Dashamirësit e ushqimeve të shëndetshme janë gjithnjë në kërkim të mënyrave më të thjeshta dhe praktike të ruajtjes së tyre në frigorifer sa më gjatë dhe sa më sigurt.
Për këtë ju vjen në ndihmë ekspertiza e AgroWeb.org
Boronicat Dhe Frutat e Pyllit
Frutat e pyllit ku bëjnë pjesë boronicat dhe luleshtrydhet janë plot e për plot me vitamina, minerale, antioksidantë dhe fibër dietike.
Në frigorifer, boronicat mund të qëndrojnë të freskëta për 1 javë, ndërsa luleshtrydhet dhe boronicat e kuqe rezistojnë deri në 5 ditë.
Një mënyrë tjetër e ruajtjes së tyre për një kohë më të gjatë është ajo e ngrirjes.
Lakra, Lulelakra Dhe Barishtet
Lakra, barishtet, brokoli, lulelakrat mund të ruhen në frigorifer për deri 5 ditë.
Barishtet janë disi më delikate dhe ekspertët rekomandojnë që ato të mbështillen me letër kuzhine të thatë.
Kjo do të sigurojë që letra të përthithë lagështinë e barishteve dhe ato të jenë të freskëta sa më gjatë.
Vezët Dhe Produktet e Bulmetit
Vezët e freskëta qëndrojnë në frigorifer për 2-4 javë, ndërsa ato të ziera rezistojnë për deri 7 ditë.
Sekreti qëndron tek vendndodhja.
Vezët nuk duhen vendosur në zonën e derës së frigoriferit që mos të ekspozohen ndaj luhatjeve të temperaturës.
Kosi nga ana tjetër mund të qëndrojë në frigorifer për një muaj.
Djathi kaçkavall kur është i pahapur mund të rezistojë në frigorifer për një muaj, gjiza për një javë ndërsa kremi i djathit për 2 javë.
Arrorët
Arrorët kanë një përmbajtje të lartë yndyre dhe kanë nevojë të ruhen në mënyrën e duhur që të mos bëhen acidike.
Në frigorifer, arrorët qëndrojnë të freskët për gjashtë muaj, ndërsa në ngrirje, ato zgjasin një vit.
Pavarësisht kohës, ekspertët nënvizojnë rëndësinë e sigurisë ushqimore dhe besimit të intuitës.
Nëse një produkt i caktuar ju duket sikur është i prishur apo ka një aromë dhe paraqitje ndryshe, atëherë është më mirë që të mos rrezikoni me shëndetin dhe ta hidhni atë në plehra./AgroWeb.org
