Keni dëgjuar për përmbajtjen e lartë të proteinave që kanë lakrat e vogla ose lakrat e Brukselit në krahasim me perimet e tjera? Por, po të marrim në konsideratë edhe vitaminat dhe mineralet që ato përmbajnë, atëherë nuk keni arsye përse të mos i përfshini këto lakra të vogla në ushqimin tuaj.
Lakrat e vogla, së bashku me rukolën dhe finokun po kultivohen gjithnjë e më shumë nga një numër në rritje agrobiznesesh në Divjakë dhe në Lushnjë.
Për shumë kohë, lakrat e vogla kanë patur një reputacion të keq për shijen e tyre paksa të veçantë. Por mënyrat e përditësuara të gatimit të tyre, me siguri shkaktojnë xhelozi mes gjithë perimeve të tjera.
Më poshtë do të gjeni receta të thjeshta të rekomanduara nga AgroWeb.org për gatimin e lakrave të vogla që kanë më shumë vlera në krahasim me barishtet dhe zarzavatet e tjera, duke qenë po aq të shijshme.
Përzgjedhja
Kur blini lakra të vogla, përzgjidhni kokrrat me gjethe të puthitura mirë, gjethe të gjelbra dhe pa njolla të verdha. Aroma e tyre duhet të jetë ajo e tokës dhe e barit. Rrreth gjysmë kilogrami me lakra të vogla, mjaftojnë për gjashtë persona, kjo në varësi se çfarë përmban tjetër menuja juaj e ditës.
Të freskëta
Lakrat e freskëta por ‘të gjalla’ mund të jenë pak të forta. Ju sugjerojmë t’i zbusni përpara se t’i përdorni në sallatë. Zbutja e lakrave bëhet në dy mënyra: duke masazhuar gjethet me pak kripë, ose duke i prerë hollë. Prijini sipas gjatësisë dhe më pas gjethet do të zbërthehen natyrshëm.
Servirja: Lakrat e gjalla kërkojnë salca të yndyrshme dhe me aromë të fortë. Përzgjidhni përbërësit e duhur siç janë: djathi, sardelet, apo arrat, krahas vajit të ullirit që është i detyrueshëm. Që të siguroheni se gjethet janë zbutur dhe janë ushqyer me salcë, duhet t’i pëzjeni mirë përpara se t’i vendosni krahas ushqimeve të tjera.
Për balancë, duhet të shtoni diçka të ëmbël si mollë, dardhë, ose fruta të thata dhe diçka të freskët si kopër, lëng limoni dhe erëza të tjera të freskëta.
Të pjekura
Prijini lakrat në gjysmë ose në copa më të vogla. Sigurohuni që gjethet vazhdojnë të qëndrojnë të puthitura dhe mblidhini ato që shkëputen. Më pas spërkatini me vaj ulliri të bollshëm, kripë dhe piper. Hidhini në një letër pjekjeje. Kini parasysh që lakrat e vogla përmbajnë ujë, ndaj nuk duhet t’i vendosni ngjitur njëra-tjetrës në letrën e pjekjes sepse në këtë mënyrë ato do të gatuhen me lëngun e tyre.
Lakrat e vogla duhet të piqen në një temperaturë prej 200 gradë. Kthejini kokrrat çdo 10 minuta dhe piqini për 25 deri në 30 minuta. Lakrat mund t’i spërkatni me një deri në dy lugë gjelle me shurup, mjaltë ose sheqer kaf që të karamelizohen.
Servirja: Pas pjekjes, ju mund t’i hani lakrat menjëherë direkt e nga letra e pjekjes. Kini durim sa të ftohen. Mund t’i spërkatni me një lëng të pregatitur mes uthullës dhe disa vajrave të gatimit, siç është ai i ullirit cilësor. Lakrat e karamelizuara shkojnë mirë me limonin jeshil, salcë peshku, salcë soje, qepë të njoma, etj. Një tjetër mënyrë është që gjatë pjekjes t’i spërkatni me mjaltë, erëza pikante, limon, qepë dhe majdanoz.
Të kavërdisura
Kavërdisja e lakrave të vogla kërkon yndyrë. Lakrat mund t’i kavërdisni me proshutë, pastërma, salçiçe, etj. Nëse jeni vegjetarianë, atëherë përdorni vaj ulliri. Skuqni produktet shtazore në një tigan mesatar dhe të thellë në mënyrë që ato të çlirojnë yndyrë. Pas skuqjes, hiqini nga tigani dhe në të hidhni lakrat e prera në gjysmë. Kavërdisini dhe pak para heqjes nga zjarri, shtoni hudhrat, qepët, timusin, specat djegës të tharë dhe gatuajini së bashku për një ose dy minuta.
Servirja: Pas kavërdisjes, shtrydhni gjysmë limoni, pak uthull, qepujka turshi dhe barishte të freskëta si mente ose nenegjik, majdanoz ose cilantro.
Në avull
Niseni gatimin duke i prerë lakrat në gjysmë. Vendosini në enën e gatimit me avull, shtoni kripë dhe piper dhe mbylleni kapakun. Lerini deri sa lakrat e vogla të kenë marrë njyrë të gjelbër të çelët për 8 deri në 10 minuta dhe lërini të ftohen.
Servirja: Lakrat në avull praktikisht mund të kombinohen me çdo gjë duke nisur nga uthulla, hudhra, vaji i ullirit, gjalpi, specat, djathrat, barishtet, specat djegës, apo erëza të tjera të shumëllojshme./AgroWeb.org
