Një shije jo thjeshtë interesante por krejt mbresëlënëse janë gështenjat e përgatitura në formën e glikosë
Është pikërisht periudha e artë e gështenjave. Disa i preferojnë të pjekura në prush, disa të tjerë të përvëluara në ujë, por ka dhe një tjetër shije, ndoshta më superiore se të gjitha të tjerat. Gliko me gështenja.
Kush e ka provuar është mahnitur! Të gjitha glikotë shqiptare janë të mrekullueshme, të shijshme. Tradita e amvisave shqiptare në përgatitjen e glikove është sa magjepsëse për shijen aq edhe unike në të gjitha llojet e saj.
E nëse shumë kush është çuditur kur ka dëgjuar për herë të parë për glikonë e domates apo patëllxhanit, e më pas është mrekulluar nga shija e tyre, do të surprizohet edhe më shumë nëse provon glikonë me gështenja.
Gështenja është një nga arrorët më të shijshëm të vjeshtës dhe dimrit. E ndërsa jemi mësuar t’i shijojmë ato të pjekura apo të zjera, një shije jo thjeshtë interesante por krejt mbresëlënëse janë gështenjat e përgatitura në formën e glikosë.
Falë përmbajtjes së tyre të lehtë, kremoze, të ëmbëlsuar në formën e glikosë, më shumë se sa një recetë kjo është një formulë e vërtetë unike që magjeps këdo me shijen e saj.
AgroWeb.org sjell këtë recetë me të vërtetë të veçantë glikoje me gështenja krokante për ta përgatitur atë në shtëpi. Gjithçka që do duhet krahas përbërësve janë edhe përkushtimi, dashuria dhe durimi.
Përbërësit
1 kg gështenja të pastruara (1250 gr të papastruara)
1 kg sheqer
650 ml ujë
1/2 – 1 lugë e madhe lëng limoni
Përgatitja
Për të përgatitur këtë gliko, gështenjat duhen zgjedhur të mëdha, të padëmtuara dhe me lëkurë të shndritshme. Pasi i kemi pastruar, në anën e poshtme mbështetëse presim gështenjat me thikë duke krijuar një formë kryqi të thellë deri në 3 milimetra.
Pasi bëjmë këtë prerje tek të gjitha gështenjat, i hedhim në tenxhere me ujë në mënyrë që të zjejnë.
E mira do të ishte që të mos i zjenim të gjitha bashkë por nga 10-15 kokrra për çdo herë, me qëllim që çdo kokërr të marrë zjerje të plotë.
I lëmë të zjejnë pak dhe në momentin që gështenjat nisin të hapen tek pjesa e poshtme ku kemi bërë prerjen i heqim nga uji dhe i lëmë të thahen në një pecetë, duke i mbështjellë njëkohësisht që të qendrojnë të ngrohta.
Pas kësaj nisim pastrimin duke larguar me kujdes të gjithë pushin e kaftë që mbështjell gështenjat. Ky pastrim është shumë i rëndësishëm për të përftuar ngjyrën e bardhë të gështenjave.
Pasi i kemi pastruar, i vendosim të zjejnë të gjitha përreth 20 minuta. I kontrollojmë sa të zbuten me kujdes që të ruajnë formën e tyre dhe të mos prishen.
Pjesa më delikate
Që të qendrojnë pak krokante, gështenjat nuk i lëmë të zjejnë plotësisht. Nga ana tjetër, në një tenxhere përgatisim sherbetin. Hedhim ujin, sheqerin dhe i zjejmë në zjarr mesatar për 10 minuta derisa lëngu të bëhet sherbet.
Më pas hedhim lëngun e limonit bashkë me gështenjat dhe vijojmë zjerjen edhe për maksimumi 5 minuta të tjera.
I heqim nga zjarri dhe i lëmë në tenxhere për 12 orë. Të nesërmen i vendosim sërish në zjarr mesatar dhe i lëmë të zjejnë për maksimumi 10 minuta. I heqim nga zjarri dhe i lëmë të ftohen.
Në këtë moment gështenjat përthithin ëmbëlsinë e shurupit. Pasi ftohen, glikotë i vendosim me kujdes në vazo qelqi të sterilizuara dhe i mbyllim kapakët fort. Vazot me gliko duhet të mbahen në një vend të errët dhe të freskët./AgroWeb.org
Lini një Përgjigje