Ndryshe nga shumë lloje merimangash që jetojnë në Shqipëri, kjo merimangë është helmuese.
Dhe nxehtësia, sipas ekspertëve, mund të shpjegojë rritjen e rasteve të pickimeve gjatë periudhës së fundit.
Sipas ekspertëve të Institutit të Shëndetit Publik sidomos në qytetet e jugut të vendit, numri i rritur i raportimeve është për shkak të faktit se ky insekt tërhiqet nga nxehtësia.
Pse quhet merimanga violinë?
Quhet kështu prej karakteristikave që ka në trup. Insekti ka përmasa mjaft të vogla, rreth shtatë milimetra dhe femrat janë më të mëdha se meshkujt.
Emri shkencor i merimangës violinë është Loxosceles rufescens.
Kjo merimangë ka ngjyrë të verdhë në kafe, këmbët e saj janë të gjata, të holla dhe të mbuluara me push të lehtë.
Ndryshe nga tetë sytë e shumicës së merimangave, ajo ka gjashtë grupuar në tre çifte.
Në kohët e fundit po regjistrohen mjaft raste të kafshimeve nga ky insekt i vogël, e cila shpjegohet me faktin se merimanga violinë bëhet agresive në kohë të nxehtë.
Një tjetër pamje nga afër e merimangës violinë.
Burime shkencore të konsultuara nga AgroWeb.org raportojnë se zakonisht merimanga qëndron larg njerëzve duke zgjedhur vende ku mund të fshihet, si këpucë, kuti të vjetra, etj.
Por me raste shëtit edhe në sirtarët e rrobave dhe vende të tjera të izoluara.
Çfarë shkakton pickimi i merimangës violinë?
Pickimi i insektit shkakton kruajtje, djegie dhe skuqje brenda dy apo tre ditësh nga pickimi.
Pickimi i merimangës violinë mbart baktere anaerobe, të cilat, nga ana tjetër, arrijnë të shkaktojnë dëmtime në lëkurë, tek muskujt dhe te veshkat, madje arrin të sjellë edhe hemorragji.
Prandaj, sipas ekspertëve, është e rëndësishme të shkoni menjëherë në urgjencën mjekësore.
Pickimi i kësaj merimange nuk sjell ndonjë dhimbje të fortë kur ndodh madje lëkura nuk tregon menjëherë ndryshime apo shenja.
Gjatë orëve pas pickimit, vendi bëhet i kuq dhe jep ndjesi shpimi.
Çfarë duhet të bëni në rast të një pickimi?
Plagë e shkaktuar nga pickimi i merimangës violinë.
Lani zonën e prekur nga pickimi me sapun dhe ujë të rrjedhshëm. Dezinfektojeni zonën e pickimit me alkool dhe paraqituni tek mjeku./AgroWeb.org
* Ky informacion ka për qëllim të plotësojë, të mos zëvendësojë këshilla nga mjeku juaj ose ofruesi i kujdesit shëndetësor dhe nuk ka për qëllim të mbulojë të gjitha përdorimet e mundshme, masat paraprake, ndërveprimet ose efektet negative. Ky informacion mund të mos i përshtatet rrethanave tuaja specifike shëndetësore.
Lini një Përgjigje