Koronavirusi i cili u shfaq në Kinë në fund të vitit 2019, vazhdon të përhapet në shumë vende të botës duke rrezikuar shumë jetë.
Ekspertët thonë se po bëhet shumë e qartë tani se mosha e tretë dhe njerëzit me sëmundje kronike janë më të rrezikuar prej virusit se sa popullata e gjerë.
Çfarë Është Koronavirusi?
Ky lloj virusi hyn tek familja e viruseve të cilat shkaktojnë simptoma të ngjashme me ato të gripit.
Këtu përfshihen shenja si një rrufë e lehtë, kollë apo edhe komplikacione më të rënda të sistemit të frymëmarrjes ku përfshihet:
- Sindroma Respiratore e Lindjes së Mesme,
- Sindroma e Rëndë Respiratore Akute.
Ka disa lloje të këtij virusi të cilat janë të përhapura kryesisht tek kafshët dhe një lloj i ri që po përhapet edhe tek njerëzit.
Cilat Janë Simptomat?
Sipas ekspertëve të ISHP të cilëve i’u referohet AgroWeb.org, simptomat varen nga lloji i koronavirusit.
Megjithatë shenjat më të zakonshme janë problemet me aparatin e frymëmarrjes.
Ky virus shkakton:
- ethe,
- kollë,
- gulçim
- vështirësi te vazhdueshme në frymëmarrje.
Në raste më të rënda, infeksioni mund të shkaktojë pneumoni, sindromë të rëndë respiratore akute, insuficiencë të veshkave, madje edhe vdekje.– thuhet në lajmërimin e ISHP.
Të Moshuarit Më Të Rrezikuar Nga Virusi
Ekspertët e Universitetit të Kolumbias në Shtetet e Bashkuara thonë se vdekshmëria nga koronavirusi ka luhatje.
Ajo është më e lartë tek të moshuarit dhe njerëzit e prekur nga sëmundje kronike.
Duke iu referuar të dhënave që vijnë nga provinca Wuhan, në 80% të rasteve, infeksioni është i një niveli mesatar ndërsa në 4.7 përqind të rasteve konsiderohet si kritik.
Niveli i vdekshmërisë mbetet i ulët, megjithatë në grupmoshat mbi 80 vjeç është i lartë.
Në lidhje me sëmundjet kronike që përmendëm më lart, ekspertët kanë vënë re se ato që ndikojnë dhe përshpejtojnë infeksionin janë:
- Sëmundjet kardiovaskulare,
- Diabeti,
- Sëmundjet kronike të rrugëve të frymëmarrjes
- Hipertensioni.
Deri më tani, ekspertët thonë se epidemia arriti kulmin në datat 23-26 janar përpara nisjes së trendit zbritës që u vu re në javët e para të shkurtit.
Masat Prandaluese
- Lani shpesh duart me ujë dhe sapun ose pastrojini ato duke i fërkuar me dezifektant me bazë alkooli;
- Kur kolliteni apo teshtini, mbuloni gojën dhe hundën me gropëzën e bërrylit ose shami letre. Hidheni menjëherë shaminë e letrës në koshin e plehrave dhe pastaj lani duart;
- Mënjanoni kontaktet e ngushta me këdo që ka temperaturë dhe kollë;
- Paraqituni tek mjeku nëse keni kollë, temperaturë apo vështirësi në frymëmarrje dhe raportoni historinë e udhëtimeve nëse keni udhëtuar kohët e fundit;
- Mënjanoni kontaktet me tregjet e kafshëve të gjalla në zonat që kanë koronavirus
- Mënjanoni konsumin e produkteve të mishit të pagatuara apo gatuara jo shumë.
- Udhëtarët që kanë patur kontakte me raste të konfirmuara apo ekspozim direkt ndaj një burimi të mundshëm infeksioni duhet të vendosen në observim mjekësor.
- Kontaktet me rrezik të lartë duhet të mënjanojnë udhëtimet për periudhën e inkubacionit deri në 14 ditë;/AgroWeb.org
