Dashamirësit e uthullës kanë mësuar shumë të reja interesante për produktin e tyre të preferuar në artikujt e vazhdueshëm që AgroWeb.org ka publikuar për këtë produkt.
Uthulla është një produkt që mund të përgatitet nga çdo ushqim që përmban sheqerna natyralë, që do të thotë se mund të nxjerrësh uthull nga molla, boronica, fiku, shalqini e shumë të tjerë.
Çdo uthull ka shijen e vet unike, e cila mund të intensifikohet duke shtuar erëza, barishte apo fruta të tjerë.
Pas fermentimit të sheqernave në alkol (faza e parë), bakteret e formuara e transformojnë alkolin në uthull (faza e dytë), ndërkohë që acidi acetik që del në pah gjatë fazës së dytë ka mbledhur aromat e ushqimit fillestar dhe i ka ofruar ato në uthull.
Ky lëng i rëndësishëm përdoret në kuzhinë dhe jo vetëm. Për shembull, uthullën e përdorim në sallata, por edhe për të zbutur shijen e kripur ose të yndyrës në gatime të ndryshme.
Uthullën e përdorim edhe për të pastruar në kuzhinë apo mbajtur nën kontroll refluksin e acidit. Përdorimet e uthullës janë po aq të panumërta sa varietetet e saj.
Më poshtë do të gjeni një listë të përgatitur nga AgroWeb.org mbi disa prej uthullave të panjohura të frutave.
Vlerat e uthullës së hurmës
Uthulla e hurmës ndoshta nuk është shumë popullore në Shqipëri, por në vendet e tjera është shumë e kërkuar. Ajo është një burim i mirë i vitaminë A, B6, dhe C.
Kjo uthull është e pasur me minerale të rëndësishme siç është kalciumi, magnezi, fosfori, kaliumi si dhe fibra. Ajo përmban pak kalori dhe aspak yndyrna.
Kjo e bën shumë të kërkuar nga njerëzit që tregojnë kujdes me peshën.
Uthulla e dardhës e bërë në shtëpi
Këtë uthull mund ta përgatisni nga lëkura ose copat e dardhës të kombinuara me pak sheqer. Mund të zgjidhni pjesët e nxira të dardhës të cilat duhen fermentuar për 2 muaj. Uthulla është e thartë, por e këndshme.
Uthulla e mollës
Amvisat janë të fiksuara pas uthullës së mollës që përdoret në gatim por edhe në punë shtëpiake. Vlerat e uthullës së mollës dhe përdorimet e saj janë të shumta dhe mund t’i lexoni edhe në AgroWeb.org
Uthulla e rrushit
Uthulla e rrushit është e njëjta me uthullën e verës por kërkon një fermentim më të gjatë. Përdoret për turshi dhe për salca. Ka rol të rëndësishëm kundër baktereve dhe është pjesë e mjekësisë tradicionale popullore kundër infeksioneve.
Vlerat e uthullës së shegës
Kjo uthull me ngjyrë të kuqe ruan ëmbëlsinë e frutit dhe ka një nivel të mprehtë aciditeti. Vlerat e saj janë të shumta sidomos për sistemin tretës, performancën e trupit, përthithjen e kalciumit, kolesterolin e ulët, tensionin e gjakut, kujtesën, luhatjet e humorit dhe venat e bllokuara.
Uthulla e thanës
Tradita zonave të veriut të Shqipërisë e kërkon që thanat të fermentohen në ujë për 30-40 ditë. Vendasit betohen për vlerat dhe përfitimet që vijnë nga uthulla e thanës.
Ata pinë një gotë të vogël me uthull thane bashkë më pak sheqer, një lëng që supozohet të ketë një efekt parandalues për disa sëmundje.
Uthulla e balsamit
Vendlindja e kësaj uthulle është Modena e Italisë. Uthulla e vërtetë e balsamit bëhet nga rrushtë Trebbiano që rriten në veri të vendit. Vjetërimi i uthullës kërkon 3 deri në 150 vjet dhe bëhet fuçi druri apo çeliku.
Ky proces i gjatë e bën uthullën e balsamit të shtrenjtë, ndaj shumë prej produkteve që shohim në treg janë imitime të lira të kësaj recete të lashtë./AgroWeb.org
Lini një Përgjigje