Një nga gatimet tradicionale të amvisave shqiptare është byreku.
Por pavarësisht mbushjes që mund të jetë e ndryshme, ajo që mbetet e njëjtë dhe sfidë e vërtetë është hapja e petëve, e cila kërkon pak kohë në përgatitje.
E në shumë raste, për shkak të mungesës së kohës amvisat detyrohen të blejnë petë të gatshme.
Në këtë artikull, AgroWeb.org ju tregon mënyrën më të lehtë për të hapur petët si dhe si t’i ruani ato, që çdo herë të përgatisni byrekun perfekt.
Përbërësit që ju duhen për brumin e petëve
(Më poshtë masat janë për përgatitjen e petave të një byreku, sasia e përbërësve përzgjidhet në bazë të petave që preferoni të përgatisni)
- 1 kg miell
- Kripë
- 350 ml ujë të vakët
- Dy lugë vaj ulliri
Përgatitja
Në një tas të madh hidhni miellin duke e kaluar në një sitë, dhe më pas spërkateni me kripë.
Krijoni një gropë dhe shtoni aty ujë dhe vajin e ullirit. Përzjejeni me një pirun derisa brumi të fillojë të lidhet, do të duhet rreth 10 minuta.
Më pas punojeni me duar, në fillim brumi do të jetë i ngjitshëm, por me punimin do të marri formën e duhur.
Kur sipërfaqja e brumit të jetë e njëtrajtshme dhe ai të shkëputet lehtë nga tasi mbulojeni me një pecetë kuzhine.
Brumin duhet ta lini të vijë përreth një orë në temperaturën e ambjentit.
Më pas jepini brumit një formë cilindrike dhe ndajeni në 25 kulaçë të vegjël, të cilët punojini derisa t’i jepni formën e rrubullakët.
Mbulojini me një pecetë me pak lagështirë, kështu brumi nuk do të thahet e do të qëndrojë i butë.
Pastrojmë sipërfaqen ku do të hapim petët dhe e spërkasim me niseshte.
Marrim topthin e parë dhe e në fillim e shtypim me dorë lehtë për ta hapur pak.
Më pas me ndihmën e petësit fillojmë dhe e punojmë, por tregoni kujdes që të rrotulloni petën herë pas here.
Kështu ajo do të marri një formë rrethore.
Peta duhet të jetë e madhe sa pëllëmba juaj. Kështu do të vazhdoni deri sa të keni formuar pesë peta të vogla.
Hapi tjetër është shumë i lehtë, merrni petën e parë dhe spërkateni me pak vaj ulliri, dhe vendosini sipër petën tjetër.
Kështu do t’i rendisni të pesta petët.
Vazhdoni derisa me 25 kulaçët të keni formuar 5 petë të vogla.
Spërkateni përsëri sipërfaqen ku do të punoni me niseshte, dhe me petësin e trashë punojeni petën derisa të jetë dyfishuar në sipërfaqen e saj.
Më pas merrni petësin e hollë, i cili kërkon një teknikë tjetër.
Vendoseni në skajin e petës dhe rrotullojeni duke mbledhur dhe petën me të.
Lëvizeni petësin në mes të tavolinës dhe me të dyja duart do ta rrotulloni nga qendra drejt skajeve të tij.
Më pas hapeni petën tërësisht, dhe bëni të njëjtin veprim për të gjitha anët e petës. Kështu ajo do të hapet në mënyrë të njëtrajtshme.
Këtë proces do ta përsërisni për të gjitha petët.
Petët e byrekut bëhen më të trasha se sa petët e bakllavasë, prandaj nuk do të jenë gati transparente.
Petët hapini sa sipërfaqja e tavës tek e cila do të përgatisni byrekun tuaj, por mos u shqetësoni nëse nuk janë të barabarta.
Tharja dhe ruajtja
Shtroni në një tavolinë të madhe, të hapur një mbulesë të pastër tavoline. Vendosni petët e hapura aty dhe lërini në temperaturë ambjenti përreth 40 minuta.
Ndërkohë parangrohni furrën e sobës në 170 gradë dhe nisni të piqni petët duke i vendosur në pjesën e poshtme të furrës.
AgroWeb.org ju këshillon që t’i lini nga pesë minuta secilën petë duke e kthyer nga të dyja anët.
Vijoni kështu me të gjitha petët që keni hapur.
Pasi t’i keni pjekur, lërini në temperaturë ambjenti që të ftohen dhe më pas ndajini sipas sasisë së petëve që keni përgatitur.
Futini në qese të mëdha plastike dhe ruajini në një vend të freskët dhe me hapësirë të bollshme në mënyrë që të mos prishen.
Në momentin që dëshironi të përgatisni byrekun tuaj të preferuar petët do t’i keni gati, mjafton të përgatisni mbushjen.
Petët e përgatitura në këtë mënyrë mund t’i ruani deri në 6 muaj./AgroWeb.org
