Pasioni i këngëtares së famshme Nertila Koka për gatimin është i njohur tashmë dhe recetat e saj janë gjithnjë të dashur për ndjekësit e AgroWeb.
Për këtë arsye po ju risjellim në vëmendje një ëmbëlsirë të gatuar nga vetë Nertila në kanalin e saj në Youtube.
Receta e kekut me karrota megjithëse ka variante të ndryshme, këngëtarja shprehet se do të gatuajë atë që bën gjithnjë në shtëpinë e saj.
Me pak përbërës, por shumë special e gjeni të shpjeguar në recetën mëposhtë.
Përbërësit
- 50-60 gr arra të shtypura
- 300 gr karrota të grira
- 200 gr sheqer
- 3 vezë
- 200 ml vaj
- 225 gr miell
- 1 lugë kafe sodë buke
- 1 lugë kafe pluhur pjekës
- Kripë
Për kremin
- 200 gr krem djathi (Philadelphia)
- 2 lugë gjelle sheqer pluhur
- 2-3 lugë gjelle limon
Përgatitja
Për të nisur këtë recetë këngëtarja ju këshillon që fillimisht të ndizni furrën në temeraturën 180 gradë C.
Më pas në një enë të thellë shtoni sheqerin bashkë me vajin dhe përziejini me një mikser apo rrahëse vezësh.
Hidhni po aty vezët një nga një duke vazhduar me përzierjen.
Në një tjetër enë të veçantë përzieni përbërësit e thatë miellin, sodën e bukës, pluhurin pjekës dhe pak kripë.
Shtojeni këtë masë tek ena ku ndodhen vezët dhe përzieni me anë të një rrahësi elektrik, derisa të formohet një masë kremoze brumi.
Hapi i rradhës është që të shtoni karrotat tek brumi dhe ti përzieni mirë me pjesën tjetër.
Brumi në fund duhet të jetë kremoz dhe jo shumë i trrashë.
Hidheni menjëherë në një tavë të shtruar me letër pjekje dhe piqeni për 40-45 minuta në temperaturë 180 gradë.
Ndërkohë përgatisni kremin që ta hidhni sipër kekut kur të jetë ftohur
Në një enë të thellë shtoni kremin e djathit, sheqerin pluhur dhe lëngun e limonit.
Përziejini mirë me lugë derisa të formohet kremi dhe lyejeni të gjithë sipërfaqen e kekut të ftohtë me këtë krem.
Sipër shtoni arrat e thërrmuara e më pas mund ta shijoni kekun tuaj në çdo moment të ditës.
Këngëtarja na siguron se është vërtetë shumë i mirë./AgroWeb.org
Lini një Përgjigje