Një recetë me produktet më të shëndetshme të prodhuara nga toka shqiptare.
Spinaq, labot, nenë dhe erëza e mrekullueshme e nenexhikut, e kombinuar në një ndër gatimet më speciale dhe të shijshme të kuzhinës shqiptare, japrakët.
Fantastik kur përgatiten me gjethe rrushi apo lakër të bardhë por padyshim edhe version i tyre i përgatitur me spinaq është i mrekullueshëm.
Një mënyrë krejt e shëndetshme për t’u ushqyer shëndetshëm dhe për t’i dhuruar organizmit mirëqenie.
AgroWeb.org u sugjeron më poshtë recetën e përgatitjes së japrakëve krejt lehtë në shtëpi sipas traditës së nënave dhe gjysheve shqiptare.
Përgatitja e Japrakëve me Spinaq në Spinaq
Përbërësit
- 30-35 gjethe spinaqi
- 3 gota miell misri
- 1 dorë qepë të njoma
- 2 duar labot dhe nenë
- 3 filxhan kafeje vaj ulliri
- Nenexhik
- Kripë
- Piper
Përgatitja
Për përgatitjen e japrakut me spinaq përzgjidhen gjethe të mëdha dhe të njoma (llogariten 7-8 gjethe për person).
Pasi lahen me ujë të rrjedhshëm, gjethet kalohen në ujë të ngrohtë me kripë sa të zbuten. Më pas hapen në tavolinën e punës për t’u bërë gati për mbushje.
Përgatitja e mbushjes
Bishtat e qepëve të njoma grihen hollë së bashku me nenë, labot, kopër dhe nenexhik, majdanoz dhe shtypen me duar, sa të lëshojnë lëngun e tyre.
Mielli i misrit sitet dhe vihet në një tenxhere. Shtohen kripë, ujë i nxehtë dhe vaj ulliri.
Masa përzihet dhe përgatitet një brumë i butë.
Në të shtohen qepët e përgatitura, kripë dhe përzihen.
Përgatitja e Japrakëve
Gjethja vendoset në dorën e majtë dhe në të vendoset mbushja me lugë.
Pasi mblidhen anët e gjethes në formë rolete ngjishet me dorë.
Në një tenxhere shtrohen disa gjethe spinaqi dhe vendosen japrakët e ngjeshur njëri pas tjetrit (jo më tepër se 2-3 reshta).
Sipër u vendoset një pjatë (që të mos hapen kur u hidhet uji) dhe mbi të hidhen kripë, vaj ulliri dhe ujë sa të dalë mbi pjatë. Japrakët lihen të zjejnë.
Shërbehen të ngrohta dhe shërbehen me kos, dhallë apo tarator./AgroWeb.org
Lini një Përgjigje