Një recetë fantastike, ideale për t’u shijuar sidomos kur koha bën ftohtë.
Kjo gjellë shije plotë jo vetëm që ngop organizmin por i jep atij fuqi dhe energji.
AgroWeb.org ju sjell më poshtë recetën e përgatitjes së turlisë me perime të dimrit, të cilat gjenden në çdo treg e dyqan fruta-perimesh.
Përgatitja e Turlisë Dimërore
Përbërësit
- 400-500 gr mish tul viç
- 1 kokërr qepë
- 3-4 patate mesatare
- 2 presh ( vetëm pjesa e bardhë)
- 3-4 karrota
- 1 filxhan çaji me bizele
- 2-3 lugë gjelle me salcë domatesh
- Kripë
- 1 gjethe dafinë
- Rigon (sipas dëshirës)
- Vaj ulliri
Përgatitja
Si fillim, AgroWeb.org ju udhëzon që të qëroni mirë karrotat dhe patatet dhe t’i ndani në kubikë të mëdhenj.
Patatet ndajini në katër pjesë nëse janë mesatare dhe në gjashtë pjesë nëse janë të mëdha.
Ndërsa karrotat prijini në rrathë rreth 2 cm, të njëjtën gjue bëni edhe me pjesën e bardhë të preshit.
Pastroni mishin dhe prijeni në kubikë jo të vegjël.
Kalojeni në një tenxhere me vaj ulliri dhe kaurdiseni nga të dyja anët.
Në vijim, shtoni salcën e domates, kaurdiseni dhe më pas shtoni qepën e grirë hollë, kaurdiseni për pak minuta e më pas shtoni karrotat, patatet dhe preshin.
Në fund shtoni bizelet, përzjeini të gjitha bashkë, shtoni kripën, gjethen e dafinës dhe rigonin nëse dëshironi shijen e tij.
Shtoni ujë derisa të gjithë përbërësit në tenxhere të mbulohen por jo plotësisht dhe lëreni gjellën të ziejë në zjarr të ngadaltë derisa mishit ë zbutet plotësisht dhe turlia të mbetet me pak lëng./AgroWeb.org
Lini një Përgjigje