Si Të Forconi Kockat Me Ushqimet e Duhura

Humbja e dendësisë minerale kockore është një sëmundje që ka të bëjë me humbjen e sasisë së mineraleve në eshtra.

Rënia e dendësisë minerale të kockave nën nivelet normale quhet osteopeni dhe është paraprirëse e osteoporozës.

Osteopenia nuk shoqërohet me dhimbje apo simptoma, por parandalimi i saj është gjithësesi i rëndësishëm.

Mosha është një nga shkaktarët e rënies së dendësisë minerale kockore. Me kalimin e viteve, eshtrat humbasin minerale, masën dhe strukturën, bëhen më të brishta dhe subjekt frakturash të ndryshme.

Mungesa e aktivitetit fizik, problemet me metabolizmin, duhanpirja, pijet e gazuara dhe alkoli janë disa prej faktorëve që kontribuojnë në humbjen e dendësisë minerale kockore.

Femrat janë më të rrezikuara nga kjo sëmundje në krahasim me meshkujt.

Mësoni më poshtë nga AgroWeb.org ndryshimet që duhet të bëni për të parandaluar dhe vonuar këtë sëmundje:

Konsumoni Më Shumë Kalçium

Kalçiumi është një nga ushqyesit më të rëndësishëm për eshtrat. Kockat përbëhen kryesisht nga kalçiumi ndaj ai është tejet i rëndësishëm.

Doza ditore është 1,200 mg kalçium në ditë për femrat dhe 1,000 mg kalçium për meshkujt.

Këtë mineral mund ta merrni nga produktet organike të bulmetit, sardelet, barishtet, zarzavatet si brokoli, kumbullat e thata e të tjerë.

Nëse nuk ushqeheni mirë, atëherë konsultohuni me mjekun për të marrë suplementë.

Më Shumë Vitaminë D

Vitamina D zbut rrezikun e kësaj sëmundjeje dhe e ndihmon organizmin të përthithë më shumë kalçium.

Trupi prodhon vetë vitaminë D nëse ekspozohet në diell për 10-15 minuta në ditë.

Aktiviteti fizik

Aktiviteti i rregullt fizik është i dobishëm për shëndetin dhe kockat. Këto të fundit rimodelohen si kundërpërgjigje e stresit fizik, ndaj lëvizni rregullisht.

Synoni të kaloni të paktën 30 minuta në ditë duke kryer aktivitet fizik si ecje, kërcim, apo ngritje peshash të lehta.

Hiqni Dorë Nga Duhani

Duhani pengon përthithjen e kalçiumit dhe ul masën kockore.

Duhanpirësit rrezikohen më shumë nga frakturat se njerëzit që nuk pijnë duhan.

Më Pak Kafeinë

Kafeina është e dëmshme për kockat dhe pengon përthithjen e kalçiumit që është i rëndësishëm për shëndetin e kockave.

Vitamina K

Vitamina K e ndihmon organizmin të prodhojë proteina për kocka të shëndetshme dhe të pakësojë sasinë e kalçiumit të nxjerrë nga trupi.

Ushqimet e pasura me vitaminë K janë lakrat e vogla, ushqimet e fermentuara të bulmetit, kumbullat dhe brokoli.

Më Shumë Kalium

Kaliumi neutralizon acidet që largojnë kalçiumin nga organizmi.

Burimet më të mira të kaliumit janë banania, avokado, luleshtrydhet, portokalli, mango, kivi, pjeshkët, hurmat, karrotat, patatet e ëmbla, brokoli dhe speci i kuq.

Doza e rekomanduar e kaliumit për të rriturit është 4,700 mg.

Magnezi

Magnezi përmbush nevojat e plot 325 sistemeve enzimatike që kontrollojnë mijëra ndërveprime kimike në organizëm.

Ai ruan strukturën e kockave duke e çuar kalçiumin nga gjaku për në eshtra.

Burime të shkëlqyera të magnezit janë bajamet, avokadot, bananet, fasulet, farat e kungullit, qumështi i sojës, arrat, kosi, barishtet.

Më Pak Kripë

Kripa e shtyn organizmin të nxjerrë më shumë kalçium.

Dozat e larta të kripës janë një faktor rreziku për brishtësinë e kockave.

Ju nuk duhet të konsumoni më shumë se 1,500 mg kripë në ditë.

Vitamina C

Vitamina C luan një rol madhor në sintetizimin e kolagjenit që është proteina kryesore e kockave.

Vitamina C gjendet tek portokalli, specat, brokoli, luleshtrydhet, lakrat e vogla, ananasi, kivi, pjepri dhe lulelakra./AgroWeb.org

* Ky informacion ka për qëllim të plotësojë, të mos zëvendësojë këshilla nga mjeku juaj ose ofruesi i kujdesit shëndetësor dhe nuk ka për qëllim të mbulojë të gjitha përdorimet e mundshme, masat paraprake, ndërveprimet ose efektet negative. Ky informacion mund të mos i përshtatet rrethanave tuaja specifike shëndetësore.

Burimi: U.S. National Library of Medicine

Lulja Gojë-Ujku, Përdorimet E Panjohura Mjekësore

Lulja Gojë-Ujku dhe ngjyrat e larmishme të saj zbukurojnë oborre e lulishte të shumta në vendin tonë.

Kjo lule rritet gjërësisht në zonat shkëmbore të Evropës.

Në vendin tonë ajo njihet si gojë-ujk ndërsa në vendet e tjera njihet si lule dragoi, lule-luani, ose lule gojë-qeni, për shkak të formës së petaleve të kësaj luleje të veçantë me emrin botanik Antirrhinums.

Në fakt, ishin Romakët e lashtë ata që e shpërndanë këtë lule në mbarë Evropën dhe në të gjithë perandorinë.

Ata i dhanë lules emrin ‘leonis ora’ që përkthehet ‘goja e luanit.’

Simbolika e kësaj luleje është forca por edhe dinakëria.

Përdorimet Botanike të Lules

Lule gojë-ujku nuk vlerësohet vetëm për bukurinë dhe ngjyrat e saj.

Farat e kësaj luleje prodhojnë një vaj botanik që përdoret kundër enjtjeve në trup.

Gjethet dhe petalet e kësaj luleje përdoren edhe në mjekësinë popullore.

Ato thahen dhe përdoren në pomada të fuqishme kundër inflamacionit.

Vlerat Shëndetësore Të Lule Gojë-ujkut

Parandalon infeksionet e lëkurës

Për shumë vite, kjo lule është përdorur në disa pomada të mira për shërimin e plagëve.

Gjethet dhe petalet e lules kanë aftësi shtrënguese të poreve dhe luftojnë inflamacionin në zonën e lënduar të lëkurës.

Në pikat e shitjes së bimëve medicinale mund të gjeni solucione të përgatitura me lule gojë-ujku.

Kundër të djegurave

Kjo lule përdoret edhe kundër të djegurave në lëkurë.

Aplikimi i pomadës në zonën e lëkurës që ka pësuar të djegura, ofron qetësim nga dhimbjet.

Kjo është arsyeja përse lule gojë ujku rekomandohet edhe kundër të djegurës nga dielli.

Pastrimi i gjakut

Lule gojë ujku përdoret për largimin e toksinave dhe helmeve nga gjaku dhe për uljen e tensionit të gjakut.

Me lulet dhe gjethet e thara të lule gojë-ujkut mund të bëni një çaj si të gjithë çajrat e tjerë bimorë.

Kundër infeksioneve urinare

Bima në fjalë përdoret edhe në trajtimin e infeksioneve urinare.

Përdoreni çajin e lule gojë-ujkut pas konsultimit me mjekun tuaj.

Për uljen e temperaturës

Një përdorim tjetër i kësaj luleje është ai i uljes së temperaturës së trupit.

Çaji dhe lëngjet me bazë luleje gojë-ujku rekomandohen për uljen e temperaturës.

AgroWeb.org ju rekomandon të konsultoheni me mjekun tuaj përpara përdorimit të çajit me lule gojë-ujku./AgroWeb.org

Mënyrat e Përdorimit Të Kripës Për Shërim Të Shpejtë

Kripa është një nga përbërësit më të përhapur në çdo kuzhinë, por përdorimi i tepruar i saj është i rrezikshëm për shëndetin.

Megjithatë përdorimi i kësaj substance interesante shkon përtej gatimit dhe aromave të tij.

Kripa përdoret gjërësisht për pastrimin e shtëpisë, bukurinë fizike e të tjerë.

Për Shërimin e Fytit

Fyti preket menjëherë nga i ftohti, ajri i thatë, infeksionet e të tjerë.

Kundra tyre, hyn në lojë kripa, me të cilën mund të bëni një gargarë të fortë e shëruese.

Hidhni një lugë çaji kripë në një gotë me ujë të ngrohtë dhe pasi të jetë shkrirë bëni gargarë për disa sekonda.

Gargarën bëjeni rregullisht për disa ditë.

Kundër Herpesit Në Buzë

Uji me kripë lehtëson dhimbjen dhe shëron herpesin në buzë.

Përzieni dy lugë çaji me kripë në një çerek gote me ujë të ngrohtë dhe lëreni të tretet.

Lyeni pjesën e buzës me herpes për 20 sekonda dhe pastaj lajeni. Përsëriteni tre deri në katër herë në ditë për rezultate të mira.

Kundër Dhimbjes Së Këmbëve

Dhimbjet e këmbëve mund të kurohen me kripën e tryezës.

Mbusheni një legen me ujë të ngrohtë dhe shtoni gjysëm filxhani me kripë.

Futini këmbët në tretësirën e kripur dhe mbajeni për 10-15 minuta.

Thajini këmbët dhe më pas masazhojini për 5 minuta.

Pastë Natyrale Dhëmbësh

Me kripën mund të mbani dhëmbët të pastër nga bakteret.

Zhyteni furçën e lagur të dhëmbëve në një enë me kripë dhe fërkoni dhëmbët.

Ju mund të përzieni sodë buke me kripë për një pastrim të thellë por të butë.

Kundër Qeskave Të Syve

Nëse keni kaluar një natë pa gjumë ose duke qarë me siguri do të keni sy të fryrë.

Përzieni gjysëm luge çaji me kripë në një tas me ujë të vakët.

Lagini pambukët në këtë solucion dhe vendosini mbi sytë e mbyllur për disa minuta.

Përsëriteni këtë për 15-20 minuta.

Kundër Pickimeve Të Insekteve

Kripa është ideale kundër pickimit të bletës, grenxës apo insekteve të tjera.

Ajo arrin të nxjerrë menjëherë toksinat nga organizmi dhe shuan dhimbjen dhe inflamacionin.

Në raste të tilla përdorni tretësira me ujë dhe kripë për të shpëlarë zonën e pickuar.

Bllokimi i Hundëve

Tretësira me ujë dhe kripë është një nga kurat më të mira natyrale për bllokimin e hundëve.

Kripa shpërbën sekrecionet dhe lehtëson nxjerrjen e tyre dhe frymëmarrjen.

Përdorni një lugë çaji me kripë në 2 gota me ujë të ngrohtë.

Futeni tretësirën në shishe të vogla spërkatëse dhe përdoreni në hundë një ose dy herë në ditë.

Përdorimet përtej shëndetit 

Zierja e Shpejtë E Vezëve

Kur të dëshironi të zieni vezë, shtoni pak kripë në ujin e valuar përpara se të hidhni vezët. Kështu ato do të zihen më shpejt.

Kripa ndihmon në rastin e vezëve të ziera fort, ndërsa nëse dëshironi vezë të ziera pak, atëherë mos përdorni kripë.

Pastrimi i argjendurinave

Kripa, bashkë me sodën e bukës mund të bashkohen në një pastë unike për të pastruar agjendurinat dhe pajisjet e kuzhinës.

Lërini lugët, pirunjtë dhe thikat të ziejnë në një tenxhere në sipërfaqen e së cilës keni vendosur letër alumini.

Shtoni kripën dhe sodën e bukës dhe lërini pajisjet të ziejnë për 3-5 minuta.

Më pas fërkojini me ujë të ngrohtë dhe me sapun./AgroWeb.org

Musaka Me Presh – Nga Gatimet Speciale Të Traditës

Kuzhina shqiptare është e pasur në receta e gatime speciale për çdo perime.

Gjellë e supa të shijshme, tava të ndryshme furre etj, i ofrojnë shije të mrekullueshme tryezës në çdo stinë.

E tillë është edhe receta e përgatitjes së musakasë me presh.

Një traditë e vjetër e kuzhinës shqiptare, që thuhet se ndikimin e ka nga kuzhina e vendeve të Lindjes.

Pavarësisht se musakaja tipike është ajo e njohur gjerësisht e përgatitur me patate, ka dhe shumë receta të tjera të përgatitjes së musakasë siç është ajo me presh, me patëllxhanë apo edhe kunguj.

AgroWeb.org sjell më poshtë recetën e përgatitjes së musakasë me presh, një gatim special, tejet i shijshëm ideal për një vakt të plotë dreke.

Përgatitja e Musakasë Me Presh

Përbërësit

(Përbërësit më poshtë për 4-5 persona)

1.5 kg presh

2 filxhanë kafeje me vaj ulliri

200-300 gr mish të grirë

2 kokrra qepë

1 lugë gjelle salcë domatesh

2 gjethe dafine

Kripë

Piper

Majdanoz

Për salcën beshamel 

3 lugë gjelle miell

2 lugë gjelle gjalpë të freskët

2 deri 3 gota qumësht

2 kokrra vezë

3 lugë gjelle djathë kaçkavall i grirë

Kripë

Përgatitja

Për kimën: Për përgatitjen e kimës kaurdisen qepët e grira imët me mish të grirë, hidhet salcë domatesh, kripë, piper dhe dafinë.

Për beshamelën: Në tigan skuqni gjalpin me miellin derisa të jetë zverdhur. Shtoni qumështin dhe përziejeni fort dhe shpejt me një lugë druri derisa masa të jetë e njëtrajtshme. Shtoni vezët e rrahura dhe vijoni ta përzieni. Shtoni kripën sipas dëshirës si dhe djathin kaçkavall të grirë.

Përgatitja e Musakasë

Si fillim preshi pastrohet me ujë të rrjedhshëm, gjethet e sipërme preferohet që të hiqen.

Pritet në copa të pjerrëta me gjatësi 3-4 centimetra.

Më pas, skuqen lehtë u hidhet pak kripë dhe ndahen në dy pjesë.

Gjysma e tyre shtrohet në një tavë ku më parë kemi shtuar vaj ulliri dhe galetë (bukë e thekur e thërrmuar imët).

Sipër tyre hidhet një shtresë me kimë  dhe mbulohet me pjesën tjetër të preshve.

Sipër i hidhet salca beshamel, e cila sheshohet në të gjithë sipërfaqen e tavës me ndihmën e një luge të lyer me qumësht.

Më pas, tava vedoset në furrë përreth 30-40 minuta./AgroWeb.org

Supë Pule me Arra dhe Hudhra – E Ngrohtë Plot Shëndet

E lehtë në shije dhe me një aromë të mrekullueshme që të tërheq menjëherë drejt tryezës është supa e pulës me arra dhe hudhra.

Receta e kësaj supe është pjesë e traditës së nënave shqiptare. Dikur ajo gatuhej në raste të veçanta, sidomos kur shtëpinë e vizitonin miq e mysafirë.

Nuk ka fjalë për të përshkruar shijen fantastike të kësaj supe, përbërësit e të cilës kombinohen në mënyrë të shkëlqyer me njëri-tjetrin.

Mishi dhe lëngu i pulës kombinuar me arrat është një mrekulli për shijen, por mbi të gjitha për shëndetin falë vlerave të larta ushqyese që ka.

Kjo supë është ideale për ditët e ftohta. Jo vetëm që të kënaq nepsin dhe oreksin me shijen e saj fantastike por ndihmon dhe mbron organizmin gjithashtu nga virozat, e ftohura dhe gripi.

Ndiqni më poshtë recetën e vjetër të Supës me Arra dhe Hudhra, e cila përgatitet krejt lehtë dhe shpejt.

Përgatitja e Supës me Arra dhe Hudhra

Përbërësit

(Përbërësit më poshtë për 4-5 persona)

Një pulë mesatare

3-4 lugë vaj ulliri

Pak gjalpë i freskët

1 filxhan çaji me arra të thërrmuara

2 lugë miell gruri

2 thelpinj hudhër

Lëng limoni i freskët

Kripë

Piper

Përgatitja

Pastrojmë me ujë të rrjedhshëm pulën dhe e ndajmë në copa.

Vendosim një tenxhere në zjarr, shtojmë copat e pulës dhe vajin e ullirit.

I kaurdisim për pak dhe më pas shtojmë ujë derisa copat e mishit të mbulohen tërësisht.

Pasi pula të ketë zierë, vendosni një tigan në zjarr, shtoni pak vaj ulliri dhe miellin, kaurdiseni derisa mielli të marrë një ngjyrë të artë.

Në këtë moment largojeni tiganin nga zjarri. Merrni pak lëng nga tenxherja ku ka zierë pula, shtojeni tek mielli dhe kaurdiseni derisa masa të behet e trashë, e njëtrajtshme.

E shtojmë këtë masë tek tenxherja ku kemi pulën me lëngun e saj. E vendosim në zjarr dhe e trazojmë në mënyrë që të mos bëhen kokërriza dhe supa të nisë të trashet.

Në fund shtojmë arrat e thërrmuara, hudhrat e shtypura, kripën, i lëmë të ziejnë për pak minuta dhe supa është gati.

Kur e shërbejmë i shtojmë piper, disa pika lëng limoni të freskët.  Nëse dëshironi, për më shumë shije mund t’i shtoni edhe disa pika gjalpë të shkrirë.

Kjo supë shoqërohet në mënyrë të mrekullueshme me sallata të freskëta të stinës, perime të pjekura, bukë të thekur por edhe byrekë të ndryshëm./AgroWeb.org

Një Avokado në Ditë Për Zemrën dhe Shëndetin

Pse duhet të hani avokado çdo ditë?

Avokadot konsiderohen si një nga produktet natyrale më mirëbërëse për organizmin njerëzor.

Një avokado përmban më shumë kalium se banane. Avokadot kanë 14% kalium, ndërsa një banane përmban vetëm 10% kalium.

Substanca bazë për shëndetin tuaj

Avokadot përmbajnë 23% folat, që është një substancë, e cila ul rastet e sëmundjeve të zemrës.

Vitamina E dhe yndyrnat e mira tek avokadot janë gjithashtu të shkëlqyera për zemrën. Folati arrin të ulë rreziqet për të pasur një goditje në tru.

Folati është gjithashtu thelbësor në parandalimin e defekteve të lindjes si problemet e sistemit kockor ahe atij nervor.

Plot me antioksidues

Ushqimi me avokado ndihmon trupin tonë të përthithë 5 herë më shumë sasinë e karotenoideve, antioksidantëve të tillë si likopeni dhe beta karoteni.

Shëndeti i syve

Avokadot përmbajnë më shumë luteinë se çdo frut tjetër, duke mbrojtur kundër uljes së shikimit dhe perdeve të syrit.

Kundër kolesterolit të dëmshëm

Shumë e pasur në beta-sitosterol, avokado ul kolesterolin e keq me 22%, ngre kolesterol të mirë me 11% dhe gjithashtu ul trigliceridet e gjakut me 20%.

Kundër qelizave të dëmshme

Studimet tregojnë se acid i lartë oleik tek avokadot ndihmon shumë në parandalimin e kancerit të gjirit.

Ai pengon rritjen e tumorit në kancerin e prostatës dhe kërkon qelizat kanceroze të qelizave parakanceroze dhe i shkatërron ato.

Kundër peshës së tepërt

Avokadot janë të pasura në fibra dhe do t’ju ndihmojnë të ndiheni më të ngopur më të gjatë, potencialisht duke ndihmuar me humbjen e peshës.

Fibra e lartë ndihmon shëndetin metabolik dhe stabilizon sheqerin në gjak.

Për shëndetin e sistemit tretës

Avokado pastron zorrët, duke lehtësuar frymën e keqe të gojës

Për lëkurë të re

Vaji i avokados ushqen në masë të madhe lëkurën dhe është një trajtim i dobishëm kundër psoriazës dhe acarimeve të tjera të lëkurës.

Për më shumë imunitet

Avokado përmban 18 nga 22 aminoacidet e nevojshme për trupin e njeriut.

Rrjedhimisht ky frut është një mënyrë e mirë për të fuqizuar sistemin imunitar. Mjafton të konsumoni gjysëm ose një avokado në ditë dhe ndihmoni fort shëndetin.

Avokado bëhet më i fuqishëm nëse kombinohet me fruta të pasura me vitaminë C, siç janë limoni, agrumet dhe ananasi./AgroWeb.org

* Ky informacion ka për qëllim të plotësojë, të mos zëvendësojë këshilla nga mjeku juaj ose ofruesi i kujdesit shëndetësor dhe nuk ka për qëllim të mbulojë të gjitha përdorimet e mundshme, masat paraprake, ndërveprimet ose efektet negative. Ky informacion mund të mos i përshtatet rrethanave tuaja specifike shëndetësore.

Burimi: U.S. National Library of Medicine

Hudhra e Egër – Shëruesja e Plotfuqishme

Vlerat shëruese të hudhrës së egër janë thuajse të panjohura, ndonëse çdo ekspert i mjekësisë alternative e rekomandon këtë barishte pa asnjë dyshim.

Të dhënat e specialistëve të kontaktuar nga AgroWeb.org tregojnë se hudhra e egër është përdorur prej shumë vitesh në mjekësinë popullore për pastrimin e sistemit tretës, mëlçisë dhe gjakut.

Bima e hudhrës së egër (lat. Allium ursinum), apo lerthi, rritet në zonat malore, kryesisht në pyje, por së fundmi shumë njerëz po e mbjellin në kopshtet e tyre. Kjo bimë karakterizohet nga aroma e fortë dhe shija therëse.

Në Shqipëri, hudhra e egër rritet në gjendje të egër por është shumë e rrallë dhe vetëm rastësia mund t’i çojë mbledhësit tek kjo bimë.

Por kohët e fundit disa ferma kanë nisur ta kultivojnë me pakicë duke kombinuar farat e importit dhe hudhrat e egra dhe kanë arritur edhe të shesin sasitë e para me pakicë në restorantet që ia dinë vlerën.

Hudhra e egër është ndër bimët më të preferuara të shefave të kuzhinës, siç është Rene Rexhepi, i cili e përdor hudhrën e egër në recetat e tij unike në restorantin e ri Noma në Meksikë.

Bima e famshme mblidhet nga marsi në maj. Nëse e përdorni për motive mjekësore, këshillohet ta mblidhini në pranverë përpara se të lulëzojë plotësisht.

Gjithashtu këshillohet që të mblidhni gjithnjë pjesën më të freskët të bimës mbi tokë.

Nga prilli deri në qershor, mund të përdorni pjesën e zhardhokut të hudhrës së egër dhe gjethet e njoma. Zhardhoku që do të përdoret në recetat mjekësore duhet të këputet në muajin gusht.

Vlerat shëruese të hudhrës së egër

Hudhra e egër është e pasur me minerale dhe vitaminë C. Rrjedhimisht ajo ofron zgjidhje ndaj disa problemeve shëndetësore. Gjethet përmbajnë më shumë vitaminë C se zhardhoku, ndaj njerëzit përdorin më shumë gjethet e pasura me këtë vitaminë.

1. Hudhra e egër kundër kolesterolit dhe tensionit të gjakut – këshillohet konsumi i gjetheve të njoma për shkak të pranisë së madhe të mineraleve të dobishme.

2. Kundër inflamacionit dhe infeksioneve – Konsumi i hudhrës së egër të freskët ndihmon kundër parazitëve intestinalë, por edhe kundër bronshitit sepse pastron rrugët e frymëmarrjes dhe zbeh kollën.

3. Kundër ulçerës në stomak dhe gastritit – Hudhra e egër rekomandohet për njerëzit që vuajnë nga ulçera në stomak. Ajo ka tendencën ta qetësojë stomakun dhe të ulë dhimbjet.

4. I bën mirë zemrës – Kjo bimë ka aftësinë të përhapet në enët e gjakut, duke i bërë ato më elastike, rrjedhimisht duke ndihmuar zemrën.

Hudhra e egër parandalon atakun në zemër. Ajo e forcon këtë organ të rëndësishëm dhe rigjallëron muskujt.

5. Pastron organizmin – Vetitë shëruese të hudhrës së egër janë efikase për pastrimin e organizmit nga toksinat. Hudhra e egër pastron mëlçinë, veshkat, zorrët dhe tëmthin.

Gjitashtu hudhra e egër lufton infeksionet urinare, shmang gazrat dhe fryrjet, përmirëson tretjen. Ajo parandalon osteoporozën dhe është ideale kundër reumatizmës dhe artritit./AgroWeb.org

Vezët, Të Skuqura Apo Të Ziera – Vlerat Ballë Për Ballë

Veza është një ushqim i pasur në ushqyes që gjen përdorim të larmishëm në kuzhinat tona.

Vezët mund t’i ziejmë, t’i skuqim, t’i rrahim e t’i përdorim në gatime të ëmbla, të kripura, e të ndërmjetme.

Kur vjen puna tek vlerat shëndetësore duhet të zgjedhim mënyrën më të mirë të servirjes së vezës.

Njerëzit janë të ndarë kryesisht në dy fronte: ata që e duan të zier  dhe ata që e duan të skuqur.

Vezët përmbajnë shumë proteina, ndaj ato janë më të preferuarat nga atletët dhe sportistët.

Vezët janë një burim i mirë i vitaminës A, hekurit, seleniumit dhe proteinës.

Mënyra e gatimit të vezës ka shumë rëndësi në përthithjen e ushqyesve dhe vlerave ushqimore.

Ndryshimi mes vezës së skuqur dhe të zier

Kaloritë dhe përmbajtja e yndyrës

Një vezë e zier fort përmban 77 kalori ndërsa një vezë e skuqur ka 90 kalori.

Një vezë e zier fort ofron 5 gramë yndyrna, 2 prej të cilave janë të ngopura.

Një vezë e skuqur ofron 7 gramë yndyrna 2 prej të cilave janë të ngopura.

Megjithatë në rastin e kësaj të fundit, nëse përdorni gjalpë, përmbajtja e yndyrnave rritet dhe po kështu kolesteroli.

Vlerat ushqyese

Zierja dhe skuqja e vezës e pajis organizmin me 6 gramë proteinë.

Si e skuqur, si e zier, veza të ofron 2-3 përqind të dozës ditore të kalçiumit dhe 10 përqind të fosforit, dy minerale të rëndësishme për shëndetin e kockave.

Për më tepër, sido ta gatuani, veza ofron 22 përqind të dozës së rekomanduar ditore të seleniumit që shërben si antioksidant.

Një vezë në ditë ofron 0.56 mikrogramë nga 2.4 mikrogramët e vitaminës B12 që duhet të konsumoni çdo ditë.

Ky ushqyes luan një rol kryesor në sistemin qendror dhe është thelbësor për formimin e qelizave të kuqe të gjakut.

Shqetësimi i vetëm në krahasimin mes të dy llojeve të gatimit të vezës qëndron tek kolesteroli.

Veza përmban 210 miligramë kolesterol. Zierja konsiderohet mënyra më e sigurt për gatim sepse yndyrnat që përdorni në skuqje rrisin kolesterolin në organizëm.

Ekspertët thonë se  vezët janë të mira për shëndetin dhe një i rritur mund të hajë një vezë në ditë pa u shqetësuar shumë për kolesterolin.

Sipas të dhënave shkencore, ngrënia e vezës në mëngjes si pjesë e një regjimi të kujdesshëm shëndetsor mund t’ju ndihmojë të humbisni në peshë.

Këshilla për vezët e ziera.

Vezën e zier mund ta kombinonin në sallatat me spinaq, patate, pulë apo peshk si një element i domosdoshëm i ushqyerjes së shëndetshme./AgroWeb.org

Urthi i Natës, Shkaktarët dhe Zgjidhja e Ankthit Përvëlues

Ndjesia e një vale djegëse që të përshkron kraharorin është gjithnjë e pakëndshme. Po flasim për urthin, që mesa duket ka tendencën të përkeqësohet gjatë përpjekjeve për të fjetur.

A e keni pyetur veten përse urthi ndizet në mbrëmje?  Nëse jeni ulur ose jeni në këmbë, graviteti ndihmon në lëvizjen e ushqimit nëpërmjet ezofagut dhe në stomak ku do të tretet.

Por kur jeni shtrirë, graviteti nuk ju vjen në ndihmë dhe nuk përshpejton kalimin e ushqimit, lëngjeve apo acideve nëpërmjet ezofagut. Një ngecje e tillë i hap rrugë shfaqjes së urthit.

Përjetimet e urthit janë të ndryshme dhe variojnë në njerëz të ndryshëm. Shumica e njerëzve përballen me urthin dhe simptomat e tij gjatë ditës, ndërsa të tjerë gjatë natës, kur është edhe më e vështirë për ta mbajtur nën kontroll.

Çfarë e shkakton ndjesinë e djegies?

Kur ushqeheni, ushqimi kalon nga fyti në ezofag dhe direkt e në stomak. Hyrja e ushqimit nga ezofagu në stomak kontrollohet nga një muskul specifik në pjesën e poshtme të ezofagut.

Ky muskul zakonisht qëndron i mbyllur, përveç se në rastet kur ju përtypni ushqim.

Kur ky muskul nuk mbyllet pasi ushqimi ka kaluar në stomak, acidet e stomakut ngjiten lart në ezofag. Mjekët e përshkruajnë këtë lëvizje për së mbrapshti si refluks.

Të dhënat tregojnë se një në dhjetë të rritur vuan nga urthi të paktën një herë në javë dhe një në tre të rritur e përjetojnë atë një herë në muaj. Sipas shkencëtarëve 10 deri në 20 përqind e të rriturve vuajnë nga urthi kronik.

Pozicionet më të mira të gjumit kundër urthit

Mjekët rekomandojnë që të përdorni një jastëk të veçantë, që do ju lejojë të qëndroni shtrirë në anën e majtë me kokën të ngritur lehtas.

Shtrirja në anën e majtë lejon acidet të kalojnë nëpërmjet ezofagut të poshtëm drejt e në stomak, ndërsa koka në një pozicion të ngritur lejon gravitetin të kryejë punën e tij.

Një studim mbi një numër pacientësh që vuanin nga urthi i natës, pavarësisht medikamenteve të marra, tregoi se intensiteti i urthit të natës zbutej me 70 përqind pas përdorimit të jastëkut për mbështetje gjatë gjumit në anën e majtë.

Këshilla kundër urthit të natës

AgroWeb.org ju këshillon të ndërmerrni disa hapa për të pakësuar shfaqjen e urthit gjatë natës.

Humbni në peshë.  Njerëzit që janë mbipeshë janë më të rrezikuar nga urthi.

Hiqni dorë nga duhani. Studimet shkencore kanë treguar se lënia e duhanit ju vjen në ndihmë kundër urthit.

Kafshata të vogla Hani kafshata të vogla të ushqimeve, konsumoni më pak yndyrna, veçanërisht pas mesditës.

Njerëzit që vuajnë nga urthi kronik duhet të konsumojnë një vakt me më pak se 500 kalori dhe 20 gramë yndyrna.

Pas ngrënies, prisni të paktën dy – tre orë përpara se të flini./AgroWeb.org

Cilat Janë Vitaminat Jetike për 40 Vjeçarët

Çfarë të vjen ndërmend kur lexon për vitaminat?

AgroWeb.org ju rekomandon t’i perceptoni ato si një ushtri të mirëfilltë ushqyesish që mbrojnë organizmin nga simptomat më të këqija të plakjes.

Një regjim i mirë ushqimor është thelbësor në çdo moshë, por bëhet shumë i rëndësishëm pas moshës 40 vjeçare kur ‘rregullat e lojës’ ndryshojnë tërësisht.

Trupi nuk funksionon njësoj pas moshës 40 vjeç. Shtimi në peshë, sëmundjet e zemrës, diabeti dhe sëmundje të tjera kronike e kanë organizmin në shënjestër.

Një nga mënyrat më të mira për të qenë të shëndetshëm është të merrni vitaminat dhe ushqyesit e duhur dhe jo vetëm nga ushqimet por edhe suplementët.

Lista e Vitaminave 

Më poshtë do të lexoni për vitaminat më të rëndësishme që nuk duhet të mungojnë në regjimin tuaj ditor pas moshës 40 vjeçare.

Vitamina B12

Kur mbush 40 vjeç dhe i afrohesh të pesëdhjetave, vitamina B12 nuk duhet të mungojë.

Ajo është thelbësore për gjakun dhe trurin.

Kjo vitaminë gjendet tek produktet shtazore, të bulmetit dhe vezët, por suplementët janë të nevojshëm sepse me kalimin e moshës përthithja bëhet më e vështirë.

Merrni suplementë në sasinë 2.4 mg në ditë.

Kalçium

Kockat e njeriut përthithin shumicën e kalçiumit përpara moshës 30 vjeçare, por ky ushqyes luan një rol thelbësor në mirëmbajtjen e kockave gjatë gjithë jetës.

Ajo është e dobishme për funksionin e nervave, muskujve, zemrës dhe shumë reagimeve biokimike.

Nëse nuk merrni mjaftueshëm nga kjo vitaminë, atëherë organizmi e merr atë nga kockat dhe rrjedhimisht i dobëson ato.

Është e rëndësishme të mos e teproni me kalçiumin sepse mund të dëmtojë zemrën.

Personat e moshave 40-50 vjeç kanë nevojë për 1,000 mg kalçium në ditë.

Gratë mbi 50 vjeç  duhet të konsumojnë 1,200 mg në ditë.

Vitamina D

Vitamina D është e rëndësishme pas të dyzetave.

Mungesa e saj ka lidhje me diabetin, sëmundjet e zemrës, sklerozën, kancerin e gjirit dhe zorrës.

Vitamina D është e nevojshme edhe për përthithjen e kalçiumit.

Dielli është burimi më i mirë i kësaj vitamine por edhe suplementët.

Magnezi

Magnezi është i dobishëm për të rregulluar tensionin e gjakut, një aspekt i rëndësishëm për 40 vjeçarët të cilët pas këtij pragu janë më të rrezikuara nga tensioni i lartë i gjakut.

Mungesa e magnezit shkakton sëmundjet e zemrës, diabetin dhe inflamacion.

Nëse ushqeheni shëndetshëm, duhet të merrni të paktën 320 mg magnez në ditë.

Magnezi gjendet tek barishtet, bishtajoret, arrorët, farat dhe avokado.

Kujdes! Nëse e teproni me magnezin do të vuani nga diarea dhe të përzierat.

Kaliumi

Kaliumi luan një rol kryesor për mbajtjen e tensionit të gjakut.

Kaliumi ul rrezikun e goditjeve në tru.

Mjekët rekomandojnë të paktën 2 gramë kalium në ditë, në rastet që nuk vuani nga ndonjë sëmundje specifike.

Nëse e teproni me kalium atëherë duhet të tregoni kujdes sepse teprica e këtij minerali dëmton sistemin tretës dhe zemrën.

Kaliumi gjendet tek banania, patatja e ëmbël, fasulet dhe thjerëzat.

Omega-3

Nuk janë vitamina, por acidet yndyrore janë të rëndësishme për të kundërvepruar ndaj ndryshimeve negative në organizëm që vijnë si pasojë e moshës.

Studimet kanë konfirmuar se acidet yndyrore ulin tensionin e gjakut dhe kolesterolin e keq.

Këto acide mbrojnë zemrën dhe trurin.

Acidet yndyrore mund t’i gjeni tek peshku, arrat, farat e linit, barishtet e të tjerë. Suplementët janë të dobishëm gjithashtu.

Përpiquni të konsumoni të paktën 500 mg të këtyre acideve në ditë nëse jeni të shëndetshëm, 800 deri në 1,000 mg në ditë nëse vuani nga sëmundjet e zemrës dhe 2000 deri në 4,000 mg në ditë nëse keni nivel të lartë trigliceridesh.

Nëse jeni duke marrë ilaçe për hollimin e gjakut, konsultohuni me mjekun për dozën e saktë të acideve yndyrore.

Probiotikët

Probiotikët nuk janë as vitamina as minerale por janë të nevojshme për personat mbi 40 vjeç.

Probiotikët e mbajnë stomakun të shëndetshëm dhe ulin rrezikun e sëmundjeve të zemrës, goditjeve në tru dhe diabetit.

Probiotikët janë të dobishëm pas moshës 40 vjeçare kur masa muskulore tkurret dhe tendenca për të shtuar në peshë është më e madhe.

Probiotikët janë kultura të gjalla që gjenden kryesisht tek produktet e bulmetit siç është kosi./AgroWeb.org

 

Mjalti dhe Qepa – Zbuloni Ndikimet Për Shëndetin

Mjaltë dhe Qepë, formula ideale

Qepa është një nga perimet më të lashta të kultivuara nga njerëzimi.

Ajo konsiderohet një thesar për shkak të vlerave fantastike kundër baktereve dhe mykut.

Analizat shkencore kanë provuar se qepa ka efekt të jashtëzakonshëm kundër mikrobeve.

Kjo sepse ajo është e pasur me flavonoidë, polifenolë, sulfur organik, saponinë dhe shumë substanca të tjera të vlefshme mjekësore.

Mjalti nga ana tjetër lufton mikrobet, falë përmbajtjes së pasur të fenolit, acideve yndyrore, lipideve, acidit askorbik, fruktozës.

Po ashtu edhe potencialit të lartë osmotik dhe pehashit të ulët.

Të dyja së bashku kanë vlera të shkëlqyera dhe zgjerojnë aftësitë mbrojtjëse të imunitetit kundër infeksioneve bakteriale.

Substancat e spikatura të qepës dhe mjaltit mund të funksionojnë mjaft mirë veçmas, por mbi të gjitha së bashku, duke shkatërruar të gjithë mikroorganizmat e dëmshëm.

Mjalti në bashkëpunim me qepën munden të tejzgjasin ose përmirësojnë funksionet e njëra-tjetrës.

Nëse do të konsumonit qepën dhe mjaltin së bashku do të përfitoni më shumë substanca anti-bakteriale të cilat janë të nevojshme për sistemin imunitar.

Nëse i konsumoni të ndara, substancat anti-bakteriale do të jenë më të pakëta në sasi dhe në fuqi.

Rezultatet e studimeve tregojnë të dhëna mjaft interesante

Lëngu i qepës në nivele të përqendruara ka një ndikim të fortë kundër rritjes së disa llojeve të mikrobeve, përfshirë mikrobin më të ndjeshëm siç është Stafilokoku.

Mjalti nga ana tjetër në nivele të përqendruara ka një ndikim të fortë kundër rritjes së të gjitha llojeve të mikrobeve, por më pak se lëngu i qepës.

Përzierja e të dy lëngjeve në sasi të barabarta por në nivele të ndryshme përqendrimi tregoi një ndikim të dukshëm në të gjitha speciet e mikrobeve të analizuara.

Rezultatet e analizave treguan se bashkimi e qepës dhe mjaltit ishte ndjeshëm më efektive dhe më e fortë kundër mikroorganizmave të dëmshëm në krahasim me punën e tyre të ndarë.

Mjaltë dhe Qepë, formula ideale

Shkencëtarët përdorën qepë të freskëta të shpëlara mirë me ujë.

Më pas qepët u bënë pelte, e cila u ruajt për 24 orë. Lëngu u filtrua dhe u përzie me mjaltin në sasi të barabarta.

E gjithë masa u ruajt në frigorifer.

Sasia e përdorur në studim ishte 2 lugë gjelle çdo 8 orë.

Me konsumin e këtij lëngu u vu re një përmirësim shumë i ndjeshëm i simptomave të studiuara./AgroWeb.org

Frutat Që Të Shëndoshin- Cilat Kanë Më Shumë Kalori?

Frutat i bëjnë shumë mirë organizmit dhe shëndetit.

Kjo vështirë të mohohet apo kundërshtohet.

Frutat përmbajnë shumë minerale, vitamina, antioksidantë dhe fibër.

Kjo pasuri vlerash është arsyeja përse shkencëtarët insistojnë se rritja e konsumit të frutave dhe perimeve mund të përgjysmojë rrezikun e vdekjes së parakohshme nga sëmundjet kronike.

Ndaj ju duhet të hani shumë fruta, ama nëse po përpiqeni të humbni në peshë, ngrënia e panumërt e frutave do të ketë një efekt negativ.

E vërteta është se frutat përmbajnë kalori dhe sheqerna natyralë, ndaj nuk duhet të konsumoni më shumë se dy racione në ditë.

Frutat mund t’i konsumoni në vend të ëmbëlsirave ose për të shuar nepsin për sheqer, thonë ekspertët.

Sipas tyre, njerëzit nuk duhet të kenë frikë nga frutat, por thjesht të përkujdesen për racionet.

Frutat si avokado, arra e kokosit, frutat e thata dhe lëngjet e frutave kanë kalori.

Frutat e pyllit përmbajnë shumë pak kalori dhe fibër duke ju mbajtur të ngopur për shumë kohë.

Më poshtë do të gjeni nga AgroWeb.org listën e plotë të frutave që shoqërohen me shumë kalori, pavarësisht vlerave ushqimore.

Avokado

Një avokado e vetme përmban 322 kalori.

Megjithatë ky frut është shumë i mirë për zemrën sepse përmban yndyrna mono-të-pangopura.

Një avokado përmban 30 gramë nga këto yndyrna.

Rrjedhimisht ju këshillojmë të hani gjysëm avokadoje në ditë.

Përpos yndyrnave, avokado përmban edhe fibër që është shumë e mirë për tretjen.

Fiqtë

Pesë fiq të vegjël përmbajnë 150 kalori

Fiqtë janë shumë të ëmbël dhe një kokërr përmban 7 gram sheqer.

Megjithatë, bashkë me sheqerin përfitoni vitaminën K dhe manganin.

Hurmat e Arabisë

100 gramë me hurma Arabie përmbajnë 277 kalori.

30 gramë hurma ofrojnë 25 gramë sheqerna natyralë.

Megjithatë mos u shqetësoni sepse hurmat e Arabisë janë një burim shumë i mirë fibre.

Arra e kokosit

Një filxhan me grimca të arrës së kokosit përmban 466 kalori.

Ky frut tropikal përmban yndyrna të mira që ju ngopin.

Rrushi i thatë 

Një filxhan me rrush të thatë përmban 429 kalori.

Këto fruta janë në vetvete një burim i përqendruar sheqeri.

Një filxhan me rrush të freskët përmban 62 kalori, ndaj zgjidhja është e juaja.

Bananja

Një banane e madhe përmban 121 kalori.

Bananet ofrojnë shumë ushqyes të mirë e të dobishëm për zemrën siç është kaliumi dhe vitamina C.

Ndaj ju këshillojmë që të konsumoni banane të vogla për më pak kalori.

Kumbullat e thata

Një filxhan me kumbulla të thata përmban 418 kalori.

Kumbullat e thata ashtu si edhe rrushtë e thatë përmbajnë sasi të larta sheqeri dhe kalorish në krahasim me kumbullat dhe rrushtë e freskët.

Megjithatë, ato përmbajnë shumë fibër që përmirëson përpjekjet tuaja për të humbur në peshë./AgroWeb.org

Qumështi i Bletës – Shëruesi Magjik i Shumë Sëmundjeve

Përdorimi i qumështit të Bletës po njeh një zgjerim të konsiderueshëm në tregun shqiptar.

Çdo pikë qumështi i bletës është jetë. Vlerësohet si nektari i perëndive për nga vlerat e jashtëzakonshme shëruese që ka për shëndetin.

I njohur ndryshe me emrin “Xhelatina Mbretërore” qumështi i bletës është ndër më të kërkuarit në botë. Sot ai është shndërruar në një biznes fitimprurës për bletarët shqiptarë krahas prodhimit të mjaltit.

Sipas të dhënave të AgroWeb.org, vitet e fundit, qumështi i Bletës po njeh një zgjerim të konsiderueshëm në tregun shqiptar.

Ashtu si në çdo vend të botës ai shitet në sasi shumë të kufizuar ndaj dhe vlera e tij përherë e më shumë bëhet më e shtrenjtë. Ai ambalazhohet në minishishe qelqi dhe shitet në gramatura shumë të vogla.

Sipas të dhënave të AgroWeb.org çmimi mesatar për vetëm një gram qumështi të bletës shkon deri në 1 mijë lekë (të reja).

Nisur për nga vlera e lartë dhe fitimprurëse, bletarët shqiptarë kanë fokusuar biznesin e tyre prej disa vitesh edhe në shitjen e qumështit të bletës ndërsa e vlerësojnë këtë mënyrë biznesi edhe më fitimprurës se sa shitja e mjaltit.

Kërkesa për qumështin e bletës në rritje

Bletarët shprehen për AgroWeb.org se kërkesa për qumështin e bletës është gjithnjë në rritje ndaj dhe ata janë duke i kushtuar vëmendje përherë e më të lartë nxjerrjes së këtij qumështi të artë.

Vjelja e qumështit të bletës kërkon një mjeshtëri të posaçme pasi i gjithë procesi është shumë delikat.

Qumështi i bletës që prodhohet nga gjëndrat e bletëve punëtore shërben për të ushqyer larvat gjatë tri ditëve të para si dhe për të ushqyer mbretëreshën.

Ky ushqim e mban mbretëreshën në jetë për 8 vjet, një fakt interesant ky, duke ditur që një bletë e zakonshme, e cila ka lindur nga e njëjta vezë me mbretëreshën, jeton vetëm 21 ditë.

Qumështi i bletës ka ngjyrë të bardhë në të verdhë, është si krem, ka shije të thartë dhe pak aromë.

Vlerat kurative për shëndetin

Vlerësohet si një super ushqim i fuqishëm për shkak të vlerave që ai mbart. Qumështi i Bletës përmban ujë, lëndë minerale, yndyrna, proteina, karbohidrate, vitamina etj.

Ai mund të përdoret për kurimin e një sërë sëmundjesh si: Hipertiroidisem, Diabeti, Hiperkolesterolemi, hipertrigliceridemi (kolesterol dhe trigliceride të larta), sëmundje të zemrës dhe enëve të gjakut, sëmundje kronike të mushkërive, sëmundje të gojës, probleme me mishrat e dhëmbëve, probleme të fytit, sëmundje të veshkave, artrite reumatoide, probleme me riprodhimin, ndihmon në periudhat e premenopauzës etj

Ai rekomandohet që të përdoret herët në mëngjes duke e marrë nën gjuhë. Kjo pasi aty ka mjaft enë gjaku që bëjnë thithjen e menjëhershme dhe kalimin në gjak.

Zgjatja e kurimit është e ndryshme dhe varet nga shkalla e sëmundjes ose qëllimi për të cilin përdoret, por asnjëhere më pak se një muaj.

Ka efekt qetësues dhe çlodhës, ul nivelin e hormoneve të tiroides. Ai është një pastrues fantastik për organizmin nga toksinat.

Ndihmon funksionimin e veshkave, rrit jetëgjatësinë e njerëzve, duke ruajtur rininë e enëve të gjakut. Zgjeron enët e gjakut, ndihmon në uljen e kolesterolit dhe triglicerideve dhe rrit imunitetin.

Ky qumësht ndihmon në formimin e rruazave të kuqe të gjakut, këshillohet në anemi dhe ndihmon në mikrohemorragji. Në lëkurë, rregullon prodhimin e yndyrës.

Përdoret në kozmetikë, sepse ndihmon në pastrimin dhe rinimin e lëkurës. Përdoret si agjent antibakterial dhe antivirusal lokal për probleme të ndryshme të lëkurës. Te fëmijët e sapolindur ndihmon në rritjen në peshë.

Qumështi i bletës, nxit gjëndrat riprodhuese, ndihmon prodhimin e vezoreve, gjatë shtatzanisë, duke rritur nivelin e progesteronit në gjak.

Rrit nivelin e testosteronit në gjak, duke ndihmuar në problemet e potencës mashkullore. Stimulon gjëndrat mbiveshkore dhe ndihmon në sëmundje si artriti ose lodhja kronike.

Ndihmon në funksionimin e mëlçisë dhe sëmundjet e saj, hepatite dhe rigjeneron strukturën e mëlçisë.

Rekomandohet që kura duhet të zgjasë një muaj, maksimumi tre muaj, ndërkohë që dozat kurative duhet të ndërmerren sipas specifikimeve përkatëse.

Vlerësohet se asnjë ilaç nuk mund të zëvendësojë vlerat kurative të Qumështit të Bletëve./AgroWeb.org

Vlerat e Rralla të Hurmave Arabike – Zbulojini Përmes Pamjeve

Edhe pse me origjinë orientale, hurmat e Arabisë janë shumë të kërkuara në Shqipëri, me një konsum të gjerë dhe me çmime jo të larta.

Hurmat e Arabisë, të freskëta apo të thata janë një prej frutave më të lashta në historinë njerëzore. Hurmat janë të pasura me vitamina, minerale, amino acide, acide yndyrore etj.

Ato nuk janë vetëm një burim i jashtëzakonshëm energjie, por ofrojnë qetësim nga shumë simptoma si çrregullimet intestinale, problemet me zemrën, anemia, çrregullimet seksuale, diarea, e shumë të tjera.

Vlerat më të mira shëndetësore të Hurmave të Arabisë

Hurmat e Arabisë janë të mira edhe për ata që duan të shtojnë në peshë.

Këto fruta të shijshme përmbajnë vaj, kalcium, hekur, kalium, fosfor, mangan, baker, magnez, sulfur të cilat e ndihmojnë organizmin të funksiojë më mirë.

Kur trupi nis e përthith vlerat ushqimore të hurmave, ndjesia e urisë nis të shuhet.

Sistemi nervor: Sistemi nervor përfiton nga hurmat për shkak të nivelit të lartë të kaliumit në to.

Shëndeti kardiovaskular: Hurmat e mbajnë zemrën të shëndetshme. Nëse i fusni në ujë gjatë natës dhe i shtypni lehtë në mëngjes para konsumimit do t’i jepni zemrës forcë. Hurmat ulin rrezikun e atakut në zemër duke zvogëluar nivelet e kolesterolit në gjak. Mjafton të konsumoni hurma dy herë në javë për një zemër të shëndetshme.

Plot energji: Mjafton vetëm gjysëm ore pas konsumimit të hurmave dhe do të ndiheni energjikë. Për shkak të nivelit të lartë të mineraleve, hurmat janë perfekte për njerëzit që vuajnë nga anemia. Ato janë plot hekur dhe si rrjedhojë pacientët përfitojnë energji dhe forcë dhe më pak lodhje e dobësi.

Një kilogram hurma përmban 3000 kalori. Kaloritë e hurmave janë në fakt të mjaftueshme për të plotësuar nevojat ditore të organizmit.

Sistemi i tretjes: Kripërat mineralet që gjenden tek hurmat e Arabisë ofrojnë forcë për kockat dhe luftojnë simptomat e dhimbshme të sëmundjeve kockore dhe kurojnë një sërë problemesh të sistemit të tretjes.

Alergjitë e Stinës: Një tjetër fakt interesant është që hurmat e Arabisë kanë në përmbajtjen e tyre sulfur organik. Ky nuk është një element i zakonshëm që mund të gjendet lehtë tek ushqimet e tjera. Por ky element lufton reagimet alergjike dhe alergjitë e stinës.

Normalisht nuk ju këshillojmë të hani vetëm hurma. Por nëse jeni të dobët dhe të hollë, dëshironi të vini muskuj, apo edhe dëshironi të jeni energjik pas një sëmundje mjekësore, atëherë hani hurma të tilla.

Kujdes! Përveç vlerave të jashtëzakonshme, duhet të kini kujdes. Duke qenë se sipërfaqja e hurmave është e e lëmuar dhe e lagësht ato mbajnë shumë papastërti. Duhet t’i lani patjetër përpara se t’i konsumoni./AgroWeb.org

Kivi – Zbuloni Ndikimin e Fortë në Organizëm

Fruti i kivit është i pasur me ushqyes dhe ka pak kalori, madje së fundmi, kivi po kultivohet edhe në Shqipëri.

Në vendin tonë kivi ka qenë pothuajse i panjohur si frut për konsumatorët deri pas viteve ’90.

E vërteta është se disa pemë të kivit janë mbjellur gjatë viteve 70’ në kopshtin eksperimental të Institutit të Kërkimeve Bujqësore në Lushnjë.

Mënyrat se si kivi i vjen në ndihmë organizmit tonë janë të panumërta.

Kivi është një super frut dhe kjo i atribuohet përmbajtjes së lartë të vitaminës C, kaliumit dhe bakrit, të cilat janë të dobishme dhe të pazëvëndësueshme për shëndetin tonë.

Lexuesit e AgroWeb.org e dinë tashmë që vitamina C ka aftësi të stimulojë jo vetëm funksionin por edhe prodhimin e qelizave të bardha të gjakut (leukocitet) të cilat janë pjesë e sistemit tonë imunitar dhe në veçanti të neutrofilit që shkatërron substancat, viruset dhe bakteret që shkaktojnë sëmundje.

Cilat janë vlerat shëndetësore të vitaminës C?

Vitamina C rrit nivelet e antitrupave, proteina të prodhuara nga qelizat e bardha të gjakut.

Vitamina C ndihmon edhe në parandalimin e trombozës.

Nëse konsumoni dy kivi në ditë, atëherë do të përfitoni 259/mg vitaminë C. Kjo dozë e nevojshme e vitaminës C, jo vetëm që do të ulë tensionin e gjakut, por edhe do të shmangë sëmundjet e zemrës dhe do t’i japë lëkurës tonalitet dhe gjallëri.

Qeniet njerëzore kanë nevojë për vitaminën C që të rrisin natyralisht nivelet e gjakut të plotë (pa përfshirë këtu plazmën), të pastrojnë gjakun dhe të rigjallërojnë zemrën dhe arteriet.

Fruti i kivit ka një nga sasitë më të larta të vitaminës C që gjenden në një frut.

Vlerat e kaliumit

Çdo frut është i pasur me kalium, një elektrolit dhe mineral thelbësor.

Në organizëm gjendet një sasi e vogël enzimash që kanë nevojë për kalium që të funksionojnë siç duhet.

Enzimat janë të domosdoshme dhe të rëndësishme për ruajtjen e niveleve të rregullta të kimisë së qelizave në trup.

Parandalimi i sëmundjeve kronike kërkon nivele të rregullta dhe të rregulluara të kaliumit.

Ky mineral ndihmon në parandalimin e disa sëmundjeve të kohëve moderne siç janë:

• Osteoporoza
• Goditjet në tru
• Tensioni i lartë i gjakut
• Gurët në veshka

Vlerat e bakrit që gjendet tek Kivi

Marrja e bakrit nëpërmjet ushqimeve është e rëndësishme për formimin e qelizave të kuqe të gjakut dhe përthithjen e hekurit.

Hekuri mbështet transportin e oksigjenit, funksionet biologjike dhe prodhimin e energjisë.

Pamjaftueshmëria e hekurit është një nga simptomat që prek shumë njerëz në mbarë botën. Kjo simptomë shkakton anemi.

Fruti i kivit ka një përqindje të lartë bakri dhe konsumi ditor i këtij fruti është i rekomandueshëm për përthithjen e një sasie të domosdoshme të bakrit në sistemin tonë endokrin.

Cilat janë vlerat e tjera të shtuara nga konsumi ditor i kivit?

Një ritual i pasur dhe i shëndetshëm ushqimor që përfshin kivin do të ndihmojë për:
1. Gjumë të mirë dhe të qetë
2. Rritjen e niveleve të kolagjenit në lëkurë
3. Uljen e rreziqeve të sëmundjeve të zemrës
4. Ekuilibrimin dhe rregullimin e funksionit të zorrëve
5. Pastrimin e mëlçisë
6. Rikthimin e energjisë, duke ju ndihmuar të ndiheni të gjallëruar, të rifreskuar dhe plot dëshirë për jetën.

Mënyrat për konsumimin e kivit janë të panumërta dhe përfshijnë: lëngjet, kombinimet me perimet, sallatat dhe shumë të tjera./AgroWeb.org

Përse Rëndon Koka Kur Nuk Pini Kafe Në Mëngjes

Është zakoni i secilit prej nesh sapo ngrihemi në mëngjes. Mund të shmangim me siguri vaktin e mëngjesit por kurrësesi kafen.

Pothuajse të gjithë ata që konsumojnë kafe rregullisht janë të varur prej saj.

Sigurisht, ajo është e shijshme. Në mëngjes, ajo është zgjimi i vërtetë pavarësisht sa herët mund të jesh ngritur nga shtrati.

Megjithatë, të gjithë ata që nuk pinë kafen e tyre rregullisht e dinë se pësojnë disa efekte të pakëndshme anësore gjatë ditës siç është specifikisht dhimbja e kokës.

Dhe vërtetë, duket sikur në një moment do të të plasë koka.

Zakonisht, ky fenomen është më i shpeshtë tek femrat por përgjithësisht i prek të gjithë.

Studimet shkencore tregojnë se ka një lidhje mes natyrës së varësisë së shkakton kafja dhe dhimbjes së kokës në momentin kur organizmi nuk merr “dozën” ditore të saj, siç është mësuar rregullisht.

Në momentin kur ju nisni të konsumoni kafen rregullisht, lehtësisht ju bëheni të varur prej saj.

Dhe nëse një ditë për arsye të ndryshme nuk arrini ta pini në kohë siç e konsumoni rregullisht sigurisht do ndiheni sikur nuk po funksiononi rregullisht.

Varësia dhe si ndikon kafja në organizëm

Nëse kafja ju bën të ndiheni më mirë, ju rrit përqëndrimin ka një shpjegim sa shkencor aq edhe mjekësor mbi efektet e njërës prej pijeve më të konsumuara në botë.

Por çfarë ndodh vërtetë kur ne konsumojmë kafe rregullisht?

Kafeina përcillet direkt receptorët e trurit duke vepruar kundër një neurotransmetuesi i quajtur adenozinë.

Kjo lloj lënde, pra adenozina ndikon që përgjithësisht ju të jeni të qetë.

Si rezultat, kur kafeina shkon në receptorët e trurit, ky i fundit nis të veprojë duke prodhuar edhe më shumë lëndën e adenozinës ndërsa lufton efektet stimuluese të kafeinës.

Pra, nëse për ndonjë arsye filloni të zvogëloni sasinë e kafeinës që normalisht merrni përditë trupi juaj do të prodhojë më shumë adenozinë, e për rrjedhojë ju do të ndiheni më të përgjumur dhe do të keni dhimbje koke.

Konkretisht, kafeina vepron si antagonist i receptorit të adenozinës.

Aktiviteti i sistemit nervor ngadalësohet kur adenozina lidhet me receptorët e saj, duke shkaktuar përgjumje. Kafeina e pengon këtë lidhshmëri.

Pra, sa më shumë kafeinë të merrni aq më shumë adneozinë truri do të prodhojë, dhe në momentin kur ju nuk do ta merrni dozën ditore të kafeinës, sasia e adenozinës së prodhuar do t’ju përgjumë duke ju shkaktuar dhimbje koke përgjatë gjithë ditës. /AgroWeb.org

Arnika – Tiparet befasuese të një bime të rrallë shqiptare

Arnika e Malit është një nga bimët më të vlefshme që na ka dhuruar natyra.

Ajo ka fuqinë të shërojë dhe kurojë shumë dhimbje trupore, lëndime dhe plagë të organizmit.

Përdorimet kryesore të arnikës së malit vërehen kundër të nxirave, enjtjeve, dhimbjeve, artritit dhe plagëve

Arnika e Malit, që ndryshe njihet si Duhani i Malit, është një bimë që i përket së njëjtës familje botanike si luledielli, madje lulja e saj është e madhe dhe me ngjyrë të verdhë.

Arnika e Malit gjendet kudo në Evropë dhe mbart emrin botanik Arnica Montana.

Arnika e Malit është gjithashtu edhe një tipar i veçantë i Alpeve Veriore shqiptare.

Banorët e zonave përreth e mbledhin rregullisht këtë bimë të rrallë mjekësore dhe e eksportojnë atë në tregjet perëndimore, të cilave nuk u mungon teknologjia për përfitimin e vlerave më të mëdha të kësaj bime.

Arnika e Malit është me të vërtetë një bimë e rrallë, pavarësisht se në vendin tonë rritet në gjendje të egër dhe ndeshet shpesh.

Megjithatë, shumë shtete të Evropës, veçanërisht asaj veriore kanë raportuar një ulje të ndjeshme të sasive të kësaj luleje të veçantë, duke i hapur rrugën eksporteve nga tregjet e reja.

Lulet e Duhanit të Malit këputen kur bima është rritur plotësisht. Ato duhen tharë dhe pastaj duhen të përdoren.

Rrënjët e bimës mblidhen, lahen dhe thahen me kujdes. Duhani i Malit është përdorur historikisht si një bimë mjekësore.

Në ditët e sotme, kjo bimë vjen tek konsumatori në formën e një xheli që aplikohet në lëkurë.

Në këtë formë, Arnika e Malit është një nga medikamentet më të përdorura të mjekësisë alternative, avantazhet e së cilës janë pikërisht tek origjina e kësaj bime të rrallë.

Nëse vuani nga artriti dhe përdorni xhelin me përqendrim 50 % të Arnikës së Malit, do të merrni të njëjtin efekt si të keni konsumuar 5% të ibuprofenit në formë xheli.

Evropa kërkon 50 tonë të Arnikës së Malit në vit. Kërkesa është e madhe, por nuk plotësohet dot, sepse kjo bimë është shumë e rrallë.

Vetitë e Arnikës së Malit

Largon dhimbjet

Arnika e Malit përbën një kurë natyrale kundër dhimbjeve. Ajo nuk i zbeh ato, por i largon tërësisht, duke stimuluar proceset shëruese të organizmit.

Arnika rekomandohet veçanërisht kundër dhimbjeve që vijnë si rezultat i traumave si rrëzimet ose inflamacioni siç është artriti.

Arnika e Malit ofron një alternativë të sigurt shëruese kundër dhimbjes pa efekte anësore të shkaktuara nga alternativat farmaceutike si ibuprofeni.

Ul enjtjet

Arnika e Malit është luftëtare fuqiplotë e inflamacionit. Ajo ul enjtjet dhe kuron edhe frakturat, ndrydhjet, shembjet e lëndime të tjera.

Shumë kirurgë e rekomandojnë Arnikën e Malit si një kurë natyrale kundër enjtjeve që ndodhin pas ndërhyrjeve kirurgjikale.

Kuron artritin

Arnika e Malit lehtëson dhimbjet nga artriti dhe ju ndihmon të lëvizni më lirisht.

Studimet kanë treguar që aplikimi i xhelit ose kremit të Arnikës së Malit në zonat e prekura nga artriti ndihmon ndjeshëm në krahasim me medikamentet.

Nëse këto të fundit kanë në përmbajtjen e tyre Arnikën e Malit, atëherë kanë më shumë sukses kundër artritit.

Shëron plagët

Arnika e Malit ndihmon në shërimin e shumë lëndimeve dhe plagëve.

Ajo kurrsesi nuk zëvëndëson kurat mjekësore, por ul dhimbjet e frakturave, nxirjeve, shembjeve, ndrydhjeve, ngërçeve etj.

Proçesi i shërimit është më i shpejtë në rast se përdorni Arnikën e Malit.

Përdorimi më popullor i Arnikës së Malit vjen në formën e xhelit që aplikohet në zonat e prekura. Arnika e Malit nuk konsumohet së brendshmi.

Arnika e Malit është një nga alternativat më popullore kundër dhimbjeve që përdoret në gjithë botën./AgroWeb.org

Shëndeti i Trurit – Si Ta Mbroni Me Ushqimet e Duhura

Mënyra se si ushqehemi ka një ndikim të jashtëzakonshëm në trurin dhe mirëqenien mendore.

Ajo çfarë hamë, mund të na dëmtojë, mund të na shërojë, ose mund të na ‘dhurojë’ edhe sklerozën.

Prej kohësh, shoqëria ku jetojmë i përmbahet idesë se ne ushqejmë trupin, duke harruar rolin e trurit në mendimet dhe veprimet tona.

Ditë pas dite, ushqimet që ne hamë shpërbëhen në ushqyes të cilët e gjejnë rrugën në gjak dhe më pas në tru.

Aty, këto ushqyes aktivizojnë reagimet qelizore, ushqejnë çdo ind dhe transformohen në shtresën mbrojtëse të trurit.

Ky i fundit është organi më i uritur në trup dhe konsumon 20 përqind të të gjithë energjisë së përftuar.

Nga ana tjetër, qelizat e trurit janë të pazëvëndësueshme në krahasim me qelizat e tjera të trupit që zëvëndësohen rregullisht.

Shumica e qelizave të trurit janë aty që nga lindja deri në vdekje.

Rrjedhimisht ato kanë nevojë për përkujdes dhe ushqyerjen e duhur.

Disa ushqime luajnë një rol mbrojtës për trurin, disa të tjerë janë shkatërrimtare për shëndetin mendor.

Cilat janë ushqimet që duhet të përfshini në regjimin tuaj ushqimor për një tru të shëndetshëm? Lexoni më poshtë të renditura nga AgroWeb.org.

Acidet yndyrore

Konsumoni më shumë peshk, salmon, sardele si disa nga burimet më të mira natyrale të këtyre acideve kaq të nevojshme për trurin.

Mos lini mënjanë farat e linit.

Glukoza

Truri ka shumë nevojë për glukozë dhe këtë duhet ta merrni nëpërmjet ushqimeve.

Bashkë me glukozën ju duhet fibër. Të dyja i gjeni tek panxhari, kivi, drithërat e plota, patatja e ëmbël, qepa e thatë dhe qepa e njomë.

Vitaminat dhe mineralet

Të gjitha vitaminat dhe mineralet siç janë seleniumi, hekuri, bakri, zinku dhe vitaminat A, C, E janë të shkëlqyera për trurin.

Konsumoni më shumë fruta pylli, portokalle, qitro dhe mollë.

Mos hiqni dorë nga brokoli, lakra, spinaqi, lulerradhiqja, qepët, karrotat, domatet apo kungulli.

Pjata juaj duhet të jetë shumëngjyrëshe si një ylber.

Vaji i ullirit ekstra i virgjër

Vaji i ullirit ekstra i virgjër është një produkt i domosdoshëm sepse është i pasur me antioksidantë, omega-3 dhe vitaminë E.

Kjo e fundit na mbron nga skleroza.

Studimet konfirmojnë se njerëzit që konsumojnë më shumë se 16 mg vitaminë E në ditë kanë 67% më pak rrezik nga skleroza.

Vitamina E në kombinim me vitaminën C mbrojnë qelizat e trurit nga radikalet e lira.

Për më tepër ato rrisin sasinë e oksigjenit që arrin në tru.

Ushqimet që duhet të shmangni

Hiqni dorë nga mishi i kuq, mishi i derrit, ushqimet e skuqura, patatinat, picat e ngrira, biskotat, ëmbëlsirat e paketuara dhe margarina.

E njëjta gjë vlen për proshutat, sallamet dhe pançetën që rrisin rrezikun e sëmundjeve mendore.

Ushqyerja luan një rol të qartë dhe vendimtar në plakjen e trurit, shfaqjen e Alzheimerit dhe sklerozës.

Për shumë kohë këto sëmundje i atribuoheshin geneve problematike që trashëgohen brez pas brezi.

Në fillim të vitit 2018, u kuptua që genetika nuk ka shumë të bëjë me këto sëmundje.

Për më tepër, më pak se 1% e sëmundje si ajo e Alzheimerit janë një mutacion genetik, ndaj shihet qartë roli i faktorit ushqim.

Shkencëtarët besojnë se një e treta e sëmundjeve të trurit mund të parandalohen duke përmirësuar stilin e jetës dhe duke u ushqyer shëndetshëm.

Me një hap të tillë, shumë njerëz do të kenë mundësi të plaken me një shëndet të pacënuar mendor./AgroWeb.org

Hoshafi me Kumbulla Të Thata – Vlerat e Traditës Shqiptare

Hoshafi është rezultat i një teknike shumë të veçantë të tharjes së frutave të cilat ose kanë aciditet të lartë ose janë të vrara e jo plotësisht të ngrënshme.

Kumbullat, mollët e egra e shumë fruta të tjera zakonisht bëhen hoshaf.

Në disa zona të Shqipërisë, kumbullat pa bërthamë vihen në varg dhe varen pranë vatrës së zjarrit që të thahen ngadalë, kur nuk është sezon me diell.

Pas tharjes, kumbullat mund të hahen siç janë, mund të hidhen në ujë të valuar për t’u njomur ose të bëhen komposto.

Hoshafi është një ushqim shumë i rëndësishëm për fëmijët sepse ka efekt pastrues.

Komposto apo Hoshafi i Kumbullave

Kompostoja e kumbullave të thara, quhet ndyshe edhe hoshaf, pasi emrin e merr nga kumbullat e thata qe njihen si hoshafka.

Ky hoshaf përgatitet mjaft lehtë në kushtet e shtëpisë dhe ka një shije më të mirë se varianti që shitet në dyqan që zakonisht është shumë i ëmbël.

Hoshafi i kumbullave të thata mund të konsumohet edhe si lëng por edhe së bashku me frutat.

Përbërësit për 4-5 persona

Kumbulla të thata 250-300 gramë

Gjysëm gote ose një gotë sheqer, sugjerohet sheqer kaf

3- 4 gota ujë

Lëngu i gjysëm limoni

1 lugë çaji kanellë nëse dëshironi

Mënyra e përgatitjes

Lajini mirë kumbullat e thata me ujë vakët. Në tenxhere hedhim ujin dhe sheqerin deri sa sheqeri të shkrihet.

Më pas hidhen kumbullat e thata dhe vihen të ziejnë së bashku me lëngun e limonit për rreth 20-30 minuta.

Shtoni kanellë sipas dëshirës.

Kompostoja apo hoshafi me kumbulla të thata, mund të konsumohet e ngrohtë, në temperaturë ambienti ose e ftohtë.

Mund ta mbani në frigorifer nëse e vendosni në një enë të mbuluar mirë për të paktën 7 ditë.

Vlerat e kumbullave të thata

Për 100 gramë kumbulla të thata: 223 kalori, 0 gramë fibra

Edhe pse me mungesë fibrash, kumbullat e thata kanë një efekt laksativ, pastrues për trupin.

Përveç kësaj, në një kupë ka 2.5 gramë proteina dhe 13% të kërkesave tuaja ditore për hekur./AgroWeb.org

Kek Shtëpie Me Çokollatë Dhe Arra – Ëmbëlsira Që Gëzon Shpirtin

Çokollata është pa dyshim një nga ushqimet më të mira që na fal gëzim e qetësi, sidomos në një ditë plot stres.

Çokollata ka aftësi të përmirësojë humorin dhe të nxisë mendimet pozitive.

Studimet shkencore kanë konfirmuar se çokollata është shumë e mirë për zemrën, qarkullimin e gjakut dhe trurin.

Mendohet që ajo ka ndikim të mirë edhe kundër diabetit, mbipeshës dhe autizmit.

Por nëse e doni çokollatën vetëm për shijen e ëmbël që ka, atëherë ju rekomandojmë recetën e mëposhtme të kekut me çokollatë.

Përgatitja e Kekut me Çokollatë dhe Arra në Shtëpi

Përbërësit

200 gramë çokollatë të zezë

150 gramë gjalpë

80 gramë sheqer

5 vezë

1 lugë çaji me vanilje pluhur

50 gramë miell

1 bustinë me pluhur pjekjeje për ëmbëlsira (e gjeni në supermarkete)

40 gramë arra të thërrmuara

10 gramë kakao

100 ml krem qumështi (pana)

Përgatitja

Ndizeni furrën në 180°C.

Në një tenxhere shkrini 120 gramë nga çokollata e zezë bashkë me gjalpin.

Në një enë tjetër rrihni vezët dhe sheqerin deri sa të krjohet një masë e bardhë.

Tek tenxherja me çokollatën e shkrirë shtoni vaniljen dhe përziejeni.

Më pas shtoni miellin dhe të gjithë përbërësit e tjerë, arrat, kakaon, pluhurin e pjekjes.

Përziejeni mirë me lugë druri dhe më pas hidheni në tepsi për ta pjekur.

Ndërkohë që keku piqet, ngroheni kremin e qumështit në një tenxhere tjetër deri sa të dalë pak tym.

Shtoni pjesën e mbetur të çokollatës dhe përziejeni mirë.

Pasi keku të jetë ftohur hidheni masën e qumështit me çokollatë sipër dhe servireni.

Çokollata e zezë është e pasur me minerale mirëbërës siç është kaliumi, zinku dhe seleniumi.

Një sasi prej 100 gramësh e një çokollate 70% të zezë plotëson 67 përqind të nevojës ditore për hekur.

Për më tepër, çokollata përmban një substancë që është e njëjta me një kimikat të çliruar nga truri kur njeriu bie në dashuri.

Jo më kot çokollata cilësohet si një ushqim që i bën mirë shpirtit./AgroWeb.org