Dikur shiteshin në çdo cep të qytetin nëpër pastiçeri apo nga shitësit me karroca lëvizëse.
Dikush i quante pasta sy e të tjerë gurabije sy, kjo prej formës së tyre.
Duke qenë se në mes të ëmbëlsirës qëndronte zakonisht reçeli krijonte përshtypjen e një syri.
Me një 10 lekësh mund të kënaqeshe me shijen e tyre delikate dhe të mirë.
AgroWeb.org ju sjell recetën e shpejtë të përgatitjes së kësaj ëmbëlsire që vjen nga kujtimet e fëmijërisë së shumë nga ndjekësve tanë.
Ndiqni këshillat dhe provojeni menjëherë për t’u kthyer në ato kohë dhe për t’u treguar fëmijëve shijen e dikurshme.
PËRBËRËSIT
500 gr miell
3 kokrra vezë dhe një të verdhë,
150 gr gjalpë,
4 lugë gjelle me mjaltë,
1 filxhan kafeje me ujë,
1 lugë kafeje me sodë
150 gr sheqer
PËRGATITJA
Për të nisur me përgatitjen e këtyre gurabijeve me reçel fillimisht duhet të rrihni 3 vezët me sheqerin në një tas.
Kur kokrrat e sheqerit të jenë tretur dhe masa të jetë kremoze dhe e plotë shtoni gjalpin e shkrirë dhe të ftohur.
Për të shkurtuar kohë mund të përdorni rrahësin elektrik kështu edhe nuk lodheni.
Më pas e ka radhën mjalti dhe uji. Mos harroni që përbërësit duhet të lidhen dhe mjalti të mos ngelet në fund të tasit.
Miellin dhe sodën e bukës hidheni në sipërfaqen e pastruar të tavolinës dhe në mes hapini një gropë.
Masën që përgatitët në tas hidheni tek mielli dhe punojeni me duar.
Nisni nga anët duke marrë miell e duke e përzierë në mes me masën e lëngshme.
Brumi që do të formohet duhet të jetë jo shumë i fortë dhe shumë elastik.
Këtë brumë hapeni në formën e një petë të trashë rreth 1cm dhe priteni duke përdorur një gotë uji.
Petat e trasha rrethore kalojini në një tavë të shtruar me letër pjekjeje.
Brumin që mbetet bashkojeni përsëri dhe formoni përsëri gurabije.
Pasi të keni mbaruar me brumin, sipërfaqet e gurabijeve lyejini me të verdhën e vezës dhe në mes vendosini nga një kokërr reçel qershie.
Tavën futeni për t’u pjekur në 180 gradë Celsius dhe lërini derisa sipërfaqja e tyre të ketë marrë një ngjyrë të artë.
Zakonisht kërkon rreth 15-18 minuta për një pjekje perfekte.
Pasi të jenë pjekur gurabijet lërini të ftohen dhe më pas mund t’i shërbeni plot shije./AgroWeb.org
