Avokadot janë ndër ushqimet më të ushqyeshme në botë. Janë të gjithanshme në kuzhinë, prandaj mund t’i përdorni në shumë receta të shijshme, duke filluar që nga sallata e deri tek lëngjet e freskëta.
Kështu do të merrni shumë yndyra dhe fibra të shëndetshme për zemrën dhe shëndetin në tërësi. Por përgatitja e një avokadoje mund të jetë një detyrë e mundimshme.
Për t’jua thjeshtuar punën AgroWeb.org ju këshillon të ndiqni këto hapa të thjeshtë për ta bërë sa më të lehtë prerjen e një avokadoje.
Çfarë ju nevojitet
Avokado
Thika e shefit
Dërrasë prerëse
Tas qelqi
Një lugë e madhe
Si të prisni një avokado
Hapi 1: Prisini avokadon në gjysmë
Duke përdorur një thikë të mprehtë, priteni në gjysmë avokadon mbi një dërrasë prerëse.
Rrotulloni avokadon duke e mbajtur thikën të qëndrueshme dhe priteni me kujdes përrreth bërthamës. Në fund, hiqni thikën dhe rrotulloni dy gjysmat në të kundërt derisa të ndahen nga njëra tjetra.
Hapi 2: Hiqni bërthamën
Drejtojeni tehun thikës suaj për tek bërthama dhe krijoni një vijëzim gjatësor në sipërfaqen e saj, duke përdorur forcë të mjaftueshme në mënyrë që thika të mos rrëshqasë. Rrotulloni thikën për të nxjerrë bërthamën.
Hapi 3: Priteni avokadon në kubikë ose feta
Nëse e prisni në kubikë, bëjeni me kujdes pa e shpuar lëkurën. Përdorni majën e thikës për të prerë tulin e avokados në formë kubikësh, më pas hiqini ato me një lugë.
Nëse e prisni feta, përdorni lugën për të liruar lëkurën rreth e rrotull dhe largoni nga lëkura të gjithë tulin. Vendoseni atë me anën e sheshtë një dërrasë prerëse dhe priteni duke përdorur majën e thikës tuaj.
Si mund ta dalloj nëse një avokado është pjekur mjaftueshëm?
Shtypni butësisht lëkurën. Nëse ndihet pak e butë por jo e qullët, është gati për konsum. Nëse lëkura është e gjelbër e zbehtë dhe shumë e fortë, avokado nuk është gati për konsum. Shpesh, ngjyra e lëkurës së avokados së pjekur është jeshile shumë e errët, por jo gjithmonë.
Po sikur të hapni aksidentalisht një avokado të papjekur?
Edhe pse nuk do të shijojë aq sa një avokado e pjekur dhe kremoze, ajo sërisht mund të konsumohet.
Nëse mund të prisni një ose dy ditë që të piqet, ndiqni këto hapa:
Hidhni pak lëng limoni në pjesët e prera të avokados që janë ekspozuar ndaj ajrit.
Bashkojini sërish të dy gjysmat.
Mbështilleni fort avokadon me qese plastike.
Mbajeni në frigorifer dhe kontrollojeni sërish nesër.
Si ta shpejtoj procesin e pjekjes?
Vendoseni avokadon në një qese letre të mbyllur së bashku me një banane ose një mollë.
Këto fruta lëshojnë gaz etilen që i bën frutat rreth tyre të piqen më shpejt. Mbajeni në banakun e kuzhinës ose diku në temperaturë dhome. Kjo mënyrë duhet të përshpejtojë pjekjen me një ose dy ditë. /AgroWeb.org
Lini një Përgjigje