Byrek me Luledele – Receta Unike nga Mjeshtri Shqiptar i Shijes

Byreku me Luledele nuk është një recetë e zakonshme.

Ky është një gatim i veçantë, frut i kreativitetit të një prej shefave më të njohur të kuzhinës jo vetëm në Shqipëri, Alfred Marku, i cili e ka ndarë këtë recetë me AgroWeb.org dhe do të mund ta lexoni në vijim.

Byreku me Luledele është një nga gatimet më speciale në menunë e gatimeve unike e të shijshme pranë restorant ‘Rapsodia’ në Shëngjin, Lezhë.

Një recetë fantastike, e cila me siguri do të shndërrohet në një nga gatimet më speciale në kuzhinën tuaj.

Përgatitja e Byrekut me Luledele në Shtëpi

(Përbërësit më poshtë janë për 4-5 persona)

1 petë byreku e gatshme ose e përgatitur vet

200 gr luledele

200 gr patate

¼ e një kokrre qepe

Një lugë gjelle gjalpë i freskët

2-3 lugë gjelle djathë kaçkavall i grirë

Piper

Kripë

1-2 thelpinj hudhër

Përgatitja

Pastrojmë luledelet me ujë të rrjedhshëm dhe i vendosim mënjanë.

Më pas qepën e presin në kubikë të vegjël. E vendosim në një tenxhere në zjarr, shtojmë gjalpin dhe i kaurdisim për pak.

Më pas shtojmë patatet e prera në kubikë të vegjël, i kaurdisim për pak dhe më pas shtojmë luledelet dhe një gotë ujë.

Shtojmë pak kripë, piper dhe pak hudhër.

E lëmë të ziejë derisa uji të avullojë dhe kubikët e patateve të kenë zier.

Më pas, e largoni nga zjarri, shtoni djathin kaçkavall të grirë dhe përziejeni derisa masa të njëtrajtësohet.

Marrim një petë byreku, e hapim dhe shtojmë masën e përgatitur.

I japim formën e rolesë dhe më pas e presim në disa copa si byreçka dhe sipër i lyejmë me vezë.

E fusim dhe e pjekim në furrë me 180 gradë.

Shefi i Kuzhinës Marku, shpjegon për AgroWeb.org se ajo që e bën këtë gatim shumë të shijshëm është kremi i djathit.

Kremi i djathit

Gjysmë kutie me pana ose pak ajkë qumështi

2-3 lugë gjelle djathë kaçkavall i grirë

Pak piper dhe vaj ulliri.

I përziejmë mirë që të gjithë përbërësit dhe i vendosim në zjarr. Në momentin që masa nis të ngrohet e heqim.

Byrekun e vendosim në një pjatancë dhe sipër i shtojmë kremin e djathit.

AgroWeb.org ju fton ta provoni këtë recetë e të ndani me ne përvojën tuaj./AgroWeb.org