Receta e Duhur e Përgatitjes së Majonezës në Shtëpi

Asnjëherë nuk jemi të sigurt me listën e përbërësve në majonezat e gatshme që gjejmë në treg.

Përbërësit e çuditshëm në majonezën e tregut si yndyrnat e ngopura vegjetale, aditivët e shijes dhe konservantët sjellin probleme me kolesterolin e keq, shëndetin e zemrës dhe presionin e gjakut.

Studiuesit në Shkollën Mjekësore të Harvardit kohët e fundit konkluduan se marrja e një sasie të madhe të yndyrnave të ngopura çon në rritjen me 18 përqind të rrezikut të sëmundjeve të arterieve koronare.

Megjithatë, duke zëvendësuar vetëm një pjesë të yndyrnave të dëmshme me të njëjtën sasi të yndyrnave të shëndetshme si vaji i ullirit shoqërohet me rënie të rrezikut me 6-8 për qind.

Majoneza perfekte e shtëpisë kërkon 4 përbërës që i gjeni lehtësisht në shtëpi dhe vetëm pak minuta.

Majoneza e shëndetshme është një kombinim i yndyrës së mirë, lëngut të limonit të freskët, të verdhës së vezës dhe kripës.

Më poshtë do të gjeni recetën bazë të përgatitjes së majonezës në kushtet e shtëpisë sipas rekomandimeve të AgroWeb.org.

Majoneza në Kushtet e Shtëpisë

Koha: 5 minuta

Sasia: 250 ml

Përbërësit

• 2 vezë të mëdha të ruajtura në temperaturë ambienti
• 2 lugë çaji me lëng limoni të freskët ose uthull molle
• 1 gotë (200 ml) me vaj ulliri cilësor
• Gjysëm luge kafeje me kripë të bluar hollë

Majoneza, disa sekrete të përgatitjes

Përdorni vezë të ruajtura në temperaturë ambienti. Vezët e ftohta nuk arrijnë të formojnë një majonezë të trashë.

Gjithnjë përdorni lëngun e limonit të parin. Ai ndihmon të shpërbëjë proteinat tek të verdhat e vezëve dhe garanton një bashkim dhe shkrirje të njëtrajtshëm.

Mos u ngutni kur të përdorni vajin. Niseni ngadalë dhe me disa pika deri sa të kuptoni që majoneza ka nisur të trashet. Pasi të jetë trashur, ju mund ta hidhni vajin në majonezë më shpejt.

Përdorni kripë të imët deti dhe shtojeni në majonezë nga pak. Kini kujdes sepse majoneza ka tendencën të bëhet tepër e kripur shumë shpejt.

Përdorni vetëm lëng të freskët limoni. Lëngu i gatshëm i jep majonezës një shije të çuditshme.

Udhëzimet

1) Mblidhini të gjithë përbërësit dhe përdorni një enë me grykë të gjerë dhe të lartë që do t’ju ndihmojë në rrahjen e majonezës

2) Ruajini të bardhat e vezëve për salca të tjera. Të verdhat e vezëve hidhini në enën e ndarë për rrahjen e majonezës.

3) Shtoni lëngun e freskët të limonit në enë së bashku me të verdhat e vezëve dhe rrihini mirë. Të verdhat përmbajnë lecithinë, një substancë ndërlidhëse që ndihmon në lidhjen e përbërësve.

4) Shtoni vajin ngadalë me nga një pikë ndërkohë që vazhdoni me rrahjen dhe përzierjen e përbërësve.

Kur majoneza nis të trashet, rriteni dozën e vajit, por hidheni ngadalë dhe rregullisht. Nëse vaji nuk tretet në majonezë, atëherë mos hidhni më por vazhdoni ta rrihni majonezën deri sa vaji i hedhur të jetë lidhur tërësisht.

5)  Nëse majoneza është tepër e trashë, atëherë shtoni një lugë çaji me ujë deri sa të arrihet niveli i dëshiruar.

6) Pasi të keni hedhur të gjithë vajin, do të vini re se majoneza do të jetë e trashur. Shtoni kripën dhe pak ujë nëse dëshironi një majonezë më të hollë.

Majonezën mund ta ruani të mbuluar në frigorifer për 5 ditë.

Nëse majoneza nuk trashet mjaftueshëm

Nëse keni arritur në gjysmën e punës, por majoneza nuk trashet, atëherë mund të shtoni edhe një tjetër të verdhë veze dhe ta rrihni pareshtur.

Shtoni vaj edhe pak më shumë se sasia e rekomanduar, por kujdes me kripën. /AgroWeb.org

A keni edhe ju një metodë tuajën për përgatitjen e majonezës në shtëpi? Ndajeni me AgroWeb në Facebook.