Në ditët e sotme mbrojtja e shëndetit është bërë akoma edhe më shumë e nevojshme.
Të gjithë mjekët thonë që përveç ndjekjes së rregullave të higjienës është e domosdoshme që të ushqeheni me produktet e duhura.
Shëndeti fundja në tavolinë nis.
Frutat dhe perimet japin vitaminat dhe mineralet e duhura organizmit.
Por përveç tyre ka edhe disa pije të cilat ju japin paketa plot energji të cilat rigjallërojnë trupin tuaj menjëherë.
E tillë është edhe receta që AgroWeb.org ju sugjeron sot.
Kompostot me fruta janë të shijshme por nga ana tjetër dhe një mënyrë shumë e mirë për të përfituar të mira për shëndetin.
Ne ju këshillojmë një kombinim krejt të veçantë i cili i jep më shumë shije por nga ana tjetër rrit dhe nivelet e vlerave.
Përbërësit
3-4 mollë të verdha
1 shkop kanelle ose 1 lugë çaji kanellë të bluar
1 limon
2 lugë çaji me mjaltë
Ujë
Përgatitja
Nisni me qërimin dhe prerjen e mollëve në copa mesatare dhe vendosini me ujë në një tenxhere.
Uji i nevojshëm për zierjen e mollëve ndryshon nga madhësia e mollëve, por 3-4 gota janë mjaftueshëm.
Lërini në zjarr mesatar mollët derisa të kenë zierë e zbutur plotësisht.
Më pas shtypini ato me ndihmën e kullores ose me blenderin, kështu lëngu do të jetë i trashë dhe i njëtrajtshëm.
Vendoseni përsëri në zjarr tenxheren dhe shtoni lëngun e një limoni dhe pak nga lëkura e tij.
Hidhni dhe mjaltin dhe në fund kanellën dhe lërini në zjarr ehe për 5 minuta të tjera.
Gjatë zierjes së dytë, uji do të avullojë më shumë dhe lëngu do të trashët më shumë.
Tani mjafton që këtë pije ta lini të ftohet pak e më pas ta ndani në gota.
Pjesa që ju mbetet mund të ruhet në frigorifer për 2-3 ditë në një shishe qelqi.
Shijojeni këtë komposto sa herë që dëshironi gjatë ditës./AgroWeb.org
Lini një Përgjigje