Shumë njerëz preferojnë të humbasin peshë me anë të dietave të ndryshme, por për disa të tjerë kjo mund të jetë diçka problematike.
Prandaj shumë nutricionistë sugjerojnë gjithmonë të ndiqni disa rregulla të thjeshta, të cilat jo vetëm që do t’iu ndihmojnë të humbisni peshë, por njëkohësisht të qëndroni sa më të shëndetshëm.
Sipas tyre, dietat shpesh nuk funksionojnë sepse ndiqen vetëm për një afat të caktuar. Dhe pas këtij afati ju mund të gjendeni sërisht në rrezik për të rifituar peshën e humbur.
Kjo është arsyeja se përse ekspertët këshillojnë që në vend të dietave të planifikoni dhe të ndiqni një plan rreth mënyrës sesi ushqeheni.
AgroWeb.org në këtë artikull ju njeh me këshillat që ekspertët japin për tu ushqyer shëndetshëm dhe njëkohësisht për të pasur një peshë të qëndrueshme ndër vite.
Konsumoni proteina dhe fibra në çdo vakt
Rregulli numër një është të përfshini proteinat dhe fibrat në çdo vakt.
Proteinat, ndihmojnë metabolizmin të punojë më shpejtë dhe ju mbajnë të ngopur për më gjatë.
Fibrat, frenojnë në thithjen e sheqerit në trup, duke bërë që të përdorni glukozën për energji dhe ajo të mos ruhet në trup si yndyrë.
Ekspertët rekomandojnë që për mëngjes të konsumoni një omëletë me spinaq dhe djathë, për më shumë proteina dhe fibra. Gjithashtu të konsumoni edhe fruta, të cilat jo vetëm që përmbajnë shumë fibra por edhe lëndë të tjera ushqyese.
Për drekë, provoni pulë me një sallatë të bollshme, të ndjekur nga produktet e detit në vaktin e darkës.
Konsumoni vaktet tuaja në orare të caktuara
Nëse kërkoni të humbisni peshë në mënyrë të qëndrueshme, duhet të dini se sekreti qëndron tek ruajtja e niveleve të sheqerit në gjak.
Kur konsumoni ushqim në orare të caktuara, ju do të arrini të mbani të qëndueshme nivelet e sheqerit në gjak. Kjo do të bëjë që ju të mos konsumoni sasi të pakontrolluara ushqimi, të cilat ju bëjnë të shtoni peshë.
Për këtë ekspertët këshillojnë të konsumoni një meze të lehtë çdo katër orë. Gjithashtu të lini të paktën një hapësirë 12 deri në 14 orë ndërmjet konsumit të darkës dhe mëngjesit.
Mos i eleminoni tërësisht yndyrnat
Studime të ndryshme tregojnë se shtimi i yndyrnave të shëndetshme në regjimin tuaj ushqimor, mund të ndikojë pozitivisht në nivelet e insulinës dhe të zvogëlojë rrezikun e diabetit të tipit 2.
Përfshini të paktën një racion të vogël me përmbajtje yndyrore në çdo vakt. Për shembull ju mund të shtoni avokado dhe farat e lulediellit në sallatën tuaj, ose të shtoni vaj kokosi në pjatën e perimeve./AgroWeb.org
