Recetat tradicionale jnë një pikë e fortë e Shqipërisë, saqë tanimë janë kthyer në një faktor ndikues për ecurinë e turizmit.
Çdo qytet i vendit tonë ka një ëmbëlsirë apo gatim me të cilin shquhet.
Këtu mund të përmendim flinë për qytetet veriore, petullat e fshira për Korçën e Pogradecin, Shapkatin e Lazaratit apo pasha-qoftet e Gjirokastrës.
Një nga këto receta është edhe kjo që ju tregon AgroWeb.org sot.
Bukëzare, është një ëmbëlsirë tradicionale shqiptare e cila përgatitet më së shumti në Elbasan.
Po, ky qytet nuk njihet vetëm për ballokumet si ëmbëlsirën më të shijshme.
Receta e bukëzares është shumë e thjeshtë për t’u përgatitur ndaj dhe nuk do t’ju mundojë së tepërmi.
Përbërësit
- 5 vezë
- 580g sheqer
- 750g miell
- 1 pako me fryrës ëmbëlsirash
- Pak kripë
Për sherbetin
- 620ml ujë
- 680g sheqer
Përgatitja
Ndizni furrën në 180 gradë kështu do të jetë e ngrohtë kur të piqni ëmbëlsirën tuaj.
Si fillim nisni me ndarjen e vezëve në dy tasa të mëdhenj, të bardhat në një dhe të kuqet në një tjetër.
AgroWeb.org ju këshillon që të përdorni rrahësin elektrik pasi kështu do të shkurtoni kohë, por edhe nuk do të lodheni.
Rrihni të bardhat e vezëve me pak kripë derisa të formoni merengen e cila nuk shkëputet nga tasi.
Nëse e shihni që ajo rrëshqet apo nuk është e mpiksur si duhet, duhet ta rrihni akoma.
Pasi të keni mbaruar me merengen AgroWeb.org ju sugjeron që të shtoni të verdhat e vezëve dhe përsëri të rrihni masën.
Në fund do të keni një krem të njëtrajtshëm dhe plot volum.
Kini kujdes që të mos e teproni me rrahjen e vezëve, pasi është shumë e rëndësishme për këtë recetë që volume i vezëve të mos bjerë.
Kështu ëmbëlsira do të dalë më e fryrë dhe e poroze.
Vazhdoni me sheqerin, i cili duhet të shtohet ngadalë tek vezët dhe të rrihet derisa kokrrizat e tij të jenë tretur.
Kjo i jep dhe bukëzares shijen fantastike dhe karakteristike nga ana tjetër brumi i saj rezulton i butë dhe elastik.
Më pas shtoni fryrësin për ëmbëlsira dhe pasi ta keni përzierë mirë e ka radhën mielli.
AgroWeb.org ju këshillon që miellin ta sitni para se ta shtoni tek masa, kështu brumi do të ketë një butësi të mrekullueshme.
Kur të keni mbaruar me brumin e bukëzares ai duhet të ketë një shkëlqim, që vjen si rezultat i rrahjes për një kohë të gjatë të vezëve me sheqerin.
Lyeni një tavë me gjalpë apo vaj dhe kaloni aty brumin.
Futeni për ta pjekur në furrën e ngrohur derisa sipërfaqja e ëmbëlsirës të ketë marrë një ngjyrë të artë të ndezur.
Ndërkohë që bukëzarja piqet ju përgatisni sherbetin.
Kjo ëmbëlsirë mund të shijohet edhe pa sherbet, por nëse doni që të jetë më e plotë mos e anashkaloni këtë hap.
Në një tenxhere hidhni ujin dhe aty tresni sheqerin e nevojitur.
Më pas vendoseni në zjarr dhe lëreni të ziejë plotësisht.
Kur ëmbëlsira të jetë gati lëreni të ftohet, priteni në rombe dhe hidhini sherbetin e nxehtë.
Më pas lëreni që buka ta pijë sherbetin dhe të ftohet dhe më pas mund ta shërbeni./AgroWeb.org
