Është një ndër salcat më të shijshme që i shtojnë lezetin çdo gatimi në tryezë.
Krejt e lehtë dhe e freskët në shije dhe një kombinim përfekt mes athtësisë së salcës së kosit si dhe aromës së hudhrave dhe kastravecave.
Kjo salcë është fantastike në shoqërimin e gatimeve të pjekura, sidomos mishrave por edhe gatimeve të tjera.
AgroWeb.org u sugjeron më poshtë përgatitjen e salcës së kosit me kastraveca dhe hudhra në shtëpi, ku padyshim shija e saj është më e freskët dhe më e ploë.
Përgatitja e Salcës së Kosit në Shtëpi
Përbërësit
2 kg kos
1 filxhan vaj ulliri ekstra të virgjër
1 lugë të vogël me kripë
2-3 thelpinj hudhër (nëse dëshironi mund të shtoni më shumë në varësi të aromës së preferuar)
1 tufë majdanoz të copëtuar hollë
Një gotë me arra të grira (nëse dëshironi)
1 kastravec mesatar
Përgatitja
Marrim kosin dhe e transferojmë në një napë të pastër të cilës i japim formën e një traste të thjeshtë.
Trasta varet në një vend të caktuar në kuzhinë dhe lihet të kullojë për 12 orë. Vendosni një enë poshtë nëse nuk keni një vend ku të rrjedhë lëngu.
Pasi kosi ka kulluar plotësisht, hapeni trastën e napës dhe hidheni masën e përqendruar të kosit në një enë qelqi.
Shtojmë kripën dhe e përziejmë mirë.
Më pas hedhim një filxhan kafeje me vaj ulliri dhe e përziejmë mirë.
Në një enë të vogël shtypim thelpinjtë e hudhrës me pak kripë që të çlirojnë aromën e tyre karakteristike.
Mos harroni që hudhra duhet përdorur gjysëm ore pas prerjes, pasi ka lëshuar alicinën e cila përçon shumë prej vlerave më të mira të hudhrës.
Grijmë në rende hollë kastravecin dhe e bashkojmë me salcën e kosit.
Nëse dëshironi mund të shtoni majdanozin e grirë hollë dhe arra të copëtuara.
Në përfundim salca rrihet dhe përzihet mirë me një lugë druri.
Vendoseni enën në frigorifer dhe mbylleni mirë me kapak.
Salca është mirë të konsumohet pas 2 orësh nga përgatitja.
Kjo kohë është e nevojshme për përzierjen e plotë të aromave të të gjithë përbërësve./AgroWeb.org
Lini një Përgjigje