Kemi hyrë zyrtarisht në stinën e virozave të cilat po sëmurin gjithnjë e më shumë njerëz.
Në këtë stinë, sistemi imunitar i njeriut është më i brishtë për të luftuar plotësisht gripin dhe të ftohurën.
Mënyra më e mirë për t’i ardhur në ndihmë organizmit dhe imunitetit është që të ushqehemi shëndetshëm me fruta, perime e drithëra.
Një nga ushqimet më të mira, për të cilin ekspertët bien njëzëri dakord, është supa me mish pule dhe perime.
Kjo supë jo vetëm e hidraton organizmin por edhe e ushqen me vitamina, minerale dhe antioksidantë që janë kaq të nevojshëm në këtë periudhë,
Në këtë artikull të AgroWeb.org do të mësoni një recetë të supës anti-grip e cila do ju ngrohë shpirtin e trupin.
Supa Me Perime Dhe Mish Pule Kundër Gripit
Përbërësit:
1 lugë gjelle vaj ulliri
1 qepë e grirë hollë,
1 presh i prerë hollë dhe i larë
2 karrota të qëruara dhe të prera në copa të vogla,
2 kërcenj selinoje të prerë hollë,
1 lugë gjelle xhenxhefil të grirë
1 thelbi hudhër të shtypur
1 lugë çaji shafran Indie
2 koncentrate pule
Gjysëm filxhani kuskus
500 gramë fileto pule
Gjysëm filxhan çaji majdanoz të grirë
2 lugë gjelle lëng limoni
Përgatitja:
Vendoseni tenxheren në zjarr dhe më pas hidhni pak vaj ulliri.
Kur të jetë ngrohur, shtoni qepët dhe preshin.
Kavërdisini për rreth 6 minuta në zjarr të ulët duke i përzier herë pas here.
Më pas, shtoni karrotat, selinonë, xhenxhefilin, hudhrën dhe shafranin.
Kavërdisini për dy minuta të tjera dhe shtoni kuskusin.
Shtoni koncentratin e pulës, dy litra ujë të ngrohtë dhe mishin e pulës.
Mbylleni kapakun dhe lërini të ziejnë për 15 minuta.
Hiqeni tenxheren nga zjarri dhe më pas mishin e pulës.
Lëreni të ftohet pak dhe më pas copëtojeni me duar.
Hidhini copat e imëta të mishit të pulës në tenxhere dhe lëreni supën të valojë për 2 deri në 3 minuta.
Më pas shtoni majdanozin, lëngun e limonit, kripën dhe piperin dhe servireni./AgroWeb.org
