Agjencia Europiane e Barnave (EMA) ka rekomanduar autorizimin për përdorimin e medikamentit antiviral të koronavirusit që është zhvilluar nga Pfizer, në të 27-ta vendet e Bashkimit Europian.
Kjo është hera e parë që agjencia rekomandon autorizimin e një pilule për trajtimin e COVID-19.
Në një deklaratë të ditës së enjte, agjencia rregullatore e barnave në BE tha se dhënia e dritës jeshile për Paxlovoid, medikamentin e Pfizer, mund të ndihmojë njerëzit e infektuar me COVID-19 që të shmangin sëmundjen e rëndë dhe shtrimin në spital. Komiteti i ekspertëve të EMA rekomandoi që pilula t’u jepet personave që nuk kanë nevojë për oksigjen dhe që janë më të rrezikuar për të kaluar në gjendje të rëndë.
Ky medikament mori miratimin e agjencive rregullatore në SHBA dhe në Britani në fund të dhjetorit, megjithëse autoritetet theksuan se furnizimet do të ishin tepër të kufizuara.
Gjithashtu, së shpejti pritet autorizimi i një tjetër pilule antivirale nga Merck. Megjithatë, është e sigurt se medikamenti i Pfizer do të mbetet opsioni i preferuar për shkak të efekteve të tij të lehta anësore dhe efektivitetit të lartë, siç tregojnë studimet, me një reduktim prej gati 90% të shtrimeve në spital dhe të vdekjeve te pacientët që kanë më shumë gjasa të sëmuren rëndë.
Pilulat nga Pfizer dhe Merck pritet të jenë efektive kundër Omicron, sepse ato nuk targetojnë proteinën spike ku ndodhet shumica e mutacioneve shqetësuese të këtij varianti.
Agjencia Europiane e Barnave tha se vendimi i saj ishte bazuar te të dhënat e rezultateve të përdorimit të këtij ilaçi te njerëzit që ishin infektuar kryesisht me variantin Delta të COVID-19, por ajo është besimplotë se ky medikament do të ishte i dobishëm edhe në frenimin e rritjes aktuale të numrit të infektimeve, të shkaktuara nga varianti shumë ngjitës Omicron.
“Bazuar te studimet laboratorike, Paxlovid pritet të jetë aktiv edhe kundër Omicron dhe varianteve të tjera”, tha agjencia rregullatore. Profili i sigurisë së këtij ilaçi ishte “i favorshëm” dhe efektet anësore ishin përgjithësisht të lehta.
Peter Liese, zëdhënësi i Parlamentit Europian për shëndetësinë, e quajti vendimin një “rreze të vërtetë shprese” për një kthim në normalitet pas pandemisë. Por, ai paralajmëroi se nuk kishte garanci nga Komisioni Europian ose nga vendet anëtare që ilaçi do të shpërndahej shpejt.
Në një deklaratë, Liese tha se ai i kishte dërguar kohët e fundit drejtuesit ekzekutiv të Pfizer “një apel urgjent”, në vijim të negociatave të BE-së për të marrë këtë ilaç./Burimi:Monitor
