Jemi mësuar së fundmi të shijojmë dhe vlerësojmë qumështin e bajameve, ose qumështin e arrorëve të tjerë si baza ideale për një sërë lëngjesh plot vlera dhe ushqyes.
Teksa jemi në mesin e një revolucioni të qumështit me bazë arrore, AgroWeb.org dëshiron t’ju prezantojë me qumështin e fistikut i pasur ma kalium, magnez, vitamina A dhe K, duke mos lënë pa përmendur dozën e mirë të proteinave.
Qumështin e fistikut e gjejmë në katër shije, duke nisur që nga ajo klasikja me aromë vanilje e deri tek ajo me luleshtrydhe, të gjitha shumë herë më të mira dhe më të shëndetshme se variantet tregtare që gjejmë nëpër raftet e marketeve.
Qumështi i fistikut me të gjithë shijet shtesë të tij është shumë i shijshëm, po aq i shijshëm sa çdo qumësht arror që mund të keni pirë deri tani. Fistikët janë natyralisht të ëmbël me pak nuancë të pikantes.
Qumështi kremoz i fistikut është natyralisht i ëmbël dhe nuk përmban asgjë artificiale. Ai ëmbëlsohet me hurma Arabie dhe me ushqime natyrale siç janë vanilja, kakao, luleshtrydhet e freskëta apo kafeja ekspres.
AgroWeb.org do t’ju tregojë formulën e përgatitjes së qumështit të fistikut në kushtet e shtëpisë. Mjafton që fistikët t’i mbani në ujë gjatë gjithë natës, t’i përzieni në një mikser ose sipas preferencës t’i ruani të paprekur për një ndjesi më të plotë.
Qumësht me fistik, hurma Arabie dhe vanilje
Përbërësit:
- 4 gota ujë
- 1 gotë uji plot me fistikë pa lëvozhgë (të pakriposur)
- Gjysmë gote me hurma Arabie pa bërthamë
- Bishtaja e vaniljes e prerë në 5 centimetra ose një lugë vanilje pluhur
- Një majë luge çaji me kanellë
- Shumë pak kripë
Përgatitja:
Zhytini fistikët e qëruar në ujë dhe mbajini për gjashtë orë. Shpëlajini dhe kullojini. Hidhini në një mikser së bashku me 4 gotat e ujit, hurmat e Arabisë, vaniljen, kanellën dhe kripën.
Përziejini së bashku për 3 deri në 5 minuta dhe më pas hidheni në një napë ose kullesë, lëreni të kullojë dhe vendoseni në një enë ose shishe të mbyllur.
Qumështi i fistikut shijon më shumë kur është i ftohtë. Ruajeni në frigorifer për disa ditë. Përpara përdorimit tundeni shishen që lëngu të jetë i njëtrajtshëm. Kjo sasi vlen për katër gota./AgroWeb.org
