Krepa Të Shijshëm Me Fara Lulëkuqesh dhe Gjizë

Kjo recetë e veçantë që AgroWeb sjell sot për ju, do t’ju mrekullojë ju dhe të dashurit tuaj.

Shije fantastike dhe kombinim perfekt që me siguri nuk e keni provuar më parë.

Ndiqni me kujdes hapat e përgatitjes së recetës dhe shijojini ato me të dashurit tuaj gjatë pasdites apo mëngjesit të një fundjave të këndshme.

Përbërësit

Për Kremin e Limonit

• 3 vezë

• ¾ filxhan me lëng limoni
• ¼ filxhan ëmbëlsues (shurup agave, mjaltë, sheqer ose shurup panje)
• 3 lugë gjelle vaj kokosi
• Lëkura e një limoni

Për Krepat

• 1 filxhan miell
• Një majë luge çaji kripë
• ¾ filxhan qumësht i skremuar
• ½ filxhan ujë
• 2 vezë
• 2 lugë gjelle gjalpë
• 1 ½ lugë gjelle fara lulëkuqesh
• 1 lugë gjelle lëkurë limoni
• 1 ¼ filxhan gjizë pa kripë

Përgatitja

Hapi 1

Në një tas të vogël zjarrdurues, përzieni vezët, lëngun e limonit dhe ëmbëlsuesin. Ndërkohë vendosni një tenxhere me ujë të ziejë. Kur uji të fillojë të vlojë vendoseni tasin zjarrdurues sipër dhe përziejini për rreth 8 minuta, derisa masa të trashet. Kremi është trashur mjaftueshëm nëse arrin të veshi sipërfaqen e lugës.

Hiqeni tasin nga zjarri dhe shtoni me ngadalë vajin e kokosit. Kalojeni kremin në një kullesë për të hequr pjesët e mpiksura dhe hidheni kremin në një tas tjetër.

Shtoni lëkurën e limonit, përziejeni mirë dhe vendosini një letër kuzhine plastike në sipërfaqe. E lini të pushojë në frigorifer për të paktën 1 orë.

Hapi 2

Në një mikser shtoni miellin, kripën, qumështin, ujin, vezët dhe një lugë gjalpë. Ndizeni mikserin për 10 sekonda derisa brumi të njëtrajtësohet. Hidheni brumin në një enë dhe shtoni farat e lulëkuqes, lëkurën e limonit, përziejini dhe futeni masën në frigorifer për të paktën 20 minuta.

Hapi 3

Parangrohni sobën dhe tiganin e sheshtë që do përdorni. Lyeni sipërfaqen e tiganit me pak gjalpë dhe filloni të hidhni brumin duke e shpërndarë në mënyrë të njëtrajtshme. Gatuajini krepat nga secila anë për 30 sekonda deri në 1 minut.

Hapi 4

Parangrohni furrën në 180 °C dhe bëni gati një tavë të shtruar me letër kuzhine. Tek çdo krep shtoni 2 lugë gjelle gjizë pa kripë dhe palosini në trekëndësha të vegjël. Vendosini ato në tavë dhe futini të piqen përreth 4 minuta, sapo gjiza dhe krepat të jenë ngrohur.

Hapi 5

Transferojini në pjata për servirje dhe shtoni mbi secilën kremin e freskët të limonit. Spërkatni sipër tyre pak lëkurë limoni dhe shijojini menjëherë. /AgroWeb.org