Në gjysmën e parë të marsit dhe në prill, shqiptarët, ashtu si gjithë shtetasit e vendeve të tjera, u përballën me një situatë të paparë ndonjëherë. Iu desh të mbylleshin në shtëpi, teksa gjithçka u mbyll, bashkë me baret dhe restorantet.
Për një vend si Shqipëria, që zë rekord për sa i përket numrit të lartë të bar-kafeve në raport me popullsinë, me 518 bare për 100 mijë banorë dhe ku kafeja ishte një normë sociale ndërveprimi, qëndrimi në shtëpi dhe pa kafe ishte një “torturë” e vërtetë.
Të dhënat e importeve të kafesë
Në fakt, të dhënat e importeve të kafesë në mars dhe prill tregojnë se shqiptarët nuk e kanë ulur aspak konsumin e kafesë, përkundrazi, në shtëpi apo në zinxhirët e tregtimit të kafeneve, nuk kanë qëndruar pa konsumuar produktin e preferuar.
Të dhënat e Ministrisë së Financave bëjnë të ditur se në janar-prill u importuan gjithsej rreth 2,700 tonë kafe, me një rritje prej 9.4% në krahasim me të njëjtën periudhë të vitit të kaluar.
Por, rekordi është shënuar në prill, kur importet e kafesë arritën në 922 tonë, që është niveli më i lartë historik i shënuar ndonjëherë këtë muaj (shih grafikun).
Në raport me gjithë muajt e tjerë, ky është niveli i tretë më i lartë i importeve në 20 vitet e fundit, me përjashtim të dhjetorit 2016 dhe 2018, sipas statistikave të Ministrisë së Financave.
Klaudja Shtrepi, Menaxhere Marketingu në “New Centtury”, që ka si pjesë të portofolit edhe kafenë përmes “Ama Caffe” thotë se është rritur tendenca e porosisë së kafesë nga familjarët si dhe blerjes së ekspresëve, por kjo kurrsesi nuk e zëvendëson qarkullimin që bëhej përmes bar-kafeve.
Ajo shton se është rritur shitja e produkteve të cilat konsumohen në shtëpi, si kapsulat për kafe ekspres; kafe turke dhe kafe e ftohtë me qumësht natyral dhe iced coffee.
Janë rritur shitjet e pajisjeve ekspres
Operatorët e tregut pohojnë se janë rritur shitjet e pajisjeve ekspres nëpër shtëpi. “Situata po zhvillon dhe përshtat nevojat e konsumatorëve, duke shijuar edhe konsumin e kafesë ekspres në komoditetin e shtëpisë”, thotë Shtrepi.
Nga 18 maji janë hapur dhe baret e restorantet dhe rituali i kafesë në lokale është kthyer sërish, ndonëse zakoni i konsumit të kafesë në shtëpi duket se do të mbetet.
Ndërkohë, e ardhmja pritet të jetë e vështirë për baret e restorantet. Enri Jahaj, anëtar i bordit drejtues të Shoqatës të Bareve, Restoranteve dhe Klubeve, pohon se rregullat strikte për distancimin fizik dhe orari i kufizuar do të falimentojnë biznesin e bareve dhe restoranteve.
Për të, perceptimi i përgjithshëm është që qytetarët kanë ndryshuar sjelljen sociale dhe takimet me njerëzit janë jonormale për shkak të distancimit. Imagjinoni – thotë ai – se sa ka ndryshuar perceptimi te një biznese ku 50% e zë produkti dhe 50% shërbimi./Monitor
