Bizhuteritë tuaja nuk kanë më shkëlqimin që kishin dikur dhe ju mund të dëshironi të dini mënyra praktike për t’i rikthyer atyre bukurinë e mëparshme.
Për fat të mirë, me këshillat e duhura ju mund t’i bëni bizhuteritë të duken sërisht po aq bukur.
Në këtë artikull AgroWeb.org ju njeh me disa këshilla se si t’i pastroni bizhuteritë në mënyrë që të shkëlqejnë edhe për vitet në vijim.
Si të pastroni bizhuteritë në shtëpi
Përdorni sapun enësh dhe ujë të ngrohtë
Shumica e bizhuterive, mund të pastrohen në mënyrë të sigurtë me sapun enësh dhe ujë të ngrohtë.
AgroWeb.org rekomandon bashkimin e një pike detergjenti për enët, me ujë të ngrohtë në një tas dhe më pas të lini bizhuteritë tuaja të qëndrojnë në përzierje për disa minuta.
Për bizhuteri të forta si ari dhe gurët e çmuar, vazhdoni me një pastrim të butë duke përdorur një furçë dhëmbësh me qime të buta. Shpëlajeni, e në fund thajeni me një leckë mikrofibër.
Si të trajtoni bizhuteritë e veshura me ar
Për bizhuteritë e veshura me ar, ndërroni furçën e dhëmbëve me një sfungjer të butë.
Një gërvishtje e vogël mund të shkaktojë gërryerje të veshjes, duke zbuluar metalin bazë.
Si të largoni njollosjen në argjend dhe bronz
Nëse bizhuteritë prej argjendi ose bronzi janë shumë të njollosura, detergjenti i enëve dhe uji mund të mos jenë të mjaftueshëm për t’i rikthyer atyre shkëlqimin.
Provoni t’i pastroni duke përdorur pëlhura lustruese të formuluara posaçërisht për pastrimin e njollave.
Po ketchup-i dhe pasta e dhëmbëve?
Ketchup-i nuk ka veti gërryese dhe aciditeti i tij i butë reagon me sipërfaqet e oksiduara për të hequr njollat.
Për të përdorur këtë metodë, zhytni bizhuteritë tuaja në një tas të vogël me ketchup, dhe lërini aty për 15 minuta deri në një orë.
Lani ketchup-in me ujë të ngrohtë dhe detergjent enësh, shpëlajini dhe thijeni bizhuteritë me një leckë mikrofibër.
Edhe pasta e dhëmbëve është po aq efektive, por kini kujdes sepse ka veti gërryese. Nëse nuk jeni të kujdesshëm rrezikoni të gërvishtni argjendin.
Sidoqoftë, është një metodë e lehtë, që ju jep rezultate të shpejta.
Zgjidhni një pastë dhëmbësh me veti gërryese të ulët, me ngjyrë të fortë, dhe pa agjentë shtesë zbardhues.
Lani bizhuteritë tuaja në ujë, më pas shpërndani në to një shtresë të hollë paste dhëmbësh, dhe fërkojeni butësisht me një sfungjer ose leckë mikrofibër.
Lëreni të qëndrojë për disa minuta, më pas shpëlajeni pastën e dhëmbëve dhe thajini me një leckë të pastër.
Po perlat?
Kini kujdes kur pastroni perlat sepse janë poroze dhe të ndjeshme. Ato duhet të pastrohen vetëm me një leckë mikrofibër dhe pak ujë.
Asnjëherë mos përdorni pastrues kimik si klori, amoniaku, peroksidi i hidrogjenit dhe acidi acetik (acidi në uthull dhe tek ketchup-i) sepse janë shumë të dëmshëm për perlat.
Mos i zhysni perlat në ujë, pasi kjo mund të dëmtojë fillin e mëndafshit me të cilin janë të lidhura.
Gjithashtu mos i ekspozoni ndaj parfumit. Perlat duhet të jenë bizhuteritë e fundit që vendosni përpara se të dilni dhe të parat që hiqni kur ktheheni në shtëpi. /AgroWeb.org
