Rritet Ndjeshëm Numri i Rasteve Ditore me COVID-19 në Shqipëri

210 0

Pas gati më shumë se dy muajsh, në Shqipëri është regjistruar një numër i lartë infektimesh nga COVID-19.

Ditën e djeshme nga kryerja e 3,526 testimeve janë zbuluar 43 raste të reja, duke shënuar numrin më të lartë ditor që prej datës 14 maj (49 raste).

Situata në spitale

Aktualisht janë 198 raste aktive me COVID-19 në të gjithë vendin ndërsa në Spitalin Infektiv po marrin trajtim spitalor të specializuar 6 pacientë.

Ndërkohë që prej 26 qershorit në Shqipëri nuk ka asnjë humbje jete nga coronavirus, kurse që prej fillimit të pandemisë janë regjistruar 2 456 të vdekur.

Rritja e rasteve të reja ditore vjen në një kohë kur ka dyshime për praninë e variantit “Delta”, ndërsa zyrtarisht një fakt i tillë ende nuk është konfirmuar.

Ministria e Shëndetësisë u ka bërë apel qytetarëve të vaksinohen për t’u mbrojtur nga COVID-19 dhe të shfrytëzojnë ditët e hapura të vaksinimit deri të dielën për personat mbi 18 vjeç.

Statistika (20 Korrik 2021)

Testime totale             862,958

Raste pozitive             132,740

Raste të shëruara       130,086

Raste Aktive                        198

Humbje jete                   2,456

Shpërndarja gjeografike e rasteve aktive sipas qarqeve:

Tiranë              89

Elbasan            21

Vlorë                17

Durrës              16

Fier                   15

Shkodër           13

Lezhë               13

Kukës                9

Korçë                4

Gjirokastër        1

Burimi: Euronews Albania