Edhe pse ka një prejardhje greke, kjo salcë përgatitet gjerësisht edhe në vendin tonë.

Ajo është shoqëruesja perfekte e qofteve, patateve, mishit të pjekur por edhe e shumë recetave të tjera.

Në shumë shtëpi kjo salcë përgatitet edhe për darkën e Vitit të Ri.

Me shije të veçantë ajo premton vetëm kënaqësi dhe freski, e cila sigurisht që duhet për të plotësuar në tërësi tryezën tuaj.

AgroWeb.org ju tregon shkurt hapat që ju duhen për ta përgatitur salcën e famshme të quajtur xaxiq.

Përbërësit

3-4 kastravecë

1 gotë e gjysmë uji me salcë kosi

2 lugë gjelle vaj ulliri

2 lugë gjelle me kopër të grirë hollë

1 lugë gjelle me lëng limoni

1-2 thelpinj hudhër

Kripë

Përgatitja

Sekreti i përgatitjes së kësaj recete është pikërisht salca e kosit.

Nëse dëshironi një shije krejtësisht speciale dhe autentike, duhet ta përgatisni atë vet në shtëpi.

Mjafton të kulloni për 15-20 orë 2-3 gota uji me kos të futura në një napë e më pas atë ta lidhni mbi nje tepsi.

Recetën e përgatitjes së salcës së kosit mund ta lexoni të plotë duke klikuar këtu.

Pasi të keni mbaruar me salcën e kosit, AgroWeb.org ju sugjeron që të vazhdoni me grirjen e kastravecëve.

Sigurisht mund të përdorni renden, por për të larguar ujin që kastravecët lëshjnë do t’ju duhet t’I shtrydhni.

Duke i marrë duar-duar shtrydhini mbi lavaman e më pas lërini në një tas kastravecët e grirë.

Shtoni salcën e kosit, vajin e ullirit, erëzat, lëngun e limonit, hudhrën e shtypur dhe kripën.

Nisni t’I përzieni me ndihmën e një luge, derisa përbërësit të jenë lidhur mirë.

Mbulojeni me një qese kuzhine dhe lëreni të pushojë salca në frigorifer për 10-15 minuta.

AgroWeb.org ju këshillon që të mos e anashkaloni këtë hap të recetës, pasi është pikërisht ai që mundëson marinimin e salcës.

Më pas mund t’i hidhni edhe pak vaj ulliri në sipërfaqe si dhe të shtoni kokrra ulliri për ta bërë pjatën tuaj sa më të bukur./AgroWeb.org