Në totalin e eksporteve bujqësore shqiptare drejt vendeve të BE-së, për muajin shtator të këtij viti, kryesojnë domatet me sasinë më madhe prej gati 930 tonë, krahas produkteve të tjera bujqësore.
Statistikat zyrtare nga qendra e eksporteve në Vlorë, tregojnë se sasia e eksporteve të domateve në këtë muaj është 25% më e lartë në të njëjtin muaj të një vit më parë. Ndërkohë që Shqipëria kryeson në rajon për eksportin e domateve dhe në tre vitet e fundit ka dhjetëfishuar prodhimin dhe eksportin e kësaj kulture.
Sipas Ministrisë së Bujqësisë dhe Zhvillimit Rural, në fund të vitit 2019, eksporti i domates u rrit në mbi 78 mijë tonë kundrejt 6.5 mijë tonëve eksporte që shënonte në vitin 2010.
Ndërkohë Shqipëria eksporton në vit 250 mijë tonë perime dhe fruta në gjithë vendet e komunitetit europian, ku cilësia dhe siguria ushqimore përafron me standardet e BE-së.
Çdo kamioni që futet në çdo territor të BE-së, i merret kampioni dhe testohet dhe kontrollohet dhe produktet shqiptare kanë rezultuar brenda të gjitha normave të lejuara duke u bërë kështu mjaft të kërkuar nga tregu i huaj.
Për herë të parë në vitin 2018, eksportet bujqësore shqiptare kapën vlerën e 300 milionë dollarëve, një dyfishim në harkun kohor të pesë viteve. Ndërsa një prej produkteve që ka njohur rritjen më të madhe të eksporteve është pikërisht domatja, e vendosur rishtazi në qendër të vëmendjes për cilësinë e saj./ATSH
