Një nga substancat trashëse më të mira që përdoret në gatime është padyshim niseshteja.

Si ajo e patates, ashtu edhe ajo e misrit gjejnë përdorim shumë shpesh në kuzhinat e amvisave shqiptare.

Megjithatë, pavarësisht efektit të ngjashëm, të dyja llojet e niseshtesë dallojnë nga njëra tjetra.

Dallimet Mes Niseshtesë Së Patates Dhe Asaj Të Misrit Në Gatim

Dallimi i parë është mëse i dukshëm. Niseshteja e misrit vjen nga drithi ndërsa ajo e patates nga një zhardhok i nëntokës.

Karakteristikat e tyre janë të ndryshme e megjithatë mund të gjejnë përdorime të njëjta.

Niseshteja e patates (në paketim) nxirret nga zhardhoku dhe përpunohet. Ajo është efikase për trashje gatimesh të ndryshme thuajse të përfunduara dhe kërkon temperaturë të ulët.

Zakonisht rekomandohet të hidhet në fund të gatimit dhe nuk duhet lejuar të valojë.

Niseshteja e misrit ka një nivel të lartë tolerance sa i përket temperaturës së lartë, madje mund të hidhet që në fillim të gatimit që të shmanget formimi i kokrrizave.

Niseshteja e misrit nuk rekomandohet të përdoret krahas përbërësve acidikë dhe sheqerit sepse ato pengojnë trashjen e ushqimit të gatuar.

Të dyja niseshtetë dallojnë edhe nga ngjyra. Lëngu ku hidhet niseshteja e patates është më transparent se ai ku hidhet niseshteja e misrit.

A Mund Të Zëvendësojnë Njëra Tjetrën Në Kuzhinë?

Zakonisht po, megjithatë ka disa përjashtime.

Niseshteja e patates mund të zëvendësojë atë të misrit vetëm në fund të gatimit ose në minutë të fundit kur dëshironi ta përdorni për trashjen e supave, gjellërave, lëngjeve të mishit dhe mbushjeve. Kjo sepse, siç e thamë edhe më lart, niseshteja e patates nuk jep efektin e duhur nëse lihet shumë gjatë në  temperaturë të lartë.

Niseshtenë e misrit mund ta përdorni në fillim të një gatimi dhe ajo do të përmirësojë çdo aspekt të gatimit tuaj në kohën e vet. /AgroWeb.org