Në momentet kur një amvisë po përgatit një gosti për miq e të ftuar ajo ka shumë punë për të bërë. Duhet të presë perime, të lajë, të shpëlajë, të marinojë, të pjekë, skuqë e kaurdisë.
Në traditën shqiptare të kulinarisë, patatet janë pjesë e pandashme e shumë gostive dhe tryezave familjare, por asnjë amvisë nuk do që ato të serviren të nxira, një proces që ndodh rëndom pas qërimit.
Problemi Qëndron Tek Niseshteja
Mjaftojnë 10 minuta nga qërimi i patates që ajo të nisë të nxihet.
Patatja nxihet shpejt kur ekspozohet ndaj ajrit të freskët sepse ajo është shumë e pasur me niseshte.
Kur niseshtetë ekspozohen ndaj oksigjenit ato nisin të oksidohen, një proces që i jep patates atë nuancën gri apo kafe.
Të mos keqkuptohemi, pavarësisht se është e nxirë, patatja është e ngrënshme por jo e bukur për syrin.
Ngadalësoni Nxirjen e Patates Me Ujë
Mënyra më e lehtë dhe më e përdorur për mbrojtjen e patateve nga nxirja është uji i ftohtë.
Kur copat e patateve mbulohen me ujë, atëherë procesi i nxirjes ngadalësohet.
Pavarësisht mënyrës së prerjes, copat e patates mund të qëndrojnë në ujë për 24 orë pa pësuar asnjë ndryshim në ngjyrën e tyre apo në shije.
Aciditeti Për Një Ruajtje Më Të Mirë
Sidoqoftë nëse ju planifikoni t’i mbani patatet në ujë për mbi 6 orë, atëherë përfshini edhe limonin.
Ju mund të përdorni një ose dy lugë çaji lëng limoni dhe më pas hidheni në enën ku keni lënë patatet në ujë.
Limoni ka aciditet dhe ky i fundit rregullon pehashin e patates dhe ndihmon në ngadalësimin më të madh të procesit të oksidimit.
Në vend të limonit, ju mund të përdorni pak uthull të bardhë e cila do të japë të njëjtin rezultat dhe do t’i mbajë patatet pa ngjyrime dhe nxirje të bezdisshme./AgroWeb.org
