Si t’i Ruani Bamjet në Shtëpi për Shije në Çdo Stinë

Nëse ju pëlqen shija e gatimeve të ndryshme me bamje, tani është sezoni i tyre.

Problemi me perimet sezonale është se nuk i shijon dot gjatë gjithë vitit.

AgroWeb.org ju sjell dy mënyra krejt të lehta për t’i ruajtur bamjet në mënyrë që t’i përgatisni recetat tuaja të dashura jo vetëm në verë.

Merrni bamjet e freskëta, por sigurohuni që të mos jenë të pabëra apo që të kenë filluar të zbuten, pasi do të humbasin shijen e tyre.

Por nëse do t’i përgatisni sigurohuni që t’i blini po atë ditë, kështu nuk do të qëndrojnë në frigorifer.

Metoda e parë

Pastrimi me ujë të ftohtë

Si fillim duhet t’i lani në ujë të bollshëm për të hequr papastërtitë që mund të kenë.

Më pas, AgroWeb.org ju udhëzon t’i vendosni vetëm për pak minuta në një tas me ujë dhe pak uthull molle që të largojmë pushin që kjo perime ka.

Heqim bishtat

Me ndihmën e një thike heqim bishtat e bamjeve.

Por duhet të tregojmë kujdes që të mos presim që të gjithë pjesën e bishtit të bamjes.

Pasi nëse farat do të ekspozohen, kur t’i vlojmë, bamja do të humbasë formën e saj.

 Vendosim në zjarr një tenxhere me ujë

Një tenxhere mesatare e mbushim me ujë, dhe e lëmë në zjarr deri sa të vlojë.

Këtë ujë do ta përdorim për të kaluar pak bamjet.

Në momentin që të shohim bulëza të formohen në sipërfaqen e ujit, marrim bamjet e qëruara dhe i hedhim në tenxhere.

Duhet të bëjmë kujdes që të mos i hedhim të gjitha njëherësh, pasi ato që do të ngeleshin në fund të tenxheres do të zbuteshin më shumë seç duhet.

I lëmë në ujë për rreth 3-4 minuta. Nëse keni bamje të vogla 3 minuta janë mjaftueshëm.

Por nëse keni madhësi të ndryshme sigurohuni që t’i ndani ato më të mëdhatë pasi duan më shumë kohë.

I kalojmë në ujë të ftohtë

Mbushni një tas me ujë shumë të ftohtë. Pasi t’i keni hequr nga uji i nxehtë bamjet do t’i kaloni në ujin e ftohtë.

Koha e ftohjes duhet të jetë e njëjtë me atë të vlimit. Pra dhe këtu do t’i lini bamjet rreth 3-4 minuta në varësi të madhësisë së tyre.

Ky proces duhet bërë menjëherë pasi i heqim nga tenxherja, kështu ato nuk do të zbuten më.

Sigurohuni që ujin e ftohtë ta ndërroni shpesh pasi do të ngrohet nga bamjet.

Me këtë mënyrë eleminohen enzimat që kanë perimet dhe frutat të cilat i lejojnë që të vazhdojnë e të piqen deri sa ato kalben.

Bamjet kështu do të ruajnë ngjyrën, shijen dhe freskinë e tyre dhe pas ngrirjes.

Ngrirja

Pasi t’i keni ftohur, me ndihmën e një pecete kuzhine, thani me kujdes që të mos i prishni formën bamjeve.

Kur të keni mbaruar me këtë proces, vendosini bamjet në një qese plastike dhe vendosini në ngrirje. Kjo metodë lejon që bamjet të ruhen deri ne 3-4 muaj.

Metoda e dytë

Metoda tjetër që AgroWeb.org ju udhëzon për ruajtjen e bamjeve është ajo me skuqjen e lehtë të tyre në një tigan.

Këtu bamjet nuese preferoni i prisni në copa të vogla që të skuqen në mënyrë të barabartë.

Pasi t’i keni prerë apo jo spërkatni me pak niseshte dhe kalojini në tigan.

Duhet të siguroheni që kur t’i hiqni nga tigani për t’i ftohur të mos jenë njëra mbi tjetrën. Kjo nuk do të lejoj që ato të zbuten.

Më pas vendosini në qese plastike dhe  vendosini në ngrirje.

Kur të doni t’i gatuani, mjafton që t’i nxirrni nga ngrirja pak më parë se t’i përdorni, kështu ato nuk do të zbuten dhe të bëhen të ujshme./AgroWeb.org