se ky variant qarkullon gjerësisht.

Në total gjatë muajit të kaluar, sipas të dhënave zyrtare të përpunuara nga Zëri i Amerikës, janë rregjistruar 598 raste të reja, me një mesatare prej 19.2 rastesh në ditë. Ndonëse në vlerë absolute shifrat nuk janë në nivele shqetësuese, krahasuar me qershorin, kur u verifikuan vetëm 186 raste, rritja është e ndjeshme, më shumë se trefishi, aq më tepër kur numri i testimeve u rrit vetëm 10 përqind

Rastet erdhën në ngjitje, veçanërisht në gjysmën e dytë të muajit. Data 29 Korrik shënoi dhe ditën me numrin me të madh, me 47 të prekur të rinj, kuota më e lartë që prej 14 majit. Ndërsa më 4 korrik, ishte niveli më i ulët me vetëm 1 të infektuar.

Gjatë muajit korrik dhe pozitiviteti (raporti mes rasteve të reja dhe testimeve) u rrit 3 herë krahasuar me qershorin, ndonëse mbetet ende në nivel shumë të ulët, 0.6 përqind. Megjithatë, ky nivel duket të jetë ndjeshëm më i lartë, në realitet, nëse mbahet në konsideratë fakti se një pjesë e testimeve I përkasin qytetarëve që detyrohen të bëjnë tampon për shkak të lëvizjev jashtë vendit. Pozitiviteti është treguesi i transmetueshmërisë së virusit në komunitet.

Në fakt, numri i shtrimeve në spital ka shënuar një rritje progresive. Nëse në datë 1 korrik kishte vetëm 2 pacientë që kishin nevojë për trajtim të specializuar, më 1 gusht raportohen 24 persona të shtruar. Nga ana tjetër, rastet aktive janë shtuar ndjeshëm. Në fund të qershorit kishte vetëm 53 të tillë, ndërsa aktualisht janë 421 persona aktivë, gati 8 herë më shumë.

Ndërsa kudo në botë, shtetet po rikthejnë kufizimet për shkak të pranisë së variantit Delta, autoritetet shqiptare janë të mendimit se situata është nën kontroll dhe nuk ka arsye që për momentin të marrin masa shtesë. Megjithatë mbetet i pashpjegueshëm fakti se përse në kufijtë e vendit, nuk ushtrohet asnjë kontroll, dhe nuk i kërkohet asnjë vizitori të tregojë nëse ka certifikatë vaksinimi apo test të kryer në 2-3 ditët e fundit, sikundër veprohet në kufijtë e shteteve europiane të cilat kanë dhe një mbulesë vaksinale më të lartë se Shqipëria.

Autoritetet po i mëshojnë thirrjeje për vaksinim, dhe muaji gusht është caktuar si muaj i hapur për të gjitha grupmoshat +18 vjeç, për të kryer vaksinën kudo në qendrat shëndetësore apo në pikat e vaksinimit të përqëndruar. “Do të jetë një muaj që ne do ta konsiderojmë muaj sulmi, për të vaksinuar qytetarët e grupmoshës +18 vjeç”, deklaroi pak ditë më parë ministrja e Shëndetësisë Ogerta Manastirliu, e cila pati një thirrje të veçantë për studentët, në prag të nisjes së vitit të ri shkollor.

Mënyrat e Shëndetshme Për Të Pirë Ujë Me Limon

Një shprehje e përhapur thotë se “kur jeta të jep limonë, bëj një limonatë.”

E nëse për të bërë limonatë të duhen disa përbërës dhe shumë kohë, AgroWeb.org ju rekomandon ujin me limon.

Vlerat E Ujit Me Limon

Pirja e rregullt e ujit me limon ju ndihmon të shëroni fytin e thatë, të përmirësoni tretjen dhe të largoni toksinat nga organizmi,

Mjaftojnë disa feta limoni (me gjithë lëkurë të pastruar mirë) në një gotë me ujë dhe, sipas të dhënave të AgroWeb.org, do të korrni shumë përfitime të mëdha për organizmin.

Studimet shkencore konfirmojnë se polifenolët që gjenden tek lëkura e kësaj agrumeje të mirë ndihmojnë për rënien në peshë.

Limoni është i pasur me vitaminë C, e cila është e nevojshme për të prodhuar kolagjen, forcuar imunitetin dhe pastruar trupin nga toksinat.

AgroWeb.org ju rekomandon që të pini çdo ditë një gotë me ujë me gjysëm limoni të prerë në feta.

Ujë i Ftohtë, i Vakët Apo i Nxehtë?

Ekspertët e ushqimit rekomandojnë që uji të jetë i vakët sepse në këtë temperaturë çlirohen vitamin C dhe antioksidantët.

Uji i vakët është ideal sepse mund të pihet edhe në sasi të konsiderueshme, ndërkohë që uji i nxehtë nuk pihet dot aq lehtë.

Koha E Duhur Për Të Pirë Ujë Me Limon

Kur zgjohemi, trupi është i dehidratuar në mënyrë ekstreme.

Rrjedhimisht, AgroWeb.org ju rekomandon që sapo të zgjoheni të pijni një gotë me ujë me limon.

Gjatë gjumit, njeriu humbet shumë lëngje nëpërmjet frymëmarrjes.

Hidratimi i mëngjesit me një gotë me ujë me limon është ideal për të zëvendësuar humbjet e natës.

Për më tepër, në mëngjes, limoni i jep forcë sistemit imunitar dhe ndihmon në prodhimin e kolagjenit.

Kujdesi Për Dhëmbët

Pirja e tepërt e ujit me limon rrezikon prishjen e enamelit të dhëmbëve. Kujdes me sasinë.

Për më tepër, njerëzit që kanë sasi të larta të hekurit në gjak duhet të tregojnë kujdes, sepse limoni përmirëson aftësitë përthithëse të hekurit në organizëm./AgroWeb.org

Aloe Vera Kundër Sinozitit dhe Shqetësimeve të Frymëmarrjes

Aloe Vera është quajtur prej shekujsh ‘bima e mrekullisë.’ Ajo është përdorur gjërësisht në një pafundësi produktesh, por kjo bimë bën me të vërtetë mrekullira për shëndetin e organizmit.

Gjethja mrekullibërëse përmban 200 përbërës të dobishëm, përfshirë 20 minerale, 18 amino acide dhe 12 vitamina.

Aloe Vera ul inflamacionin në kocka dhe përshpejton shërimin nga sinoziti. Ajo bën mrekullira edhe kundër rrjedhjeve të hundëve.

Lajmi i mirë është që Aloe Verën e gjejmë kudo, madje mund ta rrisim vetë në shtëpi dhe falë saj të përgatisim kura nga më të ndryshmet.

Aloe Vera përdoret shumë kundër sinozitit

Mund të krijoni një locion spërkatës me ujë deti ose ujë me kripë dhe Aloe Vera.

Kombinoni 500 ml me ujë me kripë dhe 50 ml me lëng të Aloe Verës, pothuajse sa një filxhan kafeje.

Hidheni lëngun në një shishe ekzistuese për spray në hundë dhe përdoreni sipas nevojës disa herë në ditë.

Do të merrni qetësim dhe shenjat e sinozitit do të fashiten brenda pak kohe.

Aloe Vera për rregullimin e frymëmarrjes

Prisni në gjysmë një gjethe të Aloe Verës. Shtrydheni me gishta lëngun xhelatinoz dhe hidheni në një shishe të vogël qelqi me ngjyrë të errët. Ruajeni për përdorim të mëvonshëm.

Hidhni nga dy pika në secilën vrimë të hundës përpara se të bini në gjumë.

Do të ndjeni menjëherë zhbllokimin e rrugëve të frymëmarrjes dhe do të shijoni një gjumë të qetë.

Mënyra e dytë është të hidhni disa copa të gjethes së Aloe Verës dhe disa gjethe eukalipti në një enë me ujë. Lëreni ujin të valojë dhe më pas hiqeni nga zjarri.

Mbulojeni kokën me një peshqir dhe thithni avullin që lëshon lëngu me gjethet fantastike. Kjo është një kurë e mrekullueshme kundër rinitit.

Kjo është rrufa e vazhdueshme që vjen si pasojë e ftohjeve dhe flukseve të korrenteve të ajrit edhe gjatë vjeshtës.

Ju mund të përdorni edhe gjethen e Aloe Verës duke e vendosur atë në ballë për disa minuta. Xhelin mund ta përdorni në kompresa kundër dhimbjes së kokës, bllokimeve të frymëmarrjes dhe për qetësim.

Aloe Vera si zgjidhje natyrale

Një studim i vitit 2011 nga Universiteti Johns Hopkins në Baltimore të Shteteve të Bashkuara, nxorri në pah përfitimet që vinin nga përzierja e 5 vajrave natyralë me antioksidantë siç janë aloe vera, arrë kokosi, portokall, nenexhik dhe vitamina E.

Studiuesit arritën në konkluzione të rëndësishme. Këto vajra mundeshin të ulnin me sukses inflamacionin dhe stresin oksidues që shkaktojnë probleme në mukozën e hundës dhe në rrugët e frymë marrjes./AgroWeb.org

Ujë Me Aloe Vera – Si ta Përgatisni dhe Çfarë Përfitoni

Uji me Aloe Vera ofron vërtet përfitime mbresëlënëse ushqyese dhe shëndetësore.

Uji i Aloe Vera, përftohet nga bima e mrekullive, e cila është përdorur prej shekujsh për vetitë e saj mjekësore.

Uji me Aloe Vera ofron vërtet përfitime mbresëlënëse ushqyese dhe shëndetësore. Një gotë me 250 ml me ujë aloe vera përmban midis 50 dhe 60 kalori.

Ju gjithashtu do të merrni rreth 50 për qind të vlerës së përditshme për vitaminë C. Vitamina C ndihmon në mbrojtjen e trupit tuaj nga infeksioni, ruan shëndetin e eshtrave dhe dhëmbëve tuaj, si edhe ndihmon në shërimin e plagëve.

Aloe vera përmban vitaminë B-12, folatë, kolinë, bakër dhe kalium gjithashtu.

Uji me Aloe vera përmban tetë sheqerna natyralë që formojnë tetë sakaridet esenciale, sipas studiuesve të çertifikuar.

Këto nuk janë të ëmbël, as nuk krijojnë një ndryshim të menjëhershëm të sheqerit në gjak, siç ndodh me substanca si saharoza apo sheqeri i zakonshëm.

Aloe vera siç tregojnë kërkimet AgroWeb.org, përmban 20 nga 22 aminoacidet që i nevojiten organizmit për funksionimin e duhur dhe shtatë nga tetë aminoacidet që konsiderohen jetësore për shëndetin.

Përfitimet mbrojtëse shëndetësore

Uji me Aloe vera ka veti anti-inflamatore në sistemin e tretjes dhe përdoret për të ndihmuar në trajtimin e kapsllëkut dhe urthit.

AgroWeb.org ju tregon se uji me Aloe Vera përdoret gjithashtu për trajtimin e sëmundjeve inflamatore të sistemit tretës.

Uji me Aloe Vera në organizmin tuaj

Uji me Aloe Vera lehtëson shqetësimet e stomakut dhe rivendos tretjen normale pavarësisht nga shkaku themelor i shqetësimit.

Është antimikrobik dhe anti-inflamator.

Uji me Aloe Vera parandalon mikrobet nga përqendrimi në stomak dhe në zorrë. Mbron organet nga veprimi i toksinave dhe alergeneve.

Pirja e 200ml e ujit Aloe vera 2-3 herë në ditë për një javë është një nga mënyrat më efektive për të hequr problemet tuaja të tretjes.

Si ta përgatisni në shtëpi?

Ju mund të shtoni një deri në dy lugë çaji aloe vera në një gotë me 200 ml ujë. Mund të shtoni disa pika lëng limoni dhe një lugë çaji me mjaltë për shije të mrekullueshme.

AgroWeb.org ju këshillon se nëse dëshironi të bëni sasi të mëdha, prini gjethet e Aloe Vera dhe hiqni skajet e tyre.

Pastroni lëkurën nga të dy anët për të marrë xhelin transparent.

Grijeni masën e xhelit në mikser dhe ruajeni në kavanoza qelqi për deri në një javë në frigorifer./AgroWeb.org

Sekreti i Orarit të Ngrënies Për të Rënë Nga Pesha

Ushqyerja është e lidhur ngushtë me rënien në peshë po aq sa shpërndarja e vakteve gjatë ditës.

Nga studimet e vazhdueshme për këtë çështje, ekspertët kanë dalë në konkluzionin se ngrënia e vakteve herët gjatë ditës mund të ndihmojë në mbajtjen nën kontroll të peshës.

Studimi më i fundit të cilit i referohet AgroWeb.org analizoi mënyrën dhe orarin e të ngrënit të disa personave duke i ndarë ato në disa kategori.

Për katër ditë me rradhë, grupi i parë i konsumoi të gjitha vaktet nga ora 08:00 deri në orën 14:00.

Grupi i dytë i konsumoi të gjitha vaktet nga ora 08:00 deri në orën 20:00.

Në fund të periudhës së provës, studiuesit zbuluan se grupi i parë nuk dogji shumë kalori ama pësoi një rënie të oreksit.

Ata konfirmuan se hormoni i urisë ghrelina ishte në nivele më të ulëta në mëngjes, por akoma më të ulëta në mbrëmje.

Dëshira për të ngrënë ishte më e ulët kur njerëzit ushqeheshin me orar, por rritej rreth orës 22:30  pak përpara gjumit.

Grupimi i Vakteve Nuk Është i Përshtatshëm Për Të Gjithë

Studiuesit shpjegojnë se grupimi i të gjitha vakteve brenda një fashe orari nuk është një qasje e përshtatshme për të gjithë.

Për shembull, personat që merren me sport kanë shumë vështirësi për tu mësuar me një mënyrë të tillë ushqyerje.

Ata kanë një orar të caktuar ushqimi dhe aktiviteti fizik dhe zbatimi i një metode të tillë nuk u vjen për shtat.

Personat që vuajnë nga diabeti kanë probleme të tjera dhe kjo sëmundje i detyron ato të hanë më shpesh.

Gratë shtatzëna apo persona që vuajnë nga sëmundje të rënda, mund ta kenë të vështirë që të konsumojnë të gjithë vlerat ushqimore në aq pak kohë.

Gjithashtu personat që kanë patur probleme me çrregullime me ushqyerjen siç janë rastet e anoreksisë apo bulimisë, një regjim i tillë nuk këshillohet.

Këshillat që Duhen Ndjekur

Gjithsesi para se të ndërmerrni këtë hap, AgroWeb.org ju sugjeron që të këshilloheni parimisht me mjekun përkatës.

Këshillohet gjithashtu që të mos e lini mëngjesin pa ngrënë, duke qenë se është dhe vakti më i rëndësishëm i ditës.

Nëse vini re që gjatë këtij regjimi trupi juaj jep shenja si marramendja, nivel i ulët i sheqerit apo i tensionit, ndërpriteni menjëherë.

SI dhe ajo që është e rëndësishme është që të mos hani më shumë se zakonisht gjatë orareve të përcaktuara, pasi kështu do të shtoni në peshë./AgroWeb.org

Miratohet Lista e re e Barnave të Rimbursueshme – Zbuloni Ilaçet e Reja

Në Listën e Barnave të Rimbursueshme 2021 janë shtuar 23 barna të reja që e çojnë ne 1191 listën e alternativave të mjekimit për diagnozat e sëmundjeve kronike.

Në listë përfshihen barna të cilat trajtojnë dhe mbajë në kontroll sëmundjet kronike me shpeshtësi më të madhe në popullatë si diabeti, hipertensioni, sëmundjet kardiovaskulare duke ofruar alternativa mjekimi bashkëkohore në mënyrë që të shmangin komplikacionet dhe të rrisin cilësinë e jetesës dhe jetëgjatësinë.

Në listë janë përfshirë edhe barna inovative për trajtimin e disa lloje tumoresh si ai i mushkërive,gjirit si edhe alternativa mjekimi për pacientët të cilët vuajnë nga pasojat e Covid 19.
Pacientët e dializës janë një grup tjetër që do të përfitojnë marrjen me rimbursim të një tjetër medikamenti për parandalimin e komplikacioneve të rënda nga sëmundja.

Me barnat e reja që i shtohen listës parashikohet të përfitojnë falas rreth 6,000 pacientë në vit.
Lista e re e Barnave të Rimbursueshme përmban 1,191 alternativa tregtare ose 340 principe aktive.

Edhe këtë vit në Listën e Barnave të Rimbursueshme përfshihen barna me marrëveshje të posaçme, duke ulur çmimin e barit me proçes negocimi me kompanitë më të mëdha multinacionale dhe për rrjedhojë, duke zgjeruar numrin e qytetarëve përfitues.

Fondi në dispozicion për LBR 2021 është 107 milion dollarë, duke garantuar një paketë më të plotë të barnave që merren falas nga qytetarët me sëmundje kronike.
Nga Lista e Barnave të Rimbursueshme përfitojnë barnat falas mbi 450,000 pacientë në vit./Burimi:Top Channel

Kavurma – Receta e Vjetër Me Mish Viçi Dhe Qepë

Kjo pjatë ngjason me jahninë dhe për disa zona konsiderohet edhe si çomlek.

Për ata që nuk e kanë dëgjuar si recetë, Kavurmaja është një traditë e zonave të ftohta të vendit tonë.

Ajo përgatitet zakonisht gjatë stinës së ftohtë por mund të jetë një zgjedhje perfekte edhe tani.

Me shije pikante kjo pjatë do t’ju mrekullojë të gjithëve në familje.

Ndiqni me kujdes hapat e treguar në recetën e AgroWeb.org dhe shijojeni që sot.

Përbërësit:

500 gr mish viçi

2 kg qepë

200 gr gjalpë

1 lugë çaji kripë

5 – 6  boçe hudhër

1 lugë çaji piper i kuq

1 lugë çaji piper i zi

1-2 lugë gjelle uthull

Përgatitja

AgroWeb.org fillimisht ju këshillon që të nisni me përgatitjen e qepëve duke i pastruar dhe qëruar.

Më pas grijini ato në rende ose pritini me thikë sa më hollë.

Në zjarr ndërkohë vendosni një tenxhere që të ngrohet dhe aty hidhni qepët e grira.

Shtoni kripën dhe përziejini me një lugë druri gjatë gjithë kohës në mënyrë që të mos ngjiten.

Kur qepa të fillojë të bëhet transparente shtoni gjalpin dhe mishin e prerë në thela.

Jepini shije me piper të kuq dhe të zi mishit të cilin duhet ta ktheni herë pas here që të skuqet në të gjitha anët.

Në fund shtoni 2 gotë me ujë ose lëng perimesh dhe lëreni të ziejë gjella me kapak për 1 orë në zjarr të ulët.

Boçet e hudhrës pa i ndarë në thelpinj lajini dhe largoni papastërtitë e më pas shtojeni tek tenxherja.

Pasi të shtoni hudhrat, AgroWeb.org ju këshillon që ta lini edhe për 30 minuta në zjarr e më pas shtoni uthullën.

Kur të jetë gati kavurmaja hiqeni nga zjarri dhe shërbejeni për të dashurit tuaj.

Zakonisht shoqërohet me pilaf, patate por edhe turshi./AgroWeb.org

COVID-19 – Çfarë Duhet Të Dini Rreth Vaksinës Sputnik Light

I emëruar sipas satelitit të Sovjetikëve, i pari i nisur në hapësirë, Sputnik V është vaksina Ruse, e cila merret me anë të dy dozave.

Por në fund të muajit të kaluar, vendi njoftoi gjithashtu se do të fillonte edhe qarkullimin e vaksinës Sputnik Light.

Përparësia që ka ky version mbi versionin standard, është se kjo vaksinë përbëhet vetëm nga një dozë dhe është shumë efikase në rastin e një shpërthimi akut të COVID-19.

Sipas të dhënave të AgroWeb.org, efikasiteti i Sputnik Light është rreth 79.4% dhe ka një kosto më të ulët.

Dhe duket se mund të zgjidhë sfidën e imunizimit të grupeve të mëdha të njerëzve në një periudhë më të shkurtër kohore sesa Sputink V.

Efektet negative që njerëzit kanë raportuar pas marrjes së Sputnik Light janë, të ngjashme me ato të vaksinave të tjera COVID-19. Ato përfshijnë:

dhimbje e lehtë në vendin e injeksionit

ethe

dhimbje koke

lodhje

dhimbje e muskujve

Aktualisht, nuk ka asnjë burim të besuar që vërteton se kjo vaksinë shkakton koagulimit të gjakut, që njerëzit kanë raportuar në lidhje me vaksinat Oxford-AstraZeneca dhe Johnson & Johnson COVID-19.

Përse ekzistojnë dyshime rreth vaksinave Sputnik?

Edhe pse Sputnik V është autorizuar për përdorim në 69 vende dhe Sputnik Light është autorizuar vetëm në 10 vende, asnjë nga këto vaksina nuk ka marrë autorizim për përdorim urgjent nga Agjencia Evropiane e Mjekimeve (EMA) ose Organizata Botërore e Shëndetit (OBSH).

Ekziston një skepticizëm rreth sigurisë së vaksinave Sputnik për shkak të mungesës së dukshme të të dhënave nga provat klinike.

Edhe pse zhvilluesit e vaksinave kanë publikuar të dhënat e provës, ekspertët u shprehën se ka një mungesë transparence dhe mospërputhje në lidhje me të dhënat e raportuara.

E ardhmja e vaksinave Sputnik

Duke përdorur versionin me dy doza të Sputnik, autoritetet shëndetësore kanë vaksinuar plotësisht rreth 8 milion njerëz në Rusi.

Sidoqoftë, Rusia është tani e gatshme të fillojë një program zyrtar të ri-vaksinimit për shkak të një rritje të rasteve dhe përhapjes së variantit delta.

Sputnik Light do të shërbejë si përforcues për rusët që morën versionin me dy doza.

Megjithatë, Sputnik V do të mbetet vaksina kryesore COVID-19, në Rusi.

Universiteti i Oksfordit dhe AstraZeneca, kanë nisur një provë që do të zhvillohet në Rusi.

Kjo provë do të vlerësojë nëse përzierja e dozave të vaksinës së tyre dhe Sputnik V mund të sjellë më shumë përfitime.

Për më tepër, disa studime po zhvillohen në vendet që kanë miratuar vaksinat Sputnik.

Këto përpjekje pritet të japin një përgjigje më të saktë të sigurisë së Sputnik V dhe Sputnik Light./AgroWeb.org

Tri Hurma Në Ditë – Pesë Vlera Direkte Për Organizmin

Hurmat e Arabisë janë plot vlera, të shijshme dhe me nivel të lartë ushqyesish.

Përveç shijes së tyre karakteristike, hurmat e Arabisë janë tejet të shëndetshme dhe i ofrojnë organizmit një sërë përfitimesh. Hurmat e Arabisë janë një burim i pasur fibrash të shëndetshme, minerale dhe vitaminash.

Ato ndihmojnë kundër konstipacionit dhe problemeve të tjera me sistemin tretës.

Hurmat e Arabisë gjenden kudo në dyqanet e ushqimeve të shëndetshme në Shqipëri. Më poshtë do të lexoni sugjerimet e AgroWeb.org mbi mënyrën dhe sasinë ditore të rekomanduar të hurmave të Arabisë.

Lexuesit e AgroWeb.org duhet të provojnë të konsumojnë 3 hurma në ditë dhe do të përfitojnë 5 vlerat e mëposhtme.

1. Shëndeti i zemrës 

Kaliumi që gjendet tek hurmat ul rrezikun e goditjeve në tru. Për më tepër, nëse përfshini hurmat në dietën tuaj do të ulni nivelin e kolesterolit të keq. Kolesteroli i keq akumulohet në muret e enëve të gjakut duke i bllokuar ato dhe duke rrezikuar ndjeshëm zemrën.

Nivelet e larta të kolesterolit të keq nënkuptojnë që zemra është e rrezikuar nga bllokime të menjëhershme që mund të ndodhin në enët e gjakut. Ngrënia e hurmave mund të ulë kolesterolin e keq dhe ta mbajë zemrën të sigurt.

2. Nivelet e energjisë

Hurmat e Arabisë janë të mbushura me sheqerna natyralë që përfshijnë: fruktozën, sukrozën dhe glukozën. Kjo i bën ato një ushqim të favorshëm për ata që kanë nevojë të rrisin nivelet e energjisë.

Hiqni dorë nga ëmbëlsirat e shpejta që premtojnë energji dhe konsumoni disa hurma Arabie. Fibra që ato përmbajnë do të parandalojnë shpërthimet e pakontrolluara të sheqerit në gjak siç ndodh me ëmbëlsira të tjera.

3. Përmirësojnë aparatin tretës

Hurmat e arabisë përmbajnë sasi të konsiderueshme të fibrës së tretshme që është thelbësore për një sistem të mirë tretës sepse arrin të orientojë ujin aty ku trupi ka më shumë nevojë: aparatin tretës. Kjo taktikë, ndihmon organizmin të shmangë konstipacionin.

Kaliumi që gjendet tek hurmat e Arabisë ndihmon në trajtimin e diaresë dhe problemeve të tjera në stomak. Duke qenë se kanë ngjyrë kafe, hurmat e Arabisë konsiderohen si ekuilibrues në aparatin tretës. Në përgjithësi, ushqimet me ngjyrë kafe janë të shkëlqyera për tretjen. Për më tepër, hurmat forcojnë bakteret e mira në stomak.

4. Trajtojnë dhe parandalojnë aneminë

Anemia prek shumë njerëz, nevojat e të cilëve për hekur janë të mëdha. Hurmat janë një burim i shkëlqyer i hekurit, që i bën ato të domosdoshme kundër anemisë. Ngrini nivelet e hekurit duke konsumuar të paktën 3 hurma në ditë.

5. Kockat, gjaku dhe sistemi imunitar

Hurmat përmbajnë magnez, mangan dhe selenium. Ky i fundit është një mineral i nevojshëm për parandalimin e kancerit. Këto minerale janë të nevojshme për të mbajtur kockat të forta dhe gjakun të shëndetshëm.

Përveç shijes, kjo është një arsye më tepër për të konsumuar tre hurma në ditë.

Së fundmi, por jo nga rëndësia, hurmat e Arabisë janë të mira për shëndetin, ndonëse kanë një nivel të lartë fruktoze.

Edhe nëse dieta juaj ju mban larg sheqerit dhe produkteve të ëmbla që përfshijnë sheqerin e arrës së kokosit, mjaltit, shurupit të misrit etj, mos harroni të konsumoni fruta.

Kur përzgjidhni hurmat në treg kërkoni për frutat, lëkura e të cilave është e butë dhe jo e rrudhosur.

Mos zgjidhini kokrrat me aromë të çuditshme ose tepër të forta. Hurmat e thata të Arabisë mbahen në frigorifer dhe qëndrojnë deri në një vit. Hurmat e njoma duhen ruajtur në enë të izoluara mirë dhe mund të qëndrojnë deri në 8 muaj./AgroWeb.org

Humbja E Kujtesës – 6 Arsye Që Nuk Lidhen Me Plakjen

Shpesh na ndodh që të futemi në dhomë dhe të mos të mbajmë mend se çfarë po kërkonim. 

Situata të ngjashme ndodhin shpesh, dhe deri diku kjo humbje kujtese është normale.

Kur përgjegjësitë rriten dhe nivelet e stresit rriten, dhe priremi të lëmë pas dore shëndetin tonë. 

Stresi i madh dhe mungesa e gjumit janë dy nga fajtorët kryesorë që ndikojnë në mosfunksionimin e mirëfilltë të trurit.

AgroWeb.org në këtë artikull ju njeh me disa nga shenjat paralajmëruese që tregojnë se ka ardhur momenti të këshilloheni me mjekun tuaj, të cilat nuk lidhen me procesin natyral të plakjes.

Jeni tej mase i stresuar 

Kur jeni shumë të stresuar, truri juaj e ka vështirë të përqendrohet.

Për të mësuar dhe mbajtur mend diçka, ju duhet të jeni shumë të përqendruar, thonë specialistët e shëndetit.

Për më tepër, kortizoli në nivele të larta (hormoni i stresit) ndikon në trurin tuaj duke dëmtuar aftësisë për të ruajtur informacione të reja.

Këshillat e mjekëve janë që të kryeni çdo ditë një aktivitet që ju pëlqen, për të reduktuar stresin. Mund të ushtroheni, të qëndroni në natyrë apo të lexoni një libër. 

Nuk flini mjaftueshëm

Gjumi bën shumë më shumë sesa thjesht ju ndihmon të ndiheni të freskët dhe energjik.

Ai luan një rol të madh në aftësinë tuaj për të ruajtur kujtimet afatshkurtra dhe shndërrimin e tyre në kujtime afatgjata, shprehen specialistët e shëndetit.

Keni shenja të depresionit

Njerëzit që vuanjë nga depresioni, shfaqin një performancë më të keqe të kujtesës dhe aftësinë për të rikujtuar informacionin.

Dhe ka të ngjarë që kjo ndodh për shkak të rritjes së hormonit të stresit kortizolit, që shoqëron gjendjen depresive.

Disa simptoma të depresionit përfshijnë:

Trishtim i vazhduar ose të ndierit “bosh” shumicën e kohës.

Mungesa e energjisë që pasohet nga lodhja e shpejtë.

Të ndihesh i pashpresë ose i pafuqishëm.

Vështirësi për të fjetur.

Ndryshimet në peshë ose oreks.

Mendime shqetësuese rreth vdekjes ose vetëvrasjes.

Mund të vuani nga një infeksion

Infeksione të ndryshme si meningjiti ose infeksionet e traktit urinar, mund të shfaqin simptoma të tilla si paqartësi dhe probleme me kujtesën.

Dhe nëse keni simptoma të tjera, si ethe, të dridhura, të përziera, të vjella, urinim i shpeshtë ose djegie gjatë urinimit, vizitoni menjëherë mjekun tuaj.

Probleme me tiroiden 

Tiroidja është një gjëndër në pjesën e qafës, që prodhon hormone, të cilat kontrollojnë shumë procese të trupit. 

Nëse funksioni i tiroides ngadalësohet, mund të ndikojnë në funksionin e trurit tuaj.

Keni mangësi të lëndëve ushqyese

Mungesa e hekurit ose vitaminës B12, mund të shfaqet edhe si harresë.

Këtë e mbështesin edhe studime të ndryshme, të kryera tek të rriturit. Këto studime kanë zbuluar se ata me nivele të mjaftueshme të B12, kanë kujtesë më të mirë./AgroWeb.org

Dueli i Vlerave – Kungulli i Verdhë Përballë Kungulleshkave

Kungulli është një perime me super veti ushqyese.

Ai është i pasur me vitamina dhe minerale, por me pak kalori dhe ka pafund mënyra për tu përfshirë në dietë, sa do të habiteshit.

Që nga ëmbëlsira, sallata, byrek me kungull madje-madje mund të jetë një zëvendësues shumë i mirë dhe i gjalpit.

Kungulli është një nga burimet më të mira dhe më të njohura me beta-karoten, një super antioksidant, që njihet si kontribuesi kryesor i ngjyrës portokalli dhe që konvertohet në vitamin A në trup.

Pjesë e të njëjtës familje botanike të kungullit të verdhë janë edhe kungulleshkat.

Vlerat e Kungulleshkave

Ndihmon në mbajtjen nën kontroll të peshës

Kungujt e njomë kanë pak kalori. Ato janë një zëvëndësues i mirë për ushqimet e pasura me kalori. Për më tepër, kombinimi i fibrës dhe ujit (95%) që gjenden tek kungujt e njomë mbajnë nën kontroll oreksin tuaj, ju ndihmojnë të digjni kalori dhe ju japin shumë energji.

Përmirëson shëndetin e syve, Ul kolesterolin

Kungujt e njomë ju ndihmojnë me qeskat poshtë syve. Kanë të njëjtin funksion si trangujt për shkak të nivelit të lartë të beta karotenit dhe vitaminës A dhe C si edhe zinkut.

Përmirëson shëndetin kardiovaskular dhe ul tensionin e gjakut

Falë përmbajtjes së lartë të magnezit, kungujt e njumë ulin rrezikun e atakut në zemër dhe ishemisë. Kungujt e njomë përmbajnë acid folik që është thelbësor në shkatërrimin e amino acideve të dëmshme që shkaktojnë atak në zemër dhe trombozë.

Parandalon inflamacionin

Kyçet dhe gjymtyrët e njeriut preken nga inflamacioni i shkaktuar nga acidi urik në organizëm. Kungujt e njomë janë një burim i pasur me acide yndyrore Omega-3 dhe karotenoidë anti-inflamator që kundërshtojnë efektet e acidit të tepërt urik.

Kundër azmës, forcon dhëmbët dhe kockat

Vitamina C luan një rol të rëndësishëm në ruajtjen e sistemit imunitar dhe zgjidhjen e problemeve respiratore.

Vlerë e shtuar për trajtimet e diabetit

Kompleksi i vitaminave B dhe prania e zinkut dhe kaliumit ndihmojnë në shpërbërjen e sheqerit në trup. Fibra dhe pektina janë thelbësore në rregullimin e nivelit të sheqerit në gjak./AgroWeb.org

Si të Parandaloni Pickimin nga Mushkonjat – Metodat më të Forta Natyrale

Në raftet e supermarketeve apo farmacive do të gjeni një sërë locionesh kundër mushkonjave dhe insekteve të tjera, por shumë prej tyre përmbajnë substanca të dëmshme, që me siguri nuk dëshironi të qarkullojnë në organizmin tuaj.

Mushkonjat tërhiqen nga disa substanca në djersën tonë, por edhe nga frymëmarrja dhe lëkura.

Mushkonjat kanë sensorë që vënë njerëzit në shënjestër që nga larg.

Bllokimi i aromave që tërheqin mushkonjat bëhet nëpërmjet solucioneve, që zakonisht përmbajnë një substancë të njohur si diethyltoluamide.

Nuk është aspak sekret që kjo substancë është toksike edhe në rastet kur nuk kemi asnjë reagim ndaj saj.

Kjo substancë përthithet lehtë nga organizmi, akumulohet në inde nga ku mund të shkaktojë dëme afatgjatë.

Solucionet e bëra në shtëpi janë padyshim zgjidhja më e mirë. Recetat dhe përbërësit janë të thjeshta dhe mbi të gjitha pa kimikatë.

Metodat Më Të Mira Natyrale Kundër Mushkonjave

Uthull Molle  

Është një ndër solucionet më efikase që mban larg padyshim mushkonjat.

Mjafton të lyeni një pambuk me uthull molle dhe të lyeni zonat e zbuluara të trupit me të para se të flini apo kur qendroni në ambjente ku mushkonjat hyjnë lehtësisht.

Ekstrakti i Vaniljes

Aroma e vaniljes trullos dhe parandalon afrimin e tyre.

Mjafton të përzjeni një lugë çaji vanilje me çfarëdolloj kremi të thjeshtë pa aromë dhe lyeni të gjitha zonat e zbuluara të trupit tuaj.

Farat e karafilit

Merrni pesë gramë fara karafili dhe zjejini me një gotë ujë. Mjaftojnë 10 pika nga ky lëng që ta aplikoni në të gjitha zonat e zbuluara të trupit.

Kamomili 

Një prej bimëve mjekësore më të lashta ka efekt paralizues ndaj qelizave nervore të insekteve.

Ndaj ju mund ta thani dhe ta shpërndani nëpër shtëpi.

Mund të vendosni pak kamomil të tharë në parvazin e dritareve ose mund ta përgatisni në formën e çajit dhe të lyeni trupin me të.

Në këtë mënyrë edhe lëkura e trupit do të bëhet e butë dhe e lëmuar.

Borziloku i freskët ose gjethet e domates

Mushkonjat nuk e tolerojnë dot erën që lëshojnë këto bimë, ndaj mos nguroni t’i përdorni.

AgroWeb.org ju udhëzon të zieni në një filxhan çaji 10 apo 15 gjethe borziloku të freskët apo disa gjethe domatesh dhe kur të ftohet lyeni trupin me to para se të flini.

Vaji esencial i borzilokut, eukaliptit ose farave të karafilit 

Vajrat esenciale janë më të mirët kundër mushkonjave.

Nëse keni në shtëpi vaj esencial borziloku, eukalipti apo karafili, shtoni pesë deri në dhjetë pika të vajit esencial në një gotë me ujë dhe lyeni zonat e pambuluara nga rrobat.

Me të mund të lyeni edhe një copë pambuku dhe ta vendosni në dritare që të mbani mushkonjat larg./AgroWeb.org

Reçeli Special me Manaferra – Mënyra Perfekte Si Ta Përgatisni Lehtë

Në doni të ëmbëlsoni veten apo më të dashurit tuaj apo në doni një gosti të veçantë për miqtë përgatisni reçel me manaferra.

Është pikërisht sezoni i tyre dhe tregjet janë plot me manaferra vendi.

Të freskëta me shije delikate ato shndërrohen në një mrekulli të ëmbël teksa përgatiten në traditën më fantastike të amvisave shqiptare, atë të reçelit.

AgroWeb.org ju sugjeron më poshtë një recetë fantastike, krejt të lehtë të përgatitjes së reçelit me manaferra në shtëpi.

Jo vetëm që mund të ëmbëlsoni veten dhe këdo në familje me këtë ëmbëlsirë të mrekullueshme por sigurisht mund ta përdorni edhe si një dhuratë të këndshme për miqtë apo të afërmit tuaj.

Përgatitja e Reçelit me Manaferra

Përbërësit 

1 kg manaferra

800 gr sheqer

Lëngu i shtrydhur i një kokrre limoni

Përgatitja 

Si fillim pastrojmë manaferrat nga bishtat dhe i shpëlajmë me ujë të rrjedhshëm.

Më pas, i vendosim në një kullesë në mënyrë që t’u largohet uji.

Shtrojmë një shtresë me manaferra në tenxhere, një shtresë me sheqer, e kështu me radhë derisa masat e sheqerit dhe manaferrave të mbarojnë.

I lëmë të pushojnë përreth 6 orë në mënyrë që manaferrat të lëshojnë lëngun e tyre.

Më pas, AgroWeb.org ju udhëzon të vendosni tenxheren në zjarr të ngadaltë. Gjatë përgatitjes së reçelit së manaferrave nuk duhet të hidhni ujë pasi manaferrat kanë lëngun e tyre.

Gjatë zierjes duhet të bëni kujdes që të largoni shkumën që do të krijohet në sipërfaqen e tenxheres.

Do ta zieni deri në 30 minuta apo edhe pak më shumë derisa lëngu i reçelit të trashet.

Pak para se ta heqim tenxheren nga zjarri shtojmë lëngun e limonit, e trazojmë me kujdes për pak sekonda dhe e largojmë nga zjarri.

E lëmë të ftohet dhe e vendosim në kavanoza të sterilizuar dhe i vendosim në frigorifer./AgroWeb.org

Gjella e Lehtë me Qepë dhe Speca – Receta e Shpejtë e Verës

Nëse ka receta që ju kujtojnë menjëherë verën, me siguri jan ëkëto të shpejtat me qepë, domate e speca.

Kjo për shkak të shijes karkateristike që ato kanë dhe lëhtësisë në përgatitje.

E tillë është edhe receta që do ju sugjerojmë sot, e ngjashme me gjellën verore me oriz dhe perime, por më pikante.

Atë mund ta konsumoni të ngrohtë dhe të ftohtë sipas dëshirës.

Ndiqni më poshtë mënyrën e saktë të përgatitjes dhe provojeni menjëherë në shtëpitë tuaja.

Përbërësit

3 qepë mesatare

6 speca jeshil

2 thelbi hudhër

500 gr domate të qëruara ose salcë

Piper i zi

Spec i kuq djegës

Vaj ullir

Kripë

Përgatitja

Për të nisur me përgatitjen e kësaj recete, AgroWeb.org ju këhsillon të prini hollë të gjithë përbërësit.

Më pas në një tenxhere shtoni vaj ulliri bashkë me qepët e grira hollë dhe lëreni të gatuhen në zjarr mesatar për 4-5 minuta.

Pas kësaj shtoni hudhrën, specat jeshil të cilët po ashtu duhet të jenë të prerë hollë dhe lërini të gatuhen për 8-10 minuta derisa të zbuten.

Përzieni derisa të gjithë përbërësit të fillojnë të skuqen dhe shtoni pipër të zi, kripë dhe spec djegës të bluar.

Në fund shtoni 500 gr domate të qëruara të cilat duhet t’i shtypni me duar ose salcë domatesh.

Lëreni tenxheren në zjarr për 15 minuta. derisa të gjithë përbërësit të jenë zbutur dhe të jenë bashkuar me njëri tjetrin.

Nëse e dëshironi më të ujshme gjellën tuaj mund të shtoni edhe më shumë domate dhe ta lini gjellën të ziejë edhe pak.

Për ta shërbyer hidheni në një pjatancë dhe shoqërojeni me bukë të thekur./AgroWeb.org

Katër Shenjat Që Jep Trupi Kur Keni Probleme Me Zemrën

Sëmundjet e zemrës janë nga sëmundjet më të përhapura në vendin tonë.

Në Shqipëri, rreth 9000 njerëz vdesin çdo vit për shkak të sëmundjeve që kanë lidhje me zemrën, sipas të dhënave të Institutit të Shëndetit Publik.

Sëmundjet kardiovaskulare janë shkaktare të shumë vdekjeve në botë. Ato përfshijnë edhe difektet e zemrës, aritminë dhe sëmundjen e arterieve koronare.

Shëndeti i zemrës përmirësohet nëse ushqeheni mirë si dhe kryeni aktivitete fizike.

Megjithatë, ju duhet t’i vini veshin trupit tuaj që është në gjëndje të japë paralajmërimet e një problemi me zemrën.

Shtrëngimi në kraharor

Shtrëngimi në mes të kraharorit është në nga treguesit kryesorë të problemeve me zemrën.

Nëse keni dhimbje , bllokim apo shtrëngim jo në anë të kraharorit por në mes të tij atëherë duhet të bëni një vizitë te mjeku i zemrës për të kuptuar më shumë.

Frymëmarrja

Sipas të dhënave të AgroWeb.org, një tjetër shenjë paralajmëruese është mungesa e frymëmarrjes. Nëse zemra nuk furnizohet mjaftueshëm me oksigjen, atëherë do t’ju duket sikur ju mungon ajri.

Nëse jeni duke ecur apo ngjitur shkallët dhe ndjeni një lodhje të pakuptueshme që ju pengon atëherë mund të jetë një shenjë paralajmëruese e problemeve me zemrën.

Rrahje të çrregullta të zemrës

A e keni përjetuar ndonjëherë ndjesinë sikur zemra do t’ju dalë nga kraharori?

Po ndjesinë e zemrës që sikur resht së rrahuri për një sekondë?

Ajo për të cilën po flasim në këtë artikull të AgroWeb.org ka të bëjë me rrahjet e çrregullta të zemrës, një fenomen që zgjat krejt pak, por që mund të ndodhë shpesh, jo vetëm kur jeni në lëvizje, por edhe kur jeni ulur, shtrirë ose duke qëndruar në heshtje.

Ky çregullim i rrahjeve të zemrës është një shenjë e problemeve me zemën, ndaj vizita te mjeku është e rekomandueshme.

Humbja e Ndjenjave

Ka raste kur njeriu humb ndjenjat apo siç thuhet, i bie të fikët në mënyrë të pashpjegueshme dhe pa shkak të mirëfilltë.

Humbja e pashpjegueshme e ndjenjave ka të bëjë me probleme të ndryshme, por një nga më kryesorët ka lidhje me zemrën.

Nëse kuptoni që keni këto simptoma, AgroWeb.org ju këshillon të vizitoheni tek një mjek menjëherë./AgroWeb.org

Petullat e Ëmbla të Shtëpisë me Arra – Plot Aromë dhe Shije

Petullat janë një traditë e vjetër që shoqëron mëngjeset e shumë shqiptarëve ndër shekuj.

Të kripura apo të ëmbla petullat mund t’i përgatisë secili në shtëpi.

Më shumë pak përbërës dhe në shumë pak kohë do të keni në tryezë një pjatë të mrekullueshme.

Në recetën e sotme AgroWeb.org ju sugjeron petullat me arra dhe sheqer pasi kanë një shije shumë të veçantë.

Më poshtë gjeni hap pas hapi të shpjeguar mënyrën e përgatitjes së tyre.

Përbërësit

300 gr miell

150 ml qumësht

130 gr sheqer

3 vezë

80 gr arra

1 pako pluhur për ëmbëlsira

Mjaltë

vaj për skuqje

Përgatitja

Për të nisur këtë recetë AgroWeb.org ju këshillon të filloni duke hedhur vezët bashkë me 100 gr sheqer në një tas të thellë dhe përziejeni me një rrahës elektrik.

Bëjeni këtë derisa sheqeri të shkrijë plotësisht.

Kur të jetë formuar shkumë sipër enës tuaj, shtoni qumështin dhe vazhdoni me përzierjen.

Shtoni edhe miellin me pluhurin e ëmbëlsirave tek ena duke e përzier me kujdes që të mos krijohen kokrra.

Kur brumi juaj të jetë i trashë dhe kompakt, shtoni copat e arrave të thërrmuara.

Pasi t’i keni përzier mirë të gjithë përbërësit lërini të pushojnë për 15 minuta, duke e mbuluar enën me letër plastike.

Ndërkohë zgjidhni një tigan të thellë për skuqjen, mbusheni me vaj deri në gjysmë dhe lëreni në zjarr të lartë derisa vaji të jetë i nxehtë.

Kur të kenë kaluar 15 minutat, merrni  brumin dhe me anë të një luge hidhni tek vaji forma të vogla rrethore.

Lërini të skuqen derisa petullat të jenë fryrë plotësisht dhe të kenë marrë ngjyrë të artë.

Në anë të sobës përgatisni në pjatë të thellë të mbuluar me letër në mënyrë që të vini petullat sapo ato të skuqen.

Pasi të keni mbaruar dhe letra ka thithur të gjithë vajin, vendosini në një enë tjetër dhe spërkatini me pjesën e mbetur të sheqerit.

Sipas dëshirës ju mund të përdorni edhe pak mjaltë dhe arra për spërkatjen e tyre./AgroWeb.org