*Nga Valbona Furrari Lasku

Ky është keku që mamat tona e kanë gatuar kur ne kemi qenë të vogla.

Keku me kos e vezë, ka qënë ëmbëlsira më e zakonshme dhe më e shpeshtë e asaj kohe.

Ama kur i shtoje dhe sherbet, ëmbëlsira kthehej në një pjatë të veçantë që nuk kishe mundësi ta shijoje dhe aq shpesh.

Më ka qëlluar kur kisha çunat në çerdhe e kopësht të kërkoja shijen e kekut që ne kemi ngrënë kur kemi qënë fëmijë.

Nuk e kam gjetur më. Ky kek, të risjell atë shije dhe meqë jemi në dimër dhe në stinë festash i bëjmë një tolerim dhe sherbetit.

Përbërësit

5 vezë fshati

100 gr gjalp

150 gr sheqer

200 ml kos

300 gr miell

1 lugë kafe e prerë me sodë buke

Lëkura e 2-3 portokalleve

Për sherbetin

600 ml ujë

800 gr sheqer

Përgatitja

Rrahim vezët me sheqerin derisa të krijohet një masë kremoze.

Shtojmë gjalpin e shkrirë, gjithnjë duke e përzjerë me telin e kuzhinës.

 Shtojmë kosin, miellin, sodën dhe lëkurat e portokallit.

Shtrojmë masën në një tavë të lyer me gjalp.

E pjekim në 180 gradë pëe 45 minuta, në mes të furrës, derisa keku të kullojë.

E testojmë me një majë thike e cila duhet të dalë e pastër.

Meqë nuk i pëlqejmë ëmbëlsirat me shumë shërbet si familje, pregatisim shërbet aq sa duhet, jo të kullojë tepri kur ta hamë.

Vendosim ujin në tenxhere bashkë me sheqerin dhe e lëmë sherbetin të ziejë 15 minuta nga pika e vlimit.

Siç dihet kur përgatisim ëmbëlsira me sherbet ose keku ose shërbeti duhet të jetë i ftohur.

Unë kisha kekun e ftohtë dhe i hodha shërbetin e ngrohtë, jo të nxehtë. Ju bëftë mirë./AgroWeb.org

* Valbona Furrari Lasku është një food bloger, me karrierë të gjatë në komunikim dhe menaxhim biznesi, por edhe një pasionante e kuzhinës së mirë dhe e recetave të shijshme të gatimit. Ajo ka edhe blogun e saj Bonbon Taste, me receta të traditës por edhe të reja, të shijshme dhe mbi të gjitha të shëndetshme. Recetat e saj ajo ka vendosur t’i ndajë edhe për lexuesit e AgroWeb.org