Receta Tradicionale Shqiptare Që Turistët Nuk Lënë Pa Provuar

723 0

Kulinaria shqiptare me gatimet e saj të shijshme, autentike është shndërruar në një atraksion të vërtetë turstik.

Krahas mrekullive të natyrës që ofron Shqipëria, me detin si kristal, malet e larta plot bimësi, qytetet e fshatrat e vjetra plot histori, gatimi dhe pjatat e shijshme shqiptare shoqërojnë turistët përgjatë gjithë udhëtimit të tyre.

E nëse ndalemi pikërisht tek gatimet tradicionale, është një pjatë e cila preferohet më shumë mes të gjithave. Ose kërkohet nga turistët të provohet me patjetër, si një nga shijet më të mira të traditës.

Dhurata Thanasi Daneri, e cila në restorantin e saj me gatime tradicionale “Luga e Argjendtë” mirëpret çdo ditë turistë të huaj ashtu si edhe vendas tregon për një nga pjatat më të kërkuara nga të huajt aty.

Bëhet fjalë për recetën e vjetër të paçes, një pjatë që të gjithë të huajt që vijnë në Shqipëri duan ta provojnë me patjetër.

“Paçja kryesisht është përdorur si ushqim mëngjesi nëpër mëngjesoret apo mencat e punëtoreve dhe është konsideruar si ushqim i burrave, atyre të”zamanit”, pasi ishte ushqim që të mbushte barkun.

Akoma nëpër restorante periferike apo gjelltore rruge gjen të gatuhet kjo pjatë kaq e shijshme dhe ndjellëse e kuzhinës shqiptare” shprehet Dhurata.

Më poshtë gjeni recetën përgatitjes së paces sipas traditës së vjetër shqiptare.

Përërësit

1kg mish koke
1 filxhan kafeje uthull
1 kokërr hudhër
Dafinë, kripë
3-4 lugë gjelle vaj
1 lugë gjelle miell
piper të zi sipas dëshirës
½ lugë gjelle salcë domate dje pak spec të kuq ( sipas dëshirës. Paçja në përgjithësi lihet e bardhë)

Përgatitja

Mishi i kokës pastrohet, pritet dhe vendoset në një tenxhere të mbushur plot me  ujë të ftohtë ku kemi shtuar dhe gjethe dafine.

E lemë mishin të marrë një valë dhe pastaj ulim intensitetin e flakës së sobës.

Pasi mishi merr valë, largojmë shkumën e krijuar.

Pasi mishi të ketë zjerë plotësisht, kullojme lëngun, e qerojmë mishin nga kockat dhe e presim në copa të vogla.

Në një tenxhere tjetër hedhim vajin e ullirit, shtojmë miellin e përzjejmë me lugë druri derisa të marrë ngjyrë të artë.

Shtojmë salcën, lëngun e mishit, mëpas mishin, pak spec i kuq dhe e lemë të ziejë në zjarr të ngadalshëm, dhe e rregullojmë me kripë e piper.

Për përgatitjen e salcës së hudhrave duhet patjetër kripë e trashë e cila mundëson dhe ndihmon kremëzimin e hudhrave.

E mira është që hudhrave t’u hiqet filizi i mesit dhe të rrihen në havan dhe t’u shtohet uthull. Kjo salcë shtohet sipas dëshirës me lugë mbi paçe.

Paçja shoqërohet ose me oriz pilaf ose me bukë të thekur. Luga e Argjendtë/AgroWeb.org