Kjo është një ëmbëlsirë shumë e veçantë.
E thjeshtë në përgatitje e me një shije që të përfshin tërësisht me ëmbëlsinë e saj.
Mund të përgatitet në çdo kohë, në raste festash a gëzimesh familjare, si gosti ndaj miqve apo edhe për të ëmbëlsuar veten dhe më të dashurit tuaj.
AgroWeb.org sjell më poshtë hapat që duhet të ndiqni për përgatitjen e kësaj ëmbëlsire krejt lehtë në shtëpi.
Përgatitja e Kekut të Shtëpisë me Sherbet Qumështi
Përbërësit
- 10 lugë gjelle me miell
- 10 kokrra vezë
- 7 lugë gjelle sheqer
- 7 lugë gjelle gjalpë të tretur
- 1 pako me pluhur pjekjeje (e gjeni në markete)
Për sherbetin e qumështit
- 500 ml qumësht
- 10 lugë gjelle sheqer
- Vanilje
Përgatitja
Si fillim AgroWeb.org ju udhëzon të ndani të bardhat dhe të verdhat e vezëve veçmas.
Të bardhat e vezëve kalojini në mikser derisa të krijohet një shkumë e fortë me vëllimin e shumëfishuar dhe që është e palëvizshme.
Më pas shtoni sheqerin tek masa e shkumës me të bardhat e vezëve dhe vijoni t’i përzieni vazhdimisht.
Në vijim, ngadalësojmë shpejtësinë e mikserit dhe shtojmë një nga një të verdhat e vezëve ndërsa vijojmë të përzjejmë masën.
Më pas, miellin e përzjejmë me gjalpin e tretur dhe pluhurin pjekës dhe e shtojmë tek masa e vezëve dhe e përzjejmë mirë me tel kuzhine në mënyrë që masa të jetë homogjene dhe të mos krijohen kokërriza.
Tavën ku do pjekim kekun e lyejmë me pak gjalpë apo vaj, i hedhim pak pluhur mielli në të gjithë sipërfaqen dhe më pas shtojmë brumin e përgatitur.
Tavën e fusim në furrë të parangrohur me 200 gradë. E lëmë në këtë temperaturë për 10 minuta dhe më pas temperaturën e furrës e ulim në 175 gradë dhe e lëmë që keku të piqet edhe për 20 minuta.
Ndërsa keku piqet, hedhim qumështin në një tenxhere bashkë me sheqerin dhe vaniljen dhe i lëmë të zjejë dhe të trashet në formën e shurupit.
Sapo keku të jetë pjekur e nxjerrim nga furra, i bëjmë disa vrima me pirun i hedhim sherbetin e qumështit të nxehtë gjithashtu dhe e lëmë të pushojë derisa ëmbëlsira të përthithë gjithë sherbetin.
Sipër sipas preferencës mund të shtoni arra të thërrmuara por edhe arra kokosi të grira gjithashtu./AgroWeb.org
