Në një deklaratë për mediat drejtori i Organizatës Botërore të Shëndetësisë për Evropën, Dr. Hans Henri P. Kluge diskutoi rreth heqjes së kufizimeve që parandalojnë përhapjen e koronavirusit.
Sipas tij përparimi që kontinenti evropian ka bërë deri më tani është jashtëzakonisht i brishtë.
Situata e përhapjes së COVID-19 në shumë shtete të Evropës është ende shumë shqetësuese.
“Të mendosh se po afrohemi në pikën përfundimtare do të ishte e rrezikshme. Virusi nuk lë vend për gabime ose vetëkënaqësi. Çdo ndryshim në strategjinë tonë të përgjigjes, zbutjen e statusit të bllokimit ose masat fizike të distancimit kërkon konsiderim shumë të kujdesshëm”, nënvijëzoi Kluge.
Ai paralajmëroi se ndërsa numri i të vdekurve po fillonte të zbriste në vendet e goditura fort, si Italia dhe Spanja, nuk ishte ende koha për të qetësuar masat kufizuese.
Shtatë nga 10 vendet e para që janë më të prekurit nga virusi janë në Evropë. Deri sot, 687,236 njerëz në kontinent janë testuar pozitivë për Covid-19 dhe 52,824 njerëz në Evropë kanë vdekur.
Dr. Bruce Aylward, këshilltar i lartë i Drejtorit të Përgjithshëm të OBSH-së, duke u kthyer nga një udhëtim në një nga vendet më të goditura, Spanja, tha që ishte shumë herët për të folur për optimizëm, por se shpërthimi atje ishte “ngadalësuar”.
Spanja, Italia, Gjermania, Austria, Danimarka dhe Franca kanë deklaruar se po i shqyrtojnë lehtësimin e kufizimeve, me Austrinë vendin e vetëm që ka përcaktuar një datë për lehtësimet e para, pas 14 prillit./AgroWeb.org
