Aroma e fokaçes së ngrohtë ndihet me kilometra larg!
Një gatim me bazë brumi i cili ka një shije marramendëse në të gjithë versionet e tij.
Mund ta keni provuar me recetën klasike me vaj ulliri dhe rozmarinë, apo atë plot shije me domate, gjithsesi fokaçja mbetet e preferuara e familjes.
AgroWeb.org sot ju tregon hap pas hapi përgatitjen e e fokaçes me kungulleshka, duke qenë se tani janë edhe në sezon.
Fetat e kungulleshkave do të shihni që do t’i japim një aromë dhe shije krejtësisht të veçantë duke e kthyer fokaçen në pjatën kryesore të tryezës.
Përbërësit për brumin e ardhur
- 100g miell
- 1g maja e njomë
- 100ml ujë
Përbërësit për brumin
- 400g miell
- 10g kripë
- 20ml vaj ulliri
- 200ml ujë
- 4g maja të njomë
Përbërësit për mbushjen
- 100g kungulleshka
- Kripë
- Piper të zi
- 10ml vaj ulliri
Përgatitja
Për të përgatitur këtë recetë të shijshme duhet që në fillim të përgatisni brumin e ardhur.
Në një tas përzieni miellin, majanë dhe ujin e përshkruar në recetë.
Punojeni lehtë me një lugë derisa të formoni një brumë të hollë që i ngjason një mase kremoze.
Këtë brumë duhet ta lini të pushojë për 12 orë, ndaj dhe AgroWeb.org ju këshillon që ta përgatisni që në darkë.
Kur brumi i ardhur të jetë gati kalojeni në një tas më të madh.
Aty shtoni ujin, majanë, miellin, kripën, vajin e ullirit dhe nisni ta punoni me duar.
Kur të shihni që përbërësit janë lidhur, AgroWeb.org ju sugjeron që brumin ta kaloni në sipërfaqen e tavolinës suaj.
Punojeni lehtë duke mos i shtuar miell, pasi brumi duhet të ketë pak lagështirë.
Kalojeni brumin në një tas dhe mbulojeni me qese kuzhine për ta lënë të pushojë për 3 orë.
Pasi të ketë kaluar koha e nevojitur punojeni lehtë brumin dhe vendoseni në një tavë të spërkatur me vaj.
Lyeni sipërfaqen e tij me vaj ulliri dhe vendosni fetat e grira të kungulleshkave duke i shtypur lehtë.
Spërkateni me piper të zi dhe pak kripë për shije dhe piqeni në furrë me 200 gradë për 25-30 minuta./AgroWeb.org
